प्रेरितों के काम 26

अग्रिपा पावलहेङ दोअ्हि,''ना ताइमिहेङ बान्चिपालिको भाअ्सिङ नुइ धुइलि द्वाना ''एसापा पावल ताइको खुर तोल्तेङ एसा दोअ्तेङ नुइ धुइलि तेङ्हि | 2 'राजा अग्रिपा,नेलाइको आगाता जाअ्लि निङ्लि काङ्को भाग्य हि,यहुदि गेलाइका हुता थुबाराइका दोसिगेलाइ का गोताङ उतारा प्याङ्का | 3 का मेनाङ खु:सि हिघा कि का नेलाइको आगाता नुइ धुइलि योग्यो हिघा हाइपालिपानु नेलाइ यहुदि रिति-रिवाजगेलाइ कालाउ प्रस्नगेलाइ जेदोङ बिसयता इम्बालाइ काथा पास्वावा इङ्को ग्याना | कृपाया धैर्य पातेतेङ काङ्को काथा हिङ्सु | 4 'झाराङ यहुदिगेलाइ काङ्को गोताङ जिवनको बिसयता गिखे, काङ्को जिवन सैलिको निसयता इम्बालाइ गिखे | काङ्को सरभिता कालाउ यरुसलेमताबुङ काङ्को विवन बिसयता इम्बालाइ गिखे | 5 यिदोइ यहुदिगेलाइ हिन्जाङ समयसोङ कासेहेङ नाल्खे , एदि इम्बालाइ मन पाहे पानु कासेहेङ एलोङ फारिसि मानिलि द्वावा, कालाउ फारसिगेलाइ यहुदि धर्मको व्यवस्थागेलाइ बो हिदोइबुङ यहुदि समुदायगेलाइ खान्तेङ झन कटर प्रकारसो मानिखे | 6 परमेस्वर केलाइको आजाइ-आजुगेलाइहेङ पिका प्रतिग्याको भरोसाता का यिदोइ जाचता एला जाअ्घा | 7 यिदोइ प्रतिग्या निङ्लिको आसाता केलाइको तेन्हे जातिगेलाइ लागातार न्हिसिन-नितिम परमेस्वरको आराधाना पाकालाइ हि | हे राजन,यिदोइ आसाको भाअ्सिङ का या यहुदिगेलाइसो दोसिलिका हिघा | 8 नेलाइ परमेस्वर सि:का द्याङ्गेलाइहेङ सिन्चाल पाखे दोअ्का काथा ग्रहन पालि हाइपालि आप्थायारो परिका हि ? 9 'जेलाउ का फारिसि हिघाखा.का इसिका बुङ सोचिघा कि नासरतको येसु:को मिङ्ता बिरोध हेन्जाङ काथागेलाइता का पालि गोयाङ | 10 कालाउ यरुसलेमता का खान्धुराइगेलाइको बिरूद्ता हेन्जा काथागेलाइ पाघा | बार्का धामिगेलाइ इङ्को खान्धुराइगेलाइहेङ झ्यालखानाता ह्वाका खाबारा पिका हिघाहि | जेलाउ येसु:को खान्धुराइगेलाइ सेअ्नाहि का इसिका रेम्का काम जेङ्हि दोअ्तेङ सहमति पिघा | 11 गोताङ चाउघारा साअ्गेलाइता का इम्बालाइहेङ हेन्जा पोलति येसु: को बिसयता जबरजस्ति मारेम्का दोअ्पातेङ दण्ड पिघा | का वथे रिसाहा हिघाखा कि का बिदेसको सहरगेलाइताबुङ इम्बालाइहेङ सानताइलाघा | 12 'एलोङ समयता,बार्का धामिगेलाइ कासेहेङ दमिसक सहर हानेका अनुमति कालाउ खाबारा पिहि 13 हे राजन ! दमिसक हानिका दामाता का एलोङ फाइसालामका बदेलसो लोतेङ हिका तिङ्घा, इङ्को आधा बेलाको समय हिघाहि | इङ्को जोल्का प्रकास तालिको खान्तेङ हेन्जा चिल्काका हिघाहि | इङ्को प्रकास का कालाउ कादोफा हानेका द्याङ्गेलाइको कोरपाहाङ चिल्काहि | 14 केलाइ झाराङ भोनोइता लोङ्नाहि, कालाउ न्हुसो का यहुदि भासाता,एलोङ गाला हिङ्घा, इङ्को गाला कासेहेङ दोअ्हि,''सावल,सावल,हाइपालि कासेहेङ सताइखेना ? ना का दोफा जुधेतेङ ताइमिहेङ चोट पातेङ हिना 15 का दोअ्घा,''ना हासु प्रभु ? प्रभु दोअ्हि,का येसु: का उङ्कोङ ज्याइहेङ ना साताइतेङ हिना | 16 ल्हो कालाउ जाअ्, का नासेहेङ काङ्को सेवक चुनिका हिघा ना काङ्को गवाहि जेङ्तेङ द्याङ्गेलाइहेङ काङ्को बिसयता ना हाइ तिङ्ना कालाउ का हाइ प्रकट पाङ्का गोताङ दोअ्ताना | ओदोङ भाअ्सिङ का नानि नाङ्को दोफा लोघा | 17 का नाङ्को ताइकोङ द्याङ्गेलाइहेङ नाङ्को दोफा मारेम्का काम पालि माप्याङ्का | कालाउ का नासेहेङ गैर-यहुदिगेलाइसोबुङ जोगाइयाङ्का, का नासेहेङ इङ्को द्याङ्गेलाइकोता दिङ्गिल्खा | 18 ना द्याङ्गेलाइहेङ सत्ये तिङ्पाना द्याङ्लाइ कितिकितिकासो फाइसालामकाता घुरियावा कालाउ भुतको सरबुङ्सो परमेस्वरता धलकियावा कालाउ न्हुसो नेलाइको पापगेलाइ स्यामा पा-पियावा कालाउ काङ्को खान्धुरिहोइ जेदोङ द्याङ्गेलाइको पबित्तरो पा प्यावा इम्बालाइहेङ ए-बानायावा |'' 19 पावल लागातार नुइ धुइतेङ हि: राजा अग्रिपा,स्वर्गसो इसिका दर्सन निङ्तेङ न्हुसो एङ्कोहेङ पालन पालि का सुइकार मापाघा | 20 का द्याङ्गेलाइहेङ ताइको हृदय कालाउ जिवन सैलि बदेलपासु दोअ्लि तेङ्घा, ओबालाइहेङ परमेस्वर भारि घुरिसु कालाउ इसिका काम पासु ज्याइसो नेलाइको हृदय कालाउ जिवन सैलि जातिङ्को बदलि जेङ्का थाहा निङ्स्वाना दोअ्घा | इदोइ काथा झाराङ खानतेङ लामफा पोलति दमिसकता दोअ्घा | कालाउ न्हुसो का यरुसलेम हानिघा कालाउ यहुदियाको गोतेङ थामेता हानेतेङ इसिका काथागेलाइ दोअ्घा | का यिदोइ काथागेलाइ दोअ्लि गैर-यहुदिगेलाइकोताबुङ हानिघा | 21 यिदोङ कारनसो यहुदिगेलाइ का मुन्दिरता हिका बेलाता रिम्लि कालाउ कासेहेङ से:का चेस्टा पाहि | 22 एला थेकापाबुङ का परमेस्वरको साघाइ निङ्तेङ हिघा कालाउ का जाअ्तेङ हिघा कालाउ जेदोङ तिङ्घा दोअ्तेङ हिघा | कालाउ का नावा काथा दोअ्तेङ मान्थुघा | मोसा कालाउ अगमबक्तागेलाइ जेदोङ जेनाङ दोअ्का हि का इङ्को दोअ्तेङ हिघा | 23 इम्बालाइ दोअ्हि कि ख्रिस्त सि:याङ कालाउ वादोङ सि:कासो सिन्हुताङ वादोङ झाराङ खान्तेङ लाङ द्याङ जेनावा | मोसा कालाउ अगमबक्तागेलाइ दोअ्का हिघाहि कि ख्रिस्त यहुदि कालाउ गैइ-यहुदि गेलाइकोता प्रकास चुमाप्यावा |'' 24 पावल ताइमिङ्हेङ बान्चिपालिको भाअ्सिङ इङ्को काथागेलाइ दोअ्काताङ पालाउ,फेस्तस र्हिकाइहि,''पावल ना पागाला हिना | नाङ्को हिन्जा बिध्याहोइ नासिहेङ पागाला बानाहि |'' 25 पावल दोअ्हि,''माहामहिम फेस्तस,(अति आदरनिय) का पागाला माको | जेदोङ काथागेलाइ का दोअ्घा इङ्को सत्ये हि | काङ्को काथागेलाइ या सब्दगेलाइ गम्भिर हि | 26 राजा अग्रिपा यिदोइ काथागेलाइको बिसयता गिखे का, निसित हिघा कि वा हिदोइबुङ काथाता अपरिचित मान्थु | हाइपालिपानु यिदोइ काथागेलाइ हिदोइबुङ ए कुन्हा थामेता घतितिका मान्थु | 27 राजा अग्रिपा ! हाइ ना अगमबक्तागेलाइ लेखेका काथागेलाइता खान्धुरि पाना ? का गिखा कि ना खान्धुरि पाना | 28 राजा अग्रिपा पावलहेङ दोअ्हि ''हाइ ना कासेहेङ यिदोइ झोको मारफाङ ख्रिस्तयन बानाइलि द्वाना ?' 29 पावल दोअ्हि,या सजिलो कालाउ आप्थायारो काङ्को भाअ्सिङ मुख्य माको, का परमेस्वर दोफा दोमचाकाइखा कि ना खिनिङ हाइ,कासेहेङ धेउनाएका झिनझिरि बाहेक नानि गोताङ काङ्को स्रोतागेलाइ का भाइकाङ जेनावा |'' 30 राजा अग्रिपा,हाकिम फेस्तस,बर्निस कालाउ इम्बालाइ दोफा योम्तेङ हिका बो द्याङ्गेलाइ जाखा-जुखारापा ल्होहि | 31 चाउघारा सा लाअ्तेङ हानिहि कालाउ ता-ताइमिता एसा दोअ्काताङ काथा पालि तेङ्हि,''यिदोइ द्याङ्हेङ से:लि माएल , झ्यालखानाताबुङ ताअ्लि माएल; जातिङकोङ या द्याङ इन्सिका मारेम्का काम पाका मान्थु कालाउबुङ वासेहेङ मृत्यु दण्ड माकुनु कारागारता ह्याको | 32 अग्रिपा फेस्तसहेङ दोअ्हि,एदि यिदोइ द्याङ सिजरहेङ अपिल मापाकाहे पानु वा लाअ्पिलि दोअ्धाङ |''