रोमियों 4

ओदोङ भाअ्सिङ जिउ आन्सार केलाइको आजाइ- आजु आब्राहामको बारेता केलाइ हाइ सम्बन्धाता पालि ? खान्धुरिको बारेता वा हाइ धिर्हि ? 2 एदि वा पाकाङ कामसो धर्मि बानाइका पानु,वा घमण्ड पालि गोइधाङ | कालाउबुङ आब्राहाम परमेस्वरको आगाता घमण्ड पालि माको | 3 पबित्त्रो धर्म सास्त्तर हाइ दोअ्खे ?आब्राहाम परमेस्वर हुसो खान्धुरि ताअ्हि ,कालाउ वाको खान्धुरि परमेस्वर एलोङ धार्मिकको रुपता गान्धिहि | 4 जेलाउ काम पाका जेदोङ ज्याला निङ्खे इङ्को उपहार माको भरु इङ्को वाको निङ्का खाबारा| 5 आधिमि इन्सिका कामपालि मादोखे जाइ वासेहेङ भक्तिहिनसो धर्मि बानाइखे, कालाउ परमेस्वरसुसो भोरोसा ताअ्खे | इन्सिका द्याङ्को खान्धुरि धार्मिकता ता गान्धिखे | 6 परमेस्वर काम बिना दोङ धार्मिक बानाइका द्याङहेङ इदोइ बचनपाहासो दाउद धन्यको दोअ्खे | 7 'इम्बालाइ धन्यको हि, जाइको अपराधगेलाइ स्यामा जेङ्का हि, कालाउ जाइको पापगेलाइ थुम्पिका हि | 8 उङ्को द्याङ्को धन्य हि, जाइको पापको लेखा परमेस्वर मार्हुकाङ | 9 इसिका आसिस इन्सिका खातानागेलाइको खिनिङ हि ? कि इङ्को खातना मापाकालाइ भाअ्सिङ्बुङ हि ? केलाइ दोअ्का हिनाहि आब्राहामको खान्धुरि एलोङ धार्मिक रूपता गान्धिका हिघाहि | 10 या हेसा जेङ्हि ? हाइ परमेस्वर आब्राहामहेङ वा खतना पालि लाम्फा माकुनु खतना पालि दोलिदोतेङ न्हुसो सुइकार पाहि ? परमेस्वर वासेहेङ खतना पालि लाम्फा सुइकार पाका हिघाहि | 11 खतना माजेङ्सिङ खान्धुरिपाहासो निङ्का धार्मिकताको चिना वा साप स्वरप वा खतना निङ्का हिघाहि | खातना माकोसिङ खान्धुरिपातेङ धर्मि गान्धिनाका झाराङ्को वा आबा जेनाको दोअ्का उदेस्य होइ इदोइ जेङ्का हि | 12 कालाउ आब्राहाम इङ्को खतना पाकालाइको आबा जेङ्हि | कालाउ इम्बालाइको खातना होइ खिनिङ आब्राहाम ओबालाइको आबा जेङ्का माको | वा ओबालाइको बुङ आबा एदि ओबालाइ केलाइको आबा आब्राहामको खान्धुरि भाइपाङ अनुसरण पाहेपानु जेदोङ वा ताइको खातना पालि खान्तेङ लाम्फा तिङ्पाका हिघाहि | 13 आब्राहाम कालाउ वाको न्हुसो लोका सन्तानगेलाइ परमेस्वरको प्रतिग्या निङ्हि ,कि ओबालाइ सारा सुमिङ निनावा | अब्राहाम इङ्को प्रतिग्या निङ्का ब्यबस्ताहेङ खान्धुरि पाका कारनसो माको | आब्राहाम परमेस्वरको प्रतिग्या निङ्का सो वा ताइको खान्धुरि होइ धर्मि हिघाहि | 14 एदि द्याङ्गेलाइ ब्यबस्ता पिताइतेङ परमेस्वरको उत्तराधिकार निङ्हे पानु,कालाउ खान्धुरि मुल्यहिन कालाउ परमेस्वरको आब्राहामदोफा को प्रतिग्या बेक्कारको जेनावा | 15 हाइपालिपानु व्यवस्था पालन मापाखे कालाउ व्यवस्था परमेस्वरको क्रोड चुमाखे, कालाउ एदि इन्ता हिदोइबुङ व्यवस्था मान्थुनु, इन्ता आपराध बुङ मान्थुखे | 16 ओदोङ भाअ्सिङ परमेस्वरको खान्धुरिको प्रतिग्याता निर्भुर हि , परमेस्वरको प्रतिग्या इन्साङकोङ उपहार भाइका निङ्लि द्वाङ | एदि प्रतिग्या एइन्साङ्कोङ उपहार नु,आब्राहामको भाइका खान्धुरि हिका गोताङ सान्तानलाइ इङ्को वचन निङ्लि द्वावा | इदोइ प्रतिग्या इङ्को द्याङ्गेलाइको भाअ्सिङ खिनिङ माको जाइ मोसाको व्यवस्थाको भाइपाङ खान्धुरि हिघाहि, आब्राहाम केलाइको झाराङ्को आबा हि | 17 धर्म सास्तरता इसिका लेखेका हि,''का नासिहेङ झाराङ जातिको आबा बानाइघा |''इदोइ परमेस्वरको आगाता सत्ये हि | आब्राहाम परमेस्वरता खान्धुरिपाहि ओदोङ भाअ्सिङ सिकालाइहेङ बुङ जिवन पिखे कालाउ जेदोङ काथागेलाइ एला थेकापा जेङ्का मान्थु इङ्कोको फाइसाला प्यावा | 18 आब्राहामको सान्तान जेनाङ दोअ्का आसा मान्थुघाखे,कालाउबुङ आब्राहाम परमेस्वरता खान्धुरि पाहि कालाउ आसा सिन्हुपाङ ताअ्हि | परमेस्वर जेसाङ दोअ्हि,''ना दोफा हेन्जा चानचामेन्दिगेलाइ जेनावा | ओदोङ भाअ्सिङ आब्राहाम हेन्जा जातिको आबा जेङ्हि | 19 आब्राहाम लगभग एसाइ बासार उमेर पुगिका हिघाहि,ओदोङ भाअ्सिङ वाको जिउसो सान्तानगेलाइ जेङ्लि उमेर दोका हिघाहि | सारासोबुङ हिदोङबुङ चान-चामेन्दि माजेङ्हि | आब्राहाम याको बारेता सोचेका हिघाहि | कालाउबुङ परमेस्वरदोफा वाको खान्धुरि कमजोर मान्थुघाहि | 20 परमेस्वर प्रतिग्या पाका काम पाङ दोअ्का काथाता आब्राहाम हिलाउबुङ साङ्खा मापाहि आब्राहाम ताइको खान्धुरि मामोअ्पाहि | भरू,वाको खान्धुरि झन सिदृद जेङ्हि कालाउ वा परमेस्वरको बाखानाइ पाहि | 21 प्रतिग्या पाका काथा परमेस्वर पालि द्वाङ दोअ्का आब्राहामहेङ पुरा निसित हिघाहि | 22 ओदोङ भाअ्सिङ,''परमेस्वर आब्राहामको खान्धुरिहेङ ग्रहन पाहि,वासेहेङ धर्मि बानाइहि |'' 23 इङ्को सब्दगेलाइ ''परमेस्वर वाको खान्धुरिहेङ मानिनु,''पानु'' आब्राहामको भाअ्सिङ खिनिङ लेखेका मान्थुघा हि | 24 इङ्को सब्दगेलाइ केलाइको भाअ्सिङ बुङ हिघाहि,परमेस्वर केलाइहेङ बुङ ग्रहन पाखे जाइ वाकोता खान्धुरि पाखे,जाइ केलाइको प्रभु येसु:हेङ सि:कासो सिन्हुपाहि | 25 येसु; हेङ केलाइको पापगेलाइको भाअ्सिङ सि:लि पिहि, कालाउ केलाइहेङ धर्मि बानाइलि वा सि:कासो जिवनता लोहि |