John
युहन्ना
1
लामफोरति बचन हिकाहिघाहि , बचन परमेस्वरदोफा हिकाहिघाहि , कालाउ बचन परमेस्वर हिकाहिघाहि | 2 वाआङ लाम्फोरति परमेस्वरदोफा हिकाहिघाहि | 3 गोताङ आनेमाने वाकोदोफा जेङ्हि, कालाउ जेङ्का हिदोइबुङ आनेमानेबुङ वा माकोसि माजेङ्घाहि | 4 वाकोता जिवन हिघाहि, कालाउ इङ्को जिवन द्याङ्गेलाइको फाइसालामका हिघाहि | 5 इङ्को फाइसालामका कितिकितिका चिल्का-चिल्काखे कालाउ कितिकितिकाता इङ्को हुता बिजय जेङ्का मान्थु | 6 परमेस्वरसो दिङ्गिल्का एमि द्याङ् हिघाहि, वाकोमिङ यु:हान्ना हिघाहि | 7 वाकोसो झाराङ साअ्ताको दोअ्तेङ इङ्को फाइसलामकाको गावाइ पिलि वाआङ् साक्सि जेन्तेङ लोहि | 8 वाआ्ङ ताइमिङ इङ्को फाइसालामका मान्थुघाहि, कालाउबुङ इङ्को फाइसालामकाको गवाहि पिलिलोहि | 9 गोताङ द्याङ्हेगेलाइहेङ ग्यान पिका जातिङ्को फाइसालामका सुमिङ्ता लोदोङ्घाहि | 10 वा सुमिङ्ता हिघाहि, सुमिङ वाकोसो जेङ्हि , कालाउबुङ सुमिङ्दोङ वासेहेङ मानाल्हि | 11 वाआङ् ताइको द्यागेलाइ कोता लोहि, कलाउ वाको ताइको द्याङ्गेलाइदोङ वाकोता ग्रहन मापाहि (मासुहि) | 12 कालाउ जेथेबुङ वासेहेङ ग्रहन पाहि कालाउ वाको मिङ्ता खान्धुरि पाहि कालाउ वादोङ इम्बालाइहेङ परमेस्वरको सानतान जेङ्लि खाबारा पिहि | 13 इम्बालाइ हितिसो, जोलोम जेङ्का माको कलाउ हिदोइबुङ् द्याङ्को जिउ कालाउ मनसो माको कलाउ परमेश्वर पाहासो जोलोम जेङ्का हिगाहि | 14 कालाउ वचन जिउ जेङ्हि (देहधारी) कालाउ केलाइको माझाता बासाहि | केलाइदोङ वाको महिमा तिङ्न्हाहि, जेदोङ् महिमा आबासो लोका एलोङ खिनिङ चानको भाइका हिघाहि | वचन अनुग्रह कालाउ सत्येताहोइ पुर्ण हिघाहि | 15 यु:हान्ना वाको बिसयता गावाहि पिकाताङ हापाङ दोअ्हि, “ वादोङ उङ्कोङ द्याङ हिका हि ज्याइको बिसयता कादोङ दोअ्घा, ' का न्हुसो लोका का खाङ्तेङ् बार्का हि ज्याइ , हाइलिपानु वा का खान्तेङ लाम्फासोङ हिघाहि |” 16 वाको अनुग्रको पुर्नतासो केलाइ एलोङ अनुग्रहहुटा भेनेङ अनुग्रह निङ्का हिनाहि | 17 हाइपालिपानु व्यवस्था मोसासो पिहि, अनुग्रह कालाउ सत्ये चाहि येसु:ख्रिस्त सो लोहि | 18 परमेस्वरहेङ हासुबुङ् हेलाउबुङ तिङ्का मान्थु | आबाको दोफा हिका एलोङ खेनिङ चान्दोङ वासेहेङ् प्रकट पापा हि | 19 "जेलाउ यरुसलेमसो याहुदिगेलाइ धामिगेलाइ कलाउ लेबिगेलाइहेङ वाकोता ""ना हासु कालाउ ?” दोअ्का काथा हिअ्लि दिङ्गिल्हि, कलाउ यु:हान्नाको गावाहि एदोइ हिघाहि " 20 वा सुइकार पाहि (मनचाहि), कालाउ इन्कार मापाहि (मारेम्का माखाङ्हि), “कलाउ का ख्रिस्ट माको ” दोअतेङ् सुइकार पाहि (मन्ताचाहि) | 21 कालाउ इम्बालाइ वासेहेङ् हि:हि, “कालाउ हाइ ? ना एलिया दोङ् ?” वा दोअ्हि “का माक '|'' “हाइ ना उङ्को अगमवक्तादोङ ?”वा जबाफ पिहि, “माको |” 22 इबाम्लाइ वासेङ दोअ्हि, “ना हासु कुनु ? केलाइहेङ दोअ्पि, “ कालाउ केलाइहेङ दिङ्गिल्कालाइहेङ केलाइ उत्तरा पिलि द्वाको, ना ताइको बिसयता हाइ द्वाना ? '' 23 वा दोअ्हि, “यसैया अगमवक्ता दोअ्ना खीनिङ,' परमप्रभुको दामा तियार पासु ' दोअ्तेङ मारालाका थामेता ह्रिकाइका एलोङ द्याङ्को गाला हिघा |” 24 इम्बालाइहेङ फरिसिगेलाइ दिङ्गिल्का हिघाहि | 25 कलाउ इम्वालाइ वासेङ हि:हि, “ना ख्रिस्तबुङ माको, एलियाबुङ माको, इङ्को अगमबक्ताबुङ माकोनु, हाइपालि बत्तिस्ताता प्याना ?” 26 यु:हान्ना इम्बालाइहेङ जोवाफ पिहि, “काते चिता बस्तिस्ता पिखा, कलाउ केलाइको माझाता एमि जातेङ हिकाहि, ज्याइहेङ नेलाइ मानाल्स्वाना | 27 का न्हुसो लोलिगोइका वादोङ ज्याइको, का जुत्ताको फित्ता (दिहाम) खाइलि योग्य का मान्थुघा |” 28 इदोइ काथा यरदन झोरा ओदोइपार बेथानियाता जेङ्का हिघाहि, जेता यु:हान्ना बत्तिस्ता पितेङ हिकाहिघाहि | 29 न्हुदिना वा येसु:हेङ ताइकोभारि लोका तिङ्तेङ दोअ्हि, “खाङ, सुमिङ्को पाप तोल्हितेङ चुम्पुका परमेस्वर थुमा ! 30 वा, वादोङ द्याङ, ज्याइको बिसयता का दोअ्का हिघाखा, “का न्हुसो एलोङ द्याङ ल्वाङ, वा का खाङ्तेङ बार्का हि, हाइपालिपानु वा का खाङ्तेङ लाम्फारतिसोङ हिघाहि |” 31 का ताइमिदोङ वासेङ नाल्का मानथुघाखा, कालाउबुङ वादोङ इस्राएलता प्रकट ज्याको दोअतेङ चिता बप्तिस्ता पिकाताङ का लोघा |” 32 यु:हान्ना एसा दोकाताङ गवाहि पिहि, “का पबित्तरो आत्माहेङ कुर्जाको रूपता स्वर्गसो खुतेङ लोतेङ वाकोहुता न्होका तिङ्घा | 33 का वासेङ नाल्का मान्थुघा, कालाउ ज्यइदोङ कासेङ चिता बप्तिस्ता पिलि दोअ्तेङ दिङ्गिलहि, वादोङ कासेहेङ दोअ्हि,ज्याइह्रुसो ना, पबित्तरो आत्मा खुकाताङ कालाउ योमतेङ्हिका तिनाना, पबित्तरो आत्माहोइ बप्तिस्ता पिका वादोङ हि |” 34 का तिङ्काङ हिघा, कालाउ गवाहि पिकाहिघा, कि परमेस्वरको चान वादोङ हि |” 35 आरोङ भेनाङ दिना यु:हान्ना वाको चात्यागेलाइसो न्हेमि दोफा जातेङ हिघाहि | 36 वा येसु:हेङ हानिकाताङ पाका तिङ्तेङ दोअ्हि, “खाङ, परमेस्वरको थुमा !” 37 वाको दोअ्का इदोइ काथा हिङ्तेङ उङ्को न्हेमि चात्यगेलाइ येसु:को दोफा हाहिलि तेङ्हि | 38 येसु: घुरितेङ खाङ्हि,कालाउ इम्लाहेङ न्हु- न्हु लोका तिङ्तेङ इम्लाइहेङ हिअ्हि, “नेलाइ हाइ भोसुखेना ?”इम्बालाइ वासेङ दोअ्हि, “रब्बि (याको माने दोङ, गुरुजि ),ना हिसो हिखेना ?” 39 वा इम्लाइहेङ दोअ्हि, “हानेसु कुनु,कालाउ नेलाइ तिङ्स्वाना |” इम्लाइ हानेहि, कलाउ वाको हिका थामे तिङ्हि | इम्बालाइ कोकोङ्दिना वाको दोफा बासा हि, हाइपालिपानु बेल्हालितोम्का हिघाहि एनसाङ द्या बजेलि तोम्का हिघाहि | 40 यु:हान्नाको दोअ्का काथा हिङ्हि, कालाउ येसु:हेङ पिताइका उङ्को न्हेमिता एमि सिमन पतरुसको ओने अन्द्रियास हिघाहि | 41 वा लाम्फा ताइको ओने सिमोनहेङ दुसुहि, कालाउ वासेङ दोअ्हि “केलाइ मसिहहेङ (याको मानेदोङ, ख्रिस्त ) दुसुका हिनाहि |” 42 वा सिमोनहेङ येसु:कोता चुमाहि | येसु: वासेङ खाङ्हि कालाउ दोअ्हि, “ना योआनेसको चान सिमोन हिना, ना केफास (याको अर्थादोङ, उन्तुइ ) दोअ्नान्हा |” 43 न्हुदिना वा गालिलता हानिका निसित पाहि | कालाउ फिलिपहेङ दुसुतेङ वा वासेहेङ दोअ्हि, “काङ्को दोफा तिसु |” 44 अन्द्रियास कालाउ पतरुस कोनिङ फिलिपबुङ बेथसेदा सहरकोदोङ हिघाहि | 45 फिलिप नाथानेलहेङ दुसुतेङ दोअ्हि, “ज्याइको बिसयता मोसाबुङ ब्यवस्थाता कालाउ अगमबक्तागेलाइबुङ लेखिका हिघाहि,योसेफको चान् नासरतको येसु:हेङ केलाइ दुसुका हिनाहि |” 46 नाथानेल वासेहेङ दोअ्हि, “हाइ नासरतसो हाइदोङ एल्का काथा लोलि द्वाङ रो ?” फिलिपदोङ इन्कोहेङ उत्तारा पिहि “लोतेङ खाङ |” 47 येसु: नथानेलहेङ ताइकोता लोकाताङ्पाका तिन्तेङ वाको बिसयता दोअ्हि, “एमि जातिङ्को इस्राएलिहेङ खाङ, हाइदोङ म्होन्हाका मान्थु |” 48 नथानेल हि:हि, “ना कासेहेङ हेसा नाल्न्हा ?” येसु: इन्कोहेङ जोबाफ दोअ्हि “फिलिप नासेहेङ काइकाखाङ्तेङ लाम्फा,कोसेको सिङ्गोरा काआङ नासेहेङ तिङ्का हिघाखा |” 49 नथानेल वासेहेङ दोअ्हि, “रब्बि,ना परमेस्वरको चानदोङ हिना , ना इस्राएलको राजा दोङ हिना |” 50 येसु: इन्कोहेङ उतारा पितेङ दोअ्हि, “का नासेहेङ कोसेको सिङ्गोरा तिङ्घा दोकाताङ ना साताना ?” (खान्धुरि पाना ) ना इदोइ खाङ्ते आरोङ बा-बारका खाथागेलाइ तिनाना |” 51 कालाउ वा उङ्हेङ दोअ्हि, “जातिङ्को, का नासेहेङ दोअ्खा, नेलाइ स्वर्ग( ह्याइका) हिन्हाका कालाउ परमेस्वरको दुतगेलाइहेङ द्याङ्को चान ह्रुसो ताङ्काताङ कलाउ खुकाताङ्पाका तिङ्स्वाना |”