Ephesians
इफिसियों
1
परमेस्वरको मन भाइपा प्रेरित जेङ्का पावलसो परमेस्वरको पबित्त्त्तरो जनगेलाइ जाइ एफिससता हि,कालाउ येसु:खान्धुरि ताअ्कालाइहेङ सेउपाखा | 2 केलाइको आबा परमेस्वर कालाउ प्रभु ख्रिस्ता झाराङहेङ अनुग्रह सान्ति जेनाको | 3 वा केलाइहेङ स्वर्गगिय थामेगेलाइता जाइ झाराङ ख्रिस्ता हिकालाइ हेङ आत्मिक आसिस पिका हि | केलाइको प्रभु येसु:ख्रिस्तको आबा परमेस्वरता बाखिनाइहि | 4 ख्रिस्त हिका केलाइहेङ परमेस्वर सुमिङको सिरजाइका खान्तेङ लाम्फोर्तिदोङ साल्हि हाइपालिपानु परमेस्वर ताइको आगाता निर्दोसि कालाउ पबित्त्तरो जन जेङतेङ हिलि द्वाको दोअ्तेङ केलाइहेङ माथारुको साल्हिका हि | 5 कालाउ सुमिङ सिरजाइकाको खान्तेङ लाम्फोर्तिसोङ परमेस्वर केलाइहेङ येसु:ख्रिस्त सो ताइको जामालगेलाइ बानाइलि निसित पाहि | इदोइ वाको मन हिघाहि(इच्छा) | इदोइता वा लेङ्चाका हिघा | 6 वाको इदोइ आचामाको अनुग्रहसो वा लेङ्चाका हि | ताइको मयारू चान ज्याइ एङ वा मायारू पाखे परमेस्वर केलाइहेङ वाको अनुग्रह हेन्जा पिहि | 7 केलाइ ज्याइ परमेस्वरता हिनाहि वाको हितिसो मुक्ति जेङका पाकाहि | परमेस्वरकोङ आसिम अनुग्रह होइ ताइको पाप केलाइसो केलाइ स्यामा निङका हिनाहि | 8 परमेस्वरको ग्यान कालाउ बुदिृसो इदोइ अनुग्रह मेनाङ उद्दार पिका हि | 9 ताइको म्होन्हाको योजना केलाइहेङ दोअ्पिन्हा | परमेस्वर इसिकाङ चाहिखे (भोखे) कालाउ वा इदोइ ख्रिस्तसो पालि योजना पाहि | 10 ठिक बेलाता ताइको योजना पुरा पालि परमेस्वरको उदेस्य | कालाउ स्वर्ग पृथ्विको गोताङ आनेमाने ख्रिस्त्ता खाबाराता पालि वाको योजना हिघाहि | 11 परमेस्वरको द्याङ जेङलि ख्रिस्ता केलाइ साल्का हिनाहि | वाको मन कालाउ योजना भाइपाङ परमेस्वर केलाइहेङ वाको द्याङ बानाइलि मन पाघाखे | वा गोताङ आनेमानेदोङ ताइको मनदोफा मिलिका बानाइखे | 12 ख्रिस्ता आसा ताका केलाइ लाङ द्याङ | कालाउ साल्का हिनाहि | ताकि वाको महिमाता केलाइ बाखिन चुमालि द्वाको | 13 नेलाइबुङ इन्सिकाङ जेङ्सु,नेलाइ ताइको मुक्तिको बारेता सत्ये सिक्स्या ये:बानाल हिङसुहोइमा | ये:बानाल हिङ्तेङ न्हुसो नेलाइ ख्रिस्ता खान्धुरि पासुन्हा | कालाउ परमेस्वर ताइको बिसेस दाकाइका (छाप) नेलाइकोता चुमाहि कालाउ नेलाइ हेङ पबित्त्तरो आत्मा पिहि जेदोङ वा प्रतिग्या पाका हिघाहि | 14 पबित्त्तरो आत्मा चाहि परमेस्वर ताइको द्याङ गेलाइहेङ प्रतिग्या पाका काथागेलाइ निङ्स्वाना दोअ्का एलोङ खाबारा हिघाहि | इङ्को परमेस्वरता हिकालाइहेङ पुरा लाअ्प्यावा | इदोइ गोताङको उदेस्य हि परमेस्वरको महिमाको बाखिन चुमालि | 15 ओदोङ बेलासोङ का दोमचाका बेलाता का दिनाङ नेलाइहेङ फोमपाका कालाउ नेलाइको भाअ्सिङ परमेस्वरहेङ धन्यबाद पिखा | का ओदोङ बेलासोङ एन्सा पालि तेङघा | 16 जेलाउ का प्रभु ये:सुता नेलाइको खान्धुरि कालाउ परमेस्वरको गोताङ द्याङगेलाइहेङ नेलाइको प्रेम बारेता हिङ्घा | 17 का दिनाङ् केलाइको प्रभु ये:सु ख्रिस्तको महिमामय आबा परमेस्वरदोफा दोमचाखा जेलाउकि वा नेलाइहेङ इसिका आत्मा प्याको ज्याइ परमेस्वरको बारेता ग्यान कालाउ जोल्का स्याइर् हे निनाको कालाउ वासिहेङ पुराङ् गिलि द्वाको बानाइ | 18 का दोमचाखाइखा,कि वा नेलाइको हृदयको मिसिहा हिअ्प्याको जेलाउ कि नेलाइ र् हुमका नाल्लि दोअ्सु ज्याइको भाअ्सिङ परमेस्वर नेलाइहेङ चुनिहि | कालाउ परमेस्वर ताइको पबित्त्तरो द्याङगेलाइ बचन पिका आसिस हेथे हेन्जा कालाउ महिमासालि हि इङकोबुङ गिस्वाना | 19 कालाउ केलाइ खुन्धुरिपाकालाइ को भाअ्सिङ परमेस्वरको सरबुङ हेथे माहान हि दोअ्को काथाबुङ गिस्वाना | 20 इङको महा सरबुङसो परमेस्वर ख्रिस्तहेङ सिका सो ल्होपाका हिघाहि कालाउ वा स्वर्गता वाको दामपाहा ख़ुरता ताअ्का हिघाहि | 21 परमेस्वर,ख्रिस्तहेङ गोताङ सासक,खाबारा,सारबुङसाइका राजागेलाइ खान्तेङ बुङ हेन्जा महत्वको बानाइहि | हिदोङबुङ या सुमिङको बानधाइति(दास),हिदोइबुङ सरबुङ खान्तेङ ख्रिस्त महत्वपुर्न हि | 22 परमेस्वर गोताङ काथागेलाइ ख्रिस्त खाबाराता ताअ्पिहि कालाउ मन्दलिको गोताङ काथाता वा ख्रिस्तहेङ दोङ सर्बोच्च खाबारा बानाइहि | 23 मन्दलि दोअ्का ख्रिस्तको जिउ | मन्दलि ख्रिस्तहोइ पुरा पुर्न हि ज्याइ गोताङ आनेमाने गोताङ पाहासो पुरा पापिखे |