2
का नेलाइहेङ दु:ख पिलि आरोङ माल्वाङ्का दोअ्तेङ निसित पाघा | 2 हाइपालिपानु का नेलाइहेङ दु:खि बानाइघापानु का दु:खी बानाइका इङको द्-याङ बाहेक हासु कासेहेङ लेङ्चापावा बानाइयावा रो? 3 काङ्को आनन्द नेलाइ झाराङ्को भाअङसिङ दोअ्तेङ, नेलाइ झाराङ्दोफा भोरोसा ताअ्तेङ जाइ दोफा का खु:सि जेङ्लि गोइका इम्बालाइदोफा कासेङ दु:ख माज्याको दोअ्तेङ का इङ्कोदोङ काथा लेखिका हिघा | 4 हाइपालिपानु नेलाइहेङ दु:खी बानाइलिको भाअ्सिङ माको, कालाउ नेलाइदोफा हिका काङ्को गेनेगेल्का प्रेम नेलाइ गिसु दोअ्तेङ हृदयको कालाउ हेन्साजा तुका कालाउ बेदानाता हेन्जाङ मि:ति ह्यापातेङ का नेलाइहेङ लेखिका हिघाखा | 5 कालाउ हासुबुङ दु:खी बानाइका हि वा कासेङ माको, कालाउ मारफाङ थाङ्का पातेङ मादोअ्नु पानु , नेलाइ झाराको हृदय थेकापा तुपाका हि| आतुइन्सालाबुङ दु:खी बानाइका हि | 6 इन्सिकाहेङ हेन्जाङ द्याङ्गेलाइ सो पिका दण्ड थिकदोङ हि | 7 कि माकुनु उल्टाङ नेलाइ अनुग्रह पातेङ स्यामा पितेङ कालाउ समझाइलि गोइस्वाना, माकुनेते इङको द॒-याङ हेन्जा पिरता दुब्यावा |मारफाङ सोकता परेतेङ दुविहि | 8 ओदोङ भाअ्सिङ नेलाइहेङ का सेउपाखा, कि उङ्को द्-याङ दोफा ताइको प्रेम झन वाङ्खाराका बानाइसु 9 ओदोङ भाअ्सिङ का नेलाइहेङ या लेखेका हिघा, गोताङ काथाता नेलाइ आग्याकारि हिसुना कि माहिसुना इङ्को जाचिलि कालाउ खाङ्लि का भोगाखा | 10 जाइहेङ नेलाइ स्यामा पिसुखेना,का बुङ स्यामा,प्याङ्का, एदि का हासुहेङ्बुङ हिदोइबुङ काथाता स्यामा पिका हिगापानु नेलाइकोङ भाअ्सिङ ख्रिस्को आगाता स्यामा पाका हिघा , 11 कालाउ साइतान केलाइहेङ फसिपालि मानिनाको, हाइपालिपानु वाको बिगिरपालि खाङ्का बिसयता केलाइ गिका हिनाहि| 12 ख्रिस्तको ए बानालको भाअ्सिङ त्रोआसता लोलाउ प्रभुता काङ्को भाअ्सिङ एनोङ फिनु हिपिका हिघाहि | 13 कालाउ काङ्को ओने तितसहेङ इनता मादुसुलाउ कासेहेङ काङ्को मनता खु:सी माजेङ्हि, कालाउ ओबालाइसो बिदा र्हुतेङ का माकेदोनियाभारि हानिघा | 14 परमेस्वरहेङ धन्यबाद ज्याको, केलाइहेङ ख्रिस्तता जेलाउबुङ थोङ्लिको भाअ्सिङ अनुग्रह पाखे,कालाउ वाको ग्यानको मालामालाका केलाइसो गोताङ थामेता तिम्पापिखे | 15 हाइपालिपानु उदार निङ्कागेलाइ कालाउ नासाकागेलाइको माझाताबुङ केलाइको परमेस्वरको भाअ्सिङ ख्रिस्तता ता:का मालामालाका हिनाहि | 16 एमि भाअ्सिङ सि:काको न्हाम्का, कालाउ भेनेङ्को भाअ्सिङ जिवनको मालामालाका, इदोइ काथाको भाअ्सिङ हासु योग्य हि रो ? 17 हाइपालिपानु हिन्साङ द्-याङ्गेलाइ भाइपा परमेस्वरको वचनहेङ ब्यापार पाका माको | परमेस्वरदोङ दिङ्गिल्का दयाङ्को रूपता केलाइ परमेस्वरको आगाता ख्रिस्ता दोनाखे |