रोमियों 15

खान्धुरिता बलियाका हिकालाइ केलाइ ताइमिहेङ खिनिङ खु:सि बानाइका मन मातेङ हुइका द्याङ्गेलाइको कमजोरिहेङ सहिलि गोइखे | 2 केलाइ झाराङ ताइको डेरागेलाइहेङ आत्मिक सुधार जेनाको दोअ्तेङ वाको भलोइको भाअ्सिङ वासेहेङ लेङ्चापाइने | 3 ख्रिस्त बुङ ताइमिहेङ खु:सि माअ्ताहि, वाको बिसयता धर्मसास्त्तरता दोअ्का हि:''जेदोङ नेलाइहेङ अपमान पाखे इङ्को अपमान का हुसो परिहि | 4 हानेका दिनागेलाइता लेखिका परिपरिको काथा केलाइहेङ सिकस्या पिलि लेखिका हिघाहि ,केलाइ आसा पाइने दोतेङ्सा इङ्को लेखिका हिघाहि | धर्मसास्त्तरसो लोका धेर्य कालाउ बलसो केलाइ आसा निङ्लि द्वाङ | 5 धेर्य कालाउ उत्साहा परमेस्वरको नेलाइहेङ ख्रिस्त येसु:दोफा एनोङ्दोङ जेङ्तेङ उदाहरन आन्सार ना एमिसो भेनेङ दोफा ताइमिङ एनोङ चिट्टाको जेङ्तेङ मिलितेङ जुलितेङ हिसु | 6 कि त ,एनोदोङ मनको जेङ्तेङ एनोङदोङ गालाहोइ केलाइको प्रभु येसु:ख्रिस्तको परमेस्वर कालाउ आबाको महिमा नेलाइ पालि दोअ्सु | | 7 अदोङ भाअ्सिङ परमेस्वरको महिमाको भाअ्सिङ ख्रिस्त नेलाइहेङ ग्रहन पाका बोमोजिम नेलाइबुङ एमि सो भेनेङहेङ ग्रहन पाअ् | 8 का नेलाइहेङ दोअ्खा,केलाइको पुर्खागेलाइहे पिका प्रतिग्यागेलाइको ब्याख्या पालिको भाअ्सिङ परमेस्वर सत्यताहेङ प्रकट पालि ख्रिस्त खाताना जेङ्कालाइको बान्धाइति जेङ्पिहि, 9 या कारनहोइ कि बो जातिगेलाइ वाको कृपाको भाअ्सिङ परमेस्वरको महिमा पाको| जेसिकाङ लेखेका हि, ''अदोङ भाअ्सिङ 'बो' जातिगेलाइको माझाता का नाङ्को बाखानाइ पाङ्का, कालाउ का नाङ्को स्तुति लेकाङ्का | '' 10 कालाउ आरुङ इसिका दोअ्का हि, ''ओइ बो जातिगेलाइ वाको प्रजादोफा आनन्द मानिपा हिखे|'' 11 काकाउ आरुङ, ''ओइ सारा बो-जातिजेलाइ,प्रभुको बाखिनाइ पाअ्, कालाउ गोताङ द्याङ्गेलाइ वाको बाखानाइ पाको |'' 12 कालाउ आरुङ यसाइया दोअ्खे, ''यिसैको हारागुटियासो एमि ल्वाङ , वाको बो जातिगेलाइ हुता सासन पावा , वाको हुसो 'बो' जातिगेलाइको आसा ताअ्तावा|'' 13 परमेस्वरको आसाता नेलाइहेङ खान्धुरि पाहासो गोताङ आनन्द कालाउ सान्तिहोइ पोङ्घा पाप्यावाको, एदोइ मनहोइ कि पबित्तरो आत्माको सरबुङ्होइ नेलाइको आसाता हेन्जाङ जेङ्लि दोसु | 14 दाइओनेगेलाइ-कालाउ बाइओनेगेलाइ कासेहेङ निसित हि,कि नेलाइ ताइमिबुङ भलाइहोइ पोङ्घाका हिसूना, कालाउ सारा ग्यानता पुरा जेङ्तेङ ता-ताइमिता सिक्स्या पिलि समरथ हिसुना | 15 कालाउ परमेस्वर कासेहेङ पिका अनुग्रहको कारन नेलाइहेङ आरुङ फोमपापालि का बारका साहास पातेङ हेथेते बिसयता लेखेका हिघा, 16 इङ्को अनुग्रह 'बो' जातिगेलाइको भाअ्सिङ परमेस्वरको ये:बानालको धामिगेलाइ पालि गोइका कर्तव्य पालन पालि कासेहेङ पिकाहि, ताकि 'बो' जातिगेलाइ पबित्तरोआत्मासो सुद्द जेङ्तेङ ग्रहनयोग्य जेङ्लि द्वाको | 17 ओदोङ भाअ्सिङ परमेस्वरको भाअ्सिङ काङ्को सेवाता कासेहेङ ख्रिस्त येसु:ता गर्भ पालि कारन हि | 18 हाइपालिपानु,वचन कालाउ कामहोइ 'बो'जातिगेलाइहेङ किका बानाइलि ख्रिस्त काङ्कोसो जेदोङ पाका हि, इङ्को खान्तेङ आरु हिदोइबुङ विषयता नुइ धुइलि आट मापाङ्का | 19 इदोइ चिन्हागेलाइ कालाउ भारभुसाइका कामगेलाइको सरबुङ्होइ कालाउ पबित्तरो आत्माको सरबुङ्पाहा का पाका हिघा | एसापा का यरूसलेमसो इल्लुरिकन ठेकापाङ द्यापाहाङ ख्रिस्तको ये:बानाल गोताङ्पाहासो बानाल पाका हिगा | 20 आरू द्याङ्गेलाइ योम्पाका जग हुता 'सा' माबानाइ दोअ्का ख्रिस्तको मिङ माठेकाका थामेता ये:बानाल, बानाल पालि लिताङ्सोङ इच्सा का ताअ्का हि, 21 धर्म सास्तरता इसिका लेखेका हि,'''वाको विसयता जाइहेङ हेलाउबुङ दोअ्पिका मान्थु, इम्बालाइ वासेहेङ तिनाङ, कालाउ वाको विसयता जाइ हेलाउबुङ हिङ्का मान्थु इम्बालाइ बुझियावा | '' 22 ओदोङ भाअ्सिङ दोङ, नेलाइकोता लोलि का हेन्जाङ खेप मादोघा | 23 कालाउ एला इदोइ मौजागेलाइता(इलाका)काङ्को भाअ्सिङ काम पालि 'बो' थामे मान्थुनाङ, हेन्जा बासारसोङ नेलाइकोता लोलि तिर्साना हिनाङ, 24 का स्पेन हानिलाउ का नेलाइहेङ भेतिलि आसा पाखा, कालाउ नेलाइ दोफा कोम्हा समय थेकापा सङ्गति आनन्द पातेङ नेलाइ कासेहेङ आरू पाकपालि दामाता साघाइस्वाना दोअ्का आसा ताअ्खा | 25 कालाउ एला सेवकगेलाइहेङ साघाइका पिपुलि का यरुसलेमभारि हानिखा | 26 हाइपालि पानु यरुसलेमता हिका खान्धुराइगेलाइ हासु गरिब हि, इम्बालाइको भाअ्सिङ माकेडोनिया कालाउ अखइयाको मण्डलिगेलाइ भेति पिका हि | 27 इदोइ भेति इम्बालाइ खु:सिसोङ जोम्पाका हिघाहि,कालाउ साचिकोङ इम्बालाइ ओबालाइको रिनिबुङ हि |हाइपालिपानु एदि 'बो'जातिगेलाइ इम्बालाइको आत्मिक आसिसगेलाइता जोम्का हि पानु, एबालाइबुङ साङ्सारि आसिसपाहासो इम्बालाइको सेवा पालि गोइखे | 28 ओदोङ भाअ्सिङ इदोइ काम दोपातेङ ओबालाइको भाअ्सिङ ल्होपाका या चान्दा पिलि दोअ्तेङ न्हुसो का नेलाइकोता लोतेङ ओदोङ पाहा पातेङ स्पेन हानाका | 29 कालाउ का गिखा कि,का नेलाइकोता लोलाउ ख्रिस्तको आसिसको भरितेङ ल्वाङ्का | 30 दाइ ओनेगेलाइ कालाउ बाइ ओनेगेलाइ,केलाइको प्रभु येसु:ख्रिस्त कालाउ पबित्तर आत्माको प्रेम पाहा काङ्को भाअ्सिङ परमेस्वर दोफा दोम्चाका हि काङ्को दोफा मेनाङ कोसिस पातेङ दोअ्हि का नेलाइहेङ बिन्ति पातेङ सेउपाखा, 31 कि का यहुदियाको खान्धुरि मापाकालाइ मुक्त जेङ्लि द्वाको,कालाउ यरुसलेमको भाअ्सिङ काङ्को सेवा खान्धुराइगेलाइहेङ ग्रहन योग्य ज्याको, 32 कालाउ परमेस्वरको इस्सासो आनन्द दोफाङ नेलाइकोता लोतेङ नेलाइ दोफाको सङ्गति सो का आरुङ ताजा जेङ्लि द्वाको | 33 सान्तिको परमेस्वर नेलाइ झाराङ दोफा ह्याको | आमेन |