9
हाइ का स्वतन्तर मान्थुघा? हिका ! हाइ का एमि प्रेरित माको? हाइ का केलाइको प्रभु येसु:हेङ तिङ्का मान्थुघा ? हाइ नेलाइ प्रभुता काङ्को कामको सेका फल माको रो? 2 का बोगेलाइको भाअ्सिङ प्रेरित माकोलाउबुङ कमसे कम नेलाइको भाअ्सिङ ते हिघा, हाइपालिपानु प्रभुता काङ्को प्रेरित पदको साप नेलाइदोङ हिसुना | 3 काङ्को बिसयको बिरुद्ता फुकालाइहेङ ,नेलाइको भाअ्सिङ काङ्को जवाफ याङ जेनाङ 4 हाइ केलाइहेङ चाका आम्का खाबारा ,मान्थु र ? 5 हाइ केलाइहेङ्बुङ आरु प्रेरितगेलाइ भाइपा प्रभुको ओनेगेलाइ कालाउ केफास भाइपाङ केलाइहेङ बुङ 'बे'चुम्तेङ हानिलि केलाइको खाबारा मान्थु रो? 6 कालाउ हाइ बर्नाबास कालाउ का खिनीङ ताइको भाअ्सिङ जिवन बान्चिपालिको काम पालि गोइखे | 7 ताइकोङ खर्च पातेङ हासु सेनाको काम पाखे ? अगुरको मिलिङ्ता थिङ्तेङ फल हासु माचाखे रो ? कालाउ हासु ताइको गाइ पोसिते दुधे माचाङ ? 8 हाइ या गोतेङ काथागेलाइ का द्-याङ्को नजरसो खिनिङ दोअ्खा रो? हाइ परमेस्वरको नियमबुङ इस्काङ माजेङ्खे ? 9 हाइपालिपानु मोसाको व्यवस्थाता लेखिका हि:''दाउनि पाका पियागेलाइको नुइता मुखाउरि माठुम्सु कालाउ इदोइहेङ चालि आम्लि सो मारोकेसु |'' हाइ परमेस्वरको पियागेलाइको बिसयता चिन्तापाखे रो | 10 हाइ वा केलाइको भाअ्सिङ दोङ इदोइ दोअ्का माको रो? केलाइको भाअ्सिङ इदोइ लेखेका हि | हाइपालिदोनु चोइका कालाउ दाउनि पाका उमको आधे भाग उम लिङ्लि आसासो चोइखे कालाउ दाउनि पाखे |'' 11 एदि केलाइ इम्लाइगेलाइको माझाता आत्मिक चालाइ बिका हिनाहि पानु, ? कालाउ इम्बालाइको भौतिक आनेमाने चेहेपानु, हाइ उङ्को अति जेङ्जि रो ? 12 एदि जेलाउ बोगेलाइसो नेलाइ दोफा एन्साङ सम्पतिको खाबारागेलाइ दाबि पाहेपानु हाइ केलाइको झन हेन्जा हक मान्थुरो ? 13 हाइ नेलाइ मागिसुखेना मुन्दिरता सेवा पाका मन्दिरसोङ चालि आम्लि निनाङ ? हाइ नेलाइ मागिसुखेना बेदिता भेति पिका गेलाइ भेतिको भाग निनावा ? 14 ये-बानाल, बानाल पाकागेलाइ बुङ इस्काङ ,ये-बानाल पाका द्-याङगेलाइ ये:बानाल काम पाकासोङ जिवन बान्चिपाको गोइखे दोअ्तेङ प्रभु आग्या पिहि | 15 कालाउ इदोइ खाबारागेलाइ मध्येसो का हिदोइबुङ कोङ चालाइका मान्थुघा , कालाउ का काङ्को भाअ्सिङ इसीकाङ वेबास्था जेनाको दोअ्तेङ का इदोइ लेखेका मान्थुघा| हाइपालिपानु काङ्को गर्व पाका काथासो, हासुबुङ कासेहेङ रोकिखे पानु भरू सि:लि सोबाइयाङ | 16 एदि का ये-बानाल, बानाल पाखा कालाउ बानाल काङ्को इङ्कोको गर्बको कारन हाइदोङ मान्ठु | इदोइ काङ्को कर्तब्य दोङ का पालि बाध्य हिधा | काङ्को भाअ्सिङ दुःखको काथा हि एदि का ये-बानाल, बानल मापानु | 17 एदि का ताइको इच्सासो इदोइ काम पाखा पानु वा ये-बानाल,बानाल पानु कासेहेङ इनाम हि |एदि का काङ्को इच्साहोइ पाका माकोलाउबुङ कासेहेङ ये-बानाल,बानाल एनोङ आग्या सोमपि पिहि | 18 कालाउ इस्का जेङ्लाङ काङ्को इनाम हाइ वाला ? काङ्को इनाम केवल इदोइ झोको खिनीङ दोङ कि: ताका माकोसिङ ये-बानाल, बानाल पालि निनाको, कालाइ ये:बानाल,बानाल पालाउ निङ्का पुर्न हक दाबि पालि मागोयाको | 19 हाइपालिपानु का दयाङ्गेलाइसो स्वतन्तर हिलाउबुङ का झनजेन्जाहेङ जितिली ड्वाको दोअ्तेङ का| ताइमिङ झाराङ्को बान्धाइति बानाइका हिघा | 20 यहुदिगेलाइहेङ जित्याङ्का दोअ्तेङ यहुदिगेलाइको भाअ्सिङ का यहुदी भाइपाङ जेङ्घा | व्यवस्थाको खाबाराता हिकालाइहेङ जितियाङ्का दोअ्तेङ का ताइमिङ व्यवस्थाको खाबाराता मान्थुलाउबुङ, कालाउ व्यवस्थाको खाबाराता हिकालाइको भाअ्सिङ् ,व्यवस्थाको खाबाताङ हिनाङ भाइपा जेङ्का | 21 व्यवस्थाको बाहार हिकालाइहेङ जितितेङ चुमालि ड्वाको दोअ्तेङ व्यवस्थाको बाहार हिकालाइको भाअ्सिङ, काव्यवस्थाको बाहार हिनाङ भाइका जेङ्घा| कालाउ परमेस्वरको व्यवस्थासो का स्वतनर मान्थुघा, का ख्रिस्तको व्यवस्थाको खाबाराता हिघा| 22 कमजोरिगेलाइहेङ (हुइका) जितियाङ्का दोअ्तेङ कमजोरिगेलाइको (हुइका)भाअ्सिङ का हुइका जेङ्घा| गोताङ प्रकारको उपायसो एमि ना एमिहेङ बान्चिपाली ड्वाको दोअ्तेङ,झाराङको भाअ्सिङ का गोताङ थोक जेङ्घा | 23 ये-बानालको आसिसगेलाइको जोम्लि ड्वाको दोअ्तेङ ये:बानालकोङ खातिर का इदोइ गोताङ थोक पाखा | 24 हाइ नेलाइहेङ थाहा मान्ठु, धाअ्काता, धाअ्कालाइ जाराङ धाअ्खे, कालाउ पुरस्कार चाहि एमि खिनीङ द्-याङ निङ्खे | ओदोङ भाअ्सिङ नेलाइ धाअ्सु कालाउ परुस्कार निङ्लि गोइपा | 25 खेलता भाग र्हुका खेलाडी गोताङ थोकता आत्मासयममि हिलि गोइखे कालाउ नियम पालन पालि गोइखे | इम्बालाइ नासा जेङ्तेङ हानिका मुकुट निङ्लिको भाअ्सिङ इनस्का पाखे | कालाउ केलाइ चाहि हेलाउबुङ मानासाका पुरस्कार निङ्लि एसा पानाखे | 26 कालाउ का हिदोइबुङ लक्ष्य मातासिङ का माअ्धाताङ्का, भेर्मता भुकुन्दि आका(तोका) भाइपा का भुकुन्दी माअ्तोकाङ्का | 27 कालाउ का ताइको जिउहेङ उन्थुइ भाइपा थाङ्का व्यवहार पाङ्का, का वासेहेङ काबुता ताताङ्का, ,पाकानु बो द्-याङ्गेलाइ बानाल पातेङ न्हुसो का ताइमिङ परमेस्वरसोङ अयोगय जेनाङ्का |