युहन्ना 17

इदोइ काथा दोअ्लि दोअ्तेङ न्हुसो स्वर्गभारि मिसिया तोअ्लितेङ खाङ्हि कालाउ दो:हि,''हे आबा,समय लोलि दोहोइ,नाङ्को चानको महिमा प्रकट पा,कालाउ चान ताइको महिमा प्रकट पाको | 2 हाइपालीपानु ना वासेहेङ गोताङ द्याङ्गेलाइ हुता खाबारा पिका हिना,कालाउ कि वा ना वासेहेङ पिका झाराङ हेङ वा अनन्त जिबन प्याको | 3 एला अनन्त जिबन इदोइ दोङ,कि नेलाइ ना,एनोङ खिनिङ सत्ये परमेस्वरहेङ नालाको,कालाउ ना दिङ्गिल्का येसु:ख्रिस्त हेङ नालाको | 4 जेदोङ कामना केलाइहेङ पिना इङ्को पुरा पालि ना पृथ्विता का महिमित बानाइका हिघा | 5 एला हे आबा,सुमिङको सिर्जनाका खान्तेङ लाम्फाङ नाङ्को आगाता काङ्को जेदोङ महिमा हिघाहि,ओदोङ होइदोङ नालोलाउ कासेहेङ महिमित पा | 6 'जेदोङ द्याङ कासेहेङ ना सुमिङ्सो पिन्हा,इम्बालाइहेङ नाङ्को मि ङकादोङ प्रकट पापिघा | इम्बालाइ नाङ्को द्याङ हिघाहि,कालाउ इम्बालाइ नाङ्को बचन किका हि | 7 नेलाइहेङ एला थाहा जेङ्का हि,किना कासेहेङ पिका गोताङ काथा नाङ्को सोङ लोका हि | 8 हाइपालिदोनु जेदोङ बचन ना कासेहेङ पिन्हा,का इम्बालाइहेङ पिका हिघा,कालाउ इम्बालाइ इङ्को ग्रहन पाका हि | का नाङको सो लोका हिघा दो:का इम्बालाइ जातिङ्कोङ गिकाहि,कालाउ ना कासेहेङ दिङ्गिल्का दोङ दो:तेङ इम्बालाइ खान्धुरिपाका हि | 9 नेलाइको भा:सिङ का दोमचाखाइखा,सुमिङ्को भा:सि ङका दोम माचाखाइखा,भरु नेलाएको भा:सिङ,जाइ हेङ ना कासिहेङ पिका हिना | हाइपालिपानु इम्बालाइ नाङ्को दोङ | 10 काङ्को गोताङ जेदोङ हि नाङ्को दोङ,कालाऊ नाङ्को जेदोङ हि काङ्को दोङ | काङ्को महिमा इम्बालाइता प्रकट जेङ्का हि | 11 'का आरुङ सुमिङ्ता माह्याङ्का,कालाउ इम्बालाइते सुमिङ्ताङ ह्यावा |का चाहि नाङ्को दोफा लोधोङ्खा | हे पबित्तरो आबा,ना कासेहेङ पिका नाङ्को मिङ्ताइम्बालाइहेङ रेम्फा ता,कालाउ इम्बालाइ बुङ केलाइ भाइपाङ एनोङ्दोङ ज्याको | 12 जेलाउ ठेकापा का इम्बालाइ दोफा हिघाखा,ना कासेहेङ पिका नाङ्को मिङ्ता इम्बालाइ हेङ समराइतेङ ताघा |इम्बालाइको सुरक्स्या पाघा |कालाउ इम्बालाइ मध्ये बिनासको चान बाहेक आरु बो हासुबुङ मानासाहि,हाइपालिपानु धर्म सास्त्तर पुरा जेङ्लि गोइका हिघाहि | 13 'एला का नाङ्को दोफा लोदोङ्खा | सुमिङ्ता हिलाउ का इदोइ काथा दो:खा,कि नेलाइकोता काङ्को आनन्द पुरा ज्याको | 14 का इम्बालाइहेङ नाङ्को वचन पिघा, कालाउ सुमिङ इम्बालाइहेङ मन्दा माताहि.हाइपालिपानु इम्बालाइ सुमिङ्को माको, जेसाङ का सुमिङ्को माको | 15 इम्बालाइहेङ ना सुमिङ्सो माचुम्पु दोअ्ते का दोममाचाखा,कालाउ इम्बालाइ हेङ दुस्तसो सुरक्स्या तापिसु| 16 इम्बालाइ सुमिङ्को माको, जेसाङकाबुङ सुमिङ्को माको | 17 इम्बालाइहेङ सत्येता ता पबित्तरो पापि,हाइपालिपानु नाङ्को बचन सत्ये हि | 18 जेसाङ ना कासिहेङ सुमिङ्ता दिङ्गिल्ना,काबुङ नेलाइहेङ सुमिङ्ता दिङ्गिल्का हिघा | 19 नेलाइको भा:सिङ का ताइमिहेङ दोङ पबित्तरो बानाइखा ताकि नेलाइबुङ सत्येता पबित्तरो जेङ्सु | 20 का एबलाइको भा:सिङ दोममापाखा,कालाउ एबलाइको बचन पाहासो काङ्को हुता खान्धुरिपाकालाइको भा:सिङ्बुङ दोम पाखा, 21 नेलाइ झाराङ ए जेङ्सु | हे आबा,जेसाङ ना काङ्को ता हिखेना,कालाउ काबुङ नाङ्कोता हिखा,एसापाङ इम्बालाइबुङ केलाइता ह्याको,कालाउ ना नादोङ कासिहेङ दिङ्गिल्का दो:तेङ सुमिङ खान्धुरि पाको | 22 जेदोङ महिमा ना कासिहेङ पिकाहिना,काबुङ इम्बालाइहेङ पिका हिघा,कालाउ कि केलाइ ए जेङ्का भाइपाङ इम्बालाइबुङ ए ज्याको | 23 का नेलाइकोता,कालाउ ना काङ्कोता,कालाउ इम्बालाइ पुर्न रुपसो ए जेनाको,कालाउ नाकासेहेङ दिङ्गिल्का दो:तेङ,कालाऊ कासिहेङ प्रेम पाका दो:तेङ सुमिङ ग्याको | 24 'आबा,का मन पाखा,कि ना कासेहेङ पिका गेलाइ का जेता हिका काङ्को दोफा ह्याको,कालाउ काङ्को महिमा पिनाको,जेदोङ महिमा,सुमिङ सिरजाइनालि खान्तेङ लाम्फासोङ्दोङ कासेहेङ प्रेम पाकानाङ ना कासेहेङ पिका हिघाखेना | 25 'धार्मिक आबा,सुमिङ नासेहेङ मानाल्खे,कालाउ का चाहि नासेहेङ नाल्खा,कालाउ ना कासेहेङ दिङ्गिल्का दोङ दोअ्तेङ एबालाइ गिखे | 26 का नाङ्को, मिङ एबालाइकोटा प्रकट पाघा,कालाउ नाङ्को मिङ बुङ एबालाइकोता प्रकट पापितेङ ह्याङ्का, कालाउ कि जेदोङ प्रेम कासेहेङ ना प्रेम पान्हा, इङ्को इम्बाइता ह्याको, कालाउ का नेलाइता ह्याङ्का |