युहन्ना 15

'जातिङ्को दाखको सिङ का दोङ,कालाउ काङ्को आबा किसान दोङ हि | 2 काङ्कोता हिका गोताङ डालेङ जाइ फलपाकल मासेपाखे वा इङ्कोहेङ साताइखे कालाउ सेपाका गोताङ डालेङ्गेलाइ झन जेन्जा फलपाकल सेपाको दोअ्तेङ वा साताइखे | 3 नेलाइ दोअ्का काङ्को वचनहोइ नेलाइ लाम्फादोङ सुद्द जेङ्लि दोअ्का हिसुना | 4 काङ्कोता हिसु, कालाउ का नेलाइ दोफा ह्याङ्का | जेसाङ डालेङ दाखको सिङ्ता हिखे इङ्को ताइमिङ फलपाकल सेपालि मादोअ्खे, एन्साङ्पा नेलाइबुङ काङ्कोता माहिसुना पानु नेलाइबुङ मादोस्वना |'' 5 दाखको सिङ का दोङ, नेलाइ चाहि डालेङ्गेलाइदोङ | एदि हासुबुङ काङ्कोता हिखे पानु, कालाउ का इङ्कोता हिहे पानु ,वा जेन्जा फलपाकल सेपावा, हाइपालिपानु कासो खेङ्तेङ् हितेङ नेलाइ हाइदोङ पालि मादोस्वाना | 6 हिदोइबुङ द्याङ काङ्कोता माहिपानु , इङ्को डालेङ भाइपा बाहार थाइगिलाङ, कालाउ इङ्को चुतेङ सेनावा, इन्सिका डालेङ्गेलाइ द्याङ्गेलाइ जाराइगिल्लावा , कालाउ मेता ह्वाता, कालाउ इङ्को ओतेङ बुसिरि जेनावा | 7 नेलाइ काङ्कोता हिसुना पानु, कालाउ काङ्को काथा नेलाइकोता हिहे पानु नेलाइ जेदोङ मन जेङ्खे र्हेसु,कालाउ इङ्को नेलाइको भाअ्सिङ पापियाङ | 8 नेलाइ जेन्जा फलपाकल सेपातेङ काङ्को चत्या जेङ्सु कालाउ प्रमानित पासुना पानु इदोइता काङ्को आबाको महिमा जेनावा | 9 'जेसाङ आबा कासेहेङ प्रेम पाहि, काबुङ नेलाइहेङ प्रेम पाका हि | नेलाइ काङ्को मायाता हिसु | 10 एदि नेलाइ काङ्को आग्या साअ्सुना पानु नेलाइ काङ्को प्रेमता हिस्वाना, जेसाङ काङ्को आबाको आग्यागेलाइ साअ्का हिघा,कालाउ वाको प्रेमता हिखा | 11 का इदोइ काथा नेलाइहेङ ओदोङ भाअ्सिङ दोअ्का हिघा, कि काङ्को आनन्द नेलाइकोता ह्याको,कालाउ नेलाइको आनन्द पोङ्घा तेङ ह्याको | 12 'काङ्को आग्या इदोइ दोङ हि,का नेलाइहेङ जेसाङ प्रेम पाघा,नेलाइबुङ एमिसो भेनेङ्हेङ एन्साङ्दोङ प्रेम पासु | 13 ताइको सानाइतिगेलाइको भाअ्सिङ ताइको प्रान पिलि खान्तेङ बारका प्रेम आरु हासुको बुङ मान्थु | 14 का नेलाइहेङ जेदोङ आग्या पाखा,इङ्को नेलाइ पा:सुना पानु,नेलाइ काङ्को सानाइति दोङ | 15 एलाका नेलाइहेङ चाकारिया मादोताङ्का,हाइपालिदोनु वाको माहाजान हाइ पाखे चाकारिया मागिखे | कालाउ का नेलाइहेङ सानाइति दो:का हिघा,हाइपालिपानु जेदोङ्का काङ्को आबासो हिङ्घा,का इङ्को गोताङ नेलाइहेङ दो:पिघा हिघा | 16 कासेहेङ नेलाइ माचुनिसुना, भुरु कादोङ नेलाइहेङ चुनिघा, कालाउ नियुक्त पाघा, नेलाइ हानिसु, कालाउ फलपाकल सेपासु ,कालाउ नेलाइको फलपाकल हितेङ ह्याको | एसापा नेलाइ आबा दोफा काङ्को मिङ्ता, जेदोङ र्-हेसुवाना, वा नेलाइहेङ इङ्को प्यावा | 17 का नेलाइहेङ इदोइ आग्या पिखा, कि नेलाइ एमि भेनेङ्हेङ प्रेम पासु | 18 एदि सुमिङ नेलाइहेङ मन्दा माताखे पानु , नेलाइ गिसुकि,नेलाइहेङ मन्दा मातालि खानतेङ कासेहेङ मन्दा माताकादोङ | 19 एदि नेलाइ इदोइ सुमिङ्कोङ्नुते सुमि नासेहेङ ताइको दोअ्तेङ माया पाधावा |कालाउ नेलाइ इदोइ सुमिङ्को माको |का नेलाइहेङ सुमिङ्सो साल्घा,ओदोङ भाअ्सिङ सुमिङ नेलाइहेङ मन्दा माताखे | 20 का नेलाइहेङ दोअ्का वचन फोम ताअ्सु, 'चाकारिया साको माझन खान्तेङ बारका माजेङ्खे |'इम्बालाइ कासेहेङ सानताइनु नेलाइहेबुङ सानताइयावा | नेलाइ काङ्को वचन साअ्सुना पानु नेलाइको वचनबुङ कितावा | 21 इम्बालाइ इदोइ गोताङ काथा काङ्को मिङ्को खातिर नेलाइहेङ पावा, हाइपालि दोनु इम्बाइलाइ कासेहेङ दिङ्गिल्काहेङ मानाल्खे | 22 का मालोकानु कालाउ नेलाइहेङ माअ्दोपिनु, नेलाइ पापको दोसि माजेङ्धावा, कालाउ एला का ताइको पापको भाअ्सिङ नेलाइ दोफा काङ्को हाइदोङ बाहाना मान्थु | 23 जाइ कासेहेङ मन्दा माअ्ताखे , वा काङ्को आबाहेङ्बुङ मन्दा माअ्ताखे | 24 एदि बो द्याङ हासुबुङ मापाका काम का ओबालाइको माझाता मापाकानु ओबालाइ पापको दोसि माजेङ्धावा |कालाउ एला इम्बालाइ कासेहेङ कालाउ काङ्को आबा न्हेमिहेङ तिङ्का हि, कालाउबुङ घृना पाका हि | 25 कालाउ व्यवस्थाता लेखेका या बचन पुरा जेङ्लि एसा जेङ्का हिघाहि,'नेलाइ कासिहेङ बिना कारन घृना पासुना |' 26 'जेलाउ सलहाकार ल्वा,जाइहेङ का आबाको तर्फसो नेलाइ कोता पिगिल्याङ्का,माकुनु सत्येको आत्मा,जाइ आबासो ल्वाङ,वादोङ काङ्को बिसयता गवाहि प्याङ | 27 नेलाइ लाम्फासोङ काङ्को दोफा हिनाङ,नेलाइबुङ काङ्को साक्सि हिसुना |''