गलातियों 6

दादा -ओने, बाइ-ओनेगेलाइ !नेलाइ ताइ मध्ये सो हासुदोङ भुलापलि दोस्वानाना नेलाइता ज्याइ आत्मिक हिसुना भुलपाका द्याङ्कोता हानेसु कालाउ वासेहेङ नर्म्रता जेङ्तेङ चुमासु| इङ्को काम नम्र जेङ्तेङ पालि गोइखे कालाउ होसपानु ! माकोनु नेलाइबुङ पापभारि तान्हि न्हास्वाना | 2 एमिसो -भेनेङ्को दुःखता साघाइसु, एन्सा पहेपानु नादोङ ख्रिस्टको वयवास्थाहेङ जातिङ्कोङ पालन पका जेङ्स्वाना | 3 एदि हासुबुङ मामानिका जेङ्काता बुङ तामिहेङ मानिनाङ्कोनिङ सम्झिखेपानु वादोङ ताइमिहेङ धोका पितेङ हिखे | 4 हासुदोङ ताइकोङ भाइपा भेनाङ दोफा तुलना मापाको | ताइको काम ताइमिदोङ जाचिसु कालाउ खेनिङ वा गर्बित जेङ्लि द्वावा | 5 झाराङ्दोङ ताइको अभिभारा ताइमिङ सुइकार पाको | 6 ज्याइ परमेश्वर सिकस्या ह्रुतेङ हिकाहि वा ताइममिता हिका गोताङ सतगुनगेलाइ ताइकोदोफा धिरली लोकालाइहेङ बाखाराइप्याको | 7 ताइमि-ताइमिहेङ धोका मापिसु ,ना परमेस्वरहेङ ठोगिलि मादोवाना | द्याङ जेदोङ थिङ्खे इङ्को सेखे | 8 एदि हासुबुङ टाइकोङ पापपुर्न मिलिङ्ता थिङ्का काम पाखेपानु वादोङ बिनास उब्जाइपाखे कालाउ हासुदोङ आत्माको मिलिङ्ता थिङ्खे पानु वा आत्मासो अनन्त जिवन उब्जाइपाखे | 9 रेम्का काम पाकाता केलाइ माइलि मान्थु | एदि केलाइ काम पालि मारोकिताङ्पानु थिक समयता केलाइ सेका ल्होपालि लिनाङ | 10 जेलाउ केलाइ अवसर निङ्नाखे, झाराङ्हेङ साघाइपाइखे | बिसेस पातेङ इम्बालाइहेङ ज्याइ खान्धुरि जाहानको हि | 11 इदोइ का ताइमिङ लेखिदोङ्खा, खाङ हेथे र्- ङ्का पातारा का लेखिदोङ्खा | 12 हासुबुङ नेलाइहेङ खाताना पालि कर लागायाङ वाला | अरुदोङ इम्बालाइहेङ मान्याको दोअ्का आसाता खेनिङ इम्बालाइ इन्साङ पाखे| ख्रिस्तको क्रुसहेङ खिनिङ मानिकाता इम्बालाइहेङ गिल्गीलाङ कि दोअ्तेङ इङ्को थिखे | 13 ज्याइ खाताना पापालि बलदिखे, इम्बालाइ ताइमिङ व्यवस्था मामानिखे | कालाउ नेलाइहेङ खतना पापपालि खाङ्खे |एदि इम्बालाइ ताइको इच्सा पुरा पापालि दोहेपानु इम्बालाइ ताइमिङ्ता गर्व पाखे | 14 का चाहि इन्सिकाता काथाता गर्व मापाङ्का दोअ्का आसा पाखा| का केलाइको प्रभु येसु: ख्रिस्तको क्रुस्ता गर्व पाङ्का | क्रुस्तपाहासो सुमिङ काङ्को भाअ्सिङ सि:का हि कालाउ सुमिङ्को भाअ्सिङ् का सि:लि दोहोइका हिघा | 15 खाताना पालि कि मापालि इङको हिदोइबुङ महत्वपुर्न काथा माको |महत्वपुर्न काथा यादोङ हि, कि परमेस्वरदोङ बानाइका नावा द्याङ जेङ्लि| 16 इदोइ व्यवस्था पालान पाका परमेस्वरको गोताङ जनगेलाइ कालाउ परमेस्वरको गोतेङ द्याङ्गेलाइ दोफा सान्ति कालाउ करुना ह्याको | 17 एला इता हासुबुङ कासेहेङ हेङ्जा कस्त मापिसु | काङ्को जिउभरि चोतको दागगेलाइ हि |इदोइ दागिगेलाइ प्रमान पिखे कि का ख्रिस्ट येसु:कोङ हिघा | 18 काङ्को दादा-ओने, बाइ-ओनेगेलाइ ! केलाइको प्रभु येसु: ख्रिस्तको अनुग्रह नेलाइको आत्माता हृयाको दोअ्तेङ का दोम पाखा | आमेन |