प्रेरितों के काम 21

केलाइ मानिलि गोइका एल्डर.डिकनगेलाइ सो बिदा र्हुतेङ न्हुसो जाहाज धोल्तेङ सिधाङ क्रसतापुता थुकालि लोनाहि ,न्हु दिना रोडसको तापुता लोनाहि | इन्तासो पतारा थुकानाहि | 2 पताराता केलाइ एलोङ जहाज तिङ्नाहि जेदोङ फोनिसिया पार पातेङ हानिदोङ्घाखे | केलाइ समुन्द्र पाहासो जाहाजाता हानिनाहि | 3 केलाइ साइप्रस तापुको भेर्पा थुकानाहि ,कालाउ केलाइ इङ्कोको केपाहा ओदोइपार सिरियाभारि हानितेङ टुरोसता खुअ्नाहि | हाइपालिपानु जाहाजको आनेमानेगेलाइ इन्ता खुपालि गोइका हिघाहि | 4 केलाइ टायर सहरता येसु:को चात्यागेलाइहेङ भेतिन्हाहि कालाउ ओबालाइ दोफाङ न्हि दिना ठेकापा हिनाहि | इम्बालाइहेङ पबित्तरो आत्मा पिका बानालको आधारता ओबालाइ पावलहेङ यरुसलेम मान्हे दोअ्तेङ चेताउनि पिहि | 5 कालाउ जेलाउ केलाइ इन्ताको भ्रमन दोपानाहि,बिदा र्हुनाहि कालाउ केलाइ हिगिल्का काम जारिदोङ ताअ्न्हाहि | झाराङ येसु:को चात्यागेलाइ इता थेकापाहि बेबाल द्याङ्गेलाइ सुधाङ कालाउ जामाललाइबुङ केलाइहेङ बिदा पिलि सहर बाहार थेकापा लोहि | केलाइ झाराङ काम्भेता तिरु थोनाहि कालाउ दोमचाकाइना हि | 6 कालाउ न्हुसो केलाइ बिदा र्हुतेङ जाहाजाता ताङ्नाहि,चात्यागेलाइ सा घुरिहि | 7 केलाइ टायरसो ताइको लागातार टोलेमाइस सहरता हानिनाहि, केलाइ चात्यागेलाइ स्वगत पानाहि कालाउ ओबालाइदोफा एनि हिनाहि | 8 भेनेङ दिना टोलेमाइस सहर लाअ्नहाहि कालाउ सिजरिया सहरता हानिन्हि ,केलाइ फिलिपको साता कालाउ हिनाहि | फिलिप परमेस्वरको ये:बानाल प्रचार पातेङ सेवा पातेङ हिघाहि | वा न्हिमि मध्येसो बिसेस साघाइ पाका एमि हिघाहि | 9 वाको द्यामि बुहु माजेङ्का चामिन्दिगेलाइ हिघाहि कालाउ इम्बालाइ अगमबानि पाका बरदान निङ्का हिघाहि | 10 इन्ता हेन्जा दिना ठेकापा हितेङ न्हुसो,एमि अगमबक्ता आगाबास यहुदिया सो लोहि | 11 वा केलाइकोता लोहि कालाउ पावलको पेति र्हहि ,कालाउ न्हुसो आगबास इङ्को पेति होइ खुर कालाउ खोकोइ धेउहि,कालाउ दोअ्हि,''पबित्तरो आत्मा दोअ्खे,''यिदोइ पेति जाइको हि वासेहेङ एसापा यरुसलेमता यहुदिगेलाइ धेवावा | कालाउ न्हुसो इम्बालाइ वासेहेङ गैर- यहुदि द्याङ्गेलाइकोता सोमप्यावा | 12 केलाइ झाराङ यिदोइ सब्दगेलाइ हिङ्नाहि ओदोङ भाअ्सिङ केलाइ कालाउ येसु:को चात्या आरू इन्ता कोङ चात्यागेलाइ पावलहेङ यरुसलेम मान्हे दोअ्तेङ सेउपाहि | 13 कालाउ पावल दोअ्हि ''नेलाइ हाइपालि खारतेङ हिसुखेना ? हाइपालि कासेहेङ वथेपा मन नेलाइ हाइपालि आउलिपापिसुखेना ? का यरुसलेमता बन्धनता परिलि तियार हिघा | का प्रभु येसु:को मिङको भाअ्सिङ सि:लि तियार हिघा !'' 14 केलाइ वासेहेङ यरुसलेमसो दुरे ताअ्लि माद्वाङ, ओदोङ भाअ्सिङ केलाइ वासेहेङ बिन्ति पालि लाअ् पिन्हाहि कालाउ दोअ्नाहि,''केलाइ दोमचाकाइयाङ , कि जेदोङ प्रभु मन पाखे एन्साङ जेनावा 15 कालाउ न्हुसो केलाइ यरुसलेम भारि हानिलि तियार जेङ्नाहि | 16 सिजिरिया बासि येसु:को हेथेते चात्यागेलाइ केलाइदोफा हानिहि, उङ्को चात्यागेलाइ केलाइहेङ साइप्रसको द्याङ मनसोनको साता चुम्पुहि | मनसन येसु:को एमि एकदम पुर्ना चात्या हिघाहि | इम्बालाइ केलाइहेङ वाको साता चुम्पुहि कालाउ केलाइ इन्ताङ हिनाहि | 17 यरुसलेमता खान्धुराइगेलाइ केलाइहेङ तिङ्तेङ मेनाङ लेङ्चाहि | 18 भेनेङ दिना,याकुबहेङ भेतिलि पावल केलाइदोफा हानिहि गोताङ बारका द्याङ्गेलाइबुङ इन्ताङ हिघाहि | 19 पावल झाराङहेङ अभिबादन पाहि कालाउ परमेस्वर गैर-यहुदिगेलाइको माझाता वाको सेवकगेलाइको माध्यमसो हाइ-हाइकामगेलाइ पाहि एलोङ एलोङ्पा बृतान्त हिङ्पाहि | 20 जेलाउ एल्डर डिकनगेलाइ इदोइ काथागेलाइ हिङ्हि,इम्बालाइ परमेस्वरको बाखानाइ पाहि | कालाउ न्हुसो इम्बालाइ पावलहेङ दोअ्हि,''ओने ! ना तिङ्खेना ,कि वथे हाजारौ यहुदिगेलाइ खान्धुराइ जेङ्हि | कालाउ इम्बालाइ झाराङ सोचिहिकि मोसाको व्यवस्था खुबै महत्वको हि | 21 बो सार्भिता गैर-यहुदिगेलाइ माझाता हिका यहुदिगेलाइ ना मोसाको व्यवस्था पालन मापालि दोअ्तेङ सिक्स्या पिना दोअ्का इम्बालाइ हिङ्का हि | इम्बालाइ हिङ्का हि कि यहुदिगेलाइको चान-चामेन्दिगेलाइहेङ खतना पालि मागोयाङ कालाउ केलाइको रिति-तिथि मानिलि मागोयाङ दोअ्तेङ सिक्स्या पिना | 22 हाइपालि गोइका ? इता यहुदि खान्धुराइगेलाइ ना लोका निसित थाहा ग्यावा | 23 एसापा हाइ पालि गोयाङ केलाइ दोअ्प्याङ: केलाइको द्यामि द्याङ्गेलाइ परमेस्वरता बाचा पाका हि | 24 इम्बालाइहेङ चुम्पुतेङ हाने कालाउ नेलाइ दोअ्फाङ ताइमिबुङ चोखाइ , ना इम्बालाइको पुरुङ खुइले बनाइलि ताका पि| एन्सा पाहे इङ्को प्रमान जेनावा कि नाङ्को बिसयता इम्बालाइ जेदोङ हिङ्हि इङ्को सत्ये माको इम्बालाइ ना मोसाको नियम नाङ्को ताइकोङ जिवनता पानल पाका तिनावा | 25 गैर-यहुदि खान्धुराइगेलाइको बिसयता केलाइ इम्बालाइहेङ चिठि एसा दोअ्तेङ पिगिल्का हिघाहि : ''मुर्ति गेलाइता चढाइका आनेमाने माचालि,हिति माचालि निर्घामेतेङ से:का गपुस माचा कालाउ हिदोइबुङ खाल्को कासिबेरि मापासु |'' 26 पावल उङ्को द्यामि द्याङ्गेलाइहेङ ताइको दोफाङ चुम्पुतेङ हानिहि कालाउ इम्बालाइको चोखाइका उत्सवता भाग र्हुहि | कालाउ न्हुसो चोखाइका दिनाको दोका दिना हेलाउ जेनाङ कालाउ इम्बालाइ झाराङ्हेङ भेति पिलि कालाउ इङ्को को उद्घोसन पालि वा मुन्दिर लिता दुल्हि | 27 जेलाउ न्हि दिना दोलि तोम्का हिघाहि हेथेते एसियाको यहुदिगेलाइ पावलहेङ मुन्दिरको सालेङ्ता तिङ्हि | इम्बालाइ गोताङ द्याङ्गेलाइहेङ तोङ्पाहि कालाउ पावलहेङ रिम्हि | 28 इम्बालाइ मार्फाङ आहुहि,''ओइ यहुदिगेलाइ,केलाइहेङ साघाइ, या दोङ द्याङ ज्याइ मोसाको व्यवस्थाको बिरुद,ताइकोङ द्याङ्गेलाइको बिरुद इदोइ द्याङ इसिका काथागेलाइ गोताङ द्याङ्गेलाइ द्यापाहाङ धिरपातेङ हि | वा हेथेते गेर-यहुदिगेलाइहेङ थानको सालेङ्ता चुमाका हि | वाते इदोइ पबित्तरो थामेहेङ असुद बानाइका हि ! 29 यहुदिगेलाइ एसा दोअ्का कारन ओबालाइ एफिससको तोरोफिमसहेङ पावल दोफा यरुसलेमता तिङ्का हिघाहि कालाउ सोचिहि कि वासेहेङ पावल मुन्दिरको थामेलिता चुमाका हि | 30 यरुसलेमता खलबल मचिहि, द्याङ्गेलाइ गोताङ पाहासो धाअ्तेसाङ लोहि कालाउ पावलहेङ रिम्हि कालाउ तानितेङ मुन्दिरको थामे भारिसो बाहार ओल्ला पाहि | मुन्दिरको दुल्लाका फिनुगेलाइ एन्सालाउदोङ बन्द पाहि | 31 जेलाउ द्याङ्गेलाइको जेर पावलहेङ से:लि तरखर पादोङ्घाखे रोमन सेनापति गोताङ सहरता गन्दागोल जेङ्तेङ हिका सुचना निङ्हि | 32 सेना पति ओदोङ्घुरि इङ्को थामेता आधे सेना अधिकारिगेलाइ कालाउ लान्ठागेलाइदोफाङ चुम्पुतेङ थुकाहि | द्याङ्गेलाइ सेनापति कालाउ लान्ठागेलाइ लोका तिङ्हि,इम्बालाइ पावलहेङ दानाइलि लाअ्हि | 33 कालाउ सेनापति पावलको भेर्पा हानितेङ रिम्हि सेनापति ताइको सेनागेलाइ पावलहेङ न्हेलोङ झिनन्झिरि दोउलि दोअ्तेङ हुकुम पाहि | कालाउ सेनापति हि:हि,''इदोइ द्याङ हासु ? वा हाइ गल्ति पाका हि ?'' 34 हेथेते द्याङ्गेलाइ एलोङ थरिको काथागेलाइ पाघाखे कालाउ हेथेते बो द्याङ्गेलाइ भेनेङ थरिको काथागेलाइ पादोङ्घाखे, इन्सिका नाना थरिको काथागेलाइ दोअ्नाङ सेनापति सत्ये काथा पत्ता लागाइलि मादोअ्हि | ओदोङ भाअ्सिङ सेनापति सेनागेलाइहेङ सेनाको साता पावलहेङ चुम्पुलि दोअ्का हुकुम पाहि | 35 जेलाउ पावल पाइरोता थुकाहि,कालाउ द्याङ्गेलाइको जेर हिङ्सा पातेङ तोङ्हि कालाउ लान्ठागेलाइ वासेहेङ तोल्हेतेङ चुम्पुहि | 36 हाइपालिपानु द्याङ्गेलाइको जेर वासेहेङ सेअ्सु,दोअ्तेङ र्हिकाताङ लेसारा पिताइका हिघाहि | 37 लान्ठागेलाइ पावलहेङ ब्यारेकता चुम्पुलि तियार हिघाहि , कालाउ सेनापति दोफा नुइ धुइहि,वा हि:हि,''नासिहेङ हाइदोङ दोअ्लि द्वाङ्का ?'' सेनापति दोअ्हि ना ग्रिक भासा धुइखेना ?'' 38 का सोचेका द्याङ ना माको रोइसो ? का नासिहेङ मिस्रो सार्भिको द्याङ सम्झिका हिघाखा ज्याइ (सरकारको बिरुद) लाम्फाङ बिद्रोह पालि तेङ्का हिघाहि | कालाउ वा मरुघानता द्या हाजार द्याङ से:का लाइको अगुवा जेङ्का हिघाहि | 39 पावल दोअ्हि,का सिलिसियाको सार्भिसो लोका यहुदि का इन्ता नामि सहर टार्ससको नागरिक | दाया पातेङ कासेहेङ द्याङ्गेलाइ दोफा धुइ-धुइलि पि |'' 40 सेनापति पावलहेङ द्याङ्गेलाइहेङ डोका नुइ धुइलि अनुमति पिहि ,ओदोङ भाअ्सिङ वा पाइरोता जाअ्हि कालाउ वा खुरको इसाराहोइ द्याङ्गेलाइहेङ सान्ति जेङ्हि | जेलाउ द्याङ्गेलाइ पावल इम्बालाइ दोफा नुइ धुइहि वा यहुदि भासाता इम्बालाइदोफा नुइ धुइहि |