युहन्ना 12

निस्तार पार्बाको तुनि लाम्फा येसु: बेथानियाता लोका हिघाहि | इन्ता लाजरस हिघाहि, जाइहेङ येसु : सि:कासो सिनुपाका हिघाहि | 2 इम्बालाइ वाको भाअ्सिङ इन्ता दिलिमाको चाका आम्का तियार पाहि | मार्था सेवा पाघाहि, कालाउ लाजरस चाहि वाको दोफा चालि योम्कासो एमि हिघाहि | 3 कालाउ मरियम आधालिटर झोको हेन्जा जाङ्का ताका परिका जट्टा मसिको मालामाला अत्तर चुम्तेङ येसु:को खोकोइता मोपिहि (सोर्ताइ) पिहि, कालाउ वाको खोकोइ पाइताला ताइको पुसुङहोइ योअ्पिहि कालाउ अत्तरको मालामालाकाहोइ सादोङ पोङ्घाहि | 4 कालाउ वाको चात्येगेलाइ मध्येसो एमि वासेहेङ रिम्पालि खाङ्का यहुदा इस्कोरियोत दोअ्हि , 5 “ इदोइ अत्तर सुमसाइ ताका चान्दिको सिक्का पितेङ उङ्को पाइसा गरिबगेलाइहेङ पिलाउ माजेङ्दाङ ?” 6 कालाउ वा गरिबगेलाइको ख्याल पातेङ इदोइ दोअ्का मान्थुघाहि, हाइपालिपानु उङ्को चोर हिघाहि, कालाउ ताकाको थैलि वा ताघाहि,कालाउ इन्तासो खुघाहि | 7 येसु: दोअ्हि, “उङ्कोहेङ हाइदोङ माअ्दोसु , कासेहेङ लिका दिनाको भाअ्सिङ वासेहेङ इङ्को ताअ्लि पि | 8 हाइपालिदोनु गरिबगेलाइ जेलाउबुङ नेलाइदोफा ह्यावा, कालाउ काते नेलाइ दोफा जेलाउबुङ माह्याङ्का |” 9 यहुदिगेलाइको एनोङ बार्का जेरदोङ वा इन्ताङ हि दोअ्का चाल गिहि, कालाउ येसु:को भाअ्सिङ खिनिङ माको, कालाउ वाको सिकासो सिन्हुपाका लाजरसहेङ बुङ खाङ्लि दोअ्ते इम्बालाइ लोका हिघाहि | 10 ओदोङ भाअ्सिङ बारका धामिगेलाइ लाजरसहेबुङ सेअ्लि साल्ला पाहि | 11 हाइपालिदोनु वाकोसोङ यहुदिगेलाइ मध्येसो हेन्जाङ झना खेङ्नातेङ हानिहि येसु:हेङ खान्धुरि पालि तोमका हिघाहि | 12 पार्बाको न्हु दिना येसु: यरुसलेमता ल्वाङ दोअ्का काथा जेरगेलाइ थाहा गिहि, 13 कालाउ द्याङ्गेलाइ नरियालको कालाउ खजुरको दालेङ्गेलाइ चुमातेङ दामाता दा:हि,कालाउ वासिहेङ स्वागत पाहि | 14 कालाउ एनोङ गधाको चान निङ्तेङ येसु: इङ्को धोल्हि, जेसाङ लेखेका हि |'' 15 सियोनको चामिन्दि, माथि | खाङ्सु, नाङ्को राजा गधाको चान हुता सवार जेङ्तेङ लोधोङ्खे |'' 16 वाको चत्यागेलाइ इदोइ काथा लाम्फाङ माबुझिहि | कालाउ येसु:को महिमा जेङ्तेङ इदोइ काथागेलाइ वाको विसयता लेखिका हिघाहि, कालाउ वाको इदोइ कामको भाअ्सिङ इम्बालाइ पाका दोङ दोअ्का इम्बालाइ सम्झिहि | 17 वा लाजरसहेङ तोमसो काइतेङ सि:कासो सिन्हुपालाउ वाको दोफा हिका द्याङ्गेलाइको जेरगेलाइ वाको गवाहि पितेङ दोङ हि | 18 वा इङ्को चिन्ह पाका हिघाहि दोअ्का हिङ्कानाङ बुङ जेर वासेहेङ भेटिलि हानिका हिघाहि | 19 फारिसिगेलाइ जेलाउ एमिसो- भेनेङ्हेङ दोअ्लि तेङ्हि, ''खाङ्सु, नेलाइसो हाइदोङ माजेनाङ | तिङ्सुखेना, सुमिङ्दोङ इङ्कों लेसारा पिताइलिदोहोइ |'' 20 पार्भाता आराधना पालि हानिकालाइ मध्ये आधिमि ग्रिकगेलाइबुङ हिघाहि | 21 इम्बालाइ गालिलको बेथसेदाको द्याङ फिलिपकोता लोतेङ् एसा दोअ्तेङ सेउपाहि ,''आबाउ, केलाइ येसु:हेङ धुसुलि खाङ्नाखे |'' 22 फिलिप हानितेङ अन्द्रियासहेङ दोअ्हि, कालाउ अन्द्रियास कालाउ फिलिप हानितेङ येसुहेङ दोअ्हि | 23 येसु: इम्बालाइहेङ दोअ्हि उत्तारा पीहि,''द्याङ्गेलाइको चानको महिमित जेङ्का समय लोका हि | 24 साचिको, का नेलाइहेङ दोअ्खा, घहमको गेरा मिलिङ्ता बिनातेङ मासिहि पानु इङ्को एकलाङ हिखे | कालाउ इङ्को सिहि पानु इङ्कोदोङ सेका सेपावा | 25 ताइको जिउको माया पाकालाइ इङ्को राम्पावा, कालाउ ताइको जिउहेङ इदोइ सुमिङ्ता हाइदोङ मास्मझ्खे वा चाहि अनन्त जिवनको भाअ्सिङ इङ्को रेम्फा ह्यावा | 26 हासुबुङ काङ्को सेवा पाखे पानु, वा कासेहेङ पिताइयाको कालाउ का जेता हिघा , काङ्को सेवक इन्ता ह्यावा | हासु काङ्को सेवा पानु आबा वाको कदर पावा |'' 27 ' एला काङ्को मन तुली तेङ्होइ ,कालाउ का हाइ दोअ्ली ?''हे आबा, कासेहेङ एदोइ आबास्तासो बान्चिपा ? माको,ओदोङ भाअ्सिङ दोङ का इदोइ आबास्ताता थुकाका हिघा | 28 हे आबा,नाङ्को मिङ्को महिमा पाअ्|'' कालाउ स्वर्गसो इसिका एनोङ गाला लोहि,'' का इङ्को महिमा पाका हिघा, कालाउ आरूङ पाङ्का |'' 29 इनता जाअ्तेङ हिका जेर इङ्को हिङ्तेङ दोअ्हि, इदोइ गड्याङ गुडूङ गालादोङ'' आरुगेलाइ दोअ्हि'' स्वर्गदूत वाको दोफा नुइ धुइका |'' 30 येसु: जोबाफ पिहि, ''या गाला काङ्को भाअ्सिङ माको, भुरु नेलाइको भाअ्सिङदोङ | 31 जेलाउ इदोइ सुमिङ्को न्या निसाब जेनावा या सुमिङ्को सासक बाहार थाइगिल्नाङ | 32 जेलाउ का पृथ्विता तोलिन्हानका,का गोताङ द्याङ्हेङ ताइमिभारि चुमाका |'' 33 वा हेसा स्याङ,इङ्को इसारा पिलि वा एसा दोअ्का हिघाहि | 34 जेरगेलाइ वासिहेङ हि:हि,ख्रिस्त हेलाउलाउबुङ दोका ब्यबस्थासो केलाइ हिङ्का हिनाहि | ना हेसा दोलि दवाना,द्याङ्को चान तोलि न्हालि गोयाङ ? इदोइ द्याङ्को चान चाहि हासु कुनु ?'' 35 येसु:ओबालाइहेङ दोअ्हि झन आसा बेला थेकापा फाइसालामाका नेलाइ दोफा हिपा थिकापा हिगिल्सु, ताकि कितिकितिका होइ नेलाइहेङ माठुमाको | आधिमि कितिकितिकाता हिगिल्नुपानु,वा ताइमि हिसु हानिका थाहा मागिखे | 36 जेलाउ ठेकापा फाइसालामका नेलाइ दोफा हि फाइसालामाकाहेङ खान्धुरि पासु,कालाउ नेलाइ फाइसालामाकाको सान्तान जेङ्सु |'' या काथा दोअ्लि दोअ्तेङ न्हुसो,येसु:इन्तासो हानिहि,कालाउ इम्बालाइसो म्होतेङ हि | 37 वा ओबालाइको आगाता इदोइ झोको चिन्ह गेलाइ पाका हिघाहि,कालाउबुङ ओबालाइ वाको हुता खान्धुरि मापाहि | 38 या आबस्यक हिघाहि,कि यसैया अगमबक्ताको बचन पुरा ज्याको,''हे परमप्रभु,केलाइको बचन हासु खान्धुरि पाहि ? कालाउ परमप्रभुको सरबुङ हासुहेङ प्रकट पापिहि ?'' 39 ओदोङ भाअ्सिङ इम्बालाइ खान्धुरिपालि मादोहि,हाइपलिदोनु यसैया आरुङ एसादोअ्का हि, 40 'वा ओबालाइको मिसियाँ तुपा पिकाहि,कालाउ ओबालाइको हृदय थान्का पापिकाहि,एसापा ओबालाइ मिसियाहोइ मातिनाको,कालाउ हृदयहोइ माबुझ्याको,माकुनुते ओबलाइ घुरियावा कालाउ का ओबालाइ हेङ एल्पालि गोयाङ्का |'' 41 यसैया इदोइ काथा दोअ्लि,हाइपालिपानु वा वाको महिमा तिङ्हि,कालाउ वाको बिसयता दोहि | 42 कालाउबुङ सासकगेलाइ मध्ये हेन्जाङ जोसो वाको दोफा खान्धुरि पाहि,कालाउ फारिसिगेलाइसो थिनाङ ,कालाउ ओबालाइ चाउघारासासो उल्ला पापियाङ दोका थितेङ इङ्को स्विकार मापाहि | 43 हाइपालिदोनु परमेस्वरको बाखानाइ खान्तेङ द्याङ्को बाखानाइ ओबालाइ हेन्जा मन्दाताघाखे | 44 येसु:तिराराइका गालाहोइ दोहि,''कासिहेङ खान्धुरि पाकालाइ कासिहेङ माको,भरु कासिहेङ दिङ्गिल्का हेङ खान्धुरि पाखे | 45 जाइ कासिहेङ तिङ्खे,वा कासिहेङ दिङ्गिल्काहेङ बुङ तिङ्खे | 46 का सुमिङ्को फाइसालामाका जेङ्तेङ लोका हिघा,ताकि कासिहेङ खान्धुरिपाकालाइ कितिकितिकाता मा ह्याको | 47 'हासुबुङ काङ्को बचन हिङ्खेपानु,कालाउ इङ्को पालन मापाहिपानु,का वाको न्याय मापाङ्का | हाइपालिपानु का सुमिङ्को न्यायपालि लोका माको,भरु सुमिङ्हेङ बान्चिपालि लोका हिघा | 48 कासिहेङ मन्दामाताका कालाउ काङ्को ग्रहन मापाका को भाअ्सिङ एनोङ न्यायधिस हि | जेदोङ बचनका बानालपाघा ओदोङ्दोङ अन्तको दिनाता वाको न्याय जेनावा | 49 हाइपालिदोनु का ताइकोङ तर्फसो बानाल मापाघा,कालाउ का हाइ धुइलि गोइका हि, कासेहेङ दिङ्गिल्का आबा ताइमिङ कासेहेङ आग्या पिकाहि | 50 का गिखा कि,वाको आग्या अनन्त जिबनदोङ हि | ओदोङ भाअ्सिङ्का जेदोङ धुइखा,आबादोङ कासेहेङ दोअ्का आन्सार धुइखा |''