16
एला सेवकगेलाइको भाअ्सिङ भेतिको बिसयता गलातिको मण्डलिगेलाइहेङ का पिका आदेस आन्सारको नेलाइ पासु: 2 आथार किपाङ्को लाङ दिना नेलाइ झाराङ ता-ताइको कमाइ आन्सारको आधे धनसम्पति खेङ्तेङ जोम्पाकाताङ तासु,कालाउ का लोलाउ भेति ल्होपालि मागोयाको | 3 कालाउ का |लोलि दोतेङ नेलाइको मनपाका द्याङ्गेलाइ परिचय पातारा पितेङ नेलाइको भेति चुमतेङ येरुसलेम दिङ्गिलाङ्का | 4 एदि काबुङ हानिलि थिक लागिहि पानु, इम्बालाइ का दोफाङ हानावा | 5 का माकेडोनियाको काम दोतेङ नेलाइहेङ भेतिलि ल्वाङ्का, हाइपालि दोनु का माकेडोनियापाहासोङ हानितेङ ह्याङ्का | 6 जेङ्लि दोअ् का नेलाइकोता कोमा दिना थेकापा ह्याङ्का, चुनदिन्ता बुङ ह्याङ्का | कालाउ न्हुसो का हिसो हानिलाउ बुङ नेलाइ काङ्को पाक पाका गोताङ कामगेलाइ मिलिपालि दोअ्सु धोवाना | 7 नानेबारे नेलाइ दोफा एघुरिङ खिनिङ बुङ माभेत्तिनु, प्रभुको इच्सा जेङ्हेपानु,कोमा समयको भाअ्सि हिलि आसा का ताअ्ता हिघा | 8 कालाउ पेन्तिकोसको पारभा थेकापा का एफिसता ह्याङ्का | , 9 हाइपालिपानु रेम्का काम पालि एनोङ बारका फिनु काङ्को भाअ्सिङ हिपिका हि ,कालाउ बिरोध पाकालाइ हेन्जाङ हि | 10 एदि तिमोथि नेलाइकोता लोलाउ वासेहेङ नेलाइ दोफा हाइमापासिङ हिलि पिसु |हाइपालिपानु वाबुङ का भाइपाङ प्रभुको काम पातेङ हि | 11 ओदोङ भाअ्सिङ हासुबुङ वासेहेङ हेला मापाको |भुरु सान्तिसो वासेहेङ ताइको हानिका थामेता दिङ्गिल्सु, कालाउ वा काङ्कोता ल्वाको | हाइपालिपानु ओनेगेलाइ दोफा लावा दोअ्तेङ का वासेहेङ र्हुमाङ्का | 12 एला अपोल्सोस ओनेको बिसयता कासेहेङ इदोइ दोअ्लि हि,का वासिहेङ बो ओनेगेलाइ दोफा मिलितेङ ओबालाइदोफा भेतघात पालि निकोङ सेउपाघा,कालाउ एला लोलि वासिहेङ इस्सा दोङ माझेङ हि | कालाउ मौका निङ्नासाङ वा ल्वाङ | 13 होसियार हिसु खान्धुरिता बलियाका जेङ्तेङ हिसु | आटिलो कालाउ साहासि जेङ्सु | 14 जेदोङ पासुखेना इङ्को गोताङ प्रेमता पाका ह्याको | 15 दाइ ओनेगेलाइ कालाउ बाइ आनाउगेलाइ नेलाइहेङ थाहा दोङ हि कि स्टिफनसको साको अखैयाता खान्धुरि पाकालाइता लाङ हिघाहि | इम्बालाइ सेबकगेलाइको सेवाता ताइमिहेङ अर्पन पाका हि | 16 इन्सिकालाइ कालाउ इन्सिकाङ परिस्रम पाका गोताङ सनाइतिगेलाइको खाबाराता हिसु दोअ्तेङ नेलाइहेङ का सेउपाखा | 17 स्टिफनस,फरतुनाट्स कालाउ आखैकसको आगमनता का आनन्दित हिघाखा,हाइपालिदोनु इम्बालाइको मालोकाता ओबालाइ पुरा पापिहि | 18 हाइपालिदोनु इम्बालाइ काङ्को कालाउ नेलाइको आत्माहेङ बुङ हाउसाइपाहि कालाउ इस्का द्याङ्गेलाइको कदर पासु | 19 एसियाको मण्डलिगेलाइ नेलाइहेङ सेउपाका पिगिल्काहि | अकिलास कालाउ प्रिस्किला कालाउ इम्बालाइको साता हिका मण्डलि प्रभुता नेलाइहेङ हार्दिक अभिबादन पिगिल्काहि | 20 गोताङ ओनेगेला नेलाइहेङ अभिबादन पिगिल्काहि | एमिसो भेनेङ हेङ पबित्तर चुमाइ होइ सेउपासु | 21 का पावल,ताइकोङ खुर होइ इदोइ अभिबादन लेखिदोङ्खा | 22 हसुबुङ प्रभुहेङ प्रेम मापाखेपानु उङ्को स्रापित ज्याको | हे केलाइको प्रभु,लोउ | 23 प्रभु येसु:ख्रिस्तको अनुग्रह नेलाइ दोफा ह्याको | 24 ख्रिस्त येसु:ता काङ्को प्रेम नेलाइ झाराङ दोफा ह्याको | आमिन |