प्रेरितों के काम 17

पावल कालाउ सिलास ओम्फिपोनिस कालाउ ओपोल्लोनिया पातेङ ताइको दामा हानिहि इम्बालाइ थिस्लोनिकि दोअ्को सहरता थुकालि लोहि | जेता यहुदिगेलाइको एलोङ चाउघारा सा हिघाहि | 2 पावल इङ्को चाउघारा साता यहुदिगेलाइहेङ खाङ्लिदिनाङ भाइपाङ हानिहि इङ्को माइसाचाका दिनागेलाइता धर्म सास्तरको बिसयोता पावल ओबालाइदोफा चर्चा परिचर्चा पाहि | 3 पावल यहुदिगेलाइ दोफा धर्म सास्तराको व्याख्या पातेङ हि कालाउ वा ख्रिस्त सि:लि गोयाङ कालाउ सि:कासो जागिलि गोयाङ दोअ्का सत्ये काथा दोअ्हि | पावल दोअ्हि,''यिदोइ द्याङ येसु:ज्याइको बिसयता का नेलाइहेङ घोसाना पादोङ्खा कि वा ख्रिस्तदोङ हि |'' 4 हेन्जा जसो यहुदिगेलाइ वाको काथा खान्धुरि पाहि कालाउ पावल कालाउ सिलास दोफा मिलितेङ हिलि निर्नय पाहि | इन्ता उल्लिदुल्लिको धर्म भक्त ग्रिक वाबालाइ कालाउ उल्लिदुल्लिको बिसिस्त तिरिगेलाइ ज्याइ हिघाहि | ओबालाइबुङ पावल कालाउ सिलास दोफा सामेल जेङ्हि | 5 कालाउ यहुदिगेलाइ खान्धुरि मापाहि मि-तुपाहि (डाहा) पाहि, इम्बालाइ आधिमि दुस्त द्याङ्गेलाइ ज्याइ बाजाराता घुराइगिल्घाखे (घुराइतेङ हिगिल्घाखे) भाडाता चुमाहि | उङ्को दुस्त द्याङ्गेलाइ इन्ता जोम्तेङ सहरता चिलाउ चिलाउपा हल्ला पालि तेङ्हि | इम्बालाइ पावल कालाउ सिलासहेङ भोलो जेसनको साता हानिहि | इम्बालाइ पावल कालाउ सिलासहेङ द्याङगेलाइको माझाता चुमालि भोघाखे | 6 कालाउ उङ्को द्याङ्गेलाइ पावल कालाउ सिलासहेङ मादुसहि, एसाङ जेसन कालाउ बोमि भेनेङ खान्धुराइगेलाइहेङ तानिकाताङ थेलिकाताङ नगरको अधिकारिगेलाइको आगाता चुमाहि | इम्बालाइ र्हिकाइहि,''यिदोइ द्याङ्गेलाइ सुमिङ्को गोताङ थामेतादोङ समस्या चुमाका हि | एला इबालाइ इता थेकापाबुङ थुकालि लोहि | 7 जेसन ताइको साता इम्बालाइहेङ बासा हिलि पिहि ,इम्बालाइ झाराङ सिजरको नियम गेलाइ बिरुद काम पातेङ ओबालाइ दोअ्खे,येसु:मिङ्को भेनेङ एमि राजा हि |'' 8 सहर अधिकारिगेलाइ कालाउ बो द्याङ्गेलाइ इङ्को चुक्लिचुका गेलाइ हिङ्हि,कालाउ ओबालाइ एकदम खिन्न जेङ्हि | 9 ओबाल जेनस कालाउ आरु खान्धुराइगेलाइहेङ दानदाइ तिरिपातेङ लाअ्पिहि | 10 कोकोङ न्हिसिन्ता खान्धुराइगेलाइ पावल कालाउ सिलासहेङ बिरिया दोअ्का सहर भारि दिङ्गिल्हि | बिरियामा इम्बालाइ यहुदिगेलाइको चाउघारा साता हानिहि | 11 इदोइ यहुदिगेलाइ थेस्लोनिकिको खान्तेङ असल हिघाहि , इम्बालाइ खुब चासो पातेङ पावल कालाउ सिलासहोइ दोअ्का वचन हिङ्तेङ हिघाहि | यहुदिगेलाइ दिनाङ-दिनाङ धर्म सास्तर पढेघाखे | इम्बालाइ सत्येदोङ कि माको दोअ्तेङ गिलि भोघाखे | 12 इम्बालाइ हेन्जाङ खान्धुरि पाहि कालाउ हेन्जा प्रमुख ग्रिक वाबाल कालाउ तिरिगेलाइबुङ इङ्को काथा गेलाइ खान्धुरि पाहि | 13 कालाउ जेलाउ यहुदिगेलाइ बिरियाताबुङ पावल कालाउ सिलास परमेस्वरको बचनको बिसयता बानाल पातेङ हिका थिस्लोनियाताबुङ थाहा निङहि,इम्बालाइ बिरियाता बुङ लोहि | कालाउ इम्बालाइ लोतेङ बिरियाको द्याङगेलाइहेङ तोङपाहि कालाउ आन्दोलित पालि तेङहि | 14 ओदोङ भाअ्सिङ खान्धुराइगेलाइ पावलहेङ समुन्द्रको काम्भेता झटै दिङ्गिल्हि, कालाउ सिलास कालाउ तिमोथि इन्ताङ बिरियाता हि | 15 खान्धुराइगेलाइ ज्याइ पावलदोफा हानिहि इम्बालाइ पावलहेङ एथेन्स थेकापा सिरपुहि, कालाउ इम्बालाइ तिमोथि कालाउ सिलासहेङ पावलको खबर चुम्पुतेङ हानिहि | बानालता इसिका हिघाहि:''हेथे दोअ्खेना धेमा का दोफा लोउ |'' 16 पावल तिमोथि कालाउ सिलासहेङ एथेन्सता र्हुम्तेङ हिघाहि, गोताङ नगरदोङ मुर्तिगेलाइहोइ भरिका तिङ्तेङ पावलको हृदय आउलिहि हिघाहि | 17 चाउघारा साता पावल यहुदिगेलाइ कालाउ धर्म भक्त ग्रिक गेलाइदोफा काथा पाहि | पावल हाते बाजारता घुराइतेङ हिका द्याङ्गेलाइ दोफाबुङ काथा पाहि | 18 इन्ता आधिमि इपिक्युरिया कालाउ स्तोइक दार्सानिकगेलाइ दोफा निक्कोङ बिचार बिमर्स जेङ्हि |''इम्बालाइ मध्येसो हेथेते दोअ्हि,''या काथा बाचक हाइ दोअ्लि भोतेङ हि ?''जेलाउ पावल येसु:को कालाउ वाको सि:कासो सिन्हुकाको बर्नन पाघाखे | आधेमि दोअ्हि,''वा आरू भेनेङ दिरगेलाइको बिसयता काथा पाका भाइका लागिखे |'' 19 ओबालाइ पावलहेङ आरैयापागस महासभाउता चुम्पुहि, ओबालाइ दोअ्हि,''जेदोङ नावा सिक्स्या ना बानाल पादोङ्खेना,केलाइहेङ यिदोइ बिसयता हाइदोङ दोअ्पिलि द्वाना ? 20 इसिका खालको काथा केलाइ लाम्फा हेलाउबुङ हिङ्का मान्थुघानाहि,'' केलाइ नाङ्को सिक्स्याको 'माने'' बुझिलि खाङ्न्हाखे |'' 21 एथेन्सको गोताङ द्याङ्गेलाइ कालाउ भेनेङ सार्भिसो लोका द्याङ्गेलाइ ज्याइ एथेन्सता हिघाहि ओबालाइ मेनाङ नावा बिचारको बिसयता काथापातेङ कालाउ हिङ्तेङ गोताङ समय बितिपातेङ हिघाखे | 22 कालाउ न्हुसो पावल आरैयापागस माहासभाउ आगाता जाअ्हि,कालाउ दोअ्हि ''एथेन्सको द्याङ्गेलाइ ! का नेलाइहेङ गोताङ पाहा हेन्जा धार्मिक निङ्खा | 23 का नेलाइको नगर लिता हानिघा कालाउ नेलाइ पुजिका आमेनेगेलाइबुङ तिङ्घा, का इन्ता एलोङ बेदि बुङ तिङ्घा जेता लेखेका हिघाहि: ''मानाल्का दिरगेलाइहेङ ना इङको दिरगेलाइहेङ पुजिसुखेना ज्याइहेङ मानाल्सुखेना, का ओदोङ परमेस्वरको बारेता दोअ्तेङ हिघा | 24 वा इङ्कोङ परमेस्वर हि ज्याइ सारा सुमिङ बानाइहि कालाउ सुमिङ्को गोताङ आमने बानाइहि | वा धरति कालाउ स्वर्गको परमप्रभु हिका हि ! वा द्याङ्गेलाइ बनाइका मुन्दिरता माहिखे | 25 वाआङदोङ जिवन,प्रान कालाउ गोताङ आनेमाने द्याङ्गेलाइङ पिखे ,वासेहेङ हिदोइबुङ द्याङ्गेलाइहेङ सहयोगको खाचो मान्थु | वासेहेङ गोइका गोताङ आमेनेगेलाइ वाको दोफाङ हि | 26 परमेस्वर लाम्फोर्ति एमि वाजान द्याङ बानाइहि कालाउ उङ्कोङ द्याङ्सो भेनेङ -भेनेङ मानब जाति बानाइहि | परमेस्वर इम्बालाइहेङ सुमिङ्को गोताङ थामेता हिलि पिहि | परमेस्वर इम्बालाइहेङ हेथे समय थिकापा कालाउ हिदोइ थामेता हिलि पाक्का पापिहि | 27 परमेस्वर वासेहेङ द्याङ्गेलाइ भोका मन पाघाखे, हुनुते नेलाइ कोर्पाहाङ वासेहेङ कितिकितिकाता भोकावा कालाउ निनावा, बास्तबता वा केलाइ झाराङसो दुरे मान्थु 28 केलाइ वाको दोफाङ बान्चिनाखे;केलाइ वाकोदोफाङ हिगिल्नाखे केलाइ वाको दोफाङ हिनाहि | जेसाङ नेलाइको कबिगेलाइबुङ दोअ्हि:''केलाइ वाकोङ जामालगेलाइ खिनिङ हिघाहि | 29 केलाइ परमेस्वरको जामालाइगेलाइ हिनाहि ओदोङ भाअ्सिङ केलाइ इसिका सोचिलि मागोयाङ्कि परमेस्वर सोना,चान्दि कालाउ उन्थुइको मुर्तिहिका भाइका माको | वा द्याङ्गेलाइको कल्पनापातेङ बानाइका हिदोइबुङ काला भाइका हिका मान्थु | 30 हानिका दिनागेलाइता द्याङ्गेलाइ परमेस्वरहेङ मागिहि,कालाउ वा ध्यान मापिहि, कालाउ एला,परमेस्वर गोताङ द्याङगेलाइहेङ गोताङ थामेता ताइको हृदय कालाउ जिवन परिबर्तन पालि आदेस पिखे | 31 परमेस्वर सुमिङ्को सारा द्याङ्गेलाइहेङ ठिकदोफा जाचिलि एनि निर्नय पालि दोअ्होइ | या पालिको भाअ्सिङ वा एमि द्याङहेङ प्रयोग पाङ | परमेस्वर लाम्फाङ एमि द्याङ साल्का हिघाहि कालाउ परमेस्वर सिकासो सिन्हुपातेङ प्रमान पिहि |'' 32 जेलाउ ओबालाइ येसु:ख्रिस्त सिकासो सिन्हुहि दोअ्का बारेता हिङ्हि आधिमिते खुजलाइहि कालाउ बोमिगेलाइ दोअ्हि,आरोङ भेनेङ समयता यिदोइ बिसयता ना केलाइ झन हेन्जा द्वाना |'' 33 पावल ओबालाइसो हानिहि | 34 कालाउ हेथेते द्याङ्गेलाइ पावलदोफा मिलिहि कालाउ खान्धुरि जेङ्हि, इङ्को खान्धुरि पाकालाइता एमि डिमनुसियस हिघाहि, वा अरियोपेगस माहासाभाउको एलोङ सदस्य हिघाहि, भेनेङ खान्धुरिपाका द्याङ एमि डामारिस मिङ हिका बेबाल हिघाहि कालाउ आधिमि आरुगेलाइबुङ खान्धुरि पाहि |