प्रेरितों के काम 5

ह्ननिया मिङ हिका एमि द्याङ हिघाहि,वाको बे' को मिङ सफिरा हिघाहि , ह्ननिया आधे मिलिङ पि:हि | 2 कालाउ इङ्को मिलिङ ताकासो आधे वाको बे' को काथाता साअ्तेङ आधे भाग ताइमि दोफा ताहि | कालाउ आधे भाग चुमातेङ प्रेरितगेलाइहेङ पि:हि | 3 पतरुस दोअ्हि,''ह्ननिया ना हाइपालि ताइको हृदय मासानहेङ पिन्हा ? ना पबित्त्तरो आत्माहेङ धाताइन्हा , ना नाङ्को मिलिङ पिन्हा,कालाउ ताइको भाअ्सिङ ना हाइपालि पिका ताकासो आधे भाग ताअन्हा ? 4 मिलिङ पिलि लाम्फा,इङ्को नाङ्कोङ हिघाहि ,कालाउ इङ्को पिलि दोअ्तेङ बुङ,ना इङ्को ताका चाहेका थामेता चालाइलि दोअ्घाना | इसिका मारेम्का काम पाका मन नाङ्को ता हेसा लोहि ? ना परमेस्वरहेङ धाताइन्हा केलाइ द्याङ्हेङ माको |'' 5 इदोइ काथा हिङ्तेङ ह्ननिया भोनोइता थोबिन्हाहि कालाउ वाको जिउ हानिहि |या काथा हिङ्कालाइ झाराङ थिहि, 6 कालाउ वाजानगेलाइ ल्होतेङ वासेहेङ धावाहोइ लुमहि कालाउ बाहार चुमतेङ लिअ्हि ,कालाउ झाराङ द्याङ्गेलाइ इङ्को घटानाको बिसयता हिङ्तेङ थिहि | 7 नितिमाको सुम बजे न्हुसो वाको बे' सफिरा लिता लोहि | वासेहेङ ताइको के हुता इन्सिका घाताना घतेका थाहा मान्थुघाखे |(मामथुघाहि ) 8 पतरुस वासेहेङ हिअ्हि, '' नेलाइ मिलिङ पितेङ ना ताका हेथे निङ्न्हा,कासेहेङ दोअ्,एदि झोकोता खिनिङ ना मिलिङ पिन्हा ?'' सफिरा दोअ्हि,''एइ,केलाइ मिलिङ पितेङ निङ्का ताका ओङ्को झोको खिनिङ |'' 9 कालाउ पतरुस दोअ्हि,''नेलाइ प्रभुको आत्माहेङ जाचिलि हेसा मिलिसुन्हा ? खाङ्सु,नाङ्को के' हेङ लिअ्कालाइ फिनु ताङ हि कालाउ इम्बालाइ नासेहेङ फातेङ बाहार चुम्पावा |'' 10 ओदोङ घुरि सफिरा वाको खोकोइता तुसोपा लोङ्हि कालाउ वाको जिउ हानिहि | उङ्को वाजानगेलाइ लोतेङ वासेहेङ सि:का निङ्हि | ओबालाइ वासेहेङ एन्साङ्दोङ बाहार चुम्पुहि कालाउ वाको के को भेरपाङ वासेहेङ्बुङ लिअ्हि | 11 गोताङ खान्धुरिपाकालाइ कालाउ आरु भेनेङ द्याङ्गेलाइ इसिका घातानागेलाइ हिङ्तेङ झाराङ थिहि | 12 प्रेरितगेलाइ द्याङ्गेलाइको माझाता हेथे-हेथे चमत्कारगेलाइ कालाउ भाङ-भाङ्का कामगेलाइ पाहि | प्रेरितगेलाइ एदोफाङ सुलेमानको दालानाता हिघाहि | इम्बालाइ झाराङ्को एलोङ्दोङ उदेस्य हिघाहि | 13 हासुबुङ प्रेरितगेलाइ दोफा मिलिलि आरबुङ मापाहि बुरु गोताङ द्याङ्गेलाइ प्रेरितगेलाइको बिसोयोता रेमकाङ काथा पाहि 14 कालाउ बुरू हेन्जा द्याङ्गेलाइ,न्हेमिदोङ वाबालगेलाइ कालाउ बेबालाइ प्रभुता खान्धुरि पाहि कालाउ खान्धुरिपाकालाइको जेरता जोम्लि लोहि | 15 ओदोङ भाअ्सिङ मिसा लोतेङ मासाधेका द्याङ्गेलाइहेङ दामा-दामाताचुमाहि | पतरुस लोधोङ्खे दोअ्का दयाङ्गेलाइ हिङ्का हिघाहि , ओदोङ भाअ्सिङ इम्बालाइ मिसा लोतेङ मासाधेकालाइहेङ सिधाउसुधाङ उन्थुइगेलाइता ताअ्हि | हाइपालिपानु इम्बालाइ सोचिहि एदि पतरुसको स्याइरे खिनिङ बुङ मिसालोकालाइकोता धेल्नुबुङ उङ्को मासाधिकागेलाइ एल्लाङ दोअ्तेङ मन पाघाखे | 16 द्याङ्गेलाइ यरुसलेमको द्यापाहाङ सहरगेलाइसो लोका हिघाहि , इम्बालाइ मासाधेका मिसालोकालाइ हेङ कालाउ दोफाङ इम्बालाइहेङ्बुङ चुमाहि ,ज्याइ गेलाइ दुस्त आत्मा (माएल्का मन) धेल्तेङ सानताइका हिघाहि,इम्बालाइ झाराङ एल्हि | 17 बार्का धामि कालाउ वाको सानाइति गेलाइ (इङको जेरको सदुकिगेलाइ दोअ्घाखे) बोमिहेङ मि तु पाहि | 18 इम्बालाइ प्रेरितगेलाइ रिम्हि कालाउ झ्यालखानाता थुनिहि | 19 कालाउ न्हिसिन्ता प्रभुको दुत झ्यालखानासो फिनुगेलाइ हिअ्पिहि कालाउ इम्बालाइहेङ बाहार चुमातेङ दोअ्हि, 20 ''हानेसु कालाउ ''थानको(मन्दिरको) साता दुल्तेङ जाअ्सु कालाउ द्याङ्गेलाइ इदोइ नावा जिवनको बिसयता गोताङ काथा ब्यख्या पासु |'' 21 जेलाउ प्रेरितगेलाइ इङ्को काथा हिङ्हि,इम्बालाइ थानता(मन्दिरता) एरि्हिमाङ हानिहि कालाउ धिरपालि तेङ्हि | झाराङ खान्तेङ बार्का धामि कालाउ वाको भायागेलाइ थुकालि लोहि | इम्बालाइ यहुदि द्याङ झाराङ अगुवागेलाइबुङ चौउघारा साता गोताङ प्रेरितगेलाइहेङ झ्यालखानासो चुमासो दोअ्तेङ आधमि द्याङ्गेलाइहेङ दिङगिल्हि | 22 जेलाउ इम्बालाइ झ्यालखानाता हानिहि इम्बालाइ प्रेरितगेलाइहेङ निङ्लि मादोहि | कालाउ इम्बालाइ घुरितेङ लोहि कालाउ इङ्को बिसयता यहुदि अगुवागेलाइहेङ दोअ्पिहि | 23 इम्बालाइ दोअ्हि,''झ्यालखानाता बन्द कालाउ रेम्फाङ ताल्चा लागाइका हिघाहि, लान्ठागेलाइ फिनुताङ जाअ्तेङ हिघाहि | कालाउ जेलाउ केलाइ फिनु हिअ्न्हाहि,झ्यालखाना खालि हिघाहि | 24 जेलाउ थानको (मन्दिरको) साको कप्तान कालाउ मुख्य धमिगेलाइ इङ्को बानाल हिङ्हि कालाउ इदोइ गोताङ्को नतिजा एला हाइ जेनाङ वाला दोअ्तेङ इम्बालाइ प्रेरितगेलाइको बिसयता आवाइ तुहि ? 25 कालाउ एमि द्याङ लोहि कालाउ इम्बालाइहेङ दोअ्हि,''हिङ्सु ! ज्याइहेङ नेलाइ झ्यालखानाता ह्वासुन्हा इम्बालाइ थानको (मन्दिरको) सालेङ्ता दुल्तेङ इन्ता जाअ्तेङ,इम्बालाइ द्याङ्गेलाइहेङ सिक्स्या पिधोङ्खे |'' 26 कालाउ न्हुसो कप्तान कालाउ वाको द्याङ गेलाइ बाहार उल्लिहि कालाउ प्रेरितगेलाइहेङ रि्म्हि कालाउ इम्बालाइहेङ चुमाहि | कालाउ लान्ठागेलाइ इम्बालाइहेङ जबरजस्ति मापाहि,हाइपालिपानु ओबालाइ जनता दोअ्फा थिघाखे | लान्ठागेलाइ थिहि हाइ पालि पानु द्याङ्गेलाइ मिसुयावा (क्रोधित) कालाउ ओबालाइहेङ उन्थुइ तोअ्कावा | 27 लान्ठागेलाइ प्रेरितगेलाइ यहुदि सभाउता चुमाहि कालाउ यहुदि अगुवागेलाइको आगाता जाअ्पाहि | प्रधान धामिगेलाइ हिअ्लि तेङ्हि | 28 वा दोअ्हि,''इदोङ द्याङ्को बिसयता द्याङ्गेलाइहेङ हेलाउबुङ हाइबुङ माधिरपासु दोअ्तेङ केलाइ नेलाइहेङ थाङ्का (कडा) आग्या पिका हिघानाहि | कालाउबुङ खाङ्सु नेलाइ इदोइ हाइपासुखेना ! नेलाइ यरुसलेमदोङ नेलाइको सिक्स्या होइ पोङ्घा पापिसुन्हा | नेलाइ उङ्को द्याङ्को हितिको दोसिलिका केलाइ हुता चुमालि भोसुखेना |'' 29 पतरुस कालाउ आरू प्रेरितगेलाइ जोबाफ पिहि,केलाइ द्याङ्गेलाइको खान्तेङ परमेस्वरहेङ मानिलि गोइखे | 30 नेलाइ येसु:हेङ सेअ्सुन्हा; नेलाइ वासेहेङ क्रुसता तोइसुन्हा ,कालाउबुङ परमेस्वर ज्याइ केलाइको आजाइ आजुगेलाइको परमेस्वर वासेहेङ सिअ्कासो आरोङ बान्चिपाहि | 31 येसु:हेङ परमेस्वर अगुवा कालाउ मुक्ति दाताको रूपता ताइको दामपाहा ताअ्तेङ तोलेहि | परमेस्वर इसिका पाहि कालाउ कि झाराङ यहुदिगेलाइ ताइको हृदय कालाउ जिनन परिबर्तन पालि द्वाको कालाउ ओबालाइको पापको भाअ्सिङ वाको सो स्यामा र्हुलि द्वाको | 32 केलाइ इदोइ काथाको गवाहि हिनाहि | कालाउ पबित्त्तरो आत्माबुङ ज्याइ परमेस्वर नेलाइहेङ पिका हिघाहि,ज्याइ वाको आग्या किहि,कालाउ इदोइ काथागेलाइको भाअ्सिङ गवाहि हि |'' 33 यहुदि नेतागेलाइ इदोइ काथा हिङ्लि दोअ्तेङ मेनाङ चेरताङ्पातेङ मिसिया जोलपाहि | इम्बालाइ प्रेरितगेलाइहेङ सेअ्लि खाङ्घाखे | 34 फारिसिगेलाइ मध्येसो एमि इङ्को सभाउसो जुरुक्क लोहि,वाको मिङ गमलिएल हिघाहि , वा सास्तिरि हिघाहि,कालाउ झाराङ जनता वासेहेङ मान पाघाखे | वा द्याङ्गेलाइ कोम्हा को भाअ्सिङ प्रेरितगेलाइहेङ साभाउसासो बाहार चुम्पुलि दोहि | 35 कालाउ न्हुसो वा इम्बालाइहेङ दोअ्हि,''इस्राएलको द्याङ्गेलाइ,इदोइ द्याङ्गेलाइहेङ नेलाइ जेदोङ पालि खाङ्सुखेना इङ्कोता आसा होसियार पासु | 36 फोम पासु नानि खान्तेङ लाम्फा खिनिङ हाइ जेङ्का हिघाहि,जेलाउ थुदास लोहि वा ताइमि बार्का द्याङ दोअ्तेङ तागति पाहि | लग-भग दयासाइ द्याङ्गेलाइ वासेहेङ साथ पिहि, कालाउबुङ वासेहेङ सेअ्हि | वाको चात्यागेलाइ चिलिबिलिगिल्हि कालाउ आन्दोलन एन्साङ दोहि | 37 कालाउ गालिलको यहुदा मिङ हिका एमि द्याङ लोहि , उङ्को द्याङ जनगानाना गान्धिका समय हिघाहि वा आधिमि द्याङ्गेलाइहेङ ताइमि दोफा लागिलिबुङ लागाइहि कालाउ अगुवाइ पाहि | वासेहेङ्बुङ सेअ्हि | कालाउ वाको दोफा लागेका गेलाइ झाराङ चिलिबिलि (आउलिहि) जेङ्हि | 38 ओदोङ भाअ्सिङ एला का नेलाइहेङ दोअ्दोङ्खा;उङ्को द्याङ्गेलाइसो दुरे हिसु,इम्बालाइहेङ एक्लाङ लाअ्पिसु, | एदि इम्बालाइको योजना द्याङ्गेलाइसोनु, माकुनु जेदोङ इम्बालाइ पादोङ्खे इङ्को द्याङ्गेलाइसो नु, असफल जेनावा, | 39 कालाउ एदि उङ्को परमेस्वर पाहासोनु कालाउ नेलाइ इम्बालाइहेङ खोराइलि मादोस्वाना,| नेलाइको धुम परमेस्वर स्वयमको बिरुदृको, धुम जेङ्तेङ दोकावा |'' गमलिएल दोअ्का काथाता यहुदि अगुवागेलाइ सहमति जेङ्हि | 40 इम्बालाइ प्रेरितगेलाइहेङ आरोङ काइहि,इम्बालाइ ओबालाइहेङ दानाइहि कालाउ येसु:को बिसोयोता द्याङ्गेलाइहेङ आरोङ हाइदोङ मादोसु दोअ्हि | कालाउ न्हुसो इम्बालाइ प्रेरितगेलाइहेङ लाअ्पिहि | 41 प्रेरितगेलाइ इङको सभाउ लाअ्तेङ हानेहि येसु:को मिङ्ता एसा अपमानित निङ्लि योग्यो जेङ्काता ओबालाइ लेङ्चाहि | 42 ओबालाइ द्याङ्गेलाइहेङ सिक्स्या पिलि माअ्लाहि कालाउ येसु:दोङ ख्रिस्त हि,दोअ्का ये:बानाल द्याङ्गेलाइहेङ दोअ्लि माअ्लाहि |ओबालाइ दिनाङ दिना परमेस्वरको थान, सा-साता एसापाङ बानाल पाहि