रोमियों 5

केलाइको खान्धुरिको कारनहोइ केलाइ परमेस्वरदोफा धर्मि जेङ्का हिनाहि,ओदोङ भाअ्सिङ केलाइको प्रभु येसु:ख्रिस्त पाहासो केलाइको परमेस्वर दोफा केलाइको मिलाप जेङ्का हिघाहि | 2 वाकोसो केलाइ इदोइ अनुग्रहता खान्धुरिसो दुल्लि निङ्का हिनाहि, इदोइ अनुग्रह्ता केलाइ जाअ्का हिनाहि,कालाउ परमेस्वरको महिमाता जोम्लि गोइका केलाइको आसाता लेङ्चानाखे | 3 यिदोइ झोको खिनिङ माको,कालाउ केलाइ ताइको सङ्कटता हाउसाइनाखे,यिदोइ गितेङ कि, सङ्कटहोइ सहनसिलता उतपन्न पाखे,सहन सिलता होइ चरितरो होइ आसा उतपन्न पाखे | 4 सहनसिलता होइ बेहोरा,कालाउ बेहोराहोइ आसा उब्जाइपाखे | 5 आसा होइ केलाइहेङ निरास मापापाखे,हाइपालिपानु केलाइहेङ पिका पबित्तरो आत्मासो परमेस्वरको प्रेम केलाइको हृदयता हुपिका हि | 6 हाइपालिपानु केलाइ कमजोरि जेङ्लाउदोङ ख्रिस्त अधर्मिगेलाइको भाअ्सिङ ठिक समयता सि:हि | 7 धार्मिक द्याङ्को भाअ्सिङ सि:लि तियार जेङ्का हासुबुङ आधिमि निनाङ् वाला,हासुबुङ असल द्याङ्को भाअ्सिङ हासुबुङ सि:लिबुङ आट पालि द्वाङ | 8 कालाउ परमेस्वर केलाइको भाअ्सिङ वाको प्रेम यिदोइताङ तिङ्पाखे,कि केलाइ पापि हिलाउदोङ ख्रिस्त केलाइको भाअ्सिङ सि:पि हि | 9 एसापा वाको हिति पाहा सो धर्मि थहराइका हिनाङ झन हेन्जा केलाइ परमेस्वरको क्रोधसो वाकोसो बान्चिपाङ | 10 हाइपालिपानु केलाइ सतुर जेङ्लाउदोङ वाको चानको सि:का पाहासो परमेस्वरदोफा केलाइको मिलाप जेङ्का हिघाहि,झन हेन्जा एला वाकोदोफाङ मिलिका जेङ्लाङ ख्रिस्तको जिबनसो केलाइ बान्चियाङ | 11 यिदोइ झोको खिनिङ माको कालाउ केलाइको प्रभु येसु:ख्रिस्त पाहासो परमेस्वरता केलाइ लेङ्चातेङ बुङ हिनाहि,वाकोसो एला केलाइहेङ परमेस्वरदोफा मिलि पापिहि | 12 एनोङ द्याङ्सो सुमिङ्सो पाप लोहि,कालाउ पापसो सि:का, एसापा गोताङ द्याङ पाप पाका हिनाङ गोताङ द्याङ्ता सि:का फाइलाइ हि | 13 व्यवस्था पिका खान्तेङ लाम्फा बुङ सुमिङ्ता पाप हिघाहि,कालाउबुङ जेता व्यवस्था मान्थु,इन्ता पापको लेखाबुङ माहिखे | 14 आदमसो चुमातेङ मोसा थेकापा द्याङ्गेलाइ हुता सि:का राइजि पाहि,इम्बालाइ हुताबुङ जाइ आदमको पाका भाइपाङ आपाराध पाका मान्थु घाहि | इङ्को आदम चाहि लोकाको प्रतिरूप हिघाहि | 15 ताका माकोसिङ इन्साङ निङ्का बरदान कालाउ इङ्को आपाराधता बाराबार मान्थु | हाइपालिपानु एनोङ द्याङ्को आपाराध होइ हिन्जा सिहेपानु झन परमेस्वरको आनुग्रह कालाउ एनोङ द्याङ्को, जेसाङ येसु:ख्रिस्तता लोका इन्साङ्को बरदान हेन्जाङ्को भाअ्सिङ गेनागेल्पा जेङ्हि | 16 इन्साङ्को बरदान चाहि इङ्को एमि द्याङ्को पापको नतिजा भाइकाङ माको | हाइपालिपानु एनोङ आपाराधको इन्साफ होइ दण्डको आग्या चुमाहि,कालाउ हेन्जा आपाराधको न्हुसो लोका इन्साङ्को बरदान होइ निर्दोसि करन चुमावा | 17 एदि एनोङ खिनिङ द्याङ्को आपाराध नाङ् -इङ्को द्याङ्पाहासो सि:का राइजि पाहि पानुते झन हेन्जा गेनागेल्पा आनुग्रह कालाउ धार्मिकता इन्साङ्को बरदान निङ्कालाइ एनोङ खिनिङ द्याङ येसु:पाहासो जिवनता राइजिपावा | 18 ओदोङ भाअ्सिङ जेसाङ एनोङ खिनिङ द्याङ्को आपाराध होइ गोताङ द्याङ्गेलाइ दण्डको भागिदार जेङ्हि,एसा पादोङ एनोङ खिनिङ द्याङ्को धार्मिकताको काम होइ गोताङ द्याङ्को भाअ्सिङ धर्मि ठहराइतेङ जिवन चुमावा | 19 हाइपालिपानु जेसाङ एनोङ खिनिङ द्याङ्को आनाग्याकारिता होइ हेन्जाङ झना पापि बानाहि,एन्साङ पातेङ एमिको खिनिङ आग्याकारिता पाहासो हेन्जा झना धार्मिक बानायावा | 20 व्यवस्था लोहि कालाउ आपाराधको बृदि जेङ्हि,कालाउ जेता पाप उब्जाइहि आनुग्रह झन हेन्जा ठेकापा बादिहि, 21 इदोइ हितु होइ कि जेसाङ पाप होइ सि:काता राइजि पाहि,एन्साङ पातेङ येसु:ख्रिस्त केलाइको प्रभुसो आनुग्रह होइ धर्मि ठहराइतेङ अनन्त जिवन ठेकापाको राइजि पाको |