7
नेलाइ कासेहेङ लेखेका काथागेलाइको बिसयता एला का चर्चा पाङ्का | वाजान द्-याङ बिहु मापाका दोङ रेम्का हि | 2 कालाउ सहबासको अपराधको कारनसो,गोताङ वाजान द्-याङगेलाइको बे'' हिलि गोइखे,कालाउ गोतेङ बेजानको ताइको ''के''हिलि गोइखे | 3 'के''ताइको ''बे''हेङ गोताङ' के' को होकगेलाइ प्याको जेदोङ एनोङ बे निङ्लि गोइखे कालाउ 'बे' बुङ ताइको के हेङ गोताङ 'बे'' को होकगेला प्याको,जेदोङ एलोङ के निङ्लि गोइखे | 4 ताइको जिउहुता बेको हिदोइबुङ खाबारा मान्थुखे, वाको जिउ हुता वाको 'के' को खाबारा हिखे | कालाउ ताइको जिउहुत्ता केको हिदोइबुङ खाबारा माहिखे | वाको जिउहुता वाको बेको खाबारा हिखे | 5 केबेको सम्बनध जिउहेङ असुइकार मापासु , कालाउ नेलाइ निधिमिदोङ आधे समयको भाअ्सिङ सहबाससो दुरे हिलि मिलिसु | नेलाइ दोमचाकाइलिको भाअ्सिङ एसा पालि दोअ्स्वाना कालाउ एदोफाङ हिसु | एसा पाहे पानु साइतान नाङ्को कमजोरि जाच पालि मादावा | 6 आतुइसा समयको भाअ्सिङ खेङ्सु दोअ्तेङ का अनुमति को रूपता खिनिङ दोअ्खा | यासेहेङ आग्या मामानिपि | 7 का ते चाहिखा झाराङ का भाइकाङ जेङ्सु कालाउ झाराङ द्-याङ परमेस्वरसो ताइको भाअ्सिङ बरदान निङ्का हि | एमि ए खालको बरदान निङ्का हिहे पानु भेनेङ,भेनेङ्दोङ खालको | 8 एला बिहु मापालाइहेङ कालाउ रानडिगेलाहेङ(एकलमहिला) का दोअ्खा: नेलाइ का भाइपाङ बिहु मापासिङ एक्लाङ हिलि रेम्का जेनाङ | 9 कालाउ ओबालाइ ताइमिहेङ काबुता ताअ्लि मादोहेपानु,बिहु पाको ,कामबासना होइ थोसिनिलि खान्तेङ भरु बिहु पालि रेम्का हि | 10 एला का बिहु पाकालाइहेङ इदोइ आग्या प्याङ्का | इदोइ काङ्कोसो माको,इदोइ प्रभुसो हि | 'बे' ताइको केसो माअ्लाताको | 11 कालाउ लाअ्हेपाहे पानु बुङ वा आरोङ बिहु मापाको, कि त वा ताङकोङ के दोफा आरोङ ल्वाको कालाउ मिलियाको के बुङ ताइको बे हेङ मालाताको | 12 कालाउ आरुङ झाराङ्हेङ का इदोइ द्वाङ्का | इदोइ काथागेलाइ का दोअ्दोङ्खा,प्रभुकोसो माको | एनोङ ख्रिस्ता हिका ओनेको 'बे' हि जाइ ख्रिस्ता मान्थु,इन्सिका 'बे' वा दोफा हिलि राजि हि पानु वा उङ्को हेङ मालाताको | 13 कालाउ प्रभुता एमि बेबालको खान्धुरि मापाका 'के' हि पानु वा एदि वाको दोफा हिलि राजि हिहे पानु वा बुङ वासेहेङ मालाताको | 14 एनोङ खान्धुरि मापाका 'के' खान्धुरि पाका 'बे' सो वाबुङ पबित्तरो जेङ्खे ,कालाउ इन्साङ्दोङ खान्धुरि मापाका 'बे' सो 'के' बुङ पबित्तरो जेङ्खे| इन्सा माजेङ्हेपानु ते नेलाइको चान-चामेन्दि सुदृद माजेङ्धावा ,कालाउ एला ओबालाइ पबित्तरो हि | 15 एदि खान्धुरि मापाकालाइ लाअ्लि,खाङ्नु,वासेहेङ इन्साङ पालि पि ,एन्सा जेङ्काता ख्रिस्ता के'बे'ता हिदोइबु खाबाराता माहिखे | 16 परमेस्वर केलाइहेङ सान्तिमय जिवनको भाअ्सिङ काइका हि | ''बे'' गेलाइ नेलाइबुङ ताइ-ताइको बे''हेङ बान्चिपालि दोस्वाना कि | न्हुसो हाइ जेनाङ वाला नेलाइ एला मागिस्वाना |ना ताइको बे'हेङ बान्चिपाली दोधाना कि | 17 हिस्कालाउ बुङ झाराङ्हेङ जेदोङ अवस्थाता परमेस्वर वासेहेङ काइका समयता वा इङ्को कालाउ जेदोङ अबस्थाता वासेहेङ एला परमेस्वर ताअ्का हि एसापा झाराङ द्-याङ बान्चिपालि गोयाङ | इदोइदोङ नियम हि जेदोङ का गोताङ मण्डलिगेलाइहेङ प्याङ्का | 18 एदि हिदोइबुङ द्-याङ काइलाउ लाङ्फासोङ खतना जेङ्का हिहे पानु वा ताइको परिब्रतन पालि मागोयाङ | एदि खतना मापाका द्-याङ्हेङ काइहि पानि वा खतना पातेङ हिलि मागोयाङ | एदि खतना मापाका द्-याङ्हेङ काइहि पानि वा खतना पातेङ हिलि मागोयाङ | 19 द्-याङ खतना पाका हि कि मान्थु इङको हिदोइबुङ बारका काथा माको | मुख्य काथा ते परमेस्वरको आग्या पालनदोङ | 20 झाराङ द्-याङ इन्सिकाङ अबस्थाता ह्याको जेदोङ अबस्थाता वासेहेङ परमेस्वरसो काइहि | 21 परमेस्वर नासिहेङ काइलाउ ना चाकारिया हिहे पानु इन्सिकाको हिदोइबुङ खाल्को मतलब मापा | एदि ना मुक्त जेङ्लि दोअ्हेपानु नासेहेङ पिका मौकाको प्रयोग पा | 22 परमेस्वर काइलाउ हिदोइबुङ द्-याङ चाकारिया हिहे पानु वा प्रभुता मुक्त जेङ्खे कालाउ वा प्रभुको जेङ्खे | जेसाङ परमेस्वर काइलाउ एदि वा मुक्त हिघाहि पानु वा ख्रिस्तता चाकारिया जेङ्खे | 23 नेलाइ दाम चुकाइतेङ चोल्नाकालाइ,ओदोङ भाअ्सिङ द्-याङ्को चाकारिया माजेङ्सु | 24 दाइ-ओनेगेलाइ बाइ-ओनेगेलाइ ! एला परमेस्वर दोफा नावा जिवनता,नेलाइ परमेस्वर सो काइका बेला जेसाङ आवस्थाता हिघासुखेना इङ्कोङ अवस्थाता हिलि गोइखे | 25 एला का बिहु मापालाइगेलाइको बिसोयोता लेख्याङ्का, कासेहेङ प्रभुसो आग्या मान्थु, कालाउबुङ का प्रभुको कृपा कालाउ एनोङ खान्धुरिसो, का ताइको बिचारहोइ एनोङ सल्लाहा प्याङ्का | 26 इदोइ दुःख को बेला हि ओदोङ भाअ्सिङ का सोचिखा नेलाइ जेदोङ अबस्थाता हिसुना इन्सिकाङ अबस्थाता हिलि रेम्का हि | 27 नेलाइको 'बे' हि पानु वाको सो अलग जेङ्का बिचार मापासु , एदि नाङ्को बिहु जेङ्का हिहेपानु खाति पोका बिचार मापासु, आरोङ बिहु पालि माभोसु | नेलाइ बिहु मापाकानु 'बे' भोका बिचार भारि मालागेसु | 28 कालाउबुङ ना बिहु पानु इङ्को हिदोइबुङ पाप मान्थु ,कालाउ कन्या बेजान बिहु पानु उङ्को पाप माको | कालाउबुङ बिहु पाकालाइ जिवनता दुःख निनावा कालाउ का चाहिखा कि नेलाइ इन्सिकाङ समस्यागेलाइ सो दुरेहिसु | 29 दाइ-ओनेगेलाइ कालाउ बाइ-ओनेगेलाइ ! काङ्को दोअ्लिको तात्पय: केलाइको भाअ्सिङ समय पोतोका हि | जाइ-जाइका 'बे' गेलाइ हि,बे' मान्थुकालाइ भाइपा हिसु | 30 जाइ दु:खित हि इम्बालाइ दुःख मानिङ्का भाइपाङ ह्याका ,जाइ लेङ्चातेङ हि इम्बालाइ माल्लेङ चाका भाइपाङ ह्याको | आनेमाने चोल्कालाइ इम्बालाइ हाइदोङ मान्थुका भाइपा ह्याको | 31 जाइ साङ्सारिक आमेता भाइपाङ व्यवहार पाखे इम्बालाइ इङ्को आमेनेता चासो मान्थुका भाइपाङ ह्याको | नेलाइ एन्साङ दोङ हिलि गोइखे | हाइ पालि पानु इदोइ सुमिङ,जेदोङ अबस्थाता एला हि,धेमाङ बितितेङ हानाङ | 32 नेलाइ चिन्तासो दुरे हिसु दोअ्का का चाहिखा बिहु माजेङ्का द्-याङ प्रभुहेङ हेसा लेङ्चापालि दोअ्तेङ प्रभुकोङ को बिसयता फिक्री पाखे | 33 कालाउ बिहु जेङ्का द्-याङ बे' हेङ हेसा लेङ्चापालि दोअ्तेङ सुमिङ्को काथाता चिन्ता पाखे | 34 इसिका द्-याङ्को मन न्हेपाहा लागेका हिखे, बिहु माजेङ्का बेजानको जिउ कालाउ आत्मा न्हेलोङ्ता हेसा पबित्तरो हिलि दोअ्तेङ प्रभुकोङ काथाको बिसोयता चिन्ता पाखे | कालाउ बिहु जेङ्का चाहि हेसा ताइको बे' हेङ खु:सि ताअ्लि दोअ्तेङ सुमिङ्को काथाता फिक्रि पाखे | 35 इदोइ काथा नेलाइ हुत्ता प्रतिबन्ध लगाइलिको भाअ्सिङ माको,भरु नेलाइको भलाइको भाअ्सिङ दोअ्तेङ हिघा,इदोइ उदेस्य होइ कि नेलाइ 'ए' मनको जेङ्तेङ प्रभु भारि भक्ति दोफा ठिक खाल्को जिवन जिउलि द्-वाको | 36 एदि हिदोइ द्-याङ ताइमिदोफा र्-हुलि दोअ्का बेजानदोफा मारेम्का व्यवहार पाका ठानिखे|कालाउ एदि उङ्को बेजानको उमेर बुङ धल्किकाताङ हानिका हिहे पानु,वा बिहु पालि भोनु वा बिहु पालि द्वाङ | इन्कोता पाप मान्थु ,इम्बालाइ को बिहु जेल्लि गोयाङ | 37 कालाउ जेदोङ द्-याङ ताइको मन पाक्का पाकाहि पानु जाइ हासुको बुङ करकापता परिका मान्थु,कालाउबुङ ताइको इच्सा हेङ काबुता ताअ्लि द्वाङ,कालाउ जाइ कन्याहेङ बिहु मापालि निर्नय पालिदोका हिहेपानु,इन्सिका द्-याङ्बुङ थिकोङ पाखे | 38 एसापा जाइ कन्याहेङ बिहु पाखे,वा ठिकोङ पाखे,कालाउ जाइ बिहु मापाखे,वा झन असल पाखे | 39 के''बान्चिपा थिकापा के कोङ खाबाराता 'बे' हि | कालाउ के'' सिहेपानु न्हुसो वा इच्सा पाका द्-याङ दोफा उङ्को बिहु पालि निङ्खे | कालाउ वा चाहि प्रभुको द्-याङ हिलि गोइखे | 40 कालाउ वा एन्साङ हिहे पानु झन खु:सि जेनावा,इदोइ काङ्को बिचार हि,कालाउ का फोमपाखा कि का दोफाबुङ परमेस्वरको आत्मा हिका हि |