लुका 24

आथारको लाङ दिना जोकसोङ येसु:को जिउ ताअ्का तोमता बेबालाइ लोहि | ओबालाइ तियारपाका मालामालाका चुइतिगेलाइ चुमाहि | 2 तोमको धारा थुमलि एलोङ बारका उन्थुइ ताअ्का हिघाहि | कालाउ ओबालाइ इङ्को उन्थुइ तोमसो भेनेङ थामेभारि तिङ्हि | 3 ओबालाइ लिता दुल्हि कालाउ प्रभु येसु:को जिउ मातिङ्हि | 4 जेलाउ इम्बालाइ इङ्को बिसयता आवाइतुतेङ हिघाहि , कालाउ जाहाका धावा होङ्तेङ हिका न्हुमि, वाजानगेलाइ इम्बालाइको भेरपाङ जाहि | 5 उङ्को बेबालाइ मेनाङ थिहि, इम्बालाइ ता-ताइको पुरिङ तुघुरपाहि | उङ्को न्हेमि द्याङ्गेलाइ इङ्को बेबालाइ हेङ दोअ्हि,सिन्हुका'' द्याङ्हेङ नेलाइ हाइपालि सिकालाएको माझाता भोसुखेन्हा ? 6 येसु:इन्ता मान्थु | वा सिकासो सिन्हुतेङ ल्होका हि | वा नेलाइहेङ गालिलता दोअ्का काथा थाहा हि ? 7 वा दोअ्हि द्याङ्को चानहेङ पापिको खुरता चुम्पुपावा,क्रुसता तोइयावा, कालाउ सिकाको सुमनिको दिना सिन्चालतेङ ल्होकावा |'' एन्सा जेङ्लि गोयाङ | 8 कालाउ उङ्को बेबालाइ येसु:हाइ दोअ्का हिघाहि फोम पाहि | 9 उङ्को बेबालाइ तोम लाअ्तेङ कालाउ तेए,चात्यागेलाइ कालाउ आरू चात्यागेलाइ हिका थामेभारि हानिहि,कालाउ गोताङ उङ्को घाटानागेलाइ को बारेता ओबालाइ हेङ दोपिहि | 10 उङको बेबालाइ मरियम मग्दलिनि,यु:हान्ना कालाउ याकुबको आमाइ मरियम कालाउ आरु बेबालगेलाइ हिघाहि | इम्बालाइ उङ्को चात्यागेलाइहेङ जेङ्का गोताङ घाटानागेलाइ हिङ्पाहि | 11 कालाउबुङ चात्यागेलाइ उङ्को बेबाल ओबालाइहेङ दोअ्पिका काथा इङ्को हाइदोङ माको दोअ्तेङ मासाअ्हि | 12 पतरुस जाराजुरुक्पा ल्होहि कालाउ तोमभारि घाअ्तेङ्साङ हानेहि | कालाउ तुघुरतेङ खाङ्हि | इन्ता ते सुतिको धाबा जेदोङ येसु:को जिउहेङ लुनधाइका हिघाहि,इङ्को खिनिङ वा इन्ता तिङ्हि | जेदोङ जेङ्का हिघाहि इङ्को बिसयता आवाइतुतेङ पतरुस साभारि घुरिहि | 13 ककोङ दिना येसु:को न्हुमि चात्यागेलाइ इम्माउस मिङ पाका द्याङ सहर हानिधोङ्घाखे | इङ्को थामे यरुसलेमसो लगभग सुमकोस आधा दुरे परिघाखे | 14 इम्बालाइ घतिका इङ्को गोताङ घाटाना गेलाइको बारेता काथा पाकाताङ हिघाहि | 15 जेलाउ इम्बालाइ इदोइ(यिदोइ) काथागेलाइ पाकाताङ हिघाहि,येसु:ताइमिङ इम्बालाइको भेरपा लोहि कालाउ ओबालाइ दोफाङ तेअ्हि | 16 कालाउ उङ्को न्हेमिहेङ येसु:नाल्लि दोलि पिका मान्थुघाखे | 17 कालाउ न्हुसो येसु:दोअ्हि,''नेलाइ तेअ्काताङ पालाउ हाइको बिसयता बात मारेका हिसुन्हा ? उधिन्हेमि सिकापा हि | इम्बालाइको र्-हाइ मेनाङ दु:खि तिङ्चाहि | 18 ओबालाइसो एमि क्लेओपास मिङ हिका द्याङ दोअ्हि,''यरुसलेमता एमि द्याङ यरुसलेमता घतेका घातानागेलाइको बारेता मागिका सायद ना खिनिङ कि ?'' 19 येसु:इम्बालाइहेङ दोअ्हि,''इसिका घातानागेलाइ, इम्बालाइ वासेहेङ दोअ्हि,''इदोइ नासरतको एमि द्याङ येसु;को बिसयको काथा हि-!वा परमेस्वर कालाउ द्याङ्गेलाइको आगाता काम कालाउ बचन होइ तिङ्पाहि कि वा एमि महान अगमबक्ता हिघाहि | 20 कालाउ केलाइको बारका धामिगेलाइ कालाउ नेतागेलाइ वासेहेङ मिरतु दण्ड पिलि कालाउ क्रुसता तोइलि पिपुहि | 21 केलाइ आसा पाका हिघान्हाहि कि वा दोङ एमि हिघाहि ज्याइ इस्राएलहेङ मुक्ति पादोङ्धाखे | कालाउबुङ इदोइ गोताङ घातानागेलाइ घतेहि | इदोइ गोताङ घाताना घतेका नानि सुम दिना जेङ्हो इ | 22 कालाउ नानि केलाइको आधिमि बेबालाइ केलाइहेङ भाङ भाङ्का काथागेलाइ दोअ्हि | एर्- हिमाङ ल्होतेङ बेबालाइ येसु:हेङ ताअ्का तोमता हानिका हिघाहि | 23 कालाउ इम्बालाइ येसु:को जिउ इन्ता मानिङ्हि | इम्बालाइ इन्तासो घुरिहि कालाउ इम्बालाइ न्हेमि स्वर्गदुत गेलाइहेङ दर्सन तिङ्का काथा दोअ्हि | स्वर्गदुतगेलाइ दोअ्हि कि येसु:सिन्हुका हि | 24 कालाउ न्हुसो केलाइको आधिमि द्याङ गेलाइबुङ तोमता हानिहि | उङ्को बेबालाइ दोअ्का भाइपाङ तोम खालि हिघाहि | इम्बालाइ हासुबुङ येसु:हेङ मातिङ्हि |'' 25 जेलाउ येसु:इम्बालाइहेङ दोअ्हि,''नेलाइ बुढ्दु (मुर्ख )हिसुन्हा कालाउ अगमबक्तागेलाइको दोअ्का हिदोइबुङ काथागेलाइ खानधुरि पालि लेदारा(न्हुसुना) जेङ्सुन्हा | 26 इङ्को अगमबक्तागेलाइको दोअ्लि दोअ्का हिघाहि,हाइपालिपानु ख्रिस्तहेङ वाको महिमा लिता दुल्लि इदोइ गोताङ काथागेलाइ भोगिलि गोइका हि | 27 कालाउ न्हुसो येसु:धर्मसास्त्ता मोसासो चुमतेङ कालाउ आरु गोताङ अगमबक्तागेलाइसो जेदोङ लेखेका हिघाहि,गोताङ काथा दोअ्पिलि तेङ्हि | धर्मसास्त्ता वाको ताइको बारेता जेदोङ लेखेका हिघाहि वा दोअ्पिहि | 28 जेलाउ इम्बालाइ इम्माउस भेरपा थुकाहि कालाउ येसु:बाहाना पाहि कि वा इन्तासो आसा दुरे हानिहि मन पाघिहि | 29 कालाउ इम्बालाइ वासेहेङ एसा दोअ्काताङ हेन्जा सेउपाहि,केलाइ दोफाङ हि,बेला हेन्जा हानिहोइ: बेलाहोइबुङ |'' कालाउ येसु:ओबालाइ दोफा हिलि राजि जेङ्हि | 30 येसु:जेलाउ तोले चालि ओबालाइ दोफा योमहि कालाउ आधे तोलेगेलाइको भाअ्सिङ धन्यबाद पिहि | जेलाउ वा इङ्को तोले पोङ्हि कालाउ ओबालाइहेङ पिहि | 31 ओङ्को पहर इम्बालाइको मिसिया खुलिहि कालाउ इम्बालाइ येसु:हेङ नाल्लि दोअ्हि कालाउ वा इम्बालाइसो मान्हातेङ हानिहि इम्बालाइ एअ्घुरिङ्ता येसु:हेङ हासुबुङ मातिङ्हि | 32 उङ्को न्हेअ्मि द्याङ,उधिन्हेअ्मि काथा पाकाताङ हिघाहि,''जेलाउ येसु:दामाता केलाइदोफा काथापाकाताङ हिघाहि,केलाइ लिता मे जोलतेङ हिका भाइका अनुभब जेङ्तेङ हिघाहि | इदोइ जातिङ्भारि मन हाउसाइतेङ जेङ्तेङ हिघाहि जेदोङ पहर वा केलाइहेङ धर्मसास्तरको सत्ये माने खोलिपिधोङ्घाखे | 33 जेलाउ उङ्को न्हेमि द्याङ जाराजुरुकपा ल्होहि कालाउ यरुसलेमभारि घुरिहि | इम्बालाइ तेए चात्यागेलाइ कालाउ आरूङ ए,दोफाङ एलोङ थामेता जोमतेङ्हिका दुसुहि | उङ्को तेए चात्यागेलाइ कालाउ ओबालाइ दोफा हिका आरू द्याङ्गेलाइ दोअ्हि, 34 ''प्रभु येसु:जातिङ्कोदोङ सि:कासो सिन्हुतेङ ल्होका हि,कालाउ वा सिमोनको आगाता तिङ्चालाहि |'' 35 कालाउ न्हुसो उङ्को न्हेअ्मि दामाता जेदोङ जेङ्का हिघाहि इङ्को हिङ्पाहि | इम्बालाइ दोअ्हि,वा तोले पोङ्लाउ हेसा येसु:हेङ नाल्हि | 36 जेलाउ उङ्को न्हेअमि द्याङ इङ्को काथा गेलाइ पाकाताङ पालाउ,येसु:ताइमिङ चात्यागेलाइको माझाता जाहि | वा इम्बालाइहेङ दोअ्हि,''नेलाइहेङ सान्ति जेनाको |'' 37 कालाउ चात्यागेलाइ भाङ्भाङ्हि कालाउ मेनाङ थिहि | इम्बालाइते मासान दोअ्तेङ सोचोहि | 38 कालाउ येसु:दोअ्हि,''नेलाइ हाइपालि चिलिबिलि गिल्सुखेन्हा ? नेलाइदोङ तिङ्का काथा हाइपालि साङ्खा पासुखेन्हा ? 39 काङ्को खुर कालाउ खोकोइगेलाइ खाङ्सु ,का सत्ये हिघा | कासेहेङ साइतेङ खाङ्सु;खाङ्सु,काङ्को बिया कालाउ हारा हि | एलोङ मासानकोते जिउ कालाउ हारा मान्थुखे | 40 जेलाउ येसु:ताइको खुर खोकोइ तिङ्पाहि | 41 इम्बालाइ मेनाङ लेङ्चाका जेङ्नाङ झन खानधुरि पालि मादोअ्हि | इम्बालाइ सारबुसाइ जेङ्हि | येसु:इम्बालाइहेङ दोअ्हि,''हाइ नेलाइदोफा इता चाका-आमका आनेमाने हि ?'' 42 इम्बालाइ एलोङ टुक्रा खिङ्का हाया वासेहेङ पिहि | 43 इङ्को हाया र्-हुलि कालाउ ओबालाइको आगाता चाहि | 44 कालाउ येसु: ओबालाइ दोअ्हि,''जेलाउ का नेलाइदोफा हिघाखा का हाइ दोअ्घा इङ्को फोम पानु | का दोअ्घा,मोसाको व्यवस्थाता अगमबक्तागेलाइको पुस्तकता काङ्को बिसयता दोअ्का गोताङ काथा पुरा जेनावा |'' 45 कालाउ न्हुसो वा धर्मसास्तरता लेखेका गोताङ काथागेलाइ बुझिलि मन हिपिहि | 46 वा ओबालाइहेङ दोअ्हि,''इसिका लेखेका हि कि, ख्रिस्तहेङ सेतावा कालाउ सुमनिको दिना वा आरुङ सिन्हुतेङ ल्होकावा | 47 कालाउ यरुसलेमसो सुरूपातेङ गोताङ जातिगेलाइहेङ वाको मिङ ता पसुताप कालाउ पाप स्यामाको बारेता ये-बानाल जेङ्लि गोयाङ | 48 नेलाइ इदोइदोङ काथाको साक्सि जेङ्सुन्हा | 49 खाङ्सु,का काङ्को आबाको प्रतिग्या नेलाइकोता दिङ्गिलयाङ्का,कालाउ जेलाउ थेकापा का दोफा सरबुङ मानिङ्पा भरि नेलाइ इदोइदोङ सहरता हिसु |'' 50 कालाउ न्हुसो येसु:ताइको चात्यागेलाइहेङ बेथानिया थेकापा चुम्पुहि,कालाउ ताइको खुर तोल्हेतेङ ओबालाइहेङ आसिरबाद पिहि | 51 वा ओबालाइहेङ आसिरबाद पिकाताङ पालाउ,वा ओबालाइसो लाअ्न्हातेङ स्वर्ग हानिहि | 52 चात्यागेलाइ वाको आराधना पाहि | कालाउ न्हुसो इम्बालाइ यरुसलेम घुरिहि | ओबालाइ मारफाङ लेङ्चाहि | 53 गोताङ समय(बेला) परमेस्वरकोङ बाखानाइ पाकाताङ ओबालाइ (थानता) मन्दिरता हि |