15
दाइ ओनेगेलाइ बाइ आनाउगेलाइ नेलाइ बानाल पाका ए बानाल का नेलाइहेङ फोम पापालि इस्सा हि,जेदोङ ए बानाल नेलाइ ग्रहन पासुना,कालाउ इन्ता नेलाइ रहुमतेङ हिसुवाना | 2 इदोइ ए बानाल सो नेलाइको उदार जेङ्का हि,एदि नेलाइ माचतपताइसिङ हे पानु,माकुनु ते नेलाइ खान्धुरि पासुना | 3 हाइपालिदोनु जेदोङ निङ्घा इङ्कोहेङ झाराङ खान्तेङ बारका बिसयको रुपता इम्बालाइहेङ सोम्पि पिहि,पबित्तरो धर्मसास्त्तर आन्सार ख्रिस्त केलाइको पापको भाअ्सिङ सिपिहि | 4 वासेहेङ लिअ्हि, कालाउ पबित्तरो धर्मआन्सार सुमतेङ दिनाता वा सिन्चाल पाहि 5 वा केफासकोता, कालाउ तेन्हे झनाकोता देखाल जेङ्हि | 6 कालाउ न्हुसो वा एनोङ्दोङ समयता नासय खान्तेङ हेन्जा ओनेगेलाइ कोता एखेताङ देखाल जेङ्हि,इङ्को मध्ये हेन्जा जसो एला थेकापा हिदोङ हि कालाउ आधिमि सि:लि दोका हि | 7 कालाउ न्हुसो याकुब कालाउ झाराङ प्रेरितगेलाइकोता वा देखाल जेङ्हि | 8 झाराङ खान्तेङ न्हुसो समय माकोसिङ जलम जेङ्का द्याङ् कोता भाइपा काङ्को बुङ वा देखाल जेङ्हि | 9 हाइपालिपानु प्रेरितगेलाइ मध्ये का झाराङ खान्तेङ तुच्छा हिघा का प्रेरितदोलि योग्य मान्ठुघा | हाइपालिपानु का परमेस्वरको मण्डलिहेङ सन्ताइघा | 10 कालाउ का जेदोङ् हिघा इङ्को परमेस्वरको अनुग्रह सो हिघा,कालाउ का दोफा हिका वाको आनुग्रह खेर माजेङ्हि | भरु काते इम्बालाइ झाराङ खान्तेङ इस्तु परिस्रम पाघा | कालाउबुङ का माको, का दोफा हिका परमेस्वरको अनुग्रह दोङ | 11 ओदोङ भाअ्सिङ का जेङ्लाउबुङ नेलाइलाउबुङ ,केलाइ जेदोङ बानाल पानाखे,इङ्को नेलाइ खन्धुरि पाका हिसुना | 12 सि:कालाइसो ख्रिस्त सिन्चाल्हि, दोअ्तेङ बानाल पाखेपानु हेसा नेलाइ मध्ये आधिमि- आधिमि सि:कासो मासिन्हुताङ दोअ्तेङ दोअ्लि दोस्वाना ? 13 एदि सि:कालाइ मासिन्चाल्हि पानुते येसु: ख्रिस्तबुङ सिकासो सिन्हुपाका माको | 14 एदि केलाइको ख्रिस्त सि:कासो आरुङ सिन्हुपाका माकुनुते केलाइको बानाल व्यर्थ जेनावा | 15 इङ्को खान्तेङ हेन्जा केलाइ परमेस्वरको बारता धाताइका साक्सिगेलाइ ठोरिनाखे, हाइपालिपानु,वा ख्रिस्तहेङ सि:कासो सिन्चाल पाहि दोअ्तेङ केलाइ परमेस्वर बारेता गवाहि पिका हिनाहि |कालाउ साचिकोङ सि:कालाइ मासिन्हुताङ पानु वा ख्रिस्तहेङ मासिन्हुपाहि | 16 हाइपालिदोनु एदि सि:कालाइ मासिन्हुनु ख्रिस्त बुङ सि:कासो मासिन्हुहि | 17 येसु:ख्रिस्त आरोङ मासिन्हुहे पानुते नेलाइको खान्धुरि ब्यर्थ हि,कालाउ नेलाइ एला थेकापा ताइको पाप दोङ हिसुना | 18 ख्रिस्तता सि:कालाइबुङ नासाका हि | 19 एदि केलाइ इदोइ जिबनको भाअ्सिङ खिनिङ ख्रिस्तता आसा ताका हिनाहि पानु केलाइ झाराङ् परमेस्वर खान्तेङ इस्तु दुःख जेनाङ | 20 साचिकोङ ख्रिस्त सि:कालाइसो सिन्हुतेङ लोका हि | सि:कालाइ मध्येसो लाङ द्याङ हिघाहि | 21 हाइदोनु जेसाङ द्याङ्सो सि:कालोहि,एन्साङ्दोङ सि:कालाइको सिन्चालबुङ द्याङ पाहा सोलोहि | 22 हाइपालिदोनु जेसाङ आदमता झाराङ सिखे,एन्साङ्पातेङ येसु:ख्रिस्तता झाराङहेङ सिन्हु पाङ | 23 कालाउ झाराङ ताताइको पाला आनसार ख्रिस्त चाहि लाङ फल,कालाउ न्हुसो वाको पुर्न आगमनता ख्रिस्तको ताइकोङ्गेलाइ | 24 एला अन्तय लाङ, जेलाउ वा गोताङ सासन,गोताङ अख्तियार कालाउ सरबुङ नासा पातेङ परमेस्वर आबा हेङ राइजि सोम्पिका हि | 25 हाइपालिपानु वा ताइको सारा सतुरहेङ ताइको पाइतालालिता मातापा भरि वा राइजि पालि गोयाङ | 26 झारा खान्तेङ न्हुसो नासा पालिगोइका सतुर सि:का दोङ | 27 'हाइपालिदोनु परमेस्वर गोताङ काथा वाको पाइतालाको खाबाराता ताका हि |'' कालाउ या साफा हि,कि गोताङ काथा वाको खाबाराता ताअ्का हि''दोनाङ खिनिङ परमेस्वर ताइमिङ वाको खबाराता मान्थु,जाइ गोताङ काथा ख्रिस्तको खाबाराता ताअ्का हि | 28 जेलाउ गोताङ काथा वाको खाबाराता चुमाखे, कालाउ स्वयम चान वाको खाबाराता ह्यावा , जाइ गोताङ थोक वाको खाबाराता ताअ्खे, ताकि परमेस्वरदोङ गोताङ आनेमाने माझन जेनाको | 29 माकुनुते सि:कालाइको भाअ्सिङ बक्तिसता पाका हाइ अर्थ जेङ्हि ? सि:कालाइहेङ मासिन्हुपाहे पानुबुङ नेलाइको भाअ्सिङ द्याङ्गेलाइ हाइपालिपानु बक्तिस्ता र्हुखे ?दा 30 का चाहि हाइपालि हमेसा दाबब्याको धारता परितेङ हिखा | 31 दाइओने-कालाउ बाइआनौगेलाइ केलाइको प्रभु येसु:ता नेलाइको कारन का गर्भ पाखा ,कालाउ का दोअ्लि दाङ्का,कि दिनाङ-दिनाङ का सि:खा | 32 द्याङ्कोङ काथा पानुते ,एफिसता झारबारिको गपुसगेलाइदोफा काङ्को धुमसो कासेहेङ हाइ फाइदा जेङ्हि रो ? सि;कालाइ मासिन्हुका जेङ्नुते,''केलाइ चानाहि कालाउ आम्नाहि, हाइपालिपानु जुम्निते केलाइ सियाङ | 33 भ्रमता मापरिसु मारेम्का सगतहोइ केलाइको चरित्तरहेङ दाग लगाइखे | 34 होसता लोसु एला उसो पाप मापासु | हाइपालिदोनु हेथे हेङ ते परमेस्वरको ग्यान दोङ मान्थु | नेलाइहेङ लेदेरपालिको भाअ्सिङ का या दोअ्का हिघा | 35 कालाउ आधिमि हिअ्लउ''सि:कालाइ आरुङ्हेसा बान्चिखे,कालाउ इम्बालाइ हिसिका खालको जिउ चुम्तेङ ल्वाङ कुनु |'' 36 ओइ हाइदोङ मागिका ! जेदोङ नाथिङ्खेना इङ्को मासिसिङ सिन्हुका माजेङ्खे | 37 चाहि न्हुसो जेङ्का जिउ माको,कालाउ चालाइ चाहि खिनिङ थिङ्सुखेना,चाहे गहुम, चाहे आरु हिदोइबुङ किसिमको फल ह्याको | 38 ताइमिहेङ इस्सा लागिका बमोजिम परमेस्वर वासिहेङ एनोङ जिउ पिखे,कालाउ गोताङ खाल्को चालाइ हेङ वाकोङ जिउ पिखे | 39 गोताङ जिउ एनोङ्दोङ खाल्को माजेङ्खे | द्याङ्को जिउ एक खालको,कालाउ जिहा जुइलेङ्गेलाइको भेनेङ खालको,कालाउ पेसा माकारागेलाइको भेनेङ खालको,कालाउ हाया गेलाइको भेनेङ खालको | 40 कालाउ जिउ बुङ स्वर्गिय कालाउ पार्थिब हिखे | स्वर्गिय जिउको थाअ्साइका एनोङ खालको हि,कालाउ पार्थिब जिउको थाअ्साइका भेनेङ खालको हि | 41 सानेको थाअ्साइका एलोङ खालको,कालाउ तालिको थाअ्साइका भेनेङ खालको,कालाउ फुरुगेलाइको थाअ्साइका भेनेङ खालको हिखे | हाइपालिदोनु एनोङ फुरु भेनेङ फुरु खान्तेङ थाअ्साइका भेनेङ जेङ्खे | 42 सिकालाइको पुर्नरुथ्थान बुङ इस्काङ दोङ हिखे | जेदोङ जिउ बिनासता लिखे,इङ्को जिउ अबिनासता सिनुखे | 43 आनादारता इङ्को लिनाखे,महिमाता इङ्को सिनुखे | हुइकाता इङ्को लिनाखे,सरबुङ्ता इङ्को सिनुखे | 44 प्राकृतिकता इङ्को जिउ लिनाखे,कालाउ आत्मिक जिउता इङ्को सिनुखे | प्राकृतिक जिउ हिहेपानु आत्मिक जिउबुङ जातिङ्कोङ हिखे | 45 ओदोङ भाअ्सिङ इसिका लेखिका हि,''लाङ द्याङ आदम सिनुका प्रानि जेङ्हि |'' कालाउ न्हुसोको आदम जिबन पिका आत्मा जेङ्हि | 46 लाङ चाहि आत्मिकि माको,कालाउ प्राकृतिक हि,कालाउ न्हुसो चाहि आत्मिक जेङ हि | 47 लाङ द्याङ भोनोइ होइ बनिका हिघाहि,इङ्को चाहि पृथ्वि हिघाहि | न्हेतेङ द्याङ्चाहि स्वर्गको हिघाहि | 48 भनोइ होइ बनिका द्याङ भाइका हिघाहि,भनोइ होइ बनिका गेलाइबुङ इन्सिकाङ हिखे,कालाउ स्वर्गिय द्याङ जिस्काङ हि,स्वर्गको गेलाइ बुङ इस्काङ हिखे | 49 जेसाङ केलाइ भोनोइको द्याङको रूप भाङ्घाइ पाका हिनाहि, इन्साङ्दोङ स्वर्गको द्याङ्गेलाइको रूप भाङ्घाइनाखे | 50 एला दाइओनेगेलाइ-बाइअनेगेलाइ का नेलाइहेङ या दोअ्खा, बिहा, कालाउ हिति स्वर्गको राइजिको हकदार जेङ्लि मादावा,नाते बिनास,अविनासको हकदार जेङ्लि दावा | 51 खाङ्सु,का नेलाइहेङ एलोङ रहस्यको कथा दोताङ्का,केलाइ झाराङ माहिङ्नाखे,कालाउ केलाइ झाराङ्को परिबर्तन जेनावा | 52 ए घुरिताङ मिसियाको ए झिमिकता,सनाइको आखिरि गालाता | हाइपालिदोनु सानाइ धुइयावा,कालाउ सि:कालाइ हेलाउबुङ मासि:का जेङ्तेङ सिन्हुतावा |कालाउ केलाइको चाहि परिबर्तन जेनावा | 53 हाइपालिदोनु सि:कास्वभाब होइ मासि:का कालाउ इदोइ सि:लि तोम्का जिउ हेलाउबुङ मासि:का जिउ भङ्गाइलि गोइखे | 54 जेलाउ बिनासि होइ अबिनासि सि:लि तोम्का होइ हेलाबुङ मासि:का जिउ भाङ्गाइखे,लेखिका हि इङ्को बचन पुरा जेनावा,''सि:का बिजयता निअ्का हि |'' 55 'ओइ सि:का नाङ्को बिजय हिसो ?ओइ सि:का नाङ्को सरबुङ हिसो ?'' 56 सि:काको सरबुङ पाप,कालाउ पापको सरबुङ ब्यबस्था | 57 कालाउ परमेस्वर हेङ धन्यबाद ज्याको,जाइ केलाइहेङ केलाइको प्रभु येसु:ख्रिस्त पाहासो बिजय प्याङ | 58 ओदोङ भाअ्सिङ काङ्को प्रिय आनाउ ओने,स्थिर कालाउ अटल हि | प्रभुको कामता जेलाउबुङ बाराकाताङ हाने | हाइपालिपानु नेलाइ गिसुखेना,कि प्रभुता नेलाइको परिस्रम ब्यर्थ माजेनाङ |