युहन्ना 19

कालाउ पिलातसदोङ येसु:हेङ चुम्तेङ लाथि लगाइलि लगाहि | 2 कालाउ सिपाहि गेलाइहेङ चुइको पाकुता गासितेङ वाको पुरिङता लगाइपिहि,कालाउ वासेहेङ नेल्पारंङको लोखन होम पाहि, 3 कालाउ वाको भेर्पा लोतेङ दोअ्हि,''प्रमान,यहुदिगेलाइको राजा !''कालाउ इम्बालाइदोङ चाउरिहि | 4 आरोङ बाहार ओलितेङ इम्बालाइहेङ दोअ्हि,''खाङ,का कासेहेङ नेलाइकोता बाहिर चुमाखा,नेलाइहेङ गिपालि भोखा,का याको नाहाइदोङ मातिङघा |'' 5 कालाउ चुइको मुकुट कालाउ नेल्पारंङको लोखन होम्पातेङ येसु:हेङ बाहार उल्लिपातेङ बाहार चुमाहि |कालाउ पिलातसदोङ इङ्कोहेङ दोअ्हि,''खाङ,इदोइ दयाङ !'' 6 जेलाउ बारका धामिगेलाइ कालाउ पालेगेलाइ दोङ वासेहेङ तिङ्हि,इम्बालाइ मेसा दोकाताङ हि्काइलि थालिहि,''उङ्को हेङ क्रुसता ताङगाइसु,इङ्कोहेङ क्रुसता ताङगाइसु !'' पिलातस दोङ इम्बालाइहेङ दोअ्हि, ''नेलाइ दोङ यासेहेङ चुम्पुतेङ क्रुसता ताङगाइसु,हाइपालिपानु का याकोता हाइदोङ देख मानिङघा !'' 7 यहुदिगेलाइदोङ वासेहेङ उत्तरा पिहि,''केलाइको एलोङ ब्यबस्था हि,कालाउ इङ्को ब्यबस्था अनुसार इदोइ सिलिगोयाङ हाइकि यादोङ ताइमिहेङ परमेस्वरको चान दोअ्का हि |'' 8 इदोइ काथा हिङतेङ पिलातस झन थिहि |'' 9 वादोङ आरोङ मन लिता दुल्लि येसु:हेङहिअ्हि,''ना हेताको दोङ ?''कालाउ येसु:दोङ वासेहेङ उत्तरा मापिहि | 10 इदोइ भाअ्सिङ पिलातसदोङ दोअ्हि,''हाइना काङदोफा माघुरयाना ? नासेहेङ लापिका अधिकार काङदोअ्सा हिदोङका नासेहेङ थाहा मान्थु ? 11 येसु:दोङ उत्तरा पिहि,''नासेहेङ ना हुसो मापिका पानु काङकोहुसो नाङ्को हाइदोङ अधिकार माजेङ दोङ | इदोइ भाअ्सिङ हेङ नाङको खुर्ता सोम्पिका हेन्सा पापको दुःख हि |'' 12 उङ्को न्हुसो पिलातसदोङ वासेहेङ लापिलि हेन्सा प्रमान पाहि | काला यहुदिगेलाइ एसा दोकाताङ हि्काइ,''हाइ कि नादोङ इदोइ दयाङ लापिना पासुना का सहरको मायारू सनाइति मामाजेङ | ताइमिहेङ राजादोङ दोतेङ दाबिपाका गोतेङ केसरको बिरोधता खारा जालाखे |'' 13 पिलातस दोङ इदोइ काथा हिङतेङ येसु:हेङ बाहिर चुमाहि,कालाउ वा ''उन्थुइका पाति ''दोअ्का थामेता | (ज्यासेङ हिब्रु भासाता गलगथा दोअ्ख) न्याय आसनता योम्हि | 14 उङ्को समय निस्तार पार्बाको तियार जेङका दिनाको आधा दिना हिघाहि |पिलातुस यहुदिगेलाइ दोअ्हि,''नेलाइको राजा इता हि !'' 15 कालाउ इम्बालाइ एसादोकाताङ रि्काइहि(चिच्यायो),''चुम्पुसु,उङको हेङ क्रुसता ताङगाइसु ! पिलातसदोङ इम्बालाइहे दोअ्हि,''हाइ नेलाइको राजाहेङ क्रुसता तुङगायाङका ?'' बार्का धामिगेलाइ दोङ उत्तरा पिहि,''केसरबाहेक केलाइको राजा अरु मान्थु |'' 16 'कालाउ वादोङ कासेहेङ क्रुसता ताङगाइलि इम्बालाइको खुर्ता सोम्पिहि | एदोङ भाअ्सिङ पाहि गेलाइदोङ येसु:हेङ जिम्मा ह्हि | 17 वादोङ ताइको क्रुसता मिङ चुम्तेङ ख्प्परे दोका थामेता हानिहि,ज्यासेङ हिब्रुता गलगथा दोअ्खे | 18 इन्ता इम्बालाइदोङ वासेहेङ क्रुस्ता तान्घाहि कालाउ वादोअ्फा आरू न्हेमिहेङ ताङगाहि,एमिहेङ एपाहा,भेनेङहेङ थेपाहा माझाता येसु:हेङ | 19 पिलातस दोङ एनोङ दोसपातरा बुङ लेखिहि,कालाउ कुलहुसो तेङपाहि | इन्कोता इस्का लेखिका हिघाहि | ''नासरत्तको येसु:यहुदिकोराजा | 20 एला हेन्साङ यहुदिगेलाइहेङ इदोइ दोसपत्तर पदेहि,हाइपानु येसु:क्रुसता ताङगाइनाको थामे सहरको भेरपाङ हिघाहि इदोइ हिब्रु,ल्यातिङ कालाउ ग्रिक भासाता लेखिएका हिघाहि | 21 यहुदिगेलाइको बार्का धामिगेलाइ दोङ पिलातस हेङ दोअ्हि,''यहुदिगेलाइको राजा दोअ्का माको,कालाउ ''यादोङ का यहुदिगेलाइको राजादोङ दोअ्हि |''दोतेङ लेखिसु | '' 22 पिलातसदोङ उत्तरा पिहि,''कादोङ ज्या लेखिघा,लेखिघा |'' 23 जेलाउ सिपाहिगेलाइ दोङ येसु:हेङ क्रुसत़ा ताङगाहि,कालाउ इम्बालाइ दोङ वाको लोखोङ चुम्तेङ गोतेङ सिपाहिगेलाइ ए-भाग जेङपा दया भाग पाहि | वाको बाहिर लोखनबुङ हुतेङ,कालाउ उङको लोखोन चाहि माजोका मान्थुका हुतासोलेता थिकापाङ पुइकालोखन सोलोधोला हिघाहि | 24 इदोइ भाअ्सिङ ताइमिङता दोअ्हि,''इदोइ चाहि माथेताइनि,कालाउ इदोइ हासुको जेङलि दोतेङ चिट्ठा लागाहि | ''धर्म सासत्तर पुरा ज्याको दोतेङ दोङ इदोइ जेङका हिघाहि:''इम्बालाइदोङ काङको लोखोन ता ताइमिता बाख्राइ,कालाउ बाहिरि लोखोनता चाहि चिट्ठा लगाइहि |'' 25 इदोइ भाअ्सिङ सिपाहिगेलाइदोङ इदोइ काम पाहि कालाउ येसु:को क्रुसको भेर्पा वाको आमाइ,वाको आमाइ को ओने,कोलोपाएको बे मरियम कालाउ मरियम मग्दालिनि जातेङ हिका हिगाहि | 26 जेलाउ येसु:दोङ ताइको आमाइहेङ वादोङ माया पाका | चात्या भेर्पा जातेङ हिका तिङहि,कालाउ वादोङ ताइको आमाइ हेङ दोअ्हि,''तिहि,खाङसु,नेलाइको चान ?'' 27 कालाउ इङ्को चात्येगेलाइ हेङ बुङ वादोङ दोअ्हि,''खाङसु,नाङको आमाइ |'' इङ्को बेलासोङ इनताङ चात्येगेलाइहेङ वासेहेङ ताइको साता चुम्पुहि | 28 इदोइ न्हुसो येसुदोङ गोतेङ काथा एला दोहोइ दोतेङ गितेङ धर्मसासत्तर पुरा ज्याको दोतेङ दोअ्हि,''का चि आम्लि किघा |'' 29 इन्ता सिर्का दोङ भरिका एनोङ अन्य ताका हिघाहि | इदोइ भाअ्सिङ सिर्कादोङ भरिका इस्पोन एनोङ हिसपको दालेङता तातेङ इम्बालाइदोङ वाको नुइता धिपाहि | 30 जेलाउ येसु:दोङ सिर्का हुइ,कालाउ वादोङ दोअ्हि,''एला दोहोइ,''कालाउ वादोङ पुरिङ तुघुरतेङ ताइको आत्मा लाहि | 31 इङ्को दिना न्यायको दिना हिघाहि | इदोइ भाअ्सिङ यहुदिगेलाइ दाङ सवाताता (बिसेसपा इदोइ स्वादतपा,जेदोङ चाहि महत्वपुर्न हिघाहि) सिका सरिरगेलाइ क्रुसता माह्याको दोतेङ बिन्ति पाहि | कालाउ इम्बालाइ खोकोइ थुतेङ इम्बालाइको सरिर चुम्पाको पोतेङ भाग पाहि | 32 कालाउ सिपाहिगेलाइ लोतेङ वाहा दोअ्फा ताङगेलाइको खोकोइ भारि,लाम्फा एमिको उङ्को न्हुसो भेनाङको | 33 जेलाउ इम्बालाइ येसु:कोता लोहि इम्बालाइदोङ तिङहि,कि वाको प्रान लाम्फादोङ जेङका हिघाहि,कालाउ खोकोइ माघुरि | 34 कालाउ सिपाहि तासो एमिदोङ वाको कोखाता भाला बाहि,कालाउ एन्सालाउ हिति कालाउ होहि | 35 नेलाइबुङ खान्धुरि पालि दोसाना दोतेङ एदोइ तिङकालाइ दोङ गवाहि पिका दोङ कालाउ वाको गवाहि सत्य कालाउ जातिङकोङ हि | कालाउ सत्य काथा म्होन्हालि मदावा | 36 'वाको हिदोइबुङ हारा मार्थुसिङ'' दोअ्का धर्म सास्त्तरको बचन पुरा ज्याको दोतेङ एदोइ काथा जेङलि लोका | 37 कालाउ आरोङ भेनेङ थामेता धर्म सास्त्तर दोअ्खे,''ज्यासो हेङ इम्बालाइहेङ बारका हि,इम्बालाइदोङ वासेहेङ खानाङ |'' 38 उङको न्हुसो अरिथियाको योसेफ,ज्या यहुदिगेलाइहेङ थितेङ म्होतेङ येसु:को धन्य हिघाहि,इङ्कोदोङ पिलातसहेङ येसु:को सिका जिउ चुम्पुलि निनाको दोतेङ बिन्ति पाहि | पिलातसदोङ अनुमति पिहि | कालाउ उङ्कोदोङ लोतेङ वाको सिका जिउ सुम्पुहि | 39 कालाउ लाम्फा वाकोता निसिङ लोका निकोदोमस बुङ प्राय सुम ते सुम किलो मुर्रा कालाउ येलोवा मिस्रित द्रब्य चुम्तेङ इन्ता लोहि | 40 एसासि इम्बालाइदोङ येसु:को द्याता यहुदिगेलाइको दफन कार्यको रितिसो बास्नादार द्रब्य दोफा सुतिको धाबाता लुन्धाइतेङ | 41 जेदोङ थामेता येसु:हेङ तोइहि,इन्ता एनोङ बगैचा हिघाहि | बगैचाता एनोङ नावा तोम हिघाहि | हिदोइबुङ दयाङ हेङ हेलाउबुङ लाम्फा इन्ता लिका मान्थु घाहि | 42 दयाङगेलाइ येसु:हेङ इङ्कोङ नावा तोमता ताहि | हाइपालिपानु इङ्को भेर्पाङ हिघाहि | कालाउ यहुदिगेलाइ ताइको माइसाचाका दिना तियारि पालि तेङ्का हिघाहि |