2 Corinthians
2 कुरिन्थियों
1
पावल,परमेस्वरको इच्सा बमोजिम येसु:ख्रिस्तको प्रेरित,कालाउ केलाइको ओने थिमोथिसो,अखैयाता कोरिन्थीता हिका, परमेस्वरको मन्डलिहेङ,कालाउ अखैयाता झाराङ सेवकगेलाइहेङ, 2 परमेस्वर केलाइको आबा कालाउ प्रभु येसु:ख्रिस्तसो नेलाइहेङ अनुग्रह कालाउ सान्ति | 3 केलाइको प्रभु येसु:ख्रिस्तको परमेस्वर आबा,कृपाको आबा,कालाउ गोताङ सान्तावानाको परमेस्वर धन्यको हि | 4 परमेस्वरसो जेसाङ सान्त्वाना केलाइ निङ्का हिनाहि,इङको सान्तावानाहेङ हिदोइबुङ दुःखता परिकालाइहेङ सान्तवाना पिलि द्वाको | 5 हाइपालिपानु जेसाङ केलाइहेङ ख्रिस्तको कस्ट हेन्जाङ जोमाङ,ओसाङ्दोङ केलाइको सान्त्वाना बुङ ख्रिस्तसो हेन्जाङ केलाइ जोमाङ | 6 कालाउ केलाइ दुःख निङ्लाबुङ इदोइ नेलाइको सान्तवाना कालाउ उदारको भाअ्सिङ जोम्का हिनाहि | केलाइ सान्तवना निङ्लाबुङ जेदोङ दुःख केलाइ भोगिन्हाखे ,इङकोङ धेर्ये दोफाङ सहिलि गोइलाउ नेलाइबुङ सान्तावानाको अनुभब पासावाना | 7 नेलाइको भाअ्सिङ केलाइको आसा बलियाका हि ,हाइपालिदोनु केलाइ गिनाखे कि,जेसाङ नेलाइ केलाइको दुःखता जोम्सुखेना, एन्साइदोङ केलाइको सान्त्वनाता बुङ नेलाइ जोम्सुवाना | 8 हाइपानु ओइ ओनेगेलाइ,एसियाता केलाइहेङ परेका दुःखको बिसयता नेलाइहेङ थाहा जेनाको दोतेङ केलाइको इच्सा हि | हाइपालिपानु केलाइ सहिलि मादोका किसिमको वथे हेन्जा साताइताका हिघाना हि,कि जिवनसो केलाइ हाइ चातेङ हिका हिघाना हि | 9 केलाइ ताइमिता माको कालाउ सिकालाइहेङ सिन्हुपाका परमेस्वरता भरोसा ताअ्का ताइमिदोङ सि:का दण्डको आग्या ताइ हुता निङ्का हिगानाखे , 10 जाइ केलाइहेङ हेन्जा बारका सि:का सो लाअ्पाका हि, कालाउ वा आरोङ बुङ केलाइहेङ लाअपावा दोअ्तेङ केलाइ वासेहेङ भरोसा पाका हिनाहि | 11 कि हेन्जाङ झनासो केलाइहेङ पिका बरदानको भाअ्सिङ केलाइको पक्स्यता हितेङ हेन्जाङ झनागेलाइ धन्यबाद प्यावा दोअ्तेङ नेलाइबुङ केलाइको पक्स्यता हितेङ केलाइ दोफा नेलाइको लिअ्ता मनसो पाका बिन्तिता साघाइ सुवाना | 12 हाइपालिपानु केलाइको घमण्ड पालि खाङ्का काथा इदोइ दोङ केलाइको लिअ्ता मनको गवाहि, सुमिङ्ता कालाउ बिसेस नेलाइ दोफा केलाइको चालचलन पबित्तरो कालाउ सत्येता हिगाहि, इङ्को ताइमनको सान्ति माको, कालाउ परमेस्वरको अनुग्रहता हिगाहि | 13 हाइपालिपानु केलाइ नेलाइहेङ आरू बुझिली मादोका काथा मालेख्याङ ,नेलाइ जे पदेसुखेना कालाउ स्विकार पासुखेना, कालाउ का आग्या पाङ्का नेलाइ दोअ्का दिना थेकापा बुङ स्विकार पासुवाना | 14 नेलाइ केलाइको काथा बुझिका हिसुना केलाइको प्रभु येसु:ख्रिस्तको दिनता नेलाइबुङ नेलाइको घमण्ड पाका काथाता जोम्सुवाना, जेसाङ नेलाइबुङ केलाइको दोङ , 15 इदोइ भरोसाता नेलाइहेङ दोहोरो फाइदा जेनाको दोअ्तेङ् का नेलाइकोता लाम्फाङ लोलि इच्सा पाघा | 16 माकेडोनिया हानिलाउ नेलाइकोता लोतेङ भेटघाट पालि कालाउ माकेडोनियासो नेलाइकोता घुरितेङ कालाउ इन्तासो यहुदिया हानिलि काङ्को पातारा नेलाइ कासेहेङ पिगिल्स्वाना दोअ्तेङ का चाहेका हिगा | 17 इदोइ खेप खाङ्लाउ हाइ साच्चिदोङ का होम्का जेङघा रो ? हाइ का ताइको योजाना बानाइलाउ संसारिक द्याङ भाइका एनोङ्दोङ नुइसो ''एइ'' कालाउ''माको''बुङ दोअ्ताङ्का रो ? 18 परमेस्वर खान्धुरि योग्य जेङ्का भाइका केलाइको बचनबुङ ''एइ;;कालाउ''माको''जेङ्का मान्थु | 19 हाइपालिपानु सिलास,तिमोथि कालाउ नेलाइको माझाता बानाल पालाउ परमेस्वरको चान येसु:ख्रिस्त ''एइ'' काकाउ ''माको'' मान्थुघाहि | कालाउ वाकोता दिनाङ ''एइ''खिनिङ हि | 20 हाइपालिपानु परमेस्वरको गोताङ प्रतिग्यागेलाइ वाकोता दिनाङ ''एइ'' हि | ओदोङ भाअ्सिङ वाकोसो परमेस्वरको महिमाको भाअ्सिङ केलाइ ''आमिन'' दोनाखे | 21 कालाउ केलाइहेङ नेलाइदोफा ख्रिस्ता बलियाका बानाइका कालाउ केलाइहेङ अभिसेक पाका परमेस्वर दोङ हि | 22 वा केलाइहेङ ताइको साप लागाइका हि,कालाउ केलाइको हृदयता बैनाको रूपता पबित्तरो आत्मा पिका हि | 23 परमेस्वर काङ्को साक्सि हि,नेलाइहेङ दण्डसो बान्चिपालि का कोरिन्थि मालोघा 24 नेलाइको खान्धुरिता र्हुता केलाइ खाबारा मापाङ्, कालाउ नेलाइको आनन्दको भाअ्सिङ नेलाइदोफा मिलितेङ काम पाङ | हाइपानु ताइको खान्धुरिता नेलाइ सिकापा हिसुखेना |