प्रेरितों के काम 15

कालाउ न्हुसो आधिमी द्याङ्गेलाइ यहुदियासो एन्तिओकता लोहि,इम्बाला गैर-यहुदी दादा-ओनेगेलाइहेङ सिकस्या पिलि सुरु पाहि:मोसाको व्यवस्था आन्सार जेलाउ थेकापा खाताना माजेनावा एन्सालाउ थेकापा नेलाइको मुक्ति माजेनावा |'' 2 पावल कालाउ बार्नाबास इन्सिका सिकस्याको घोर बिरोदि हिघाहि,कालाउ इम्बालाइ इङ्को बिसयता उङ्को द्याङ्गेलाइ दोफा गालाबाजि पाहि| कालाउ मण्डलि पावल ,बार्नाबास कालाउ आरू द्याङ्गेलाइहेङ य्रुरुसलेम दिङ्गिल्लि निर्नय पाहि |उङ्को द्याङ्गेलाइ इङ्को बिसयता प्रेरितगेलाइ कालाउ वाराङ्गेलाइ दोफा झन गालाबाजि पाहि | 3 ओबालाइहेङ हानिलाउ दामा ख़र्चा मण्डलि साघाइहि, इम्बालाइ फोनिसिया कालाउ सामारिया पातेङ हानिहि |इङ्को सरभिगेलाइता इम्बालाइ हेसा गैर-यहुदि द्याङ्गेलाइ सत्ये परमेस्वर भारि घुरिहि दोतेङ दोअ्पिहि,इङ्को बानालहोइ गोताङ दादा-ओनेगेलाइहेङ खुब आनान्द बानाहि | 4 पावल,बार्नाबास कालाउ अन्य द्याङ्गेलाइ यरूसलेम थुकालि लोहि | इन्ताको प्रेरितगेलाइ, डिकनगेलाइ कालाउ गोताङ खान्धुराइगेलाइ इम्बालाइ स्वागत पाहि पावाल,बार्नाबास कालाउ आरु द्याङ्गेलाइ परमेस्वर ओबालाइसो पाका गोताङ काथागेलाइ दोअ्हि | 5 यरुसले मता आधेजसो खान्धुराइ गेलाइ (बिस्वासि) आधेमि फरिसिगेलाइको दलको हिघाहि ओबालाइ ल्होतेङ दोअ्हि,गैर-यहुदिगेलाइ खतना पालि गोयाङ | मोसाको ब्यबस्था मानिलि गोयाङ दोअ्तेङ केलाइ दोअ्लि गोयाङ !'' 6 कालाउ इङ्को बिसयता सोचिलि,बिचार पालि प्रेरितगेलाइ कालाउ एल्डर गेलाइ जोम्हि | 7 हिन्जाङ बेर थेकापा गालाबाजि कालाउ न्हुसो पतरुस जाअ्तेङ इम्बालाइ दोअ्हि | दाइ-ओनेगेलाइ नेलाइहेङ थाहादोङ हि,सुरुको (लाम्फाको) दिना गेलाइता हेसा परमेस्वर काङ्को नुइसो आरु जातिगेलाइ ये:बानालको बचन हिनाको कालाउ खान्धुरि पाका दोअ्तेङ नेलाइको माझासो कासेहेङ साल्हि | इम्बालाइ का सो ये: बानाल हिङ्हि कालाउ खान्धुरि पाहि | 8 परमेस्वर झाराङको हृदय गिखे कालाउ वा इदोइ गैर-यहुदिगेलाइहेङ सुइकार पाहि , परमेस्वर केलाइहेङ वादोङ पिका भाइकाङ इम्बालाइहेङ पबित्त्तरो आत्मा पिहि केलाइहेङ इङ्को पिङ्पाका हि | 9 परमेस्वरको भाअ्सिङ उङ्को द्याङ्गेलाइ हिदोइबुङ पाहासोबुङ केलाइ खान्तेङ फरक मान्थु | खान्धुरिसो परमेस्वर ओबालाइको हृदय सुददि (एल्क) बानाइपिहि | 10 ओदोङ भाअ्सिङ चात्यागेलाइको कान्धेता इङ्को जुवा ताअ्पितेङ हाइपालि परमेस्वर हेङ जाचि सुखेना ? इदोइ जुवा नाते केलाइको आजाइ -आजुको ना केलाइ फुलि दोअ्न्हाहि | 11 केलाइ खान्धुरि पनाखे, कि प्रभु येसु:को अनुग्रहसो केलाइ उदार निङ्का हिनाहि,जेसाङ इम्बालाइबुङ निङ्का हि |'' 12 कालाउ न्हुसो गोतेङ जेरदोङ सिकापा हि , ओबालाइ पावल कालाउ बार्नाबासको काथागेलाइ मन पितेङ ध्यान पितेङ हिङहि |पावल कालाउ बार्नाबास ओबालाइको माध्यम गैर-यहुदिगेलाइको माझाता परमेस्वर पाका गोताङ सरबुङ्गेलाइ कालाउ सारभुसाइका कामगेलाइको बारेता बयानपातेङ हिङपाहि | 13 ओबालाइ दोअ्लि दोअ्तेङ याकुब दोअ्हि,''काङ्को दाइ-ओनेगेलाइ,ध्यान पितेङ काङ्को काथा हिङ्सु | 14 सिमोन नेलाइहेङ हेसा परमेस्वर गैर-यहुदिगेलाइहेङ ताइको कृपा तिङ्पाहि दोअ्का काथा दोअ्हि | लाम्फादोङ परमेस्वर गैर-यहुदिगेलाइहेङ ग्रहन पाहि कालाउ ओबालाइ ताइको द्याङ बनाइहि | 15 अगमबक्तागेलाइको बचनगेलाइ यिदोइ दोफा मिलिखे : 16 ''का यिदोइ काथासो घुरितेङ ल्वाङ्का ,का दाउदको सा आरोङ बानायाङ्का,जेदोङ लोङ्का हि | वाको साको भागगेलाइ आरोङ बनाइ प्याङ्का | जेदोङ राहान्का हि कालाउ का वाको भापाका सा नावा बानायाङ्का | 17 कालाउ कि आरू जाति झाराङ गैर-यहुदिगेलाइबुङ काङ्को ताइको द्याङ्गेलाइदोङ प्रभु एन्साङ दोअ्हि कालाउ गोताङ द्याङ्गेलाइ प्रभुहेङ भोकावा | कालाउ वा खिनिङ एमि हि ज्याइ गोताङ इदोइ आमेनेगेलाइ पाखे | 18 इङ्को काथा परमप्रभु दोअ्खे लाम्फोर्तिसोङ दोअ्का हिघाहि,जेदोङ सिरजाइको सुरुसोङ दोअ्का हिघाहि | 19 आदोङ भाअ्सिङ केलाइ गैर-यहुदिगेलाइहेङ दुःख पिलि माएल, ज्याइ परमेस्वर भारि घुरितेङ लोका हि | 20 भरु केलाइ ओबालाइहेङ यिदोइ काथागेलाइ दोअ्काताङ एलोङ चिठ्ठी लेखिलि गोयाङ : मुर्तिहेङ चदाइका आमेने माचालि , असुद्द सो भेनचाकाइतेङ हिलि कासिबिरिसो दुरे हिलि, हिति माचालि, निर्घा मेतेङ सेका गपुस कालाउ जियाजुइलेङ माचालि | 21 नेलाइ इन्सा मापासु हाइपालिपानु इन्ता एलाउबुङ इसिका द्याङ्गेलाइ हि ज्याइ मोसाको व्यवस्था धिरपाखे | मोसाको वचनगेलाइ हेन्जा बासारसोङ गोताङ ए आथार माइसाचाका दिनाता चाउघारा साता पढेदोङ्खे | 22 कालाउ प्रेरितगेलाइ,एल्डरगेलाइ कालाउ झाराङ मण्डलि निर्नय पाहि कि पावल कालाउ बर्नाबासको दोअ्फा ताइकोङ आधिमि द्याङ्गेलाइहेङ एन्तिओकता दिङ्गिल्हि | ओबालाइ यहुदा जाइहेङ बर्नाबासबुङ दोअ्खे कालाउ सिलासहेङ साल्हि | उङ्को द्याङ्गेलाइहेङ यरुसलेमको दाइ-ओनेगेलाइ मेनाङ इज्जत पाघाखे | 23 मण्डलि ओबालाइको खुरता इङ्को पातारा पिगिल्हि , एन्तिओक सहरता कालाउ सिलिसिया कालाउ सिरिया सार्भिता गैर-यहुदि दाइ-ओनेगेलाइहेङ नेलाइकोता दादा-ओने,प्रेरितगेलाइ एल्डर गेलाइसो सेउपाखा: 24 केलाइ हिङ्लि दोअ्का हिनाहि आधेमि केलाइको मण्डलिको द्याङ्गेलाइ नेलाइहेङ दुःखि कालाउ मन आउलि पापिहि | कालाउबुङ केलाइ नेलाइहेङ इन्सिका दोअ् दोअ्तेङ मादोअ्न्हाहि ! 25 नेलाइकोता आधेमि चुनिका द्याङ्गेलाइ दिङ्गिल्लि साल्का हिनाहि, इम्बालाइ केलाइको प्रिय सानाइति बार्नाबास कालाउ पावलदोफा ल्वाङ् | 26 इम्बालाइ प्रभुयेसु:ख्रिस्तको सेवाता ताइको जिबन सोम्पिका हि | 27 ओदोङभाअ्सिङ केलाइ ओबालाइ दोफा यहुदा कालाउ सिलासहेङ्बुङ दिङ्गिल्न्हाखे | इम्बालाइ इदोइ चिठिता लेखेका काथागेलाइ नुइहोइ दोअ्लि खाङ्खे | 28 पबित्त्तरो आत्मा सोचिखे कि केलाइ नेलाइहेङ हेन्जा जिम्बाबारि पिलि माएल, कालाउ इङ्कोता केलाइ राजि हिनाहि , नेलाइ इदोइ झोको खिनिङ पालि आवस्यक हि: 29 मुर्तिगेलाइहेङ चादाइका आमेने माचासु, हिति माचासु निर्धा मेतेङ सेका:गपुसगेलाइ माचासु,हिदोइबुङ खाल्को मालुचासु , एदि नेलाइ इसिका काथा कामगेलाइसो दुरे हिसुन्हा पानु,नेलाइ रेम्फा पास्वाना | एला केलाइ बिधा र्हेन्हाखे |'' 30 कालाउ पावल,बर्नाबास,यहुदा कालाउ सिलास यरुसलेम लाअ्तेङ एन्तिओक हानिहि ,इन्ता इम्बालाइ खान्धुरिराइ गेलाइको समुह जोम्पाहि कालाउ इम्बालाइ हेङ चिठि पिहि | 31 खान्धुराइगेलाइ चिठिता लेखेका अर्तिको काथा पदेलि दोअ्तेङ मेनाङ लेङ्चाहि | 32 यहुदा कालाउ सिलासबुङ अगमबक्तागेलाइ हिघाहि ओदोङ भाअ्सिङ दाइ-ओनेगेलाइहेङ हिन्जाङ बचनगेलाइसो अर्ति पितेङ इम्बालाइहेङ बलियाका बानाइहि | 33 इन्ता इम्बालाइ कोह्मा हितेङ न्हुसो यहुदा कालाउ सिलास घुरिहि ,इम्बालाइ खान्धुराइ गेलाइसो सान्तिको आसिरबाद निङ्तेङ न्हुसो यरुसलेमको दाइ-ओनेगेलाइ जेदोङ इम्बालाइहेङ इङ्को कामता दिङगिल्का हिघाहि ओबालाइकोता घुरिहि | 34 सिलासहेङ चाहि इन्ताङ हिलि रेम्फा जेङ्हि 35 पावल कालाउ बार्नाबस एन्तिओकतादोङ हि, इम्बालाइ कालाउ आरू द्याङ्गेलाइ इन्ता ये:बानाल गेलाइ बानाल पाहि कालाउ प्रभुको बचन धिरपाहि | 36 आले दिना न्हुसो,पावल बर्नाबासहेङ दोअ्हि,''केलाइ हेन्जा सहरगेलाइता प्रभुको सान्देस दोअ्न्हाहि | केलाइ उङ्को सहरगेलाइता केलाइको दाइ-ओनेगेलाइ हाइपाखे वाला दोअ्तेङ खाङ्लि ए पल्ट भेतिलि हानिलि गोयाङ |'' 37 बार्नाबास यु:हान्ना मर्कुसहेङ्बुङ दोफाङ चुम्पुलि खाङ्घाखे | 38 इम्बालाइ लाम्फा हानिलाउदोङ इम्बालाइहेङ यु:हान्ना मर्कुसहेङ लाअ्धिका हिघाहि, प्याम्फिलियाता वा इम्बालाइ एदोफा काम मापाहि | ओदोङ भाअ्सिङ पावल वासेहेङ दोफाङ चुम्पुलि माकिहि | 39 पावल कालाउ बार्नाबासको माझाता इङ्को बिसयता बारका मि तुपासुहिका जेङ्हि कालाउ इम्बालाइ सुतिहि,भेनेङ-भेनेङ दामा चाहि | बार्नाबास मर्कुसहेङ चुम्पुतेङ समुन्द्र पाहासो साइप्रस भारि हानिहि 40 पावल सिलासहेङ ताइदोफा चुम्पुलि साल्हि कालाउ हानिहि,अन्तिओकको दाइ-ओनेगेलाइ पावलहेङ प्रभुको अनुग्रहता अर्पन पातेङ कालाउ बिदा जेङ्हि | 41 मण्डलि गेलाइहेङ हेन्जा बलियाका बानाइकाताङ पावल कालाउ सिलास सिरिया कालाउ सिलिसिया सार्भिगेलाइ जेङ्तेङ हानिहि |