2
काङ्को आनाङ दाइ -ओनेगेलाइ,बाइ-बेजान ओनेगेलाइ,जेलाउ का नेलाइकोता लोघा,का नेलाइहेङ परमेस्वरको गवाहिको बारेता घोसाना मापाघा | कालाउ का बार-बारका कालाउ बुदिृको ग्यानको काथा मापाघा | 2 जेलाउ थेकापा का नेलाइदोफा हिघा,येसु: ख्रिस्त कालाउ वाको क्रुसको ताङ्गाइकाता सि:का बाहेक आरू गोताङ निल्याइने दोअ्का निसित पाका हिघाखा | 3 जेलाउ का नेलाइकोता लोघा,का कमजोर हिघाखा,मुइमुइतेङ कालाउ थितेङ फिरतेङ हिघाखा | 4 काङ्को उपदेस कालाउ बानाल द्-याङगेलाइहेङ लाअ्पाका ग्यानि सब्दगेलाइ मान्थुघाखे,कालाउ काङ्को सिक्स्याको प्रमान सरबुङ हिघाहि जेदोङ आत्मासो लोखे | 5 नेलाइको खान्धुरि द्-याङ्को ग्यानता माको कालाउ परमेस्वरको सारबुङ्ता आधारित ह्याको दोअ्तेङ का इन्सा पाघा | 6 कालाउबुङ परिपक्का जेङ्का द्-याङ्गेलाइ केलाइको माझाता बुद्दिको बानाल प्याङ | कालाउ केलाइ इदोइ युगको बुद्दि माको, नाते इदोइ युगको शासकगेलाइको बुद्दि,यो निसित बितितेङ हानावा | 7 कालाउ केलाइ परमेस्वरको म्होनाका ग्यान दोअ्प्याङ जेदोङ ग्यान म्होका हि | परमेस्वर इदोइ ग्यान केलाइको भलाइको भाअ्सिङ तियार पाका हि | सुमिङ सिरजाइका न्हाका खान्तेङ लम्फादोङ वा इदोइ योजना बानाइका हिघाहि | 8 इदोइ युगको हिदोइबुङ सासकगेलाइ इदोइ ग्यान माबुझिहि,एदि इम्बालाइ बुझिहेपानु इम्बालाइ परमेस्वरको महिमा प्रभुहेङ क्रुसता मातोइ धावा | 9 जेसाङ सास्तरता लेखिका हि:''हिदोइबुङ मिसिया होइबुङ मातिङ्का,हिदोइबुङ न्हातोङ्होइ माहिङ्का,हासुबुङ पिर थिकापा हासुबुङ मासोचिका, इदोइ काथा ताइमिहेङ प्रेम पाकालाइको भाअ्सिङ परमेस्वर तियार पाका हि | 10 परमेस्वर इदोइ काथागेलाइ केलाइहेङ पबित्तरो आत्मासो तिङ्पापिका हि, हाइपालिपानु आत्मा गोताङ काथा भोखे | परमेस्वरको गम्भिर रहस्यको काथागेलाइ सुधाङ आत्मा भोखे | 11 जेसाङ हासुबुङ भेनेङ द्-याङको बिचार गेलाइ गिलि मादोखे, खालि इङको जेदोङ आत्मा वाको लिता हिखे वा खिनिङ बिचारगेलाइ गिखे , परमेस्वरको बिसयता बुङ इसिकाङ | परमेस्वरको बिचारगेलाइ हासुबुङ मागिखे इम्बालाइ परमेस्वरको आत्मा होइ खिनिङगिखे | 12 एला केलाइ सुमिङ्ता हिका आत्मा निङ्का मान्थुनहाहि कालाउ केलाइ परमेस्वरसो आत्मा निङ्का हिनाहि | परमेस्वरको पबित्तरो आत्मासो केलाइहेङ पिका बरदानगेगेलाइ गिलि ग्याको दोअ्तेङ निङ्का हिनाहि | 13 जेलाउ केलाइ इदोइ बानालगेलाइ पानाखे,केलाइ द्-याङ्को ग्यान होइ धिरपाका काथागेलाइता मादोन्हाखे | केलाइ आत्माहोइ धिरपाका सब्दगेलाइ दोङ प्रयोग पानाखे | आत्मिक काथागेलाइ दोअ्पिलि आत्मिक सब्दगेलाइ दोङ धुइनाखे | 14 जेदोङ द्-याङ आत्मिक मान्थु वा परमेस्वरको आत्मासो लोका काथागेलाइ ग्रहन मापाखे | वा इङ्को गोताङ काथागेलाइ हाइदोङ मागिका सम्झिखे | वा आत्माको काथा गिलि मादोखे,हाइपालिपानु इङ्को काथागेलाइहेङ आत्मिक रुपता खिनिङ जाचिलि दोअ्खे | 15 कालाउ आत्मिक द्-याङ गोताङ काथागेलाइ सुतिपालि दोका हिखे, कालाउ वासेहेङ हासुबुङ जाचिलि मादोअ्खे | धर्म सास्तरता दोअ्खे | 16 'परमप्रभुको मन हेङ हासुगिलि द्वाङ रो ? कालाउ हासु परमप्रभुहेङ अहाइलि दोअ्खे ? कालाउ हासु धिरपालि दोअ्खे ?केलाइदोफा ते प्रभु येसु: ख्रिस्तको मन हि |