रोमियों 16

का नेलाइहेङ केलाइको बेजानओने फिबि दोफा नाल्पालि खाङ्का,वा मण्डलिको सेवाता आगासरिका एलोङ रेम्का द्याङ 2 का नेलाइहेङ एनोङ निबेदन पाखा कि खान्धुराइगेलाइहेङ सोबाइका खाल्सो वासिहेङ प्रभुता ग्रहन पासु,का वासिहेङ चाहिका हिदोइबुङ थोकको सघाइ वासिहेङ पिसु,हाइपालिदोनु वा ताइमिङ हेन्जाङ्को कालाउ कासिहेङबुङ सघाइका हि | 3 प्रिस्किला कालाउ अकिलास,ख्रिस्त येसु:ता काङ्को दोफा हितेङ सघाइका लाइहेङ सेउपाखा | 4 इम्बालाइ काङ्को जिबन बान्चिपालि ताइको जिबनबुङ जोखिमता ताका हिघाहि,का नेलाइहेङ धन्यबाद पिखा कालाउ गैर यहुदिगेलाइको झाराङ मण्डलिगेलाइहेङ धन्यबाद पिखे | 5 कालाउ ओबालाइको साता जोम्कालाइ झाराङ मण्डलिगेलाइहेङ बुङ सेउपाखा | काङ्को प्रिय आनाउ स्पेनितियसहेङ,जाइ ख्रिस्तको भाअ्सिङ एसियाको लाङ खान्धुराइ दोङ,वासिहेङ बुङ सेउपासु | 6 मरियम हेङ,जाइ नेलाइको माझाता मेनाङ मेहेनत पाहि,वासिहेङ बुङ सेउपासु | 7 एन्द्रोनिक्स कालाउ युनियस, काङ्को ताइकोगेलाइ कालाउ का दोफाङ झायालखानाता हिकालाइहेङ बुङ सेउपाखा | इम्बालाइ प्रेरितगेलाइ मध्ये मिङ चारचलिकालाइ दोङ,कालाउ का खान्तेङ लाम्फाङ ख्रिस्तता हिका हिघाहि | 8 एम्लिआतस,प्रभुता काङ्को ओनेहेङ सेउपाखा दोअ्पिसु | 9 उरबानोस,ख्रिस्तता केलाइहेङ सघाइका,कालाउ काङ्को आनाउ सानाइति स्ताखुसहेङ सेउपाखा दोअ्पिसु | 10 प्रभुको योग्य ठहराइका अपेल्लेसहेङ सेउपाखा दोअ्पिसु | आरिस्तोबुलोसको साकोलाइहेङ सेउपाखा दोअ्पिसु | 11 काङ्को ताइको हेरोदियनहेङ सेउपाखा दोअ्पिसु | प्रभुता हिका नर्किसको जाहानगेलाइहेङ सेउपाखा दोअ्पिसु | 12 प्रभुता ओसारापाङ कामपाका तरुफेना कालाउ तरोफोससाहेङ सेउपाखा दोअ्पिसु | प्रभुता ओसारापाङ काम पाका आनाउ परिसिसहेङ सेउपाखा दोअ्पिसु | 13 प्रभु येसु:ता छाल्का रुखोस कालाउ वाको आमाइ,जाइ काङ्को आमाइ बुङ जेङ्का हिघाहि,ओबालाइहेङ सेउपाखा दोअ्पिसु | 14 असिमक्रिट्स,फ्लेगन,हर्नेस,पत्तरबास,हरमास,कालाउ ओबालाइदोखा हिका झाराङ दाइ ओने कालाउ बाइ ओनेगेलाइहेङ सेउपाखा दोअ्पिसु | 15 फिलोलोगस कालाउ जुलिया, नेरियस, काकाउ वाको बेजान ओने ओलिम्पाहेङ सेउपाखा| वा ओबालाइ हिका झाराङ खान्धुराइगेलाइहेङ सेउपाखा | 16 जेलाउ नेलाइ दुसुस्वाना ता-ताइमिता, पबित्तरो चुमाइ चासु | खिस्तको गोताङ मण्डलिगेलाइ नेलाइहेङ सेउपाका पिगिल्का हि | 17 दाइओने-कालाउ बाइ ओनेगेलाइ , का नेलाइहेङ बिनम्रोसोङ सेउपाखा, कि नेलाइहेङ धिर्पाका धर्म-सिद्द्न्ताको बिरूदता खेङ्नाका कालाउ,'बो'गेलाइको खान्धुरिता बाधा चुमाकागेलाइ दोफा थिसु | इम्बालाइ धिर्पाका सिक्स्या उल्टा हिखे | 18 हाइपालिपानु इन्सिकागेलाइ खिस्तको केलाइको प्रभुको भाअ्सिङ माको, कालाउ ताइमिङ्कोङ हामुकोको भाअ्सिङ सेवा पाखे, कालाउ इम्बालाइको ताअ्का-ताअ्का काथाहोइ सोझाकागेलाइको हृदयहेङ धोखा पिखे | 19 नेलाइको आग्याकारिता झाराङ द्याङ्गेलाइता जाहेर हिदोङ हि, कालाउ नेलाइको कारन का आनन्द पाखा | कालाउ का भोखा, कि नेलाइ जेदोङ रेम्का हि, इङ्को भाअ्सिङ 'ना' बुद्द्धिमान जेङ कालाउ जेदोङ आखेका हि इन्तासो दोसि माजेङ्सिङ हिसु | 20 सान्तिको परमेस्वर मार्फाङ दोङ साइतानहेङ नेलाइको पाइतालालिता यानावा,केलाइको प्रभु येसु:ख्रिस्तको अनुग्रह नेलाइ दोफा ह्याको | 21 तिमोथि काङ्को सघाइका सानाइति,कालाउ काङ्को ताइको गेलाइ लुकियस यासोम कालाउ सोसि पातरोस नेलाइहेङ सेउपाखा पिगिल्का हि | 22 इदोइ पातारा लेखेका,का तरतियस प्रभुता नेलाइहेङ सेउपाखा पिगिल्खा | 23 काङ्को बानसाघाकालाइ कालाउ सारा मण्डलिहेङ सत्कार पाका गायस बुङ सेउपाका पिगिल्काहि | नेलाइहेङ सेउपाखा | सहरको कोस अध्यसय इरास्तस कालाउ ओने क्वार्ट्स बुङ नेलाइहेङ सेउपाखा पिगिल्काहि | 24 केलाइको प्रभु येसु:ख्रिस्तको अनुग्रह नेलाइदोफा ह्याको आमेन | 25 एला वा वासिहेङ,जाइ नेलाइहेङ काङ्को ए बानाल कालाउ येसु:ख्रिस्तको बिसयता बानाल आन्सार बलियोका बानाइलि द्वाङ,इङ्को रहस्य थासाइका बमोजिम,जेदोङ जुगौजुग सङ म्होनाका हिघाहि, 26 जेलाउ अनन्तको परमेस्वरको आग्या आन्सार अगमबक्तागेलाइको लेखिका पाहा प्रकट पाका कालाउ दोअ्का हि,इदोइ कारनसो कि गोताङ झाराङ जातिगेलाइ खान्धुरिपाको कालाउ आग्या पिताको, 27 येसु:ख्रिस्त पाहासो एनोङ खिनिङ सर्बग्यानि परमेस्वरको हेलालाउबुङ महिमा ज्याको | आमेन |