प्रेरितों के काम 4

जेलाउ पतरुस कालाउ यु:हान्ना द्याङ्गेलाइ दोफा काथापाकाताङ हिघाहि,आधिमि द्याङ्गेलाइ इम्बालाइकोता लोहि | इम्बालाइ यहुदि धामिगेलाइ थानको (मन्दिर) सामाराइ पाकागेलाइको कप्तान कालाउ आधिमि सादुकिगेलाइ हिघाहि | 2 पतरुस कालाउ यु:हान्नाहेङ द्याङ्गेलाइ चेरतामपाका हिघाहि,हाइपालि पानु येसु:ता द्याङ्गेलाइ सि:कासो सि:न्हुखे, दोअ्तेङ ओबालाइ द्याङ्गेलाइहेङ ये;सुको उधारन पितेङ धिर पाघाखे कालाउ घोसाना पादोङ्घाखे | 3 यहुदि अगुवागेलाइ पतरुस कालाउ यु:हान्नाहेङ रिम्हि कालाउ झ्यालखानाता हवाहि | बेलालि दोअ्का हिघाहि,ओदोङ भाअ्सिङ पतरुस कालाउ युहन्नाहेङ भेनेङ दिना थेकापा झ्यालखानाता ताअ्हि | 4 कालाउ हेन्जा द्याङ्गेलाइ ज्याइ-ज्याइ पतरस कालाउ यु:हान्नाको ये:बानाल हिङ्का हिघाहि,इम्बालाइ खान्धुरि पाहि ओदोङ भाअ्सिङ इन्ता लगभग ना-हाजार वाबालाइ खान्धुरि पाकालाइ हिघाहि | 5 न्हु दिना यहुदि सासकगेलाइ,कालाउ यहुदि धर्म गुरुगेलाइ कालाउ सास्तिरिगेलाइ यरुसलेमता जोमका हिघाहि | 6 .प्रधान धामि ह्न्नास,कैयाफा,यु: कालाउ अलेकजान्दरगेला इनता हिघाहि गोताङ द्याङ्गेलाइ जेदोङ प्रधान धामि चुनिका एलोङ जाहानको इनता हिघाहि | 7 इम्बालाइ पतरुस कालाउ यु;हान्नाहेङ झाराङ्को आगाता जाअ्पाहि | यहुदि अगुवागेलाइ,ओबालाइहेङ हेन्जाङ खेप हिअ्हि,''उङ्को लेङ्ग्रा द्याङ्हेङ नेलाइ हेसापातेङ एल्पासुन्हा ? हासुको खाबारा चुमतेङ नेलाइ एसा पासुन्हा ? 8 कालाउ पबित्त्तरो आत्मा होइ पतरुस पोङ्घाहि,वा इम्बालाइहेङ दोअ्हि,''द्याङ्गेलाइको अगुवागेलाइ कालाउ बार्का धामिगेलाइ : 9 नेलाइ इसिका रेमका काम पाका बिसयता ऐला केलाइहेङ प्रस्न पासुखेना कि इदोइ लेङ्ग्रा द्याङ हेसा एल्हि ? 10 नेलाइ झाराङ यहुदि द्याङ्गेलाइ गिसु कि इदोइ लेङ्ग्रा द्याङ नासरतको येसु:ख्रिस्तको सरबुङ सो एल्का जेङ्का हि ! ज्याइहेङ नेलाइ क्रुसता ताराइसुन्हा |परमेस्वर वासेहेङ सि;कासो जिवनता ल्होपाहि,इदोइ द्याङ लेङ्ग्रा हिघाहि,कालाउ एला ठिक हि , वा नेलाइको आगाता जाअ्लि दोअ्का हि,इदोइ गोताङ येसु:को सरबुङ होइ जेङ्नाङ ! 11 इदोइ इङ्कोङ उन्थुइ,ज्याइ ना बानाइलि माकिसुन्हा,ओदोङ एला कुन्हाको पुरुङ-उन्थुइ जेङ्लि लोका हि | 12 आरू हासुङ्ताबुङ, मुक्ति मान्थु,हाइपालिपानु केलाइ मुक्ति निङ्लि स्वर्गलेता द्याङ्गेलाइ कोता भेनेङ हिदोइबुङ मिङ पिका मान्थु |'' 13 यहुदि अगुवागेलाइ गिहि कि पतरुस कालाउ यु:हान्नाता हिदोइ बुङ इन्सिका तालिम कालाउ सिक्स्या मान्थु दोअ्तेङ कालाउ अगुवा गेलाइ पतरुस कालाउ यु:हान्नाता साहस पातेङ धुइकाबुङ तिङ्का हिघाखे |ओदोङ भाअ्सिङ इम्बालाइ भारबुसाइका हिघाहि | कालाउ न्हुसो खिनिङ इम्बालाइ पतरुस कालाउ यु:हान्ना येसु:दोफाङ हिघाहि दोअ्तेङ थाहा गिहि | 14 इम्बालाइ उङ्को लेङ्ग्रा द्याङ्हेङ न्हेलोङ प्रेरितगेलाइको भेरपा योमतेङ हिका तिङ्हि | उङ्को द्याङ एल्का हिघाहि,ओदोङ भाअ्सिङ इम्बालाइ इङ्को प्रेरितगेलाइको दोअ्का काथाता हाइदोङ बिरुदृ पालि मादोहि |'' 15 यहुदि अगुवागेलाइ इम्बालाइहेङ माहासभाउसो बाहार हानेलि दोअ्हि कालाउ न्हुसो इङ्को यहुदि नेता गेलाइ ता-ताइमि एला हाइ पालि गोयाङ दोअ्का काथाता काथा दोअ्सुलि तेङ्हि | 16 इम्बालाइ दोअ्हि,''केलाइ इङ्को प्रेरितगेलाइ दोफा हाइपालि गोयाङ ? यरुसलेमको झाराङ द्याङ्गेलाइ गिका हि कि इम्बालाइ बार-बारका भारबुसाइका कामगेलाइ पाका हि | इदोइ सरलङ्ग हि,केलाइ यासेहेङ सत्ये माको दोअ्लि मादोवाङ | 17 कालाउ नेलाइ इम्बालाइहेङ येसु:को बिसययोता आरुङ हेन्जा माअ्दोलितेङ केलाइ इम्बालाहेङ थिपालि गोयाङ | कालाउ इङ्को काथागेलाइ द्याङ्गेलाइको माझाता झन माचार -चाराइ यावा |'' 18 यहुदि अगुवागेलाइ पतरुस कालाउ यु:हान्नाहेङ आरुङ लिता काइहि,इम्बालाइ,ओबालाइहेङ दोअ्हि द्याङ्गेलाइहेङ येसु:को मिङ ता हाइदोङ काथागेलाइ माधिरपासु दोअ्तेङ आग्या पिहि | 19 पतरुस कालाउ यु:हान्ना इम्बालाइ उत्तर पिहि,''परमेस्वरको काथा आगाता हिदोइ ठिक हि ? नेलाइहेङ हिङ्लि कि परमेस्वरहेङ ? नेलाइ ताइमिङ्दोङ बिचार पासु |'' 20 केलाइ सिकापा हिलि माद्वाङ,केलाइ जेदोङ हिङ्नाहि कालाउ तिङ्नाहि केलाइ इङ्को काथागेलाइ द्याङ्गेलाइहेङ दोअ्लि गोयाङ |'' 21 इम्बालाइ साजाय पिका हिदोइबुङ उपाय मान्थुतेङ ओबालाइहेङ झन हेन्जा धमकि तिङ्पितेङ लाअ्पिहि,हाइपालि पानु जेदोङ घाताना जेङ्का हिघाहि इङ्कोको भाअ्सिङ झाराङ द्याङ्गेलाइ परमेस्वरको बाखानाइ पातेङ हिघाखे | 22 हाइपालि पानु जेदोङ द्याङ सरबुङ्सो एल्का पाका हिघाखे,वाको उमेर द्याकुरि बासार खान्तेङ हेन्जा हिघाहि | 23 पतरुस कालाउ यु:हान्ना यहुदि अगुवागेकेलाइको सभाउ लाअ्तेङ ताइको सानाइतिगेलाइ दोफा लोहि | इम्बालाइ ताइको सानाइतिगेलाइहेङ मुख्य (बार्का) धामिगेलाइ कालाउ धर्म गुरुगेलाइ जेदोङ-जेदोङ दोअ्का हिघाहि गोताङ दोअ्पिहि | 24 जेलाउ खान्धुरि पाकालाइ इङ्को हिङ्हि,इम्बालाइ झाराङ परमेस्वरहेङ एलोङ्दोङ हृदयहोइ दोमचाकाइ हि | इम्बालाइ दोमचाहि,''हे प्रभु,ना दोङ एलोङ खिनिङ हिना ज्याइ पृथ्वि,बादेल,समुन्द्र कालाउ इङ्को गेलाइता हिका गोताङ आमेने इदोइ पृथ्विता बानाइहि | 25 केलाइको आजु (पुर्खा) दाउद नाङ्को सेवक हिघाहि | पबित्त्तरो आत्मापाहा वा इङ्को वचनगेलाइ लेखिहि: खान्धुरि मापाकालाइ हाइपालि झाअ्मिरिहि,कालाउ दयाङ्गेलाइ माजेङ्का काथागेलाइ हाइपालि फोम पाहि ? 26 पृथ्विको राजागेलाइ,सासकगेलाइ परमप्रभु कालाउ वाको खिस्त बिरुदृ धुम पालि एनोङ थामेता जोमका हि |' 27 हाइपालिपानु जातिङ्को ना अभिसेक पाका,नाङ्को पबित्त्तरो सेवक (आल्ते) येसु:को बिरुदृता हेरोद ,कालाउ पन्तियास पिलातस उधिन्हेमि,खान्धुरि मापाका कालाउ इस्राएलगेलाइ दोफा इदोइदोङ सहरता जोमका हिघाहि | 28 इदोइ गोताङ द्याङ्गेलाइ ना-नाङ्को सरबुङ कालाउ बुदिृ होइ योजना पाका गोताङ काम पालि एलोङ्दोङ जेङ्हि | 29 एला हे प्रभु,इम्बालाइको थिकापा हुता नजर पापि,कालाउ नाङ्को बान्धाइतिगेलाइहेङ गोताङ सहास पि कालाउ नाङ्को वचन धुइलि पि, 30 प्रमानगेलाइ पितेङ कालाउ नाङ्को पबित्त्तरो सेवक येसु:को मिङ पाहा भारबुसाइका काम पातेङ उङ्को मासाधिका द्याङ्गेलाइहेङ एल्पातेङ नाङ्को सरबुङ तिङ्पापि |'' 31 खान्धुरि पाकालाइ दोमचालि दोअ्तेङ इम्बालाइ ऐ -थामे जोमहि इन्ता हेङ्गालाइन्हाहि,कालाउ इम्बालाइ झाराङ पबित्त्तरो आत्मा सो पोङ्घाहि,कालाउ इम्बालाइ साहसपातेङ परमेस्वरको वचन दोअ्हि | 32 खान्धुरि पाकालाइको हुल (समुह) झाराङ एलोङ्दोङ हृदय कालाउ एलोङ्दोङ आत्मा हिका हिघाहि,कालाउ इम्बालाइ मध्येसो एअ्मिबुङ ताइको धन-सम्पतिको हिदोइबुङ आमेने इदोइ काङ्को केलाइको दोअ्तेङ मादोअ्घाखे | कालाउ इम्बालाइको गोताङ आमेने साझा हिघाहि | 33 प्रभु येसु:को सि:का सो सिन्हुका जेङ्काको बारेता प्रेरितगेलाइ बार्का सरबुङको गवाहि पिघाखे | कालाउ परमेस्वर झाराङ खान्धुरि पाकालाइहेङ हेन्जा आसिरबाद पिघाखे | 34 इम्बालाइ हासुहेङ्बुङ हिदोइबुङ आमेनेको खाचो(गोइहिघापानु) परिघाखे ,हाइपालि पानु ज्याइ-ज्याइको ताइको मिलिङ कालाउ सा गेलाइ हिघाखे पितेङ ताका चुमाघाखे | 35 इम्बालाइ पिकासो निङ्का ताका प्रेरितगेलाइहेङ पि:हि , कालाउ न्हुसो झाराङ ओबालाइहेङ जेदोङ-जेदोङ आमेने गोइघाखे ओदोङ आमेनेगेलाइ बाराइपिघाखे | 36 खान्धुरि पाकालाइ मध्ये सो एमिको मिङ युसुफ हिघाहि | प्रेरितगेलाइ वासेहेङ बर्नाबास दोअ्घाखे | ''बर्नाबास' मिङ्को माने जेङ्खे ''द्याङ ज्याइ आरु भेनेङ्हेङ साघाइखे |'' वा साइप्रस सारभिको एमि लेबि हिघाहि | 37 युसुफको ताइकोङ मिलिङ हिघाहि,इङ्को मिलिङ वा पिहि कालाउ वा पिकासो निङ्का ताका प्रेरितगेलाइहेङ पि:हि