रोमियों 14

कमजोरि खन्धुरि हिका द्याङ्लाइहेङ ताइको समुहको सदस्यगेलाइ भाइपा अपनाइसु | कालाउ इम्बालाइको बिचारता गालाबाजि पालि माको | 2 आधिमि गोताङ आनेमाने चालि एल दोअ्तेङ खान्धुरि पाखे,कालाउ खान्धुरिता कमजोरि हिकालाइ चाहि सिनजाल्का सारगेलाइ खिनिङ चाखे | 3 चाकालाइ माचाकालाइहेङ तुच्छा मा थान्याको,कालाउ माचाकालाइ चाकालाइहेङ दोसि मालाग्याको | हाइपालिपानु परमेस्वर इङ्कोहेङ ग्रहन पाका हि | 4 बोमिको चाकारियाहेङ निया निसाफ पाका नाहासु ? इङ्को ते ताइकोङ माझनको आगाता हिखे वा पतित हिखे | वासिहेङ जाअ्पाघा,हाइपालिपानु,वाको माझन वासिहेङ वाको आगाता जाअ्पालि द्वावा | 5 हिदोइबुङ द्याङ एनोङ दिनाहेङ भेनेङ दिना खान्तेङ हेन्जा महत्वको मानिखे,भेनेङ द्याङ गोताङ दिनाहेङ ओदोङ झोको थानिखे | गोताङ द्याङ ताइको मन पुरा निस्चित हिलि गोइखे | 6 जेदोङ द्याङ हिदोइबुङ दिन गेलाइहेङ बिसेस रुपता मानिखे,वा प्रभुको आदारको भाअ्सिङ पालन पाखे | जेदोङ द्याङ चाखे,वा प्रभुको भाअ्सिङ चाखे,हाइपालिपानु वा परमेस्वर हेङ धन्यबाद पिखे | जेदोङ द्याङ माचाखे,वा परमेस्वरको आदारको भाअ्सिङ माचाखे कालाउ परमेस्वरहेङ धन्यबाद पिखे | 7 केलाइ हासुकोबुङ ताइकोङ भाअ्सिङ मा बान्चिनाखे कालाउ हासुबुङ ताइको भाअ्सिङ मासिखे | 8 एदि केलाइ बान्चिलि गोइनु पानु प्रभुको भाअ्सिङ बान्चायाङ,कालाउ सि:लि गोइनु प्रभुको भाअ्सिङ सियाङ | 9 चाहे केलाइ बान्चायाङ,चाहे केलाइ सेयाङ,केलाइ प्रभुकोङ दोङ | इदोइकोङ भाअ्सिङ ख्रिस्त प्रभु सि:हि कालाउ आरुङ सिनु हि,वा सि:कालाइको कालाउ बान्चिकालाइको न्हेमिकोङ प्रभुदोङ | 10 ना हाइपालि ताइको ओनेको न्याय निसाफ पाखेना ? ना हाइपालि ताइको ओनेहेङ तुस्स थानिखेना ? हाइपालिपानु केलाइ झाराङ न्याय आसनको आगाता जाअ्लि गोयाङ | 11 धर्म सास्तर्ता लेखिका हि,''प्रभु दोखे,जेसाङका बान्चिका हिघा,गोताङ तिरु काङ्को आगाता तिरु ठोलि गोयावा,कालाउ गोताङ देतोङ होइ परमेस्वरको बाखिन पावा |'' 12 ओदोङ भाअ्सिङ केलाइ झाराङ परमेस्वरहेङ ताइको लेखि पिलि गोयाङ | 13 ओदोङ भाअ्सिङ केलाइ एमिसो भेनेङ हेङ एला उसो इन्साफ मापाइने | बरु ताइको ओनेको मनता चोट लागेका काथागेलाइ मापाइने | 14 का गिखा,कालाउ प्रभु येसु:ता निस्चित हि कि,हिदोइबुङ काथा ताइमिता असुद माजेङ्खे बरु जाइ इङ्को असुद थानिखे,वाको भाअ्सिङ इङ्को असुद दोङ जेङ्खे | 15 ना जेदोङ चाखेना उङ्को ओदोङ काथा होइ नाङ्को ओनेहेङ दखल जेङ्खेपानु,ना प्रेमता हिगिल्का मान्ठुना | जेदोङ ओनेको भाअ्सिङ ख्रिस्त सिपिहि, ना चाका आमेनेसो वाको नास माज्याको | 16 ओदोङ भाअ्सिङ नेलाइहेङ जेदोङ रेम्का जेङ्खे इङ्कोहेङ बोगेलाइहेङ आखेका दोअ्लि मापि | 17 हाइपालिपानु परमेस्वरको राइजि दोअ्का चालि कालाउ आम्लि माको,कालाउ पबित्तरो आत्मा, धार्मिकता, सान्ति कालाउ आनन्द हि | 18 जाइ एदोइ खाल्को येसु:को सेवा पाखे, इनसिका परमेस्वरको मनदा ताअ्का कालाउ द्याङगेलाइसो असल मानिका हिखे | 19 एसापा केलाइ इङ्को काथागेलाइको चाल चलियाइने जाइ सान्ति चुमाखे,कालाउ एमि सो भेनेङ्हेङ आत्मिक उब्जाइपाखे | 20 चालि-आम्लिको भाअ्सिङ परमेस्वरको कामहेङ मानासापासु| साचिकोङ इङ्को गोताङ आमेने सुद्द हिखे,कालाउ ताइमि चाका आमेने बोगेलाइहेङ मारेम्का बानाइलि थिक मान्थु | 21 उचित ते या रेम्का जेनावा,बिहा माचालि, गोराचि-माआम्लि,इदोइ कामदोङ मापालि जेदोङहोइ नाङ्को अनेहेङ आखेका जेङ्खे | 22 नाङ्को हिका खान्धुरि परमेस्वर कालाउ नाङ्को माझाता ताअ् |धन्य उङ्को द्याङ, जाइ ताइको सहि थोहोराइका काथागेलाइसो ताइमिहेङ दोसि माथोहोराइलि मागोयाको | 23 हासुबुङ साङ्खा पातेङ हाइदोङ चाहेपानु उङ्को दोसि थोरिखे, हाइपालिपानु वा कान्धुरि माकोसिङ चाका हि |खान्धुरि बिना उब्जाइ माजेङ्का हिदोइ काथा पापदोङ |