इफिसियों 2

हानिका दिन गेलाइता ताइको पापगेलाइ कालाउ परमेस्वरको बिरुदि कामगेलाइ सो नेलाइको आत्मिकि जिबन सिका हिघाहि | 2 एइ बुङ,लाम्फा नेलाइ इन्सिकाङ पापगेलाइता हिघा सुखेन्हा | नेलाइ सुमिङकोङ द्याङगेलाइ भाइपाङ बान्चितेङ हिघा सुखेन्हा | नेलाइ बादेलको दुस्त सरबुङगेलाइको सासक दोफा हानिसुन्हा | एलाबुङ परमेस्वरहेङ मामानिकागेलाइ इङकोङ आत्मा होइ काम पादोंङ्खे | 3 हानिका दिनागेलाइता केलाइ झाराङदोङ इङ्को द्याङगेलाइ भाइपाङ बान्चिका हिघान्हा हि | केलाइ ताइको पापमय स्वभाब हेङ लेङचापालि भोगान्हाहि | केलाइको मन होइ जेदोङ भोगाखे एन्साङ पान्हाहि | केलाइ जेसाङ हिघान्हा हि इदोइ पापसो परमेस्वरको चेर भोगिलि गोइका हिघाहि | हाइ पालिपानु केलाइ आरु भाइपाङ् हिघान्हाहि | 4 कालाउ परमेस्वरको क्रिपा माहान हि कालाउ परमेस्वर केलाइहेङ हेंन्जाङ मायारु पाखे | 5 केलाइको पापको कारन केलाइ ख्रिस्त दोफा नावा जिबन पिहि | केलाइ परमेस्वरको आनुग्रह होइ बान्चिपाका हिनाहि | 6 कालाउ परमेस्वर केलाइहेङ ख्रिस्तदोफाङ तोअ्ल्हेतेङ ताइमिदोफा स्वर्गिय थामता ताअ्हि | इसिका जेङ्का कारन केलाइ ख्रिस्त दोफा ये जेङतेङ हिनाङ | 7 भबिस्यता लोका गोताङ सान्तानहेङ (चानचुहेङ) ताइको अनुग्रह हेथे हेन्जा हि दोअ्का आसिम सम्पति तिङपालि परमेस्वर एसा पाका हि | ख्रिस्त ये:सुमा हिका केलाइ दोफा दायाबान जेङतेङ परमेस्वरको उङ्को अनुग्रह तिङपाखे | 8 नेलाइ अनुग्रहको बान्चिपाका हि | कालाउ इङको आनुग्रह खान्धुरिसो निङ्का हिसुन्हा | नेलाइ ताइमिदोङ नेलाइहेङ माबान्चिपाहि | बरु इङको एलोङ परमेस्वरको उपहार हिघाहि | 9 नेलाइ ताइको कामहोइ बान्चिका माको ओदोङ भाअ्सिङ हासुकोबुङ गर्ब पालि मादोवाङ | 10 केलाइ जिसिका हिघान्हाहि इन्सिकाङ परमेस्वर बानाइहि | ख्रिस्त ये:सुता रेम्का काम पाकालाइहेङ केलाइहेङ नावा जिबन पिका हि | केलाइको भाअ्सिङ इङ्को रेम्का कर्म गेलाइ परमेस्वर लाम्फासोङ् मिलिपाखे | रेम्का काम पाकाताङ केलाइ बान्चियाइने दोअ्तेङ परमेस्वर एसा पाका | 11 नेलाइ गैर यहुदि (आन्यजाति) जेङतेङ जोलोमसुन्हा | यहुदि गेलाइ नेलाइहेङ ''खाताना मापाका दोअ्खे | नेलाइको जिउ द्याङको खुरहोइ खाताना पाका हि | 12 याद ताअ्सु,हानिका दिना गेलाइता नेलाइ ख्रिस्त सो भेङचाकाइ का हिघासुखेन्हा | नेलाइ इस्राएलको नागारि मान्थु सुधांसु खेना | कालाउ प्रतिग्याको बाचा नेलाइदोफा मान्थुघाखे,जेदोङ परमेस्वर वाको द्याङगेलाइ दोफा पाका हिघाहि |नेलाइ आसा माकोसिङको सुमिङता बान्चिका हिघासुधाना कालाउ नेलाइ परमेस्वरहेङ मानाल्घा सुखेन्हा | 13 एइ 'ए''समयता नेलाइ परमेस्वरसो दुरे हिघासुखेन्हा | कालाउ एला नेलाइहेङ परमेस्वरसो भेरपा चुमाका हि | ख्रिस्तको हितिसो नेलाइहेङ परमेस्वर मेनाङ भेरपाङ चुमाका हि | 14 ख्रिस्तको कारनसो एला केलाइ सान्ति निङका हिसुन्हा |ख्रिस्त केलाइ किधिन्हिमिहेङ ऐ बानाइका हिनाहि | यहुदि कालाउ गैर यहुदि गेलाइ माझाता बेरेम खेरेका भाइपाङ लाअ्न्हाका हिघाहि | इम्बालाइ ता-ताइमिता मन माताधाखे | कालाउ ख्रिस्त ताइमिङको जिउहोइ मन्दामाताका खोराइका बेरेम भापापापिहि | 15 यहुदि नियमगेलाइ हेन्जा कालाउ आग्यागेलाइ हिघाहि | कालाउ ख्रिस्त ब्यबस्थाहेङ एधा भासिङ दोअ्पा पिहि | द्याङगेलाइको इदोइ न्हेमि भेनेङ जेरहेङ ताइमिता एनौङदोङ नावा द्याङ बानाइलि कालाउ एसापा सान्ति चुमालि ख्रिस्त उदेस्य हिघाहि | 16 क्रुससो ख्रिस्त न्हें जेर माझाको मान्दामाताका दोअ्पापिहि कालाउ इम्बालाइहेङ एलोङदोङ जिउता मिलिपापिहि | ख्रिस्त इम्बालाइहेङ परमेस्वर भारि तान्हिलि भोघाखे | वा इङ्को कामको मन्दामाताका क्रुसता सेअ्तेङ पाहि | 17 ख्रिस्त लोहि कालाउ नेलाइको माझाता सान्तिको बानाल पाहि ज्याइ परमेस्वरसो दुरे हिघाहि | कालाउ नेलाइकोता सान्ति बानाल पाहि ज्याइ परमेस्वरको भेरपा हिघाहि | 18 एइ,ख्रिस्तसो केलाइ झाराङहेङ एलोङ आत्मासो आबाकोता लोका खाबारा पिहि | 19 ओदोङ भाअ्सिङ नेलाइ बासालाइ कालाउ परदेसि माको | नेलाइबुङ परमेस्वरको पबिततरो जेन दोफाङ नागरिक जेङका हिसुन्हा | नेलाइ परमेस्वरको जाहानको सदस्यगेलाइ दोफा बुङ मिलिका हिसुन्हा | 20 नेलाइ खान्धुराइ परमेस्वरको सा,जेदोङ प्रेरित गेलाइ कालाउ अगमबक्तागेलाइ सो जग बानाइका मिलिङता बनाइका हि | ख्रिस्तदोङ ताइमिङ साको मुल जग उन्थुइ हि | 21 इङको गोताङ सा ख्रिस्त गासिका हि | इङको प्रभुता पबित्त्तरो इस्वररुको सा जेङतेङ बाराखे | 22 कालाउ ख्रिस्तता नेलाइबुङ भेनेङ गेलाइ दोफाङ बानाइका हिसुन्हा | आत्मासो नेलाइबुङ इसिका एलोङ थामे जेङदोङसुखेन्हा जेता परमेस्वर हि |