14
प्रेमहेङ नेलाइको लक्सय बानाइसु , साचिकोङ्को आत्मिक बरदानगेलाइको भाअ्सिङ बारका निङ्का इच्सा ताअ्सु खास पातेङ अगमबानि पाका बरदानको भाअ्सिङ | 2 हाइपालि पानु जाइ अन्य भासागेलाइता धुइखे इङ्को द्याङ्गेलाइदोफा माको, कालाउ वा परिमेस्वर दोफा धुइखे | वा हाइ दोअ्खे हासुदोङ हाइबुङ माबुझिखे, वा पबित्तरो आत्मासो म्ह्रोनाका रहस्यको सत्ते काथागेलाइ धुइखे | 3 कालाउ अगमबानि पाका झाराङ परमेस्वर दोफादोङ पाखे | इम्बालाइको आत्मिकि ब्रिद्दि कालाउ सान्त्वानाको भाअ्सिङ वा धुइखे | 4 अन्य भासाता धुइका द्याङ ताइको आत्मिक ब्रिद्दि पाखे | कालाउ अगमबानिपाका द्याङ मण्डलिको आत्मिक ब्रिद्दि चुमाखे | 5 नेलाइ झाराङ अन्य भासा पासुदोकाका इस्सा पाखा,कालाउ इङ्को खान्तेङ झन इस्तु नेलाइ अगमबानि बोलेका का मन पाखा | मण्डलिको आत्मिक ब्रिद्दिको भाअ्सिङ हासुदोङ माने माखोलिहे पानु,अन्य भासापाका खान्तेङ अगमबानि पाका झाराङ खान्तेङ बारका हि | 6 दाइ ओनेगेलाइ-कालाउ बेजान ओनेगेलाइ एदिका नेलाइ कोता अन्य भासापाकाताङ लोघा,कालाउ नेलाइ कोता हिदोइबुङ खाल्को ग्यान माकुनु अगमबानि सिकस्या माचुमाघा पानु का सो नेलाइहेङ हाइ फाइदा जेङ्खे | 7 मुरलि कालाउ बिरा भाइका हुसि मान्थुका बाजा सो रेम्का धुवानि उलेखे पानु,हासु दोलि दोखे हाइ धुइतेङ हि ? 8 एदि सनाहि सो झालाझालापा धुवानि मापिहे पानु धुमको भाअ्सिङ हासु तियार जेनावा ? 9 नेलाइदोफा बुङ इस्काङ जेङ्खे | एदि बुझिलिदोङ मादोका सब्दगेलाइ नेलाइ ताइको देतोङ होइ दोसुखेना पानु नेलाइ हाइ दोतेङ हिसुना हासु बुझियावा ? नेलाइ ते भेरमाभाइकाङ धुइतेङ हिका जेङ्सुवाना | 10 सुमिङ्ता सायद हेन्जाङ खाल्को भासा हि | इङ्को हिदोइबुङ मानेहिन मान्थु | 11 एदि धुइका भासाको माने माबुझिका पानु ते धुइकाको भाअ्सिङ का बिदेसि जेनाङ्का,कालाउ इङ्को धुइका चाहि काङ्को भाअ्सिङ बिदेसि जेनावा | 12 एसापा नेलाइबुङ पबित्तरो आत्माको बरदान गेलाइको भाअ्सिङ हाउसाइका हिनाङ मण्डलिको कामता उपहार निङ्लि कोसिस पासु | 13 ओदोङ भाअ्सिङ अन्य भासा पाका वा इङ्कोको माने खोलिका सरबुङ्को भाअ्सिङ दोमचाकाइइयाको | 14 हाइपालिपानु, का अन्य भासाता दोमचाकाइलाउ काङ्को आत्मा दोमचाकाइखे,कालाउ साफा चाहि हिखे | 15 एलाका हाइपालि कुनु ? का आत्माता दोमचाकाइकायाङ्का,कालाउ पुन्दिङ्बुङ दोम्चाकायावा | आत्मा बाखिन पावा,कालाउ का पुन्दिङ होइ बुङ बाखिन प्याङ्का | 16 माकुनुते ना आत्माता परमेस्वरको बाखिन पालाउ बुझिलि मादोका बाहारको द्याङ नाङ्को धन्यबादको दोम्चाका न्हुसो आमिन एसा द्वावा ? जेलाउ कि ना हाइ दोकासो वा माबुझियावा | 17 नाते रेम्फा धन्यबाद पिखेना वाला,कालाउ वा उङ्को बो द्याङ्को हाइदोङ आत्मिक ब्रिद्दि मापावा | 18 का परमेस्वर हेङ धन्यबाद चदाइका,हाइपालिदोनु नेलाइ झाराङ खान्तेङ हेन्जा का अन्य भासाता धुइखा | 19 कालाउबुङ मण्डलिता अन्य भासाता ते हाजार सब्दगेलाइ धुइलि खान्तेङ भरु ताइकोङ पुन्दिङ होइ नालोङ सब्द बो गेलाइहेङ सिक्स्या पिलि गोयाङ दोतेङ का धुइलि मन पाहा | 20 दाइ ओनेगेलाइ कालाउ बाइ अनाउगेलाइ जामाल भाइका माजेङ्सु | खराबिको भाअ्सिङ जामाल जेङ्सु,कालाउ सोचिका कालाउ बिचारता परिपक्व जेङ्सु | 21 धर्म सास्त्तरता इसिका लेखिका हि,''अच्मको भासा धुइका द्याङ्गेलाइसो कालाउ बिदेसको नुइसो इदोइ द्याङ्गेलाइ दोफा का धुइयाङ्का,कालाउबुङ नेलाइ काङ्को काथा माहिङ सुवाना,परमप्रभु दोखे |'' 22 ओदोङ भाअ्सिङ अन्य भासागेलाइ खान्धुराइपाकालाइको भाअ्सिङ माको,कालाउ खान्धुरि माकालाइको भाअ्सिङ चिन्ह दोङ | कालाउ अगमबानिचाहि खान्धुरि मापाकालाइको भाअ्सिङ माको,कालाउ खान्धुराइगेलाइको भाअ्सिङ खिनिङ | 23 एदि गोताङ मण्डलिगेलाइ ए दोफाङ जोम्तेङ झाराङ अन्य भासाता धुइहेपानु,कालाउ खान्धुरि मापाका द्याङ्गेलाइ माबुझिकालाइ इन्ता लोहे पानु इम्बालाइ नेलाइहेङ पागाला दोवारो ? 24 कालाउ झाराङ अगमवानी पाकाताङ हिका बेला आधिमि खान्धुरि मापाका माकुनु बाहारको द्याङ इनता दुल्हि पानु वासेहेङ झाराङ खान्तेङ ताइको पापको लिका जेनावा,कालाउ वा झाराङ पाहासो जाचिन्हावा | 25 वाको हृदयता म्होनाका काथागेलाइ प्रकट जेनावा,कालाउ तुघुरतेङ वापरमेस्वरहेङ पुजियावा,काकाउ वा ''परमेस्वर नेलाइको माझाता हि'' दोअ्का घोसाना पाङ्का | 26 ओदोङ भाअ्सिङ दाइ-ओने,बाइआनाउगेलाइ एला नेलाइ हाइ पालि गोयाङ ? जेलाउ नेलाइ एदोफाङ जोम्लाउ,झाराङ दोफा ल्हे,सिक्स्या, प्रकास हिखे,अन्य(बो भासा) भासाको माने खोलिकापिका जेङ्खे |इदोइ गोताङ काथा आत्मिक बुद्धिको भाअ्सिङ पाको | 27 हासुबुङ अन्य भासाता धुइहि पानु न्हेमि खिनिङ माको इस्तुता सुमि झना थेकापा पाला-पालापा धुइयाको, कालाउ कालाउ एमि इङ्को को माने खोलिप्याको | 28 कालाउ माने खोलिका इन्ता हासुबुङ मान्ठुनु धुइका द्याङ मण्डलिको चौघाराता सिकापा ह्याको,कालाउ वा उङ्को दोफा ताइमिङ दोफा कालाउ परमेस्वरदोफा धुइयाको | 29 अगमबानि पाकालाइ चाहि न्हेमिसो सुमि ह्याको कालाउ आरु इम्बालाइ धुइका काथा रेम्फा जाचाइयाको | 30 कालाउ इन्ता हिका हिदोइबुङ एमि प्रकास जेङ्हि पानु लाङ बक्ताचाहि सिकापाइ ह्याको | 31 नेलाइ झाराङ पाला पालापा अगमबानि धुइलि दोसुवाना,कालाउ एसापा दोङ झाराङ धिरलि द्वावा कालाउ झाराङ हाउसाइलि द्वावा | 32 अगम बक्तागेलाइको आत्मा अगम बक्तागेलाइकोङ खाबाराता हिखे | 33 हाइपालिदोनु परमेस्वर गोलमालको परमेस्वर माको,कालाउ सान्तिको परमेस्वर हि | सन्तगेलाइको गोताङ मण्डलिता हिका मुन्धुम आनुसार, 34 तिरिगेलाइ मण्डलिको चौघाराता सिकापा ह्याको इम्बालाइहेङ धुइका आनुमाति मान्थु,कालाउ ब्यबस्था दोनाङ भाइपा इम्बालाइ खाबाराता ह्याको | 35 हाइदोङ काथाको बारेता नेलाइ हिलि खाङ्खे पानु ता-ताइको 'के' हेङ हिअ्ताको |हाइपालि पानु मन्डलिता बेबाला धुइलि लेदेर जेङ्का काथा | 36 हाइ परमेस्वरको बचन नेलाइसो सुरु जेङ्का रो ? हाइ नेलाइकोता खिनिङ लोकाहि रो ? 37 हासुबुङ ताइमिहेङ अगम बक्ता कालाउ आत्मिकि द्याङ समझिखे पानु काङ्को लेखिका काथा प्रभुको आग्यादोङ नु वा स्विकार पाको | 38 कालाउ हासुबुङ वाको वास्ता मापाखे पानु, कालाउ वाको बुङ वास्ता मापावा | 39 ओदोङ भाअ्सिङ दाइ -कालाउ बाइ आनाउगेलाइ,अगमबानि धुइलि उत्कट इच्सा पासु, कालाउ अन्य भासाता,धुइकालाइहेङ मारोकिसु | 40 कालाउ गोताङ काम सिस्तादोफाङ कालाउ रेम्फा तरिकासो हिलि गोइखे |