Romans
रोमियों
1
येसु: ख्रिस्तको बान्धाइति पावलसो, परमेस्वर कासिहेङ एलोङ प्रेरित दोअ्तेङ काइहि कालाउ झाराङ द्याङ्गेलाइहेङ ये:बानाल हिङ्पालि कासेहेङ साल्हि | 2 परमेस्वर हेन्जा बासार लाम्फा दोङ ताइको अगमबक्तागेलाइसो वाको द्याङ्गेलाइहेङ ये:बानाल हिङ्पालिको भाअ्सिङ दोअ्तेङ प्रतिग्या पाका हिघाहि | इङको बचन धर्म सास्तरता लेखेका हि | 3 ये:बानाल दोअ्का दोङ केलाइको प्रभु येसु; ख्रिस्त,परमेस्वरको चानको बारेता दोअ्पिलि जाइ जोलोम जिउ आन्सार दाउदको हारा गुटियासो जेङ्का हिघाहि || 4 एलोङ द्याङ्को रुपता वा दाउदको जाहानता जेलोम जेङ्का हिघाहि, वा पबित्तरो आत्मासो येसु:हेङ परमेस्वरको चान दोअ्तेङ तिङ्पाहि | वासेहेङ माहान सरबुङ्होइ सिकासो सिन्चाल पाहि | 5 वाको मिङ्को खातिर परमेस्वर कासेहेङ प्रेरितको ख़ास काम सोम्पिहि,परमेस्वर इदोइ काम सारा सारभिगेलाइको जातिगेलाइहेङ प्रभुता चुमालि कालाउ आग्या पालन खान्धुरिसो बानाइलि वाको काथा मानिलि दोअ्तेङ सोम्पिहि इदोइ का येसु:को भा्सिङ पाखा | 6 कालाउ रोमता हिका द्याङ्गेलाइहेङ बुङ येसु:ख्रिस्तकोङ जाहान जेङ्लि दोअ्तेङ काइहि | 7 रोमिता हिका नेलाइ झाराङ परमेस्वरको पबित्त्तरो द्याङ्गेलाइ दोअ्तेङ ,कालाउ वाको सेवक जेङ्लि काइका हिनाहि | नेलाइहेङ केलाइको आबा परमेस्वरसो कालाउ प्रभु येसु: ख्रिस्तको अनुग्रह कालाउ सान्ति | 8 झाराङ खान्तेङ लाम्फा नेलाइ झाराङ्को भाअ्सिङ येसु:ख्रिस्त पाहासो काङ्को परमेस्वरहेङ का धन्यबाद प्रकट पाखा, हाइपालिपानु सुमिङ्ता द्यापाहाङ द्याङ्गेलाइ नेलाइको खान्धुरिको बिसयता बाखिन पातेङ हि | 9 का गोताङ हृदयसो वाको चानको ये:बानालता बानाल पालि वाको सेवा पाखा ,कालाउ काङ्को साचि हि कि | का हेसा लागातार काङ्को दोमचाकाइता कालाउ दिनाङ नेलाइहेङ फोमपाखा , प्रभुहेङ इदोइ सत्ये थाहा हि | 10 कालाउ का इदोइ र्हेखा कि हिदोइबुङ किसिम परमेस्वरको इच्सापाहासो आखिरता का नेलाइकोता लोलि सफल जेङ्लि द्वाको | परमेस्वर इच्छा पाहे पानु खिनिङ इदोइ गोताङ जेनावा | 11 का नेलाइहेङ खाङ्लि एकदम किघा,का नेलाइहेङ हिदोइबुङ आत्मिक उपहार पिलि भोखा ओदोङ्होइ नेलाइहेङ बलियाका बानायावा | 12 काङ्को दोअ्लि खाङ्का हाइपानु केलाइ झाराङ खान्धुरिहोइ एमिसो भेनेङ्हेङ हाउसाइपाको | नेलाइ खान्धुरिहोइ कासेहेङ साघाइसुखेना कालाउ काङ्को खान्धुरिहोइ नेलाइ हेङ साघाइखे | 13 दाइ-ओनेगेलाइ कालाउ बाइ-बेजान ओनेगेलाइ,नेलाइ गिसु कि का हेन्जाङ खेप नेलाइकोता लोलि योजाना पाघा | का नेलाइकोता लोलि भोघाखा ताकि नेलाइहेङ आत्मिक काथासो साघाइ थुकापालि द्वाको | का नेलाइहेङ भेनेङ गैर-यहुदिगेलाइ भाइपाङ सहयोग पालि किखा | 14 चाहे कासेहेङ लागिखे कि का झाराङ द्याङगेलाइको सेवा पालि गोइका हि: ग्रिकगेलाइ,गैर-ग्रिकगेलाइ ग्यानि ,कालाउ हाइदोङ मागिका द्याङ्गेलाइको | 15 ओदोङ भाअ्सिङ का दोअ् मादोअ्पा रोमता हिकालाइहेङ बुङ ये:बानाल, बानाल पालि मन हि | 16 का ये:बानाल दोफा मालेदेरयाङ्का भरु बाखिन पाङ्का , हाइपालिपानु ये:बानाल खान्धुरि पाका झाराङ्को मुक्तिको भाअ्सिङ इदोइ परमेस्वरको सरबुङ हि, जेदोङ परमेस्वर प्रयोग पाखे | लाम्फा यहुदिगेलाइको कालाउ गैर-यहुदिगेलाइ भाअ्सिङबुङ | 17 ये:बानालहोइ द्याङ्गेलाइहेङ वाकोदोफा धार्मिक जेङ्लि काथा तिङ्पाका हि | परमेस्वरको दामाहोइ द्याङ्गेलाइहेङ लाम्फासो न्हुसो थिकापा खान्धुरिसो धार्मिकता भारि चुम्पुखे | जिसिका धर्मसास्तरता दोअ्का हि,''जेदोङ धर्मिचाहि खान्धुरिसो दोङ बान्च्यावा |'' 18 परमेस्वरको चेर स्वर्गसो प्रकट जेङ्हि , हाइपालिपानु द्याङगे्लाइ वाको बिरुद्ता दुस्त कालाउ मारेम्का कामगेलाइ पाहि | इम्बालाइदोफा सत्ये हि,कालाउबुङ उङ्को सत्ये ओबालाइको दुस्त कामहोइ म्होपिका हि | 19 परमेस्वर ताइको चेर तिमपाहि,हाइपालिपानु वाको बारेता गिलि गोइका गोताङ काथा परमेस्वर प्रस्त दोअ्पिलि दोअ्होइ | 20 परमेस्वरको बिसयता हेन्जा काथागेलाइ हि,जेदोङ द्याङ्गेलाइ तिङ्लि माअ्दोखे वाकोङ अनन्तको सरबुङ कालाउ भेनेङ आमेनेगेलाइ जाइ वासेहेङ परमेस्वर दोअ्तेङ नाल्पाखे | कालाउ सुमिङ्को सुरुसोङ दोङ इङ्को गोताङ आमेनेगेलाइ गिलि द्याङगेलाइहेङ सजिलो हि | इङ्को आमेनेगेलाइ प्रस्त हि जेदोङ परमेस्वर बानाइका हिघाहि | ओदोङ भाअ्सिङ इङको गोताङ द्याङ्गेलाइ ताइमि पाका मारेमका कामगेलाइसो परमेस्वरसो खाअ्लि माद्वाङ | 21 द्याङ्गेलाइ परमेस्वरहेङ नाल्हि, कालाउबुङ इम्बालाइ वासेहेङ परमेस्वरको रूपता महिमा मापाहि, नाते धन्यबाददोङ पिहि | कालाउ द्याङ्गेलाइको बिचारगेलाइ बेकारको जेङ्हि कालाउ कितिकितिकाहोइ इम्बालाइको हाइदोङ मागिका बुदिृहेङ थुम्पिहि | 22 द्याङ्गेलाइ ताइमिहेङ ग्यानि बुद्दिमानि दोअ्तेङ दाबि पाहि, कालाउबुङ इम्बालाइ हाइदोङ मागिहि ( मुर्ख जेङ्हि )| 23 इम्बालाइ परमेस्वरको महिमा पालि लाअ्हि जेदोङ अनन्त हि ,कालाउबुङ परमेस्वरको महिमाहेङ संसारिक आमेने भाङ्पा तिम्पा मुर्ति पुजा दोफा सातेहि | द्याङ्गेलाइ परमेस्वरको महिमाहेङ जिहाजुरलेङ,गुपुसगेलाइ कालाउ पुय्याँगेलाइ भाइका तिङ्का बानाइका मुर्ति पुजा दोफा सातिहि | 24 द्याङ्गेलाइ पापहोइ पोइघाका हि,नेलाइ दुस्त कामगेलाइ पालि भोसुखेना | ओदोङ भाअ्सिङ परमेस्वर नेलाइहेङ पापपुर्ना जिवनताङ बान्चियाको दोअ्तेङ लाअ्पिहि | ओदोङ भाअ्सिङ इम्बालाइ एमिसो भेनेङ्ता ताइको जिउगेलाइको ख्याल मापासिङ कासिबिरि पाहि | 25 इङ्को द्याङ्गेलाइ परमेस्वरको सत्येहेङ धाताइकागेलाइ दोफा सोअ्तेङ अनन्तको परमेस्वरहेङ लाअ्हि | परमेस्वरको सिरजाइका इङ्को आमेनेगेलाइ पुजिलि कालाउ सेवा पालि तेङ्हि | 26 द्याङ्गेलाइ इन्सिकाङ कामगेलाइ पानाङ परमेस्वर इम्बालाइहेङ लेदेरखुदेरका कामबासाना पालि लाअ्पिहि जेदोङ इम्बालाइ पालि चाहिघाखे | बेजान गेलाइ वाजनगेलाइ दोफा जिम्लि लाअ्तेङ बेजान -बेजान दोफाङ दोङ जिम्लि तेङ्हि | 27 एन्साङ वाबाल द्याङगेलाइ बुङ बेजान दोफा जिम्लि लाअ्तेङ आरु वाबाल द्याङ्गेलाइ दोफा जिम्लि तेङ्हि | इम्बालाइ ता-ताइमिता लेदेरका कामगेलाइ पाहि | कालाउ नेलाइ मारेम्का पाकानाङ इम्बालाइको जिउ कस्त निङ्हि | 28 परमेस्वरको सत्ये ग्यान ताअ्लि गोयाङ दोअ्का काथाहेङ द्याङ्गेलाइ महत्व मापिहि | कालाउ द्याङ्गेलाइ मापालि गोइका काम पाहि ओदोङ भाअ्सिङ बेक्कारको कामगेलाइ पाको दोअ्तेङ परमेस्वर लाअ्पिहि | 29 नेलाइको मन गोताङ खाल्को पाप,दुस्त,ताइको रेम्का खाङ्का कालाउ मन्दामाताका होइ पोङ्घाहि, दि:का | इङ्को द्याङ्गेलाइ ताइमिताङ डाह,से:का बिचार,चेरसुका,धाताइका कालाउ एमिसो भेनेङ्हेङ मारेम्का काथा दोअ्का , काथा भानाइका हिखे | 30 इम्बालाइ ता-ताइमिता मारेम्का काथागेलाइ पाखे,इम्बालाइ परमेस्वरहेङ मन्दामाताअ्खे | इम्बालाइ मिङ जोल्का,अहंकार,अभिमानि, दुस्त, इम्बालाइ मारेम्का कामगेलाइ पालि नावा दामागेलाइ भोगिल्खे | इम्बालाइताइको आबा-आमाइ हेङ्बुङ मासाखे | 31 इम्बालाइ हाइदोङ मागिखे(मुर्ख) कालाउ इम्बालाइ ताइको भाकलगेलाइ पुरा मापाखे | कालाउ हासुहेङ्बुङ दाया मातिङ्पाखे |बिस्वासघाति, क्रुर,निर्दय, हिखे | 32 इम्बालाइ परमेस्वरको धार्मिक बिधान गिखे , इन्सिकाङ द्याङ्गेलाइ सि:लि गोयाङ दोअ्का परमेस्वरको नियम इम्बालाइ गिखे | कालाउबुङ इम्बालाइ इङ्को गल्ति कामगेलाइ पातेङ हिखे,कालाउ आरुगेलाइ एन्सा पाकाबुङ थिकोइ थानिहि |