प्रेरितों के काम 14

पावल कालाउ बार्नाबास आइकोनियम सहरता हानिहि, इम्बालाइ यहुदिगेलाइको चाउघारा साता दुल्लि, ओबालाइ गोताङ सहरता पाका भाइपाङ | इम्बालाइ इसिका प्रकारसो वचन पिहि कि हेन्जा यहुदिगेलाइ कालाउ गैर-यहुदिगेलाइ ओबालाइको दोअ्का काथा साअ्तेङ खान्धुरि पाहि | 2 कालाउ आधेमि यहुदिगेलाइ खान्धुरि मापाहि, इङको यहुदिगेलाइ गैर-यहुदिगेलाइहेङ उसकाहि कालाउ खान्धुराइ गेलाइको बिरोद्दता कु- भावाना सिरजाइहि | | 3 पावल बार्नाबास आइकोनियामता हेन्जा समय थेकापा हि,कालाउ प्रभुको बिसयता निडर जेन्तेङ ये:बानाल पाहि, कालाउ प्रभु इम्बालाइहेङ कालाउ भारभुसाइका कामगेलाइ पाका सरबुङ पितेङ इम्बालाइको गवाहिको वचन दोअ्तेङ प्रमानित पाघिहि | 4 हेथेते द्याङ्गेलाइ यहुदिगेलाइको पक्स्यता हिघाहि, भेनेङ द्याङ्गेलाइ पावल कालाउ बार्नाबासको पक्स्यता हिघाहि | एसापा इदोइ सहरको द्याङ्गेलाइ न्हे भाग जेङ्हि | 5 आधे गैर-यहुदिगेलाइ,आधे यहुदिगेलाइ कालाउ यहुदिगेलाइको अगुवागेलाइ पावल कालाउ बर्नाबासहेङ ओबालाइ इम्बालाइहेङ सान्ताइलि, कालाउ उन्थुइहोइ तोअ्तेङ सेअ्लि भोगाखे | 6 जेलाउ पावल कालाउ बार्नाबास इन्सिका सयन्त्तरगेलाइ थाहा गिहि इम्बालाइ इङ्को सहर लाअ्हि कालाउ लाइकाओनियाको लिस्ता कालाउ डर्बि सहरगेलाइ कालाउ इन्ताको भेर्पाको इलाका (मौजा) भारि हानिहि | 7 इम्बालाइ इन्ताबुङ ये-बानाल हिङपाहि | 8 लिस्ट्राता एमि लेङ्ग्रा द्याङ हिघाहि , वा जोलोमसोङ लेङ्ग्रा हिघाहि कालाउ हेलाउबुङ तेका मान्थुघाखे | 9 वादोङ पावल दोअ्का काथागेलाइ हिङ्हि, पावल वासेहेङ सोझाङ खाङ्हि कालाउ या थाहा गिहि, कि वाकोता एलाङ्का दोअ्का हेन्साङ खान्धुरि हिघाहि | 10 ओदोङ भाअ्सिङ पावल बल पातेङ र्हिकाइहि,''ताइको खोकोइता जाअ् ! कालाउ उङ्को द्याङ तोङ्हि कालाउ द्यापाहाङ तेलि तेङ्हि | 11 जेलाउ पावल जेदोङ पाहि इङ्को द्याङ्गेलाइ तिङ्हि इम्बालाइ लाइकाओनिया भासाता र्हिकाइहि, इम्बालाइ दोअ्हि,'' दिरगेलाइ द्याङगेलाइ भाइकाङ जेङ्का हि कालाउ इम्बालाइ केलाइकोता लोका हि |'' 12 द्याङ्गेलाइ बार्नाबासहेङ जिउस दिर, कालाउ पावलहेङ हेमेसदिर दोअ्लि तेङ्हि,हाइपालिपानु वा चाहि प्रमुख बक्ता हिघाहि | 13 जिउसको मुन्दिर सहरको भेर्पा हिघाहि इङ्को मुन्दिर धामिगेलाइ सहरको फिनु गेलाइता आधे साढेपियागेलाइ कालाउ ल्हेको मालागेलाइ चुमाहि | यिङ्को धामि कालाउ इन्ता हिका द्याङ्गेलाइ पावल कालाउ बार्नाबासहेङ बलि चदाइलि भोगाखे | 14 कालाउ जेलाउ यिङ्को प्रेरितगेलाइ पावल कालाउ बार्नाबास इन्सिका काथागेलाइ थाहा गिहि,इम्बालाइ ताइको लोखन दावागेलाइ थेअ्हि, द्याङ्गेलाइ भारि धाअ्हि कालाउ र्हिकाइहि: 15 ओइ द्याङ्गेलाइ ! नेलाइ हाइपालि एसा पासुखे ना ? केलाइ दिरगेलाइ माको ! केलाइ नेलाइ भाइकाङ द्याङ्गेलाइ खिनिङ ! केलाइ नेलाइहेङ ये:बानाल हिङ्पालि लोन्हाहि ताकि नेलाइ इन्सिका बेकारको काथागेलाइसो लाअ्स्वाना कालाउ बान्चिका (जाइका) परमेस्वर भारि घुरिस्वाना वा दोङ एमि हिका हि ज्याइ बादेल,पृथ्वि,समुन्द्र कालाउ इन्कोगेलाइता हिका गोताङ आमेने बानाइहि | 16 दोका दिनागेलाइता वा गोताङ जातिगेलाइहेङ ताइको इच्सा पाका भाङ्पाङ बान्चिलि पिहि | 17 कालाउ परमेस्वर पाका काम वाको जातिङ्को प्रमान पाहि , वा नेलाइको भाअ्सिङ वाइ पिहि | वा नेलाइहेङ थुप्रो-थुप्रो चाका-आम्का पिहि कालाउ नेलाइको हृदय आनन्द होइ पोङ्घा पापाहि |'' 18 यिदोइ काथा दोअ्तेङ इम्बालाइहेङ मुस्किलसो ओबालाइहेङ बलि-पुजा चदाइलिसो उङ्को द्याङ्गेलाइहेङ रोकिहि | 19 कालाउ-न्हुसो एन्तिओक कालाउ आइकोनियसो आधे यहुदिगेलाइ लोहि, इम्बालाइ पावल कालाउ बार्नाबासको बिरोद्द द्याङ्गेलाइहेङ उस्काइहि कालाउ ओबालाइ पावलहेङ उन्थुइ तोहि कालाउ सहरसो बाहार तानितेङ ओल्ला पाहि | द्याङगेलाइ पावलहेङ सि:हि दोअ्तेङ सोचिहि | 20 येसु:को चात्यागेलाइ पावलको कोरपाहाङ जोम्हि, कालाउ पावल ल्होहि कालाउ सहरभारि घुरिहि, भेनेङ दिना वा कालाउ बार्नाबास यिङ्को सहर लाअ्हि कालाउ डर्बि भारि हानिहि | 21 पावल कालाउ बार्नाबास डर्बिता ये:बानाल पाहि, हेन्जाङ द्याङ्गेलाइ येसु:को चात्या जेङ्हि , पावल कालाउ बार्नाबास लिस्त्रा, आइकोनियम कालाउ एन्तिओक सहर भारि घुरिहि 22 चात्यागेलाइहेङ आत्माता बलियाका बानाइकाताङ ओबालाइहेङ खान्धुरिता हितेङ हिलि अर्ति पिहि, कालाउ हेन्जा कस्त सहितेङ केलाइ परमेस्वरको सारभिता दुल्लि गोयाङ दोअ्तेङ ओबालाइहेङ दोअ्हि | 23 इम्बालाइ गोताङ मण्डलिको भाअ्सिङ एल्डरगेलाइ नियुक्त पाहि, इम्बालाइ उङ्को एल्डरगेलाइ प्रभुता ताइको खान्धुरि जिम्मा पिहि कालाउ पावल कालाउ बर्नाबास इम्बालाइहेङ ओबालाइको खुर्ता जिम्मा पिहि | 24 पावल कालाउ बार्नाबास पिसिदिया सार्भि पाहासो प्यामफिलिया दोअ्का सारभिता लोहि | 25 इम्बालाइ परमेस्वरको बचन परगा सहरता ये: बानाल पाहि कालाउ अटालिया दोअ्का सहर भारि घुरिहि | 26 कालाउ इन्तासो इम्बालाइ समुन्द्रको दामापाहासो पाकपातेङ एन्तिओखियाता हानिहि,जेता इम्बालाइ पुरा काम (दोपाका काम) पाकाको भाअ्सिङ परमेस्वरको अनुग्रहता इम्बालाइहेङ जिम्मा पिका हिघाहि | 27 जेलाउ इम्बालाइ एन्तिओकता थुकालि लोहि,कालाउ मन्डलिगेलाइहेङ जोम्पाहि,कालाउ परमेस्वर इम्बालाइको दोफा पाका गोतेङ कामगेलाइको बयान पाहि,कालाउ हेसा आरु जातिगेलाइको भाअ्सिङ्बुङ परमेस्वर फिनु हिपिहि इङ्कोबुङ पाहि-पाहि पातेङ हिङ्पाहि | 28 पावल कालाउ बार्नाबास चात्यागेलाइदोफा हेन्जा दिना थेकापा एन्तिओकाता हि |