प्रेरितों के काम 6

थुप्प्रुङ-थुप्प्रुङ द्याङ्गेलाइ येसु:को चात्या जेङ्लि तेङ्हि, कालाउ ओदोङ समय हिब्रुगेलाइको बिरुद्ता ग्रिक यहुदिगेलाइ गनगन पालि तेङ्हि,हाइपालिपानु दिनाङ चाका आमेने बाखाराइकाता इम्बालाइको राडिगेलाइहेङ (बिधुवा) गोइका जति चाका-आमका आमेने मानिङ्घाखे | 2 ओदोङ भाअ्सिङ तेन्हे झना प्रेरितगेलाइ इङ्को गोताङ जेरको चात्यागेलाइहेङ एदोफाङ काइहि कालाउ इम्बालाइहेङ दोअ्हि,केलाइ चाका-आम्का आमेनेगेलाइ बाखाराइलि साघाइलि पालिको भाअ्सिङ परमेस्वरको वचन धिरपालि काम चुमाका हिनाहि कालाउ यिदोइ केलाइको भाअ्सिङ रेम्का माको | 3 ओदोङ भाअ्सिङ दाइ-ओनेगेलाइ,नेलाइसोङ न्हिमि झना द्याङ्गेलाइ साल्सु,| इम्बालाइ झाराङ वाबाल हिलि गोयाङ ज्याइको बारेता द्याङ्गेलाइ वा असल हि द्वाको | नेलालाइ ज्याइहेङ साल्सुखेना वा बुदिृ कालाउ पबित्तरो-आत्मासो पोङ्घाका हिलि गोयाङ | केलाइ इम्बालाइहेङ इदोइ काम पालि नियुक्त पाङ | 4 एसा पाहि पानु केलाइ- केलाइको समय दोमचालि कालाउ परमेस्वरको वचन बानाल पाहि गोताङ समय पिलि द्वाङ | 5 चात्यागेलाइ झाराङ जेरदोङ इसिका बिचार मन्दाताअ्हि , कालाउ इम्बालाइ इङ्को न्हिमि झना द्याङ्गेलाइहेङ साल्हि: सित्फनस(खान्धुरि पुरा कालाउ पबित्त्तरो आत्माहोइ पोङ्घातेङ हिका द्याङ) फिलिप,प्रखरस,निकनोर,तिमोन,परमिनास कालाउ निकोलस एन्तिओकको,जो लाम्फा यहुदि जेङ्का हिघाहि | 6 कालाउ न्हुसो ओबालाइ इम्बालाइहेङ चुम्पुहि कालाउ प्रेरितगेलाइकोता जाअ्पाहि ओबालाइ दोमचाकाइ पिहि कालाउ ताइको खुरगेलाइ उङ्को द्याङ्गेलाइ हुसो ताअ्हि | 7 परमेस्वरको बचन हेन्जाङ द्याङ्गेलाइकोता थुकातापादोङ्घाखे,यरुसलेमता चात्यागेलाइको सङ्ख्या हेन्जाङ जेङ्काताङ पाघाखे | हेन्जाङ यहुदि धामिगेलाइबुङ यिदोइ खान्धुरिता चात्या जेङ्हि | 8 स्तिफ्नस एमि अनुग्रहि कालाउ सारभुसाइका द्याङ,द्याङ्गेलाइको माझाता भारबुसाइका काम गेलाइ कालाउ चमत्कार काम पाहि | 9 कालाउबुङ आधिमि यहुदिगेलाइ लोहि कालाउ स्तिफनदोफा गालाबाजि पाहि, उङ्का यहुदिगेलाइ सभाउ सासो लोका हिघाहि | उङ्को यहुदिगेलाइ साइरिनि लोका हिघाहि | अलेकजेन्द्रिया कालाउ सिलिसिया कालाउ एसिया सो हिघाहि इम्बालाइ स्तिफनदोफा बहस पाहि | 10 कालाउ आत्मासो स्तिफनहेङ बुदिृमानि होइ नुइ धुइलि साघाइतेङ हिघाहि | ओदोङ भाअ्सिङ यहुदिगेलाइ वाको दोफा गालाबाजि पालि मादोहि | 11 कालाउ ओबालाइ आधिमि द्याङ्गेलाइहेङ घुस पितेङ दोअ्लि लगाइहि,''केलाइ मोसा कालाउ परमेस्वरको बिसयता स्तिफनस धर्मको निन्दा (दुसिका) पाका केलाइ हिङ्का हिनाहि |'' 12 एसा पातेङ ओबालाइ द्याङ्गेलाइ,धर्म गुरु यहुदि अगुवागेलाइ कालाउ सास्तिरिगेलाइहेङ तोङ्पान्हाहि | कालाउ ओबालाइ मेनाङ तासिङ जितेङ चेरतामपाहि कालाउ ओबालाइ लोतेङ स्तिफ्नसहेङ रि्महि कालाउ ओबालाइ वासेहेङ यहुदि सभाउ साता यहुदिगेलाइको चाउघारा साता जाअ्पाहि | 13 ओबालाइ आधे धाताइका गबाहिगेलाइबुङ चुमाहि, इङको धाताइका गवाहिगेलाइ दोअ्हि,''यिदोइ द्याङ जेलाउबुङ यिदोइ पबित्त्तरो थामेता कालाउ मोसाको नियम बिरुदृ पाखे | 14 हाइपालिपानु यिदोइ द्याङ एसा दोअ्का केलाइ हिङ्का हिनाहि,नासरतको येसु: यिदोइ थामेहेङ नासापाङ,कालाउ मोसा केलाइहेङ पिका मुन्दुमबुङ (रितिरिवाज) बदलियाङ दोअ्खे |' यिदोइ द्याङ दोअ्का केलाइ हिङ्का हिनाहि |'' 15 चाउघारा साता योमतेङ हिका झाराङ द्याङ्गेलाइ स्तिफनसहेङ मिङ सुइ-सुइपा खाङ्हि | वाको हा्इ स्वर्गदुतको भाइका तिङ्घाखे,झाराङ इङ्को तिङ्हि |