प्रेरितों के काम 28

जेलाउ केलाइ रेम्फाङ जाहाजसो लेता खुअ्नाहि,कालाउ याबुङ गिनाहि, कि या टापुहेङ माल्टा दोअ्खे | 2 इन्ता वाइ लोका हिघाहि कालाउ मेनाङ चुङ्का हिघाहि,कालाउ इन्ताको रैथाने द्याङ्गेलाइ केलाइदोफा सानाइति भाइपाङ हि: | इम्बालाइ केलाइको भाअ्सिङ मे धोपिहि कालाउ केलाइ झाराङ्हेङ नेउता पिहि | 3 पावल मिसिङ्को पोङ्नाका योमफ़ोरोइगेलाइ जोम्पातेङ मेता जुहि | मे धाङकानाङ एलोङ बिसहिका पुय्या बाहार लोहि कालाउ पावलको खुरता चोहि | 4 इन्ता योम्कालाइ पावलको खुरता पुय्या तोइनातेङ हिका तिङ्तेङ इम्बालाइ दोअ्हि,यिदोइ द्याङ्ते द्याङ से:का हिलि गोयाङ (हत्यारा) | वा चिताते मासिहि,कालाउबुङ न्याय वासेहेङ बान्चिलि मापिहि |'' 5 कालाउ पावल खुर हेङ्गालाइतेङ कालाउ पुय्याहेङ मेता ह्वापिहि, पावलहेङ आतुइसाबुङ हाइदोङ माजेङ्हि | 6 द्याङ्गेलाइ सोचिहिकि पावल एला इमावा,माकुनु एक्कासि लोङ्तेङ स्यावा, इम्बालाइ निकोङ बेर थेकापा पावलहेङ खाङ्हि कालाउ स्यावा दोअ्तेङ र्हुमतेङ हि कालाउबुङ इन्सिका हाइदोङ मारेम्का घाताना माघतेहि, कालाउ ओदोङ भाअ्सिङ पावलप्रतिको ताइको दोअ्का धाराना द्याङ्गेलाइ बदलिहि | इम्बालाइ दोअ्हि,''वाते परमेस्वरदोङ हि |'' 7 इनता भेर-भेरपा आधे मिलिङ हिघाहि, इन्ता तापुको एलोङ प्रमुख द्याङ हिघाहि वाको मिङ पब्लियस हिघाहि | भेरपाङ वाको मिलिङ्गेलाइ हिघाहि | वा केलाइहेङ वाको सा ता लोलि काइहि,कालाउ वा केलाइ दोफा रेम्का व्यवहार पाहि,केलाइ वाको साता सुम्नि थेकापा बासा हिनाहि | 8 पब्लियसको आबा मासाधिका हिघाहि,वाहेङ मिसा लोका हिघाहि कालाउ हिति मासि जेङ्तेङ चोखो लोङ्का हिघाहि | कालाउ पावल वाकोता हानिहि कालाउ दोमचाकाइपिहि, दोमचाकाइतेङ न्हुसो वा ताइको खुरगेलाइ वाको हुता ताअ्पिहि कालाउ एल्पाहि | 9 इसिका घाताना तिङ्तेङ इङ्को तापुको गोताङ मासाधिकागेलाइ पावलकोता लोहि | पावल इम्बालाइहेङ बुङ एल्पापिहि |'' 10 इङ्को तापुको द्याङ्गेलाइ केलाइहेङ हेन्जाङ सम्मान पाहि केलाइ इन्ता सुम माहिना थिकापा हिनाहि | 11 जेलाउ केलाइ हानिलि तियार जेङ्नाहि,कालाउ इन्ताको द्याङ्गेलाइ केलाइहेङ गोइका आनेमानेगेलाइ पिहि | केलाइ अलेक्जेड्रियासो जाहाजाता धोल्नाहि | जाहाजको आगाभारि जमल्याहा दिरगेलाइको चिन्ह हिघाहि | 12 केलाइ सिराक्युस सहरता थुकानाहि, इन्ता केलाइ सुमदिना थिकापा हिनाहि कालाउ न्हुसो इन्तासो हानिनाहि | 13 केलाइ रेगियास सहरता थुकालि लोनाहि, भेनेङ दिना माहेसो नुहेसो भेर्मा दलाइलि तेङ्हि,कालाउ केलाइ हानिलि दोनाहि | एनि न्हुसो केलाइ पतिओलि सहरता थुकालि लोनाहि | 14 केलाइ इन्ता आधिमि दादा-ओनेगेलाइ निङ्नाहि, एम्बालाइ केलाइहेङ इन्ता ए आथार थेकापा हिलि सेउपाहि, न्हुसो रोम थुकालि लोनाहि | 15 इन्ताको खान्धुराइगेलाइ थुकालिलोका थाहा गिहि,इबालाइ केलाइहेङ भेतिलि अप्पियसको हाते कालाउ सुम धर्मसाला दोअ्का थामेता लोहि | जेलाउ पावल इम्बालाइहेङ तिङ्हि परमेस्वरहेङ धन्यबाद पिहि कालाउ वा साहासि जेङ्हि 16 कालाउ न्हुसो केलाइ रोमता हानिनाहि, पावलहेङ रोमता एक्लाङ हिलिपहि, कालाउ वाको सुरुक्स्याको भाअ्सिङ एमि सिपाइ हि | 17 सुम्निको दिना न्हुसो पावल इन्ताको मुख्य-मुख्य यहुदिगेलाइहेङ काइलि दिङ्गिल्हि, जेलाउ इम्बालाइ एदोफाङ लोहि,पावल दोअ्हि,''काङ्को यहुदि दाइ-ओनेगेलाइ ! का केलाइको द्याङ्गेलाइको बिरुदता हाइदोङ पाका मान्थुघा | नाते तेअ्का काङ्को आजाइ-आजुगेलाइको रीतिवाजको बिरुदद दोङ पाका हिघा | कालाउबुङ कासेहेङ यरुसलेमता रिम्पाइहि कालाउ रोमि सरकारहेङ सोम्पि पिपाहि | 18 रोमिगेलाइ पावलहेङ हिन्जाङ प्रस्नगेलाइ पाहि, कालाउबुङ इम्बालाइ कासेहेङ से:का दण्ड (मृत्यु दण्ड) पिका कारन हिदोइबुङ मानिङ्हि | एसापा इम्बालाइ कासेहेङ स्वतन्त्तर पिलि खाङ्घा | 19 कालाउ यहुदिगेलाइ बिरोध पाहि, सिजरको आगाता जाचिपालि कासेहेङ रोम दिङ्गिल्लाको दोअ्तेङ का दोअ्लि गोइघा | कालाउ का काङ्को ताइको द्याङ्गेलाइको बिरुदता हाइदोङ आपति पालि मान्थु | 20 इदोङ कारन नेलाइदोफा भेतिलि कालाउ नुइ धुइलि चाहिखा, का या साङ्गालाहोइ धेउनाका हिघा हाइपालि पानु इस्राएलको आसाता का खान्धुरि पाखा|'' 21 यहुदिगेलाइ पावलहेङ उतरा पिहि,''केलाइ ताइको बिसयता यहुदियासो हिदोइबुङ पातारागेलाइ निङ्का मान्थुनाहि | ना ते केलाइकोङ हिदोइबुङ यहुदि दाइ-ओनेगेलाइ जाइ यहुदियासो लोहि आधे खबरगेलाइ चुमाहि नाते नाङ्को बिसयता हाइदोङ खाराब दोअ्हि | 22 केलाइ नाङ्को बिचारगेलाइ हिङ्लि भोअ्नाखे केलाइ गिनाखे कि इदोइ दलको बिसयता द्याङ्गेलाइ द्यापाहाङ मारेका खिनिङ दोअ्तेङ हि |'' 23 पावल कालाउ यहुदिगेलाइ वाको भासिङ एलोङ दिना साल्हि इङ्को दिना हेन्जा झना यहुदिगेलाइ पावलहेङ साता भेतिहि | लिपाङ पावल इम्बालाइदोफा बातमारितेङ हि,पावल परमेस्वरको राज्यको बिसयता इम्बालाइहेङ बयाख्या पातेङ हिङ्पाहि | पावल मोसाको ब्याबस्था कालाउ अगमबक्तागेलाइको लेखेका काथागेलाइको प्रयोग पातेङ येसु:को बिसयता इम्बालाइहेङ खान्धुरि पापालि भोघाखे | 24 हेथेते वाको काथागेलाइता खान्धुरि पाहि कालाउ हेथेते मापाहि | 25 इम्बालाइकोत गालाबाजि जेङ्हि, यहुदीगेलाइ हानिलि तोम्का हिघाहि कालाउबुङ पावल झन इम्बालाइहेङ एलोङ काथा दोअ्हि,''पबित्त्तरो आत्मा यसैया अगमब्क्ताको माध्यमसो नाङ्को आजाइ- आजुगेलाइको बिसय सत्ये हि दोअ्हि, 26 '' उङ्को द्याङ्हिका भारि हाने कालाउ, इम्बालाइहेङ दोअ्: हिङ्नुते हिङ्सुखेना नेलाइ,कालाउबुङ नेलाइ मागिसुखेना नेलाइ खाङनुते खाङ्सुखेना कालाउ तिङ्सुखेना कालाउबुङ नेलाइ जेदोङ तिङ्सुखेना माबुझिस्वाना 27 एइ, यिदोइ द्याङ गेलाइको मन बन्द हि एला यिदोइ द्याङ्गेलाइको न्हातोङ्गेलाइ हि कालाउबुङ इम्बालाइ माहिङ्खे कालाउ इङ्को द्याङ्गेलाइ सत्ये खाङ्लि माकिखे | इसिका जेङ्का हि,ओदोङ भाअ्सिङ इम्बालाइ ताइको मिसियाहोइ मातिनाङ ताइको न्हतोङ्होइ माहिनाङ, ताइको मनहोइ माबुझ्याङ | इसिका जेङ्का हि ओदोङ भाअ्सिङ इम्बालाइ का भारि माधुरियाङ इम्बालाइहेङ एल्पालि | 28 का चाहिखा कि ना यहुदिगेलाइ गिसु कि परमेस्वर गैर-यहुदिगेलाइको भाअ्सिङ मुक्ति पिगिल्का हि, इम्बालाइ हिनावा | 29 कालाउ वा इदोइ बचन दोअ्लि दोअ्तेङ,यहुदिगेलाइ ताइ-ताइमिता हेन्जा बाद-बिबाद पाकाताङ बिदा जेङ्हि | 30 पावल पुरा न्हे बासार ताइको भाडाको साता हि, वा झाराङ द्याङ्गेलाइहेङ स्वागत पाहि ज्याइ वाकोता भेतिलि लोहि | 31 पावल परमेस्वरको राज्यको बिसयता बानाल पाहि, वा प्रभु येसु:ख्रिस्तको बिसयता दोअ्हि | वा एकदम निर्भय हिघाहि कालाउ हासुबुङ वासेहेङ नुइ धुइलि रोकिलि मादोअ्हि |'