3
हाइ केलाइ आरोङ ताइमिङ बाखिन पालि खाङनाखे रो ? हाइ केलाइ, बोमिगेलाइहेङ गोइका भाइपा केलाइ नेलाइहेङ याते नेलाइसो भेनेङ्हेङ सिफारिस पातारा तिम्पाली गोइखे रो ? 2 नेलाइदोङ केलाइको सिफारिस पातारा, जाइ झाराङ द्-याङ्गेलाइसो नाल्का कालाउ पदेलि दो:का कालाउ नेलाइको हृदयता लेखिन्हाका हि | 3 नेलाइदोङ तिम्पासुखेना हाइपालिपानु नेलाइ ख्रिस्तको पातारागेलाइ, कालाउ केलाइको सेवाको फलपाकल इङ्को पातारा मसिहेङ माको, सिन्हुका परमेस्वरको आत्माहोइ सो लेखिका हि, उन्थुइको पातिता माको, कालाउ बिहा हृदयको पातिता | 4 ख्रिस्टसो परमेस्वरता केलाको इसिकाङ भरोसा हि | 5 हिदोइबुङ काथा केलाइसो लोका हि दोअ्तेङ दाबि पालि केलाइ योग्य मान्थुनाहि, कालाउ केलाइको योग्यता परमेस्वर सो लोखे | 6 नावा क़रारको चात्यागेलाइ केलाइहेङ योग्यको बानाइहि, लिखेका अक्स्यरता माको, पबित्तरो आत्माता| हाइपालिपानु लिखिका अक्स्यरते सेअ्खे, कालाउ पबित्तरो आत्माते जिवन पिखे | 7 सि:का चुमाका व्यवस्थाको अक्स्यरगेलाइ उन्थुइता लिखेका हिगाहि, इङ्को व्यवस्था एसापा महिमामय जेन्तेङ लोहि, इङ्को फैसलामका तिन्तेङ इसारा इस्रएलीगेलाइ मोसोको र्-र्हइ खाङ्लि मादोहि, इङ्को फाइसालामका आतु-तुन्पा रामतेङ हानिदोङ्घाहि | 8 पबित्तरो आत्माको सेवा हेसापातेङ आरोङ हिन्सा महिमामय माज्यावा रो ? 9 हाइपालिपानु दोसिलि तिम्पिका व्यवस्था महिमामय हिघाहि पानु, धर्मि बानाइका सेवा हिन्साङ इस्तु महिमामय जेनावा| 10 हाइपालिपानु जाएअ्खेप महिमामय हिघाहि, एला जितिका महिमाहोइ इङ्को महिमामय मन्थुहि | 11 हाइपालिपानु जाइ माअ्तेङ हानिहि इङ्को महिमा लोका हिघाहि | इङ्को सेवा पानु ज्याइ हेला-लाउबुङ ह्यवा इङ्को झन बिसाल महिमा जेङ्धावा | 12 ओदोङ भाअ्सिङ केलाइको इसिका आसा हिघाहि केलाइ एकदमै साहसि जेङ्घा हिनाहि | 13 केलाइ मोसा भाइकाङ माको,जाइ वाको उराइतेङ हानेका महिमाको दो:का झलक इस्राएलिगेलाइ मातिनाको दोअ्तेङ ताइको र्हाइता नोसोइ ठुम्घाहि | 14 तर ओबालाइको मन राङ्का(थाङ्का) जेङ्का हिघाहि,हाइपानु नानिको दिना थेकापासोङ पुरना करार पदेलाउ इङ्को नोसोइ कालाउ मातोलिनाखे,जेदोङ नोसोइ ख्रिस्तसो खिनिङ तोलिहिप्याङ | 15 एला थेकापा बुङ मोसाको किताब पदेलाउ नेलाइको मनता नोसोइ थुमन्हाका हिदोङ हि | 16 जेलाउ द्-याङ्गेलाइ प्रभुता घुरियावा कालाउ खिनिङ इङ्को नोसोइ तोलीन्हावा | 17 प्रभुते आत्मा, जेदोङ थामेता प्रभुको आत्मा ह्यवा इन्ता स्वतनत्तरो जेनावा | 18 केलाइ झाराङ्को थुम्न्हाका र्-र्हाइ मानथु, केलाइ झाराङ प्रभुको महिमा तिम्पानाखे, केलाइ वा भाइपाङ परिवरतन जेङ्दोङ्नाखे |इदोइ परिवरतनहोइ झन- झन महिमा चुमाखे,जाइ आत्माहि |