इफिसियों 3

का ख्रिस्त ये:सुको कैदि,कालाउ नेलाइका बुङ एलोङ कैदि ज्याइ यहुदिगेलाइ माको | 2 जातिङको नेलाइ गिसुखेना कि परमेस्वर ताइको अनुग्रहहोइ नेलाइहेङ साहायता पालि कासेहेङ इदोइ काम सुम्पिका हि | 3 परमेस्वर कासेहेङ वाको म्होनाका योजाना दोअ्पिहि | याको बारेता आधे लेखिलि दोहोइका | 4 कालाउ का लेखेका इङको काथागेलाइ पदेहे पानु ख्रिस्तको बारेता म्होनाका सत्येते का बुझिका दोअ्का नेलाइ गिलि दोअ्स्वाना | 5 लाम्फा-लाम्फाको द्याङगेलाइ इङको म्होनाका सत्येता दोअ्पिका मान्थुघाखे कालाउ एला आत्मासो इङको म्होनाका रहस्य वाको पबित्तरो प्रेरितगेलाइ कालाउ अगमबक्ता गेलाइसो दोअ्पिका हि | 6 म्होनाका सत्येता एदोइ दोङ: परमेस्वर ताइको यहुदिगेलाइहेङ् पिका इङकोङ काथागेलाइ गैर यहुदि गेलाइबुङ निनाङ् | गैर-यहुदिगेलाइ यहुदिगेलाइ दोफाङ एलोङदोङ जिउता जेनाङ कालाउ ख्रिस्त ये:सु तपिका परमेस्वरको बचनको सहभागि जेनावा |ये:बानालको कारनसो गैर यहुदिगेलाइ इदोइ गोताङ निनावा | 7 परमेस्वरको बिसेस अनुग्रह होइ,का ये:बानालको एलोङ सेबक जेङघा | वा ताइको सरबुङसो कासिहेङया अनुग्रह पिकाहि | 8 परमेस्वरको द्याङगेलाइ मध्येका झाराङ खान्तेङ तुच्स हिघा | कालाउ वा कासेहेङ ख्रिस्तको अनन्त धनरूपि ये:बानालको बारेता गैर यहुदिगेलाइ माझाता बानाल पालि इदोइ उपहार पिहि | इङको धनको महिमा गिलि मादोपाङ हि | 9 कालाउ परमेस्वर कासेहेङ वाको म्होनाका सत्येताको योजना बारे गोताङ द्याङगेलाइहेङ दोअ्पिलि काम पिहि,इङको सत्येता लाम्फोर्तिसोङ वाकोता म्होनाका हिघाहि | वादोङ परमेस्वर हि ज्याइ गोताङ आनेमाने सिरजाइहि | 10 वाको उदेस्य हिघाहि कि स्वर्गिय थामेता गोताङ सासकगेलाइ कालाउ आधिकारिगेलाइ परमेस्वर ताइको ग्यान भेनेङ भेनेङ पाहा सो तिङपाखे दोअ्का ग्याको | 11 युगौ लाम्फोर्ति परमेस्वर बानाइका योजना भाइपा इङको पाका हि | ताइमिदोङ योजना पाका भाइपाङ वा इङको पाहि | वा इङको केलाइको प्रभु ख्रिस्त ये:सु पाहासो पाहि | 12 ख्रिस्तता केलाइ परमेस्वरको आगा निर्धक्क जेङतेङ खान्धुरि दोफा जाअ्लि दोअ्स्वाना | ख्रिस्ता खान्धुरिसो केलाइ इदोइ पालि द्वाङ | 13 ओदोङ् भाअ्सिङ का नेलाइहेङ सेउपाखा नेलाइको कारन काङको कस्तगेलाइ तिङतेङ नेलाइ हरेस माचासु कालाउ आसाबुङ मासेअ्सु | काङको कस्त नेलाइको ता आदार चुमावा | 14 ओदोङ भाअ्सिङ का आबाको आगाता तिरु थोका, 15 स्वर्गको कालाउ पृथ्विको गोताङ जाहान वाको सो दोङ वाको मिङ र् हुन्खे | 16 का आबाहेङ ताइको महिमामय सम्पति भाइपाङ नेलाइहेङ सरबुङ प्याको दोअ्तेङ दोमचाका इखा,कालाउकि ताइको आत्माता नेलाइ बालियाका जेङलि दोस्वाना | वाको आत्मापाहासो वा नेलाइहेङ इङको सरबुङ प्यावा | 17 नेलाइको खान्धुरिहोइ ख्रिस्त नेलाइको हृद्यता ह्याको दोअ्तेङ का दोमचाखा | का दोमचाखा,कि,ख्रिस्तको प्रेमको माहानता बुझिका सरबुङ परमेस्वरको गोताङ द्याङगेलाइ निनाको | 18 कालाउ दोमचाङका कि परमेस्वरको गोताङ नेलाइ हेङ कालाउ परमेस्वरको पबित्त्तरो द्याङ ख्रिस्तको प्रेमको माहानता बुझिका सरबुङ निनाको |का इदोइ बुङ दोमचाङका कि वाको प्रेमकोगोताङ उताको,लिताको नेलाइ बुझिलि द्वाको | 19 ख्रिस्तको प्रेम द्याङको सरबुङसो बाहार हि | कालाउ नेलाइ इङ्को प्रेम बुझिलि दोसु दोअ्का काङको दोमचाखा | जेलाउ नेलाइदोङ परमेस्वरको पुरा जेङतेङ पोङघा स्वाना | 20 परमेस्वरको सरबुङ जेदोङ केलाइ लिता काम पातेङ हि,इङको केलाइ सोचिका कालाउ फोमपाका खान्तेङ हेन्जा पालि द्वाङ | 21 मण्डलिता कालाउ ख्रिस्त ये:सुता दिनाङ दिनाङ कालाउ युग-युग थेकापा वाको महिमा जेङतेङ ह्याको | आमेन |