13
का द्याङ्गेलाइ कालाउ स्वर्गदुतगेलाइको भासाता धुइलाउबुङ काङ्कोता प्रेम मान्थुनु, का काथा भानाइगिल्का, घन्टी, कालाउ झाइ-झाइ पाका झ्याली खिनीङ जेनावा | 2 का दोफा अगमबानी पाका सरबुङ हि वाला,कालाउ गोताङ इन्ताको रहस्य कालाउ ग्यानगेलाइ गिलि द्वाङ्का वाला,कालाउ ''रा''गेलाइ तुगिल्लि दोका थेकापाको(धिगिल्का)(हतिपाका) गोताङ खान्धुरि काङ्को दोफा हि वाला, कालाउ का दोफा प्रेम चाहि मान्थुहे पानु का हाइबुङ माको | 3 एदि का सारा सम्पति द्याङ्गेलाइहेङ बाराइपिघा, कालाउ काङ्को जिउ ओपालि पिघा पानु, कालाउ का दोफा प्रेम मान्थु पानु कासेहेङ हाइबुङ फाइदा मान्थु | 4 प्रेम सहिलि दोका हिखे, कालाउ प्रेम दायालु हिखे,प्रेम इख माताअ्खे, नाते सेखिदोङ पाखे | 5 प्रेम थाङ्का माजेङ्खे, प्रेम नाते एकोरो हि, प्रेम ताइको काथाता स्वार्थ माजेङ्खे | कालाउ नाते झरको मानिखे, प्रेम सोझाङ चेरचोरोङ माजेङ्खे | प्रेम खाराबको हिसाव माताते | 6 प्रेम खराबता मालेङ्चाखे, कालाउ सहि सत्येता आनन्द हिखे | 7 प्रेम झाराङ्को गोताङ काथा धेर्य पुवर्क सोहिखे, गोताङ हेलाउबुङ साअ्खे, गोताङ काथाता आसा ताअ्खे, गोताङ काथाता हेलाउबुङ र्हुम्तेङ हिखे | 8 प्रेम हेलाउबुङ माअ्ताखे, अगमबानिगेलाइ बितितेङ हानिखे, भासागेलाइ बन्द जेनावा, ग्यान हतितेङ हानावा | 9 केलाइको ग्यान पुर्न मान्थु,केलाइको अगमबानि अपुर्ण हि | 10 कालाउ जेलाउ सिद्द्ता चाहि लावा , कालाउ इङ्को अपर्णता लाअ्तेङ हानावा | 11 जेलाउ का जामाल हिघाखा कालाउ जामाल कोनिङ धुइघाखा, जामाल कोनिङ बिचार पाघाखा,जामालको निङ भाइपा गालाबाजिगेलाइ पाघाखा | जेलाउ का धाना जेङ्घा, कालाउ, का इङ्को जामाल बेलाको चालगेलाइ लापिघा | 12 एला केलाइ आइना खाङ्ना भाइपा मिदुलुदुलुपा तिङ्नाखे,कालाउ इङ्को बेला चाहि, केलाइ जाहापा तिङ्लि दाङ | एला का आतुन्सा खिनिङ बुझिखा, ओदोङ बेला चाहि गोताङ गियाङ्का , जेसाङ का पुर्न रूपता नाल्नाका हिघा | 13 एला इदेइ सुम्लोङ काथागेलाइ हिका ह्याङ: खन्धुरि,आसा कालाउ, प्रेम इदोइ सुमलोङ हिखे, इम्लाइता झाराङ खाङ्तेङ बारकादोङ प्रेम |