प्रेरितों के काम 27

या निस्चय पाका हिघाखे कि केलाइ समुन्द्रपाहासो इटालि हानिङ्दोङ्घानाखे | एमि लान्ठा अधिकारि जुलियस,पावल कालाउ आरुबुङ कैदिगेलाइहेङ पाले पितेङ ताका हिघाखे | जुलियस सम्राटको पलटन हिघाहि, 2 केलाइ एड्रमितियमसो लोका एसियाको भेनाङ-भेनेङ थामे पाहासो जेङ्तेङ हानेका तोम्का जाहाजता दोलन्हाहि | केलाइदोफा अरिस्ताखर्स हिघाहि | वा म्यासिदोनियाता थिस्लोनिकाको एमि नागरिक हिघाहि | 3 भेनेङ दिना केलाइ सायडन सहर लोअ्न्हाहि, जुलियस पावलहेङ रेम्का व्यवहार पाहि | वा पावलहेङ ताइको सानाइतिगेलाइदोफा भेतिलिपालि पिहि,कालाउ इम्बालाइ पावलको आवस्यकताहेङ खाम्पिसु | 4 केलाइ सायडन सहर लाअ्न्हाहि कालाउ साइप्रस टापुको भेरपा पातेङ हानिनाहि हाइपालिपानु भेरमा केलाइको भेनाङ पासो लोहि | 5 केलाइ सिलिसिया कालाउ प्याम्फिलिया तटपातेङ् समुन्द्र पार पान्हाहि , इन्तासो केलाइ लाइसियाको माइराता लोन्हाहि | 6 माइराता इङ्को लान्ठा अधिकारि आलेकजान्द्रियारियाको जहाज लिङ्हि जेदोङ इटालि हानिदोङघाखे | ओदोङ् भाअ्सि् वा केलाइहेङ इङ्को जाहाजाता तापुहि | 7 केलाइ समुन्द्रपाहासो पाक पातेङ हेङ्जा दिनाथेकापा आलो-ओपा हानिकाताङ हिनाहि हाइपालिपानु भेर्मा केलाइको दामाको हानिका पाहासो लोघाखे कालाउ स्नाइडस दोका ठामेता एकदम मुस्किलसो थुन्हाहि | इङ्को प्रकारसो केलाइ हेङ्जाङ दुरे हानेलि मादोन्हाहि ओदोङ भाअ्सिङ केलाइ सलमोन भेर्पा क्रेट टापुको माहेभारि हानेन्हाहि | 8 एकदम मुस्किलसो केलाइ झोराको काम्बे पातेङ्सा हानेन्हाहि , इन्तासो केलाइ सुबिधासोङ बन्दरगाह दोका थामेता लोन्हाहि | लसिया दोका सहर इन्तासो भेरपाङ हिघाहि | 9 कालाउ केलाइ हेङ्जाङ समय नासा पाका हिनाखे इङ्को समुन्द्र पाहा हानेलि एकदम थिलिगोइगोइका हिघाहि हाइपानु यहुदिगेलाइको उपबासको दिना दोलि दोफा हिघाहि, अदोङ भाअ्सिङ पावल इम्बालाइहेङ,साबधान पातेङ कालाउ दोअ्हि, 10 'खाङ्सु द्याङ्गेलाइ,का तिङ्खा केलाइको हानेका काम आपतजनक जेनावा, कालाउ इन्ना जहाजको सामान खेनिङ माको केलाइको ज्यानबुङ नासातावा | 11 कालाउ जाहाजको कप्तान कालाउ मालिक पावलको काथा मासाहि, ओदोङ भाअ्सिङ लान्ठा आधिकारि पावलको दोअ्का मासाहि | भरू इम्बालाइ मालिक कालाउ कप्तानगेलाइको दोअ्का साहि | 12 कालाउ सुरसित बन्दरगाहाता चुङ्दिङ्को बेलाता जाहाज ता:लि हिसोबुङ रेम्का ठामे मान्थुघाहि | एसापाङ हेङ्जाङ द्याङ्गेलाइ जाहाज इन्ता माताअ्लि निर्नय पाहि | द्याङ्गेलाइ फोनिक्स हानेलि द्वाङ दोका आसा पाहि, चुङ्दिङ्को बेलाता जाहाज इन्ता रोकिलि वा ताअ्लि दोधावा | फोनिक्स एनोङ माहे दिहे कालाउ दाहे दिहे घुरेका क्रेट टापुको सहर हिघाहि | 13 इन्तासो,सिरि-सिरिका भेर्मा माहेसो लोहि, जाहाजको द्याङ्गेलाइ दोअ्हि,''एसाङ भेर्माको आसा पाका हिघानाखे एला केलाइहेङ ओसाङ जेङ्हि '' ओदोङ भाअ्सिङ इम्बालालाइ लङ्रर तान्हि | जाहाजहेङ क्रेटको काम्बे, काम्बेपातेङ चुम्पुहि | 14 कालाउ इङ्को समयता दुम भेरमा ''दाहे नुहे ''इङ्को टापु पारातेङ लोहि | 15 इङ्को भेर्मा जाहाजहेङ ताइको दामाभारि चुम्पुका कारन्सो केलाइ इङ्को बिपरित हानेलि मादोअ्हि ,एसाङ केलाइ जाहाजता ताइको काबुतामा ताअ्लि मादोतेङ दुम भेर्माको साल जेसो हानिहि जाहाजहेङ ओसोङ्पाहा हानेलि पिनान्हाहि | 16 केलाइ लेताभारि म्हुइका टापु क्लौदाता हानेन्हाहि कालाउ केलाइ एकदम मुस्किलसो ताइको जिउ बान्चिपालि नाउ जाहाजता चुमालि दोन्हाहि | 17 जिवन बान्चेका पाका नाउहेङ जाहाजाता चुमाका न्हुसो इम्बालाइ जाहाजको कोरपाहाङ एदोफाङ ताअ्लि द्याहामहोइ जिङ्हि, कालाउबुङ जाहाज सिरितिसको दाल्दालिता भास्याङ्बे दोअ्तेङ द्याङ्गेलाइ थिहि | ओदोङ भाअ्सिङ इम्बालाइ जाहाजहेङ भेरमाहोइदोङ ल्होपाको दोतेङ पाल लेता खुपाहि | 18 भेनाङ दिना दुमभेरमा लोतेङ जाहाजहेङ हेङ्जाङ दान्हाहि,द्याङ्गेलाइ आनेमानेगेलाइ जाहाजसो थाल्हि | 19 एनि न्हुसो इम्बालाइ जाहाजको यन्त्तरगेलाइबुङ थालपिहि | 20 हेङसा दिनथेकापा इसिका दुमभेर्मा गुसुसाइकानाङ केलाइ साल्हे,फुरुगेलाइ होइदोदोङ मातिङ्न्हाहि | दुम भेर्मा एकदम थिलिगोइगोइपा चोलिहि | कालाउ केलाइको बान्चिका आसादोङ लाअ्न्हाहि, केलाइ स्याङ वाला दोअ्तेङ सोचिन्हि | 21 हेन्जा दिना थेकापा द्याङ्गेलाइ हाइदोङ माचाहि, कालाउ एनि पावल इम्बालाइको आगाता जाअ्हि कालाउ दोअ्लि ''ऐ द्याङ्गेलाइ,नेलाइहेङ का क्रेट मालाअ्सु दोघाखा | नेलाइ काङ्को काथा हिङ्लि गोइसुध्वास्वाना | कालाउ नेलाइ इसिका किसिमको नासाका दुःख भोगिलि मागोइध्वास्वाना | कालाउकि नेलाइ इन्सिका प्रकारको दु:ख कालाउ नोक्सान खोपिली मागोध्वास्वाना | 22 कालाउ एला का दोअ्दोङ्खा साहसि जेङ्सु , नेलाइ हासुबुङ मासिसुवाना कालाउ जाहाज रामावा | 23 आन्जि न्हिसिनता परमेस्वरसो स्वर्गदुत कादोफा लोहि, वा ओदोङ परमेस्वर हि, जाइको का वाकोङ हिगा कालाउ का वासेहेङ सेवा पाखा | 24 वा दोअ्हि,पावल ना माथि! ना सिजरको आगाता जाअ्लिङ गोयाना, कालाउ परमेस्वर नाङ्को भासिङ नाङ्को दोफा समुन्द्रपाहा पाकपाकाताङ हानेकालाइहेङ झाराङ्हेङ बान्चिपावा | 25 ओइ द्याङ्गेलाइ,जोस मागुमाइपासु ? का परमेस्वरता खान्धुरि पाखा, वाको दुतदोङ दोका भाइपाङ गोतेङ जेनावा | 26 कालाउबुङ केलाइ हेदोइबुङ एनोङ टापुता थेस चालिङ गोयाङ | 27 तेद्याको न्हिसिङ थेकापाबुङ केलाइ एडरिया समुन्द्र कोरपाङ योम्तेङ हिनाहि | जाहाज चालाइकागेलाइ हिदोइबुङ मिलिङ्को भेरपाङ पुगिका बिचार पाहि 28 इम्बालाइ दिहामको टुप्पाता एनोङ ल्हिका आमने धेउतेङ समुन्द्रता थाल्पिहि, एन्सा पातेङ इम्बालाइ चिको हेथे दुब्बा १२० फिट; एसाइ एकुरि फिट लिता पत्ता लगाइहि | इम्बालाइ आरोङ आथुङ्सा आसा फारामा हानेतेङ ओरोङ दिहाम समुन्द्रता थाल्हि | इदोइ खेप बुङ ९० फिट लिता निङ्हि | 29 इम्बालाइ जाहाज बारका उन्थुइता थुन्हालि द्वाङ वाला दोतेङ थितेङ ताका हिघाखे | ओदोङ भाअ्सिङ इम्बालाइ लङ्रर थाल्हि कालाउ इम्बालाइ झेङ्का पहरको दिना ल्वाको दोतेङ्सा दोमचाकाइहि | 30 हेथेते जाहाज चालाइकागेलाइ जाहाज लाअ्तेङ खाअ्लि भोघाखे, इम्बालाइ जिउ बान्चेपाका नाउगेलाइ चिता खुपाहि | इम्बालाइ इसिका स्वाङ पाहि कि इम्बालाइ जाहाजको आघा भारिसो आरोङ लङ्ररगेलाइ हुल्पाखे 31 कालाउ पावलदोङ लान्ठा अधिकारि कालाउ भेनाङ लान्ठागेलाइहेङ दोअ्हि,''एदि उङ्को द्याङ्गेलाइ जाहाजता माधोल्हेपानु नेलाइ माबान्चेस्वाना | 32 कालाउ इङ्को जिउ बान्चेपाका नाउ चि, लिताङ हानाको दोतेङ लान्ठागेलाइ दिहाम पोपिहि | 33 र्-हि्माङ माजेङ्सिङ लामफाङ पावल द्याङ्गेलाइहेङ हाइदोङ्बुङ माचाको दोअ्तेङ मानाइपाहि | वा दोअ्हि बितिका चौध दिनासो नेलाइ र्-हुमतेङ हिसुना ,कालाउ खाङ्तेङ हिसुना, नेलाइ चौध दिनासो म्हितुङ्पा हिसुना | नेलाइ हाइदोङ चाका मान्थुसुना | 34 एला का नेलाइहेङ सेउपाखा कि हाइदोङ चापिसु, या नेलाइहेङ बान्चिलिको भाअ्सिङ आवस्यक हि | नेलाइ हासुकोबुङ पुरिङ्को एनोङ पुसिङ्बुङ मानासातावा |'' 35 पावलदोङ एसा दोका न्हुसो,वा आतुङ्सा सेले हु्हि कालाउ परमेस्वरहेङ झाराङ्को आगाता धन्यबाद पिहि | वादोङ सेलेको पोङ्न्हाका टुकुरा पातेङ चालि तेङ्हि | 36 इम्बालाइ झाराङ साहास निङ्तेङ कालाउ चालि तेङ्हि | 37 केलाइ जाम्मा न्हे साइ सुमकुरीतेना झना द्याङ्गेलाइ जाहाजाता हिघानाहि | 38 जेथे केलाइ चाहिनाहि ओदोङ झोकोङ चानाहि, कालाउ इम्बालाइ जाहाजसो ल्हिका आमने समुन्द्रता जाहाजहेङ होम्का बानाइलि थाल्हि | 39 जेलाउ झेङ्हि जाहाज चालाइका चालक भोनोइ हिका मिलिङ तिङ्हि ,कालाउ इङ्को थामे हिसो वाला दोअ्तेङ चाहि थाहा मागिहि | एदि दोअ्हेपानु इम्बालाइ जाहाजहेङ काम्भेता चुम्पुलि दोअ्धाङ | 40 एसापा इम्बालाइ लाङ्गुरको दियाम खाङ्पिहि कालाउ इङ्कोहेङ समुन्द्र्ता थाइ गिल्पिहि | कालाउ इम्बालाइ दियाम खाङ्हि इन्ता ल्हाफागेलाइ खोइनाका हिघाहि | इम्बालाइ आगापाहाको पाल भेर्माको भाअ्सिङ ल्होपाहि कालाउ काम्भेभारि हानिहि | 41 कालाउ जाहाज बालाको भासता परिहि जाहाजको आगापाहाको भाग इन्ता खेअ्हि कालाउ जाहाज चटपटाइलि मादोअ्हि | कालाउ बार्का-बारका साल्काहोइ एकदम जोरसो लोहि कालाउ जाहाजको लेसारापाहाको भाग न्हु भाग टुक्रा टुक्रापा पोङ्नापापिहि | 42 सिपाइ गेलाइ कैदिगेलाइहेङ से:लि खाङ्हि ताकि इम्बालाइ पाउरिलि मानिनाको कालाउ खाअ्लि मादाको | 43 कालाउ सिपाहि अधिकारि पावलहेङ बान्चिपालि खाङ्घाखे, ओदोङ भाअ्सिङ कैदिगेलाइहेङ से:लि अनुमति मापिहि | वा कैदिगेलाइहेङ जाइ पाउरिलि दोअ्घाखे लाम्फा धाअ्सिलि कालाउ भोनोइता हानिलि आग्या पिहि | 44 आरू द्याङ्गेलाइ फाला धेङ्ग्राको पोङ्नाका कालाउ-धेङ्ग्रागेलाइ प्रयोग पातेङ हानिलि दोअ्घाखे | एसापा झाराङ द्याङ्गेलाइ सेङ्का भोनोइता थुकाहि हिदोइबुङ द्याङ्गेलाइ मासि:हि |