प्रेरितों के काम 12

ओदोङ दोङ बेला राजा हेरोद मण्डलिको हेन्जा जोसा द्याङ्गेलाइहेङ साताइलि तेङ्हि | 2 हेरोद याकुबहेङ तरबारहोइ से;लि दोअ्का हुमुम पिहि | 3 हेरोद तिङ्हि कि यहुदिगेलाइ इङ्को मन्दाताअ्हि , ओदोङ भाअ्सिङ वा लाम्फा हानितेङ कालाउ पतरुसहेङ्बुङ रिम्हि, इन्सिका घाताना यहुदिगेलाइको निस्तार पार्भाको समयता घतेका हिघाहि (जेङका हिघाहि) | 4 हेरोद पतरुसहेङ रिम्तेङ झ्यालखानाता ह्वाहि , तेतु झना लान्ठागेलाइ पतरुसहेङ थाङ्का नजरता ताअ्हि, हेरोद पतरुसहेङ निस्तार पार्भाको न्हुसो द्याङ्गेलाइको माझाता चुमालि योजना पाहि | 5 ओदोङ भाअ्सिङ पतरुसहेङ जेलता ह्वाहि ,कालाउ मण्डलि वाको भाअ्सिङ परमेस्वरता दोमचाकालाइतेङ हि (दोमपाकाताङ हि) | 6 पतरुस न्हेमि लान्ठागेलाइको माझाता जिम्तेङ हिघाहि, वासेहेङ न्हेलोङ साङ्गलाहोइ (झिनझिरिहोइ) धेउका हिघाहि | आरु लान्ठागेलाइ झ्यालखानाको फिनुता पाले पितेङ हिघाहि , इङ्को दिल्माको समय हिघाहि | हेरोद पतरुसहेङ जुम्निको दिना द्याङ्गेलाइको आगाता चुमालि सोचिघाखे | 7 आचानक परमप्रभको स्वर्गदुत इन्ता जाअ्हि कोठाभारि फाइसालामाहि,स्वर्गदुत एपाहा सुम- सुमाइतेङ नाङ्घा पाहि स्वर्गदुत दोअ्हि''मार्फा ल्हो, |''साङ्गलागेलाइ पतरुसको खुरगेलाइसो होअ्न्हाहि | 8 स्वर्गदुत पतरसहेङ दोअ्हि,''तियार जेङ,नाङ्को जुत्तागेलाइ सुङ |''पतरुस इन्साङ पाहि,दुत दोअ्हि,''नाङ्को धाबा लोखन होङ कालाउ काङ्को न्हु लौउ |'' 9 जेलाउ स्वर्गदुत इन्तासो उल्लिहि कालाउ पतरुस बुङ वाकोङ न्हु-न्हु हानिहि | पतरुस मागिहि कि स्वर्गदुत हाइ पादोङ्घाखे इङ्को सत्ये हिघाहि | वा सोचिहि कि वा दरसन तिङ्तेङ हि | 10 पतरुस कालाउ स्वर्गदुत लाम्फा कालाउ न्हुसो पालेगेलाइहेङ कालाह्मतेङ सहरता दुल्का चिरको फिनुता इम्बालाइ थुकाहि,कालाउ इङ्को फिनु ताइमिङ इम्बालाइको भाअ्सिङ हिनाहि कालाउ इम्बालाइ बाहार उल्लेतेङ एलोङ गालिलको दामा पातेङ हानिहि,कालाउ स्वर्गदुत वासेहेङ लाअ्तेङ हानेहि | 11 जेलाउ पतरुस हाइ जेङ्का हिघाहि दोअ्का थाहा निङ्हि कालाउ ताइमिहेङ दोअ्हि,''एला का थाहा गिघा कि एदोइ जातिङ्को सत्ये हि रोइसो | प्रभु ताइको स्वर्गदुत दिङ्गिल्हि कालाउ कासेहेङ हेरोदसो बान्चिपाहि | यहुदिगेलाइ का हुसो (हुत्ता) मारेम्का घाताना जेनाङ दोअ्तेङ सोचिहि वाला | भरु कासेहेङ प्रभु इङको गोताङ कस्त गेलाइसो लाअ्पाहि |'' 12 याको बिसोयोता गिलि दोअ्तेङ पतरूस मरियमको सा भारि हानिहि , मरियम यु:हान्नाको आमाइ हिघाहि | (यु:हान्ना हेङ मर्कुस बुङ दोअ्घाखे ) हेन्जा द्याङ्गेलाइ इनता जोम्तेङ हिघाखे| ओबालाइ झाराङ दोमपाका (दोम चाकातेङ) हिघाहि | 13 पतरुस बाहार सो फिनु ढक-ढककाइहि ,रोदा मिङ हिका बेजान फिनु हिअ्लि दोअ्तेङ हानिहि | 14 रोदा पतरुसको गाला नाल्हि कालाउ वा मेनाङ लेङ्चाहि, मेनाङ लेङ्चानाङ वा फिनु हिअ्लिबुङ निल्हि | वा लिता हानिहि कालाउ जोम्तेङ हिका जेरहेङ दोअ्हि,''पतरुस फिनुता जाअ्तेङ हि |'' 15 ओबालाइ रोदा हेङ दोअ्हि,''ना बाउलिना ! ''कालाउबुङ वा यिदोइ जातिङ्को दोअ्तेङ हि | इङको जेर दोअ्हि,''उङ्को पतरुसको स्वर्गदुत हिलिगोयाङ |'' 16 पतरुस फिनु ढक -ढकपाकाताङ हिघाहि ,जेलाउ चात्यागेलाइ फिनु हिअ्हि कालाउ ओबालाइ पतरुसहेङ तिङ्हि | इम्बालाइ वासेहेङ तिङ्तेङ सक्को जेङ्हि | 17 पतरुस खुरको इसारा होइ इम्बालाइहेङ सिकापा हिलि दोअ्हि ,वा,हेसा परमप्रभु वासेहेङ जेल्सो लाअ्पापिहि,''दोअ्को काथा दोअ्हि | वा दोअ्हि,''याकुब कालाउ आरु दाइ-ओनेगेलाइ हेङ बुङ दोअ्पिसु |'' कालाउ न्हुसो पतरुस भेनेङ थामेभारि हानेहि | 18 भेनेङ दिना लान्ठागेलाइ (सिपाहिगेलाइ) थिचोङहि | इम्बालाइ स |क्क परिहि पतरसहेङ हाइ जेङ्हि वाला दोअ्तेङ इम्बालाइ पतरुस राम्काता इम्बालाइ आवाइ तुहि (अन्योलता परिहि ) 19 राजा हेरोद पतरुसहेङ द्यापाहाङ भोअ्तेङ हितेङ खाङ्हि कालाउबुङ निङ्लि मादोहि | कालाउ हेरोद लान्ठागेलाइहेङ हिअ्लि भोलि तेङ्हि, पत्ता मानिनाङ लान्ठागेलाइहेङ दोङ से:लि हुकुम पिहि | न्हुसो हेरोद यहुदियासो सिजरिया सहरता एनि न्हेनि समयको भाअ्सिङ इन्ताङ हि | 20 हेरोद टायर कालाउ सायडनगेलाइ दोफा मारफाङ चेरतामपाका हिघाहि, ओदोङ भाअ्सिङ इम्बालाइ एलोङ समुह जेङ्तेङ हेरोदकोता लोहि | इम्बालाइ हेरोदको निजि सेवा पाका बलस्तको साहायाता निङ्हि कालाउ हेरोदहेङ सान्तिको भाअ्सिङ सेउपाहि | हाइपालिपानु इम्बालाइ राजा हेरोदको सारभिसो दोङ चाका-आमका निङ्तेङ हिघाहि | 21 हेरोद ओबालाइ दोफा एनि भेतिलि निसित पाहि , इङ्को दिना हेरोद मेनाङ साङ्का साहि धावा लोखोन होङ्का हिघाहि | वा राजसिहासनता योम्लि कालाउ द्याङ्गेलाइहेङ सम्भोदन पाहि | 22 द्याङ्गेलाइ र्हिकाइहि,''इदोइ ते परमेस्वरको गाला हि द्याङ्को माको |'' 23 हेरोद इङ्को बाखानाइ पाहि कालाउ प्रभुको महिमाहेङ मान्येता मापापिहि | ओदोङ भाअ्सिङ दुत वासेहेङ मिसा लोपापिहि कालाउ वा लिता-लिताङ पेसा पेतेङ सिहि |स्याङ-स्याङपा 24 परमेस्वरको सन्देस द्यापाहाङ चारबिराइहि कालाउ हेन्जा-हेन्जाङ द्याङ्गेलाइहेङ लिताङ सोङ प्रभाब जेङ्न्हापाहि | खान्धुराइगेलाइको जेरगेलाइता हिन्जा दुना बाधिकाताङ हानिहि | 25 बर्नाबास कालाउ सावल यरुसलेमता ताइको काम दोअ्पातेङ न्हुसो एन्तिओक घुरिहि | ओबालाइको दोफा यु:हान्ना (मर्कुस) बुङ हिघाहि |