प्रेरितों के काम 10

सिजरिया दोअ्का सहरता कर्निलियस मिङ हिका एअ्मि द्याङ हिघाहि वा रोमन पल्टनको एमि कप्तान हिघाहि ज्याइहेङ ''इतालियन''दोअ्घाखे | 2 वा धार्मिक द्याङ हिघाहि, कालाउ वा वाको जाहान झाराङ परमेस्वरता थिघाखे | वा द्याङगेलाइहेङ रेम्का मन होइ ताका दान कालाउ परमेस्वरता दिनाङ दोमचाघाखे | 3 एनि नितिमा सुम बजेको पहरता कर्नीलियास झालाझालापा परमेस्वरको दर्सन तिङ्हि परमेस्वरको एलोङ स्वर्गदुत ताइमि भारि लोका तिङ्हि, कर्नीलियस कर्निलियास दोअ्काताङ लोका तिङ्हि 4 क्रनिलियास स्वर्गदुतहेङ थिचोङ्तेङ खाङ्हि कालाउ दोअ्हि,ना हाइ भोखेना,प्रभु ?'' स्वर्गदुत दोअ्हि,परमेस्वर नाङ्को दोमचाका हिङपिहि कालाउ गरिब,दु:खि गेलाइहेङ पाका नाङ्को दाया तिङ्हि परमेस्वर नासिहेङ फोमपादोङ्खे | 5 आधिमि द्याङ्गेलाइहेङ जोप्पा सहरता दिङ्गिल, सिमोनहेङ घुरिपातेङ चुमालि नाङ्को आधिमि द्याङ्गेलाइ दिङ्गिल ज्याइहेङ पतरुसबुङ दोअ्खे | 6 सिमोन जेदोङ द्याङ्कोता हिदोङ्घाखे ज्याइको मिङ बुङ सिमोनदोङ ,वा धालेको काम पाखे वाको सा समुन्द्रको भेरपा हि |'' 7 कर्निलियास दोफा नुइ धुइका स्वर्गदुत हानिहि, कर्नीलियास ताइको न्हेमि चाकारिया कालाउ एमि लान्ठाहेङ काइहि उङ्को लान्ठा धार्मिक खालको द्याङ हिघाहि | वा कर्नीलियासको साघाइ पाका हिघाहि | 8 कर्नीलियस उङ्को सुमि झनाहेङ रेम्फा काथा दोअ्तेङ लाइपाहि, कालाउ न्हुसो इम्बालाइहेङ जोप्पा दिङ्गिल्हि | 9 भेनाङ दिना उङ्को सुमिदोङ जोप्पा सहर भेर्पा लोहि, ओदोङ पहर पतरुस चाहि दोमचालि साको बारान्दाता ताङ्हि, इङ्को बेला तेन्हे पहर जेङ्का हिघाहि | 10 पतरुस म्हितुका हिघाहि,वा चालि खाङ्घाखे ओबालाइ उम तियार पालाउ दर्सन तिङ्हि | 11 वा स्वर्ग आन्हाका कालाउ इन्तासो बारका धावाको चेन्थ्रा भाइका आधेलेता हुलतेङ हिका कालाउ इङ्को बारका धाबाको द्यापाहाङ्सो तेअ्न्हातेङ भोनोइता हुल्तेङ हिघाहि | 12 उल्लिदुल्लिको प्रानिगेलाइ इन्ता हिघाहि तेअ्का प्रानिगेलाइ, पोम्भेलेतेङ तेअ्का प्रानिगेलाइ कालाउ बादेलता उराइका जिहा-जुइलेङ्गेलाइ, 13 कालाउ न्हुसो एलोङ गालाहोइ पतरुसहेङ दोअ्हि,''ल्हो पतरुस,हिदोइबुङ एलोङ बान्चिका प्रानि से:तेङ चा |'' 14 कालाउ न्हुसो एलोङ गालाहोइ पतरुसहेङ दोअ्हि,''ल्हो पतरुस,हिदोइबुङ एलोङ बान्चिका प्रानि से:तेङ चामान्थुघा | 15 कालाउ आरुङ वासेहेङ दोअ्हि,''परमेस्वर इङ्को गोताङ काथागेलाइ सुद्द जेङ्हि दोअ्का घोसाना पाका हि, ओदोङ भाअ्सिङ ना यासेहेङ अपबित्त्तरो मासोचे |'' 16 इसिका घाताना सुम्खे जेङ्हि,कालाउ न्हुसो गोताङ आनेमानेगेलाइ बादेलभारि घुरिपातेङ चुम्पुहि | 17 इसिका दसरनको मतलब हाइ वाला दोअ्तेङ पतरुस आवाइ तुअ्हि, कोकोङ बेला कर्नीलियस दिङ्गिल्का द्याङ्गेलाइ सिमोनको सा पात्ता लगाइहि | इम्बालाइ फिनुता जाअ्तेङ हिघाहि | 18 इम्बालाइ हापाङ काइहि कालाउ हिअ्हि,''हाइ सिमन पतरुस इता हिखे ?'' 19 पतरुस इङ्कोङ दर्सनको बिसयता फोमपातेङ हिघाहि, कालाउबुङ आत्माहोइ वासेहेङ दोअ्हि,''खाङ्सु ! सुमि द्याङ्गेलाइ नासिहेङ भोदोङ्खे | 20 लहो,कालाउ लेताको तालाता हाने उङ्को द्याङ्गेलाइ दोफा माथिसिङ हाने , कादोङ इम्बालाइहेङ नाङ्कोता दिङ्गिल्का हिघा |'' 21 कालाउ पतरुस उङ्को द्याङ्गेलाइ हिका लेताको तालाता खुअ्हि ,वा दोअ्हि,''नेलाइ भोतेङ्हिका द्याङ कादोङ | नेलाइ हाइपालि इता लोसुन्हा ?'' 22 इङ्को द्याङ्गेलाइ दोअ्हि,कर्नीलियास एमि लान्ठा आधिकारि हि ,वा धार्मिक खाल्को द्याङ हि; वा परमेस्वरको बाखानाइ पाखे गोताङ यहुदिगेलाइ वासिहेङ मानिखे,कालाउ सेउपाखे | एलोङ पबित्त्तरो स्वर्गदुत वाको साता नासिहेङ नेउता पिका हिघाखे कालाउ ओदोङ भाअ्सिङ वा नाङ्कोसो आधे ये-बानाल गेलाइ हिङ्लि द्वाको |'' 23 पतरुस इम्बालाइहेङ दोअ्हि लिता लोसु कालाउ नानि इताङ बासा हिलि सेउपाहि , कालाउ न्हु दिना पतरुस तियार जेङ्तेङ उङ्को सुमि द्याङ्गेलाइ दोफा हानिहि | आधेमि जोप्पाको चात्यागेलाइबुङ पतरुसदोफा हानिहि | 24 वाको न्हुदिना इम्बालाइ सिजरिया दोअ्का सहरता थुकाहि, कर्नीलियास इम्बालाइहेङ र्हुम्तेङ हिघाहि, वा लाम्फासोङ ताइको दाइ-ओनेगेलाइ कालाउ ताइको सानाइति भायागेलाइहेङ साता जोम्पाका हिघाहि | 25 जेलाउ पतरुस सालिता दुल्हि,कर्निलियास वाको दोफा दुसुहि कालाउ पतरुसको खोकोइता तुघुरतेङ सेउपाहि | 26 कालाउ पतरुस वासेहेङ ल्होलि दोअ्तेङ सेउपाहि,कालाउ पतरुस दोअ्हि ल्हो, का बुङ ना भाइकाङ द्याङ |'' 27 पतरस कार्निलियादोफा काथा दोसुकाताङ लिता दुल्हि कालाउ इन्ता हिन्जा द्याङ जोमका तिङहि | 28 वा इम्बालाइहेङ दोअ्हि,''नेलाइ गिसुखेन्हा कि यहुदि जेङ्तेङबुङ आरु बङ्सोको द्याङ्गेलाइदोफा इन्सा हिगिल्लि,चागिल्लि या ते द्याङ्गेलाइकोता हानिलि यहुदिगेलाइको व्यवस्थाको बिरूद्द हि | कालाउबुङ परमेस्वर कासिहेङ तिङ्पालि दोका हि, कि का हासुहेङ्बुङ 'अपबित्त्तरो,आखेका,दोअ्तेङ मादोअ्लि धिर्पाका हि | 29 ओदोङ भाअ्सिङ का इता हिदोइबुङ आसा माकोसिङ्को लोघा , एला कासेहेङ दोअ्सु,हाइपालि कासेहेङ इसा काइसुन्हा |'' 30 कर्नीलियास दोअ्हि,द्या दिना लाम्फा का सा ता दोमचाकाइतेङ हिघाखा | कोकोङ बेला दिनाको सुम बजेका हिघाहि | एन्सालाउ आचानक एलोङ स्वर्गदुत जाहाका धाबा होङ्तेङ काङ्को आगाता जाअ्हि | 31 वा दोअ्हि,''कर्नीलियास ! परमेस्वर नाङ्को दोमचाका हिङ्हि कालाउ गरिब दु:खियागेलाइहेङ नाङ्को दान पिका तिङ्हि,परमेस्वर नासेहेङ फोम पाखे | 32 ओदोङ भाअ्सिङ सहर जोप्पाता द्याङ गेलाइ दिङगिल कालाउ सिमोन जाइहेङ पतरुसबुङ दोअ्खे इता लोलि नेउता पिसु कालाउ वासिहेङ लोलि सेउपासु | वा सिमोन धालेको काम पाकाको सा ता हिखे,वाको सा समुन्द्रको भेरपा हि |' 33 ओदोङ भाअ्सिङ का नेलाइहेङ मारफाङ चुमतेङ लोसु दोअ्तेङ द्याङ्गेलाइ दिङगिल्घा, ना लोपिन्हा केलाइको भाअ्सिङ रेम्का जेङ्हि | इता केलाइ एला परमेस्वरदोफाङ हिनाहि इङ्को गोताङ काथा गेलाइ हिङ्पिलि जेदोङ प्रभु दोअ्लि दोअ्तेङ नासिहेङ आदेस पिका हि |'' 34 पतरुस नुइ धुइलि तेङ्हि,''एला का जातिङ्भारि बुझिखा कि परमेस्वरको भाअ्सिङ झाराङ द्याङ्गेलाइ एलोङदोङ सामान हि | 35 कालाउ गोताङ सारभिता परमेस्वर वासेहेङ सुइकार पाखे,ज्याइ वाको आराधाना पाखे कालाउ जेदोङ सही हि इङ्कोङ पाखे,| 36 परमेस्वर यहुदिगेलाइ दोफा नुइ धुइका हि, परमेस्वर येसु:ख्रिस्तको ज्याइ गोताङ द्याङ्गेलाइको परमप्रभु हि वाकोसोदोङ सान्तिको ये:बानाल ओबालाइको भाअ्सिङ दिङ्गिल्हि | 37 यहुदिया भरि हाइ जेङ्हि दोअ्का काथा नेलाइहेङ थाहा दोङ हि,वाला | या गालिलता यु:हान्नाको बप्तिस्ताको बारेता द्याङ्गेलाइहेङ बानाल पाहि कालाउ न्हुसो सुरु जेङ्का हि | 38 ना नासरतको येसुको:बारेता गिखेन्हा ? परमेस्वर वासेहेङ पबित्त्तरो आत्मा कालाउ सरबुङ पितेङ' ख्रिस्त बानाइहि | येसु:द्यापाहाङ्को द्याङ्गेलाइको भाअ्सिङ रेम्का काम पाकाताङ हानिहि कालाउ भुत कालाउ दुस्ता-आत्मा खोका द्याङ्गेलाइहेङ एल्पाहि | वा परमेस्वर येसु:को दोफा हिका प्रमान पिखे | 39 केलाइ वा यहुदियाता कालाउ यरुसलेमता पाका गोताङ काम गेलाइ तिङ्न्हहि , इङको केलाइ तिङ्का हिनाहि,इङ्को गवाहि जेङ्तेङ हिनाहि | कालाउबुङ ओबालाइ वासेहेङ धेङग्रा होइ बानाइका क्रुसता तोङ्तेङ से:हि | 40 कालाउ वा सि:काको सुमनिको दिना न्हुसो परमेस्वर वासेहेङ सुन्हुपाहि कालाउ द्याङ्गेलाइहेङ सर्लक्क येसु:हेङ तिङ्पापिहि | 41 कालाउबुङ येसुहेङ: झाराङ द्याङ्गेलाइ तिङ्लि माअ्दोहि, ज्याइहेङ परमेस्वर गवाहिको भाअ्सिङ साल्का हिघाहि इम्बालाइखिनिङ येसु:को दर्सन निङ्हि केलाइ इङ्कोको गवाहिगेलाइ हिनाहि वा सि:कासो सिन्चाल हि कालाउ न्हुसो केलाइ येसु:दोफा चानाहि आम्नाहि | 42 येसु:केलाइहेङ बानाल पाहि कालाउ द्याङ्गेलाइहेङ दोअ्हि, कि वासिहेङ खिनिङ परमेस्वरको बान्चिका द्याङगेलाइहेङ कालाउ सि:कालाइकोबुङ न्यानिसाप पालिको भाअ्सिङ साल्का हि | 43 गोताङ द्याङ ज्याइ येसु:हेङ खान्धुरि पाखे येसु:को मिङ्ता वा पापगेलाइ सो स्यामा निनावा ,गोताङ अगमबक्तागेलाइ वाको सत्येता साबित पाहि |'' 44 पतरुस काथा दोअ्काताङ पालाउ वचन हिङ्का उङ्को झाराङ द्याङ्गेलाइदोफा पबित्त्तरो आत्मा खुअ्हि | 45 यहुदि खान्धुराइगेलाइ ज्याइ पतरुस दोफा इन्ता लोका हिघाहि इम्बालाइ भारभुसाइहि हाइपालिपानु खान्धुरिमापाका- यहुदिगेलाइकोताबुङ पबित्त्तरो आत्माको उपहार लोका हिघाहि | 46 हाइपालिपानु नावा भासाता धुइतेङ इम्बालाइ परमेस्वरको स्तुति पाका इम्बालाइ हिङहि | कालाउ पतरुस दोअ्हि | 47 केलाइ भाइपाङ पबित्त्तरो आत्मा निङ्का इम्बालाइहेङ चिको बप्तिस्ता र्हुलिसो हासु मनहेङ सेकिलि द्वावा ?'' 48 कालाउ पतरुस कर्नीलियस,वाको ताइको द्याङ्गेलाइहेङ कालाउ सानाइतिगेलाइहेङ येसु:ख्रिस्त मिङ्ता बप्तिस्ता पिका आग्या पिहि | कालाउ द्याङ्गेलाइ पतरुसहेङ आरोङ एअ्नि न्हेनि थेकापा हिलिको भाअ्सिङ सेउपाहि |