11
नेलाइ काङ्को आतुन्सा हाइदोङ मागिकाता सहितेङ हिपिली गोइका हि ओदोङ भाअ्सिङ सेउपाखा सहिपिसु | 2 इस्वरिय दाहाहोइ का नेलाइ दोफा डाहि जेङ्का हिगा | एनोङ्दोङ 'के' को पबित्तरो दरवाइनिको(बेहुली) रूपता नेलाइहेङ प्रस्तुत पालि का ख्रिस्तदोफा नेलाइको बिहुपालि र्-हेपिघा | 3 कालाउ जेसाङ पुहाँया ताइको चातुराइसो ह्ब्बाहेङ धाताइहि, इन्साङ्दोङ ख्रिस्तादोफा नेलाइको धाताइका मान्थुका कालाउ माआइथि भक्तिसो नेलाइको बिचारगेलाइ न्म्रोता जेनावा बे दोअ्तेङ का थितेङ हिघा | 4 हाइपलिपानु एदि हासुबुङ द्-याङ लोतेङ केलाइ बानाल पाका खान्तेङ भेनाङ येसु:हेङ बानाल पाहि पानु |कालाउ नेलाइ निङ्का आत्मा खान्तेङ भेनाङ आत्मा नेलाइ ग्रहन पासुनापानु नेलाइ निङ्का ये:बानाल खन्तेङ भेनेङ ये:बानाल ग्रहन पासुनापानु, नेलाइ झाराङ्को आगाता सोझाङ तुगुरतेङ सेउपासुखेना रोइसो | 5 हाइपालिपानु का बिचार पाका हिघा,का हिदोइबुङ काथाता इङ्को मुख्य प्रेरितगेलाइ खान्तेतेङ कम मान्थुघा | 6 कालाउ का एकदम सिल्लि बक्ता माकोलाउबुङ काङ्कोता ग्यानको इन्सिका कमि मान्थुघा | इदोइ काथा केलाइ गोताङ खाल्को नेलाइहेङ जाहापा तिम्पाप्याङ | 7 ताइमिहेङ म्हुइका पातेङ नेलाइहेङ बार्का बानायाङ्का दोअ्तेङ परमेस्वरको ये:बानाल का नेलाइहेङ ता:का हिम्पाकाता हाइ का पाप पाघा रो? 8 नेलाइको सेवापालि आरु बो' मन्डलिसो साघाइका ताका कौरि चुमातेङ का इङ्को मण्डलीगेलाइहेङ लुतिघा | 9 नेलाइदोफा हिलाउ काङ्कोता हाइदोङ मान्थुघाहि कालाउबुङ का हाइकोङ कमि माजेङ्घा, हाइपालिपानु म्केडोनियासो लोका ओनेगेलाइ काङ्को मान्थुका का पुरा पापिहि | ओदोङ भाअ्सीङ हिदोइबुङ किसिमको नेलाइहुता भार जेनावा बे दोअ्तेङ का ताइमिहेङ रोकिघा |आरोङ न्हुसोबुङ रोक्याङ्का| 10 ख्रिस्तको सत्येता काङ्कोता हि, कालाउ अखैयाको थामेगेलाइता काङ्को इदोइ गर्वहेङ हासुबुङ रोकिली मादावा| 11 हाइपालि? का हाइ नेलाइहेङ प्रेम मापाखा दोअ्तेङ्सा रो? परमेस्वर गिकाहि,का नेलाइहेङ प्रेम पाखा | 12 का जेदोङ कामं पादोङ्खा इङ्को पातेङ्सा हायाङ्का, ताकि इङ्को दयाङ्गेलाइको दाबिपाका सत्ये तिम्पालि द्-वाको | जाइगेलाइ धाकदोफाङ पाको सेवाकामगेलाइ केलाइकोङ सामान दोअ्तेङ दोअ्खे | 13 हाइपालिदोनु इन्सिका दयाङ्गेलाइ धाताइका प्रेरितगेलाइ कालाउ धाताइका काम पाकालाइदोङ, कालाउ ख्रीस्टको प्रेरितगेलाइको भेस गुअ्तेङ हिगिल्कालाइ खिनिङ | 14 कालाउ इङ्को हाइदोङ भर्बुसाइका काथा माको, हाइपालिपानु साइतानबुङ फाइसालामका स्वर्गदुतकोगेलाइको भाइकाङ रूप बदेलखे | 15 ओदोङ भाअ्सिङ इदोइ हाइदोङ भार्बुसाइको काथा माको, कि वाको बानधाइतिगेलाइबुङ धर्मिकताको बानधाइतिगेलाइको रूपता ताइको भेस बदेलखे |इम्बालाइको अन्त इम्बालाइको काम आन्सारको अन्त्य जेनावा | 16 का आरोङ दोअ्ताङ्का , हिदोइबुङ दयाङ कासेहेङ हाइदोङ मागिका दोअ्तेङ मासोच्याको , एदि नेलाइ कासेहेङ इन्सिका सम्झीसुखेना पानु हाइदोङ मागिका भाइपाङ ग्रहनपासु, जेसाङ काबुङ हाइदोङ बलदिली ड्वाको | 17 काङ्को इदोइ घमन्डको निस्चयता , का प्रभुको खाबाराता माको ,कालाउ हाइदोङ मागिनाङ भाइपा धुइतेङ हिघा | 18 हिन्जाङ सुमिङ्को काथागेलाइता बलदिकानाङ काबुङ बलदिकाङ्का | 19 नेलाइ ताइमिङ इदोइझोको बुद्दिमान जेङ्का हिसुना, कि लेङ्चातेङ हाइमागिकालाइहेङ सहिपिसुखेना | 20 हाइपालिपानु हिदोइबुङ द्-याङ नेलाइहेङ बानधाइति बानायावा,कालाउ नेलाइहेङ ताइको सिकार बानायावा, कालाउ नेलाइसो फाइदा पातेङ घाक जोमाइपातेङ नेलाइको नुइता चाउरेलाउबुङ नेलाइ गोताङ सहेस्वाना | 21 का लेदेरतेङ सुइकार पाङ्का, हाइपालिपानु केलाइ चाहि इदोइ गोताङ सहिली मादोनाहि |कालाउ हासुबुङ हिदोइबुङ काथाता बलदिहेपानु, काबुङ इङ्को काथाता बलदिकाङ्का |एइ का हाइदोङ मागीका भाइपाङ दोअ्खा | 22 हाइ इम्बालाइ हिब्रु गेलाइ | काबुङ हिब्रुदोङ | हाइ इम्बालाइ अब्राहामको सनतान गेलाइ ? काबुङ्ते रो | 23 हाइ इम्बालाइ ख्रिस्तको सेवकगेलाइ? का झन अझङ असल सेवक , पागाला भाइपाङ का नुइ धुइतेङ हिगा | का हिन्जाङ परिस्रोम पाघा| झ्याल्खानाता हिन्जाङ खेप परिघा| गान्दिली मादोपाङ द्वावालीहोइ म्हे निन्चाघा| सि:काको नुइता बारामबार परेघा | 24 ना खेप का यहुदिगेलाइको खुरसो ए कम न्हेकुरि खेप द्-वालीहोइ म्हेहि | 25 सुमखे कासिहेङ लाठिहोइ दानाइहि | एखे उन्थुहोइ तोहि | सुमखे का धोलका जाहाज ध्वस्त जेङ्हि | ए दिना नितिम ,ए दिना न्हिसिन का समुन्द्रताङ हिघा , 26 काङ्को बारामबारको यात्राता का झोरागेलाइको जोखिमता परेघा, डाकागेलाइको जोखिमता, बोमिगेलाइको जोखिमता, सहरको जोखिमता, उदाउदाङ्का थामेको जोखिमता, सुमुन्द्रको जोखिमता धाताइकाको ओनेगेलाइसोलोका जोखिमता | 27 परिस्रोम कालाउ दु:खता हेथे-हेथे न्हिसिनता माजिम्सीङ, म्हितुपाङ कालाउ चि:माआम्सीङ, बारम्बार लाखता, चुङ्काता कालाउ हाइदोङ मान्ठुकाता परिघा | 28 कालाउ भेनेङ काथागेलाइ बाहेक गोताङ मन्दलिगेइको चिन्ता काङ्को हुता हि | 29 हासु आधामाराका हि , कालाउ का चाहि मान्थुघा ? हासु पापता फोसेनाका हि ,कालाउ का चाहि लोकोबोकोका माजेनाङ्का ? 30 का गर्व पालीदोङ गोइनु,का ताइको आदामाराका:तिम्पाका काथाता गर्व पाङ्का | 31 प्रभु येसु:को परमेस्वर कालाउ आबा जाइ हेलालाउबुङ धन्यको हि, वा हिका हि, का माधाताइका | 32 दमसकसता अरिट्स राजाको हाकिम कासेहेङ रिम्ली दमसकस सहरता पाले ता: हिघाही| 33 कलाउ बेरेमको एलोङ खिरकिसो दालोता तातेङ कासेहेङ लेता हुल्पातेङ का वाको खुरसो खाअ्घा |