5
नेलाइको माझाता पातरनि पाका पाप हि दोअ्का काथा पक्का जेङ्का हि , जातिङ्को इसिका अनैतिकता ते परमेस्वरको बारेता मागिलाइकोताबुङ मानिङ्खे | द्-याङगेलाइ दोअ्खे,आधिमि ताइको आबाको 'बे' हेङ बुङ ताअ्का हि | 2 कालाउ एलाउबुङ नेलाइ ताइको बाखिन दोङ पासुखेना ! नेलाइहेङ ते दु:ख जेङ्लि गोइका माको रो? जेदोङ द्-याङ इन्सिका पाखे इङ्को हेङल नेलाइको माझासो दिगिल्सु | 3 जिउता नेलाइदोफा मान्थुघा कालाउबुङ आत्माता का नेलाइदोफा हिघा | कालाउ का उङ्को द्-याङहेङ का इता हिका भाइपाङ न्याय पाहोइका | 4 जेलाउ नेलाइ केलाइको प्रभु येसु:को मिङ्ता जोम्सुखेना , कालाउ का आत्माता नेलाइ दोफा ल्वाङ्का कालाउ नेलाइको प्रभु येसु:को सरबुङ नेलाइ दोफा ह्यावा | 5 कालाउ उङ्को द्-याङहेङ साइतानको खुरता लाअ्पिसु,जेसाका कि वाको पापि स्वभाव नासाताको कालाउ वाको आत्मा चाहि प्रभुको दिनाता बान्चि पालि द्वाको | 6 नेलाइको घमण्ड थिक माको ''आतुइसा साउिरहोइ गोताङ धिकाउरि दोङ साउरि बानाइखे ''या गिकाङ मान्थुना? 7 नावा साउरि बानाइलि बासि साउरि ओल्लापापि,कालाउ खिनिङ् नेलाइ नावा साउरिको धिकाउरि जेङ्स्वाना, ख्रिस्त येसु जाइ केलाइको निस्तारको थुमा हिका हि, लाम्फाङ सेन्हाका हिघाहि | 8 ओदोङ भाअ्सिङ केलाइ निस्तार उम चाइने,कालाउ बासि साउरि जेङ्का सेले चाहि माको | बासि साउरि पाप, कुकाम कालाउ दुस्त कामको साउरि माको, निस्खोत सत्येताको सिङ्को सेले च्चाइने पबित्तरो कालाउ जातिङ्को सेले इदोइ दोङ | 9 का नेलाइहेङ कसिबेरीको सङ्तता माहिसु दोअ्तेङ पातारा लेखेका हिघाका | 10 याको माने,इदोइ सुमीङ्को कासिबेरिगेलाइ,दिकालाइ, खुकालाइ,मुर्तिपुजापाकालाइदोफाहेलाउबुङ सङ्गत मापासु दोअ्का माको,माकुनुते नेलाइ सुमिङ्सोङ बाहार हानिलि गोइधास्वाना | 11 कालाउ इसिकाको सङ्गत मापासु दोअ्तेङ का नेलाइहेङ लेखिघा, ताइमिङ खान्धुरि ओनेदोअ्तेङ दोअ्खे ,पानु वास्ताबता उङ्को कासिबेरी,वा दिका,वा मुर्तिपुजापाका,वा मन्दामाताका,वा गोरा म्हाका वा खुका|इन्सिका दयाङ्गेलाइ दोफाङ योम्तेङ उमबुङ माचा | 12 इङ्को जाइ मण्डलि बाहार हि,इम्बालाइ न्याय पालि काङ्को हाइ खाचो?: हाइ नेलाइ मनडलिको लिताकोगेलाइहेङ न्याय पालि मागोयाङ रो? 13 बाहारकोगेलाइहेङ न्याय परमेस्वर दोङ पाखे ,धर्म सास्तरता इसिका दोअ्का हि,''दुस्त द्-याङ्गेलाइहेङ ताइको जेरसो सुतिपासु |