प्रेरितों के काम 19

अपोल्लोस कोरिन्थि सहरता हिका बेला,पावल एफिससको दामा पाहा पाहासो हेन्जा थामेगेलाइ भारि घुराइगिल्का हिघाहि एफिससता पावल हेथेते चात्यागेलाइ दुसुहि | 2 पावल ओबालाइहेङ हि:हि,''हाइ नेलाइ खान्धुरि पालाउ पबित्त्तरो आत्मा निङ्सुना ?''ओबालाइ दोअ्हि,''केलाइ हेलाउबुङ पबित्त्तरो आत्मा हि दोअ्का हिङ्का मान्थुनाहि |'' 3 जेलाउ पावल हि:हि,हिसिका खालको बप्तिस्ता नेलाइ र्हुसुना ?'' ओबालाइ दोअ्हि,''यु:हान्ना जेसाङ दोअ्हि एन्साङ केलाइ बप्तिस्ता र्हुका हिनाहि |'' 4 पावल दोअ्हि,''यु:हान्ना द्याङ्गेलाइहेङ ताइको जिवन परिवर्तन पालि खाङ्कालाहेङ बप्तिस्ता पिघाखे | यु:हान्ना दोअ्घाखे एमिहेङ खिनिङ खान्धुरिपासु ज्याइ वाकोसो न्हुसो लोधोङ्खे , वा येसु:हि |'' 5 जेलाउ ओबालाइ इङ्को हिङ्हि,ओबालाइ प्रभु येसु:को मिङ्ता बप्तिस्ता रहुहि | 6 कालाउ न्हुसो पावल ओलाइहेङ खुर ताअ्तेङ कालाउ पबित्त्तरो आत्मा ओबालाइकोता लोहि | जेलाउ ओबालाइ भेनेङ-भेनेङ भासागेलाइसो धुइलि तेङ्हि कालाउ अगमबानिगेलाइ पालि तेङ्हि | 7 ओबालाइको हुलता माकुलाउबुङ तेन्हे झन हिघाहि | 8 पावल चाउघारा साता हानिहि कालाउ माथिसिङ साहासदोफाङ नुइ धुइहि, सुम महिना थिकापा पावल एन्साङ्दोङ पाहि, वा यहुदिगेलाइ दोफा बहस पाघाखे | कालाउ इम्बालाइहेङ परमेस्वरको सार्भिको बिसयता साउसाइपाघाखे | | 9 हेथेते यहुदिगेलाइ थाङ्का हिघाहि, ओबालाइ खान्धुरि मापाहि ओबालाइ परमेस्वरको दामाको बिसयता हेन्जाङ आखेका निन्दनिय काथागेलाइ द्याङ्गेलाइको आगाता पाहि | ओदोङ भाअ्सिङ पावल इम्बालाइहेङ लाअ्हि कालाउ चात्यागेलाइहेङ दोफाङ चुम्तेङ हानिहि कालाउ गोताङ दिना तिरान्नसको चाउघारा साता हानितेङ बहस तेङ्हि | 10 पावल इसिका काम न्हे बासार थेकापा पाहि इसिकाङ कामसो कारनहोइ जेङ्नाङ गोताङ यहुदि कालाउ ग्रिक एसिया सारभिको प्रभुको बचन हिङ्हि | 11 परमेस्वरको हाइदोङ सारभुसाइका काम गेलाइ पालि पावलहेङ प्रयोग पाहि | 12 पावलको चालाइका रुमालगेलाइ कालाउ लोखन धावागेलाइ मिसा लोकालाइको हुता ताअ्हि, जेलाउ इम्बालाइ एसा पाहि इम्बालाइ एल्धाखे कालाउ दुस्त आत्मागेलाइ इम्बालाइसो बाहार ओल्लिघाखे | 13 हेथेते यहुदिगेलाइ थामे-थामेता घुराइगिलतेङ दुस्त आत्मागेलाइ द्याङ्गेलाइसो खाअ्पापिघाखे | 14 स्केवाको न्हिमि चानगेलाइ एन्सा पाघाखे , (स्केवा बार्का धामि हिघाहि )| कालाउ कि यहुदिगेलाइ प्रभु येसु:को मिङ प्रयोग पातेङ द्याङ्गेलाइसो दुस्त आत्मा दिगिल्लि खाङ्घाखे | इम्बालाइ दोअ्घाखे,''का नासेहेङ उङ्को येसु:को मिङ्ता जेदोङ्को मिङ्सो पावल बानाल पाखे,आदेस पिखा बाहार लोउ |'' 15 कालाउ ए पल्ट एलोङ दुस्त आत्मा इङ्को यहुदिगेलाइहेङ दोअ्हि,''का येसु:हेङ नाल्खा,कालाउ पावलहेङ नाल्खा,कालाउ नेलाइ चाहि हासु 16 कालाउ उङ्को द्याङ ज्याइदोफा दुस्त आत्मा ताङ्का हिघाहि उङ्को तोङ्तेङ यहुदिगेलाइहेङ झार्मिरिहि , वा झाराङ खान्तेङ बलियाका हिघाहि | वा इम्बालाइहेङ दानाइहि कालाउ इम्बालाइ धावा लोखनगेलाइ थेअ्पिहि | उङ्को यहुदिगेलाइ इङ्को सासो नाङ्घाङ कालाउ आधामारातेङ खाअ्हि | 17 एफिससको गोताङ द्याङ्गेलाइ,यहुदिगेलाइ,कालाउ ग्रिकगेलाइ यिदोइ काथागेलाइ थाहा गिहि कालाउ निकौङ थिहि,कालाउ इम्बालाइ झाराङ प्रभु येसु:मिङ्ता हेन्जा खान्तेङ हेन्जा सम्मान पालि तेङ्हि | 18 हेन्जा द्याङ्गेलाइबुङ ज्याइ खान्धुराइ जेङ्का हिघाहि,आगाता लोतेङ कालाउ इम्बालाइको दुस्त कामगेलाइ झाराङ्को आगाता सुइकार पाहि | 19 ओबालाइ मध्येसो आधिमि टुनामुना पाका, म्होका , झारफुक,प्रयोग पाका हिघाहि | इम्बालाइ ताइको टुनामुना पाका किताबगेलाइ चुमाहि कालाउ झाराङ्को आगाता इङ्को पुस्तकगेलाइ ओअ्पाहि | इङ्को पुस्तकगेलाइको दाम झान्दाइ न्हेकुरि ते हाजार चान्दिको सिक्कागेलाइ झोको अनुमान पाहि | 20 इसिका प्रकारसो, प्रभुको वचन द्यापाहाङ उब्जाइहि कालाउ द्याङ्गेलाइता धेमाङ प्रभाब जेङ्हि | 21 कालाउ काथागेलाइ पालि दोअ्तेङ,पावल म्यासिदोनिया कालाउ अखैया कालाउ यरुसलेम हानिका योजना बानाइहि | पावल सोचिहि,''यरुसलेम भ्रमन पालि दोअ्तेङ न्हुसो का रोम भ्रमन पाङ्का |'' 22 तिमोथि कालाउ इरास्तस न्हेमि पावलको सहयोगिगेलाइ हिघाहि | पावल इम्बालाइहेङ म्यासिदोनिया ता लाम्फाङ्दोङ दिङ्गिल्हि | पावल आले समयको भाअ्सिङ एसियाताङ हि | 23 कालाउ ओदोङ समयता एफिससता बारका आसान्ति जेङ्का हिघाहि | इङ्को आसान्ति परमेस्वरको दामाको बिसयता चुम्तेङ जेङ्का हिघाहि | 24 इनता डेमोतिरियस मिङ हिका एमि द्याङ हिघाहि ,वा चान्दिको काम पाघाखे | वा आर्तेमिस मुन्दिर चान्दिको म्हुइका नमुनागेलाइ बानाइहि | एसापा इसिका सिल्पि क्रमिगेलाइ निकोङ काम पितेङ ताका पिहि 25 डेमितिरियस इदोइ गोताङ सुनारगेलाइहेङ कालाउ इन्सिका ब्यवसायित पाका द्याङ्गेलाइहेङ जोम्पाहि कालाउ इम्बालाइहेङ दोअ्हि, नेलाइ रेम्फा गिसुखेना, यिदोइ कामसो केलाइ निकोङ ताका कामाइनाखे | 26 कालाउ खाङसु, या पावल दोअ्का द्याङ हाइ पादोङ्खे ! हिङ्सु वा हाइ दोअ्दोङ्खे, पावल हेन्जा झानाहेङ प्रभाबित कालाउ परिबर्तन पालि दोहोइ | वा इता एफिससता कालाउ एसियाको सारा सारभिगेलाइता इसिका कामगेलाइ पातेङ हिनाहि | पावल दोअ्खे ,कि द्याङ्गेलाइको बानाइका दिरगेलाइ सत्ये दिरगेलाइ माको | 27 पावल दोअ्का इन्सिका काथागेलाइहोइ द्याङ्गेलाइ केलाइको पेसा बिरुद्द जेङ्का खातारा जेनाङ | कालाउ इनता भेनेङ खाताराबुङ हि: द्याङ्गेलाइ सोचिलि द्वाङ कि माहान दिर डाइनाको मुन्दिर हिदोइबुङ महत्वपुर्न काथा माको ! इङ्को बेला वाको माहानाता नासावा | डाइनाको दिर सारा एसिया कालाउ सुमिङ्को गोताङ थामेता दोङ पुजियावा | 28 इन्सिका काथा हिङ्तेङ न्हुसो इम्बालाइ क्रोधित जेङ्हि इम्बालाइ र्हिकाइलि तेङ्हि,''डाइना,एफिससको माहान दिर दोङ |'' 29 सहरको द्याङ्गेलाइ भानाइ लुटेङ हिघाहि, इम्बालाइ गायस कालाउ अरिस्ताखर्सहेङ रि्म्हि |न्हेमि द्याङ्गेलाइ म्यासिदोनिबासि हिघाहि कालाउ पावल दोफा हानिघाहि | झाराङ द्याङ्गेलाइ खुजलाइका सा भारि धाअ्पुहि | 30 पावल बुङ इन्ता लिता हानिलि भोगाखे,कालाउ द्याङ्गेलाइको जेरगेलाइहेङ सम्भोदन पालि खाङ्घाखे कालाउ येसु:को चात्यागेलाइ वासेहेङ हानिलि मापिहि | 31 इङ्को सार्भिको हेथेते नेतागेलाइ पावलको भाया हिघाहि ,इम्बालाइ वासेहेङ खबर पिगिल्हि | इम्बालाइ पावलहेङ तामासा सा लिता मान्हे दोअ्हि | 32 हेथेते द्याङ्गेलाइ एनौङ खिनिङ काथाता र्हिकाइतेङ हिका हिघाहि आधिमि भेनेङ काथाता रि्हिकाइतेङ हिका हिघाहि | इङ्को सभाउ सा दोधारता हिघाहि, हेन्जा द्याङगेलाइ इन्ता हाइपालि लोका दोअ्का बुझिलि दोअ्का मान्थुघाहि | 33 यहुदिगेलाइ अलेकज्यान्दर मिङ हिका एमि द्याङ्हेङ जनता आगाडि जाअ्पाहि द्याङ्गेलाइ वासेहेङ हाइपालि एला दोअ्हि | अलेकज्यान्दर ताइको खुर इङ्को जेर हिका भारि तोल्हेतेङ हेङ्गालाइहि हाइपालिपानु वा इम्बालाइहेङ व्यख्या पातेङ बुझिपालि भोघाखे | 34 कालाउ जेलाउ द्याङ्गेलाइ थाहा गिहि कि अलेकज्यान्दर एलोङ यहुदि हिघाहि, इम्बालाइ एलोङ्दोङ काथाता न्हे घन्ता ठेकापा र्हिकाइतेङ हि,''एफिससबासि गेलाइको डाइना माहान हि | इङ्को गाला न्हें घन्ता थिकापा र्हिकाइतेङ हि | 35 कालाउ न्हुसो सहरको हाकिम इम्बालाइहेङ सिकापा पालि कोसिस पाहि कालाउ दोअ्हि,''एफिससको द्याङ्गेलाइ ! हाइ सुमिङ्ता हासुबुङ द्याङ्हि ज्याइ एफिसस सहरको माहादेबि डाइनाको मुन्दिर हि, कालाउ वाको मुर्ति जेदोङ स्वर्गसो हुल्का दोअ्तेङ मागिखे ? 36 हिदोइबुङ द्याङ्बुङ इङ्को सत्ये माको दोअ्लि माद्वा, एसापा इम्बालाइ सिकापा हिसु हाइदोङ्पालि खान्तेङ लाम्फा सोचेसु | 37 नेलाइ,इदोइ द्याङ्गेलाइहेङ चुमासुना,कालाउ इम्बालाइ केलाइको देबिको बिरुद्द ए, सबदबुङ माएल्का दोअ्का मान्थुसुना, इम्बालाइ थानसो हाइदोङ्बुङ खुका मान्थु | 38 केलाइको न्यायगेलाइ हि,कालाउ इनता निर्नय गेलाइ हि ,डेमेतिरियस कालाउ वाको कारिगरगेलाइको हासुकोबुङ बिरुद्ता हाइदोङ हिहे पानु नेलाइ न्यायगेलाइ हानाको न्यायलता इम्बालाइता ताइमिता मादोसियाको | 39 आरू आरूङ आसा चर्चा पालि बाकि हिनु इङ्को काथा गेलाइ सहरको द्याङ्गेलाइ दिनाङ सभाउ मिलिपावा | 40 हाइपालिपानु नानि इता घटेका घट्नाको कारनहोइ एला दङ्को दोसि लोलि सम्भावाना हि |हाइपालिपानु नानिको यिदोइ सभाउ जेलाउ हिदोइबुङ ठोस कारन मान्थु , यिदोइ समस्याको बिसयता बास्तबता बयान पिलि मादाङ |'' 41 सहरको हाकिम उङ्को झोको दोअ्तेङ सा- सा हानेलि दोअ्हि |