प्रेरितों के काम 18

न्हुसो, पावल एथेन्स लाअ्हि कालाउ कोरन्थि हानिहि | 2 वा इन्ता अक्विला मिङ हिका एमि यहुदिहेङ भेतिहि, अक्विला,पोन्ट्स दोअ्का प्रेदेसता जोलोम जेङ्का हिघाहि, कालाउ वा कालाउ वाको प्रिस्किला भर्खर खिनिङ इतालिसो कोरिन्थ थुकालि लोका हिघाहि,हाइपालिपानु क्लौदियस गोताङ यहुदिगेलाइ रोम लाअ्लि गोइखे दोअ्का आदेस पाका हिघाहि | पावल इम्बालाइहेङ भेतिलि हानिहि | 3 इम्बालाइ पावल भाइपाङ तम्बु (पाल) बानाइका काम पाघाखे पावल इम्बालाइ दोफाङ हि कालाउ इम्बालाइ दोफा पाल बानाइका काम पाहि | 4 जेलाउबुङ माइसाचाका दिना पावल चाउघारा साता यहुदिगेलाइ कालाउ ग्रिक गेलाइदोफा काथा पाघाखे वा येसु:ता खान्धुरि बानाइलि इम्बालाइहेङ कोसिस पातेङ हि | 5 सिलास कालाउ तिमोथि म्यासिदोनिया सो पावलहेङ भेतिलि कोरन्थियता लोहि, न्हुसो ताइको समय द्याङ्गेलाइहेङ ये:बानाल दोअ्काताङ पिताइ पाहि | वा यहुदिगेलाइहेङ येसु:दोङ ख्रिस्त दोअ्तेङ तिङ्पाहि | 6 कालाउ यहुदिगेलाइ पावलको सिक्स्यागेलाइ ग्रहन मापाहि , यहुदिगेलाइ एकदम हेपाइकाका (निंदनिय) वचनगेलाइ दोअ्हि | ओदोङ भाअ्सिङ पावल ताइको लोखन धावागेलाइसो धुला र्हिहि , वा यहुदिगेलाइहेङ दोअ्हि,''एदि नेलाइहेङ मुक्ति मागोइहिपानु,इङ्को नेलाइकोङ गल्ति जेनावा का ताइमि दोका जति सक्दो पाघा | एला का गैर-यहुदिगेलाइकोता हानाङ्का |'' 7 पावल चाउघारा सासो बिदा र्हुहि कालाउ ताइतस जुसट्स मिङ हिका द्याङ्को साता हानिहि, उङ्को द्याङ सत्ये परमेस्वरको धामि हिघाहि वाको सो चाउघारा साकोङ भेनेङ पाहां हिघाहि | 8 क्रिस्पस चाउघारा साको बारका हिघाहि,क्रिस्पस कालाउ आरू झाराङ द्याङ्गेलाइ ज्याइ वाको साता हिघाहि ओबालाइ प्रभुता खान्धुरिपाहि , कोरन्थिको हेन्जा द्याङ्गेलाइबुङ पावलको बानाल मनपितेङ हिङ्हि कालाउ खान्धुरिपाहि कालाउ बप्तिस्ता र्हुहि | 9 न्हिसिन्ता पावल दरसन निङ्हि, इङ्को दरसन प्रभुवासेहेङ दोअ्हि,'' माथि''! लागातार द्याङ्गेलाइ दोफा घुइतेङ हि ! मालाअ् ! 10 का नादोफा हिघा नासिहेङ नोक्सान पाका हिदोइबुङ योजना सफल माजेनाङ काङ्को हेन्जा द्याङ्गेलाइ इदोइ सहरता हि |'' 11 पावल ए बासार आधा थिकापा हि,कालाउ ओबालाइको माझाता परमेस्वरको बचनको सिक्स्या पिह | 12 गल्ति अखैया अन्चलको हाकिम जेङ्हि, आधिमि यहुदिगेलाइ वाको दोफा मिलेतेङ पावलको बिरोध पाहि,ओबालाइ पावलहेङ न्यायलयता चुम्पुहि | 13 यहुदिगेलाइ गल्लियोहेङ दोअ्हि इदोइ द्याङ केलाइ को कानुनको बिरुद्द परमेस्वरहेङ पुजिलि दोअ्तेङ द्याङ्गेलाइहेङ लाइपाका चेस्ता पादोङ्खे |'' 14 पावल हाइदोङ दोअ्लि तोमका हिघाहि कालाउ गल्लियो यहुदिगेलाइहेङ दोअ्हि,''एदि इदोइ काथागेलाइ अपराधपुरन काम जेङ्हेपानु का नेलाइको काथा हिङ्धाङ्घा | 15 यिदोइ सब्दगेलाइ , कालाउ मिङ्गेलाइ कालाउ नेलाइको व्यवस्थाको बिसयता हि | ओदोङ भाअ्सिङ यिदोइ समस्यागेलाइ नेलाइदोङ ताइमि मिलिपासु |'' 16 कालाउ ओबालाइहेङ गललियो न्यायलयसो बिदा पिहि |'' 17 कालाउ ओबालाइ चाउघारा साको अध्कस्य सोस्थेनिजहेङ रिम्हि कालाउ न्यायलयको आगाता वासेहेङ दानाइ हि, कालाउ गल्लिय इङ्कोता हाइदोङ चासो मापिहि | 18 पावल दाइ-ओनेगेलाइ दोफा हेन्जा दिना थेकापा इन्ताङ हि , न्हुसो बिदा र्हुतेङ समुन्द्रको दामपाहासो सिरिया हानिहि | प्रिस्किला कालाउ अक्किलाबुङ वाकोङ दोफाङ हिघाहि | किक्रियाता परमेस्वरदोफा ताइको प्रतिग्या पुरा पालि पावल ताइको पुसुङ चेपाहि | 19 कालाउ न्हुसो इम्बालाइ एफिससता हानिहि, इन्ता वा प्रिस्किला कालाउ अक्विलाइहेङ इन्ताङ ताअ्घिहि | वा एफिससता हिलाउ चाउघारा साता हानिहि कालाउ यहुदिगेलाइदोफा बातमारिहि | 20 इम्बालाइ पावलहेङ आरोङ आले दिना थिकापा हिलि आग्रह पाहि कालाउबुङ वा माकिहि | 21 पावल बिदा र्हुतेङ हानिलि खाङ्लाउ दोअ्हि,''एदि परमेस्वरको इच्छा जेङ्हे पानु का नेलाइकोता ल्वाङका |''कालाउ वा एफिससो समुन्द्रको दामा पाहासो हानिहि | 22 पावल सिजरिया सहरता हानिहि , कालाउ मण्डलिहेङ अभिबादन पालि वा यरुसलेम थिकापा हानिहि | कालाउ खिनिङ एन्तिओक हानिहि | 23 इन्ता वा आले समय थेकापा हि कालाउ न्हुसो इन्तासो वा गलातिया कालाउ फ्रिगिया प्रदेसगेलाइता हानिहि | कालाउ चात्यागेलाइको उत्साह बदिपापिहि | 24 अपोल्लस मिङ हिका एमि यहुदि एफिससता लोहि,| वा अलेक्जेंड्रिया दोअ्का सहरता जोलोम जेङ्का हिघाहि | वा एलोङ बिद्दवान द्याङ हिघाहि | वासेहेङ धर्म सास्तरको बिसयता रेम्का ग्यान हिघाहि | 25 वा प्रभुको दामाको बिसयोता रेम्का धिर्का हिघाहि कालाउ पुरा उत्साहित हिघाहि | येसु:को बिसयता वा जे जति काथा पाहि गोताङ सहि हिघाहि | कालाउ वा यु:ह:न्नाको दोअ्का बप्तिस्ताको बारेता गिघाखे | 26 वा चाउघारा साता निर्धक्क नुइ धुल्लि तेङ्हि प्रिस्किला कालाउ अक्किला वा दोअ्का हिङ्हि | इम्बालाइ वासेहेङ ताइको साता चुम्पुहि कालाउ परमेस्वरको दामाको बिसयता वासेहेङ आरोङ झन प्रस्त पातेङ बुझाइ पाहि | 27 अपोल्लोस अखैया सार्भिता हानिलि इच्छुक हिघाहि , ओदोङ भाअ्सिङ एफिससको दाइ-ओनेगेलाइ वासेहेङ सहयोग पाहि | अखैयाता हिका येसु:को चात्यागेलाइहेङ ओबालाइ इन्ता आपोल्लोसहेङ ग्रहन पालि दोअ्लि पातरा लेखिहि | अखैयाता प्रभुको अनुग्रह होइ येसु:प्रति उङ्को चात्यागेलाइको खान्धुरि हिघाहि कालाउ अपोल्लोस इम्बालाइको बार्का साहायक जेङ्हि | 28 वा गोताङ द्याङ्गेलाइको आगाता यहुदिगेलाइताको बिरोधता बहस पाहि | अपोल्लोस जातिङ्को झालाझालापा रुपता यहुदिगेलाइहेङ गल्ति हिका प्रमान पाहि | वा धर्मसास्तरको आधारता येसु:दोङ ख्रिस्त हि दोअ्का प्रामान पिहि |