रोमियों 3

एला यहुदिगेलाइहेङ हाइ फाइदा हि ते ? खाताना हाइ जरूरि हि ते ? 2 एइ,यहुदिगेलाइहेङ हिन्जाङ फाइदागेलाइ हि , मुख्य काथा या परमेस्वर ताइको सिक्स्या गेलाइ सो यहुदिगेलाहेङ खान्धुरि पाहि | 3 या सत्ये हि आधे जसो यहुदिगेलाइ परमेस्वरको आग्या मापिकाङ हिघाखे | कालाउ ओदोङ भाअ्सिङ हाइ परमेस्वरको भाकल पुरा पालि रोकिखे ? 4 इन्सा माजेङ्पि, परमेस्वर सत्ये कालाउ गोताङ द्याङगेलाइ,झुता जेनाको | धर्म सास्त्तरता लिखिका हि:''ना ताइको बचनता सच्चा प्रमानित जेङ्पि, जेलाउ इन्साप जेङ्लाउ ना जितिपि |'' 5 जेलाउ केलाइ गल्ति पानाखे ,ओदोङ भाअ्सिङ परमेस्वर येल्का हि दोका काथा आरोङ इस्पस्ट पाखे | ओअ्दोङ भाअ्सिङ हाइ केलाइ दोअ्लि द्यावाङ हाइ परमेस्वर केलाइहेङ दण्ड प्याङ वा धाताइका ज्याङ ? का द्याङ्को मनताको भाइपा धुइदोङ्खा | 6 सिलाउबुङ माको(मिधुलाउबुङ माको) ! इन्सापानु परमेस्वर खुमिङ्हेङ न्याय हेसापा पालि दोअ्धावा | 7 कालाउ एदि काङ्को धाताइकाहोइ परमेस्वरको सत्येता वाकोङ महिमाको भाअ्सिङ जेन्जा जेङ्हेपानु, हाइपालि पापि भाइपा न्यायता परितेङ हिघा | 8 इन्सापानु रेम्का जेङ दोअ्तेङ मारेमका काम हाइपालि मपाइनेते ?आधिमि-आधिमि द्याङ्गेलाइ केलाइ इन्साङ दोनाखे दोतेङ केलाइ निन्दापुर्न दोस चुमाखे | नेलाइको दोस न्याय सङ्गतदोङ हि | 9 ओदोङ भाअ्सिङ केलाइ यहुदिगेलाइ खाङतेङ असल हिनाहि कुनु ? माको,मिधुलाउबुङ मान्थुनाहि | हाइपालि पानु झाराङ द्याङ, यहुदिगेलाइ कालाउ गैर- यहुदिगेलाइ गोताङ इङ्कोङ पापको वसता हि दोअ्तेङ का दोसी लागाइलि दोहोइ का | 10 लेखेका हि, धर्म सास्त्तर दोअ्खे: ' इता धर्मि हासुबुङ मान्थु, एमि बुङ मान्थु , 11 इता हासुबुङ बुझिका द्याङ मान्थु ,इता परमेस्वरहेङ भोअ्का हासुबुङ मान्थु| 12 उङ्को झारा आवाइतुगिल्का हि ,इम्बालाइ एदोफाङ बेकारको जेङ्का हि| हासुबु रेम्का मापाखे, रेम्का पाका एमिबुङ मान्थु |'' 13 'इम्बालाइको निर्घा हवाहवाङ्का तोम भाइका हि, इम्बालाइको ताइको देतोङ्होइ धाताइका काथागेलाइ पाखे |'' पुयाको बिस ओबालाइको नुइताङ हिखे | 14 'इम्बालाइको नुइगेलाइ स्राप कालाउ खाका काथागेलाइ होइ पोङ्घाका हि |'' 15 'इम्बालाइको खोकोइ सेअ्लिको भाअ्सिङ मा-मार्पा धाअ्खे | 16 बिनास कालाउ बिपति इम्बालाइको दामाता हि, | 17 इम्बालाइ सान्तिको दामा नाल्का मान्थु |'' 18 इम्बालाइ परमेस्वरहेङ माथिखे कालाउ'' ए'' सामानको मान्थु | 19 केलाइ गिनाखे कि ब्यबस्थादोङ दोअ्का खिनिङ, इङको ब्यबस्थाकोङ खाबाराता हिका लाइदोङ | वादोङ गोताङ द्याङ्गेलाइ नुइ सिकापा पाङ , कालाउ गोताङ सुमिङ्हेङ परमेस्वरको न्यायको खाबाराता चुमाङ | 20 हाइपानु ब्यबस्थाहेङ पिताइतेतेङ हासुबुङ हुसी हिका प्रानि परमेस्वरता धर्मि जेङ्लि मादोअ्खे | हाइपालिपानु व्यवस्थासोङ दोङ पापको चेताना जेङ्खे | 21 कालाउ एला व्यवस्था बिना दोङ द्याङ्गेलाइहेङ परमेस्वरसो लोका धार्मिकता प्रकट जेङ्का हि | इङ्को कोङ गवाहि व्यवस्था कालाउ अगमबकतागेलाइ पिका हि | 22 येसु: ख्रीस्टता खान्धुरि पाका झारा दोफा परमेस्वरको धार्मिकता खान्धुरिपाहासो प्रकट जेङ्का हि, हाइपालिपानु हाइदोङ भेत मान्थु | 23 हाइपालिपानु झाराङ पाप पाका हि कालाउ परमेस्वरको महिमा थेकापा ठुकालि निल्का हि , केलाइहेङ येसु: ख्रिस्तको खान्धुरिको माध्यमसो धर्मि पाका हि | 24 द्याङ्गेलाइहेङ परमेस्वरको अनुग्रह पाहासो धर्मि बानाहि, इदोइ हाइदोङ माकोसिङ उपहार येसु: ख्रिस्तको माध्यम पाहासो परमेस्वर द्याङ्गेलाइहेङ पापसो मुक्त पातेङ धर्मि बानाइखे | 25 परमेस्वर केलाइको पापको भाअ्सिङ येसु: हेङ दिङ्गिल्हि , इम्बालाइको खान्धुरिको कारनसो परमेस्वर येसु:को हिति पाहासो द्याङ्गेलाइको पापको स्यामा प्याङ | इदोइ धार्मिक हि, दोअ्तेङ परमेस्वर एसा पाहि | ताइको र्हुम्काको कारन परमेस्वर द्याङ्गेलाइ हेङ इम्बालाइको पाका पापगेलाइको भाअ्सिङ दण्ड पिहि | 26 परमेस्वर ताइमिङ धर्मि हि, कालाउ खान्धुरि ताअ्कालाइहेङ वा धर्मि थोहोराइखे दोअ्का काथा प्रमान पालि वाबर्तमान समयता या पाहि | 27 ओदोङ भाअ्सिङ केलाइ ताइमिङ यिस्काङ घमन्ड पाका थामेहि रो ? अह,हिदोइ थामेबुङ मान्थु | हाइपालि ठामे मान्थु ? हाइपालिदोनु इदोइ खान्धुरिको सिधान्दातासो खिनिङ कालाउ व्यवस्थाको दामासो | 28 ओदोङ भाअ्सिङ व्यवस्थाको कामगेलाइको पालनबिना खान्धुरि पाहासोदोङ द्याङ धर्मि थोहोरिखे दोअ्का केलाइ थानिनाखे | 29 हाइ परमेस्वर यहुदिगेलाइको खिनिङ परमेस्वर हि रो? हाइ वा गैर-यहुदिगेलाइको परमेस्वर माको रो ? वा बो जातिगेलाइको बुङ परमेस्वर हिका हि | 30 परमेस्वर एनोङ खिनिङ हि, वाखातानावालागेलाइहेङ इम्बालाइको खान्धुरिको आधार पाहासो धर्मि बानाइका हि |कालाउ खाताना मापाकालाइहेङ इम्बालाइको खान्धुरि पाहासो धर्मि बानाइखे | 31 ओदोङ भाअ्सिङ केलाइ इदोइ खान्धुरिसो व्यवस्थाहेङ रद्द पालि ? सि:लाउबुङ माको भुरु केलाइ ते ब्यबस्थाहेङ जोगिपातेङ ताअ्नाखे |