युहन्ना 11

लाजरस मिङ्को एमि द्याङ मासाधेका जेङ्का हिघाहि, उङ्को मरियम कालाउ वाको बाइ मार्थाको डेरा बेथानियाता हिघाहि | 2 प्रभुहेङ उत्तर मोपितेङ वाको पाइतालाता ताइको पुसुङ्होइ योपिका मरियम इदोइदोङ हिघाहि | याकोङ ओने लाजरस मासाधेका हिघाहि | 3 उधिन्हेमि बाइ ओने येसु:कोता एसा दोअ्तेङ बानाल पिगिल्हि, “ प्रभु, जाइहेङ ना माया पाखेना,उङ्कोहेङ मिसा लोका हि | 4 कालाउ इदोइ हिङ्तेङ येसु: दोअ्हि, “इदोइ मिसाहोइ सि:का माचमाङ ,कालाउ या परमेस्वरको महिमाको भाअ्सिङ हि, ता कि इदोइपाहासो परमेस्वरको चानको महिमा ज्याको |” 5 येसु: मार्था, कालाउ वाको ओने लाजरसहेङ माया पाघाहि | 6 कालाउबुङ लाजरस मासाधिका हि दोअ्का हिङ्तेङ वा जेता हिघाहि आरोङ झन न्हेनि थेकापा इन्ताङ हि | 7 उङ्को न्हुसो वा चात्यागेलाइहेङ दोअ्हि, “ते, एला केलाइ आरोङ यहुदिया घुरितेङ हानाइने |” 8 चात्यागेलाइ वासेहेङ दोअ्हि, “रब्बि एनाङ खिनिङ यहुदिगेलाइ नासेहेङ उन्थुइहोइ तोलि खाङ्घाहि, कालाउ हाइ आरोङ ना इन्ताङ हानाना ?” 9 येसु: उत्तर पिहि, “ हाइ दिनाता ते-न्हे घानता मान्थुखेरो ? कालाउ दिनाता हिगिल्कालाइ माबोखे खे, हाइपालिदोनु उङ्को इदोइ सुमिङ्को फाइसालामका तिङ्खे, 10 कालाउ न्हिसिन्ता हिगिल्कालाइ बोखे खे, हाइपालिदोनु उङ्को द्याङ्कोता फाइसालामका मान्थुखे |” 11 इङ्को न्हुसो वा इम्बालाइहेङ दोअ्हि, “केलाइको सानाइति लाजरस निन्द्राता परिका हि, कालाउ उङ्कोहेङ ल्होपालिका का इन्ता हानाङ्का |” 12 चात्यागेलाइ वासेहेङ दोअ्हि, “प्रभु उङ्को निन्द्राता परिकाहि पानु उङ्को एलाङ |” 13 येसु: उङ्कोको सि:का बिसयता दोअ्का हिघाहि,कालाउ इम्बालाइ निन्द्रा लोका काथाको बिसयता निन्दा धुलाका खिनिङ काथा वाला दोअ्घाखे | 14 येसु: इम्बालाइहेङ झालाझालापा दोअ्पिहि, “लाजार सि:का हि | 15 नेलाइ खन्धुरि पासु दोअ्तेङ नेलाइको भाअ्सिङ का इन्ता माहिकाता खु:सि हिघा जेदोङ जेङ्लाउबुङ केलाइ वाकोता हानाइने |” 16 कालाउ दिदुमस दोका थोमाबुङ ताइको सानाइति चात्यागेलाइ दोअ्हि, “ ते केलाइबुङ हानाइने, कालाउ वा दोफा सि:याइने |” 17 जेलाउ येसु:लोहि, कालाउ लाजरसहेङ तोम्ता ताअ्का द्यानि जेङ्का थाहा गिहि | 18 बेथानिया यरुसलेमसो भेर्पाङ सुम किलोमिटर दुरेता हिघाहि | 19 हेन्जाङ यहुदिगेलाइ मार्था कालाउ मरियमकोता वाको ओनेको बिसयता इम्बालाइहेङ सम्झालाइलि लोका हिघाहि | 20 येसु:लोकाताङ पाका हिघाहि दोअ्का हिङ्तेङ मार्था हानिहि कालाउ वासेहेङ दामाता दुसुहि | कालाउ मरियम चाहि साताङ योमतेङ हि | 21 कालाउ मार्था येसु:हेङ दोअ्हि, “प्रभु, ना इता हिनु ते काङ्को ओने मासिधाङ | 22 कालाउ एलाबुङ का गिखा, ना जेदोङ परमेस्वर दोफा ह्रेखेना,परमेस्वर नासेहेङ पिखे |” 23 येसु: वासेहेङ दोअ्हि, “नाङ्को ओने आरोङ सिनुताङ |” 24 मार्था वासेहेङ दोअ्हि, “का गिखा, वा इङ्को आन्तिमको दिनाको पुनारुत्थानता आरोङ सिनुतेङ ल्होकाङ |” 25 येसु: वासेहेङ दोअ्हि, “पुनारुत्थानता कालाउ जिवन कादोङ | कासेहेङ खान्धुरि पाकालाइ सि:लाउबुङ सिनुहुताङ | 26 कालाउ ज्याइका कालाउ का हुसो खान्धुरि पाका हासुबुङ हेलाउबुङ मास्याङ | हाइ ना इदोइ खान्धुरि पाना ?” 27 वा वासेहेङ दोअ्हि, “ खाङ प्रभु, का खान्धुरि पाखा, ना सुमिङता लोका ख्रिस्ट, परमेस्वर चान हिना |” 28 एसा दोअ्तेङ वा हानिहि, कालाउ ताइको ओने मरियमहेङ काइतेङ सिकापा दोअ्हि, “गुरु जि लोहोइ, कालाउ कासेहेङ काइखे |” 29 इदेइ हिङ्तेङ मरियम जुरुक्पा ल्होतेङ ओकोता हानिहि | 30 उङ्को बेला थेकाकापा येसु: देराता थुकालि लोका मान्थुघाहि, कालाउ वा इङ्को थामेता हिघाहि जेता मार्था वासेहेङ दुसुका मान्थुघाहि | 31 साता वासेहेङ सम्झाइलि लोका दिना यहुदिगेलाइ मरियम जुरुक्पा ल्होतेङ बाहार हानिका तिङ्तेङ, वा इङ्को तोम्ता खार्लि हनिकाबे दोअ्तेङ, वाको न्हु-न्हु हानिहि | 32 जेलाउ मरियम येसु: हिका थामेता थुकाल्हाहि कालाउ वासेहेङ तिङ्हि, कलाउ एसा दोकाताङ वा वाको खोकोइता तुघुरतेङ दोअ्हि,''हे प्रभु, ना इता हिनुते काङ्को ओने मासिधाङ |” 33 जेलाउ येसु: उङ्कोहेङ खार्तेङ हिका कालाउ उङको दोफा लोका यहुदिगेलाइबुङ खार्तेङ हिका तिङ्हि, कालाउ वाको आत्माता हेङ्जाङ व्याकुल जेङ्तेङ कालाउ हेङ्जाङ दु:खि जेङ्हि | 34 वा इम्बालाइहेङ हिअ्हि, “नेलाइ वासेहेङ हिसो ताअ्का हिस इम्बालाइ वासेहेङ दोअ्हि, “प्रभु, लोतेङ खाङ |” 35 येसु: खार्र्हि | 36 ओदोङ भाअ्सिङ यहुदिगेलाइ दोअ्हि, “खाङ, वादोङ उङ्कोहेङ हेथे माया पाघाखे |” 37 कालाउ आधिमी दोअ्हि, “ हाइ कान्हाको मिसिया तिम्पाका वा इदोइ द्याङहेङ्बुङ सि:कासो बान्चिपालि माद्वारो  ?” 38 कालाउ येसु: आरोङ मेनाङ व्याकुल जेङ्तेङ तोम्ता हानिहि | इङ्को तोम एनोङ घोपाता हिघाहि | इनता नुइ एनोङ बार्का उन्थुइहोइ एरेका हिघाहि |” 39 येसु: दोअ्हि, “ उन्थुइ लापासु |” सि:का द्याङ्को बाइ मार्था वासेहेङ दोअ्हि,'' हे प्रभु, एला थेकापाते न्हाम्लि दोहोइ वाला हाइपालिपानु उङ्को सि:का द्यानि जेङ्होइ |” 40 येसु: उङ्कोहेङ दोअ्हि, “ हाइ का नासेहेङ दोअ्का माको, 'ना खान्धुरि पान्हा पानु परमेस्वरको महिमा तिनाना '?” 41 इम्बालाइ उन्थुइ लापाहि, कालाउ येसु: ह्रुसो म्हाल्तेङ दोअ्हि, “हे आबा, का नासेहेङ धन्यवाद पिखा, हाइपालिपानु ना काङ्को सेउपाका हिङ्ना | 42 का गिघाखा कि हाइपालिपानु ना काङ्को सेउपाका हेलाउबुङ हिङ्खेना | कालाउ इता जातेङ हिका गुलसुमुल्सुपा हिकाको भाअ्सिङ का इदोइ दोअ्का हिघा , ताकि कि ना कासेहेङ दिङ्गिल्का दोङ दोअ्तेङ इम्बालाइको खान्धुरि ज्याको |” 43 कालाउ इदोइ काथा दोअ्लि दोतेङ न्हुसो वा बारका गालासो ह्रिकाइहि, “लाजरस, बाहार ओलितेङ लोओउ |” 44 उङ्को सि:का द्याङ वाको खुर- खोकोइ जिङ्न्हाकाङ कालाउ वाको ह्राइ धावाओइ लुन्धाइनाकाङ बाहार ओलितोङ लोहि | येसु: इम्बालाइहेङ दोअ्हि, “ उङ्कोको मान्चाउलि खाइपिसु, कालाउ उङ्कोहेङ हानिलि पिसु |” 45 मरियमकोता लोका हेन्जाङ यहुदिगेलाइ येसु: को पाका काम तिङ्तेङ वासेहेङ खान्धुरि पाहि | 46 कालाउबुङ इम्बालाइसो आधिमि द्याङ फरिसिगेलाइकोता हानिहि, कालाउ येसु:को पाका कामगेलाइ दोअ्पिहि | 47 कालाउ बारका धामिगेलाइ कालाउ माहासभाउको सदयस्यगेलाइ काइतेङ उङकोहे दोअ्हि , “एला केलाइ हाइपाइने ? हाइपालिदोनु इदोइ द्याङते हेन्साङ चिन्हागेलाइ पातेङ हि | 48 यासेहेङ इन्साङ लाप्याङ पानु झाराङ याको हुसो कान्धुरि पाङ कालाउ रोमिगेलाइ लोतेङ केलाइको पबित्तरोथामे कालाउ केलाइ जाति न्हेमिहेङ नासा पावा |” 49 कालाउ इम्बालाइमध्ये एमि, कैयाफा जाइ इदोइ बासारको प्रधान धामि हिघाहि वा इम्बालाइहेङ दोअ्हि, “नेलाइ हाइदोङ मागिसुखेना ! 50 गोताङ सारभि नासा जेङ्का खाङ्तेङ जनताको भाअ्सिङ एमि द्याङ् सि:काता नेलाइको कल्यान हि दोअ्तेङ नेलाइ माबुझिसुखेना ?” 51 इदोइ वा वाकोसोङ दोअ्का मान्थुघाहि कालाउ इङ्को बासारको प्रधान धामि जेङ्कानाङ सारभिको भाअ्सिङ येसु: सि:लिगोयाङ दोअ्का अगमबानि धुइका हिघाहि | 52 सारभिको भाअ्सिङ खिनिङ वा दोअ्का मान्थुघाहि, कालाउ चारबिराइतेङ हिका परमेस्वरको सन्तानहेङ एदोफाङ जोम्पालिको भाअ्सिङ इदोइ दोअ्का हिघाहि | 53 ओदोङ भाअ्सिङ इङ्को दिनासो इम्बालाइ वासेहेङ से:लि साल्ला पाका हिघाहि | 54 ओदोङ भाअ्सिङ येसु: आरोङ यहुदिगेलाइको माझाता आगा-आगा माहिगिल घाहि,कालाउ इन्तासो उदाडाङ्का थामेको भेर्पाङ हिका एफ्राइम दोअ्का सहारता हानिहि, कालाउ इन्ता चत्यागेलाइदोफा हि | 55 यहुदिगेलाइको निस्तार पार्बा भेरपाङ लोका हिघाहि कालाउ देरा-देरासो हेन्जाङ द्याङ्गेलाइ ता-ताइमिहेङ सुद्द बानाइलि दोअ्तेङ निस्तार पार्बा लोका खाङ्तेङ लाम्फा यरुसेलेमता हानिहि | 56 कालाउ इम्बालाइ येसु: भोहि, कालाउ इम्बालाइ मुन्दिरता लोका बेला एदोफापा दोअ्लितेङ्हि, “ नेलाइहेङ हिस्का लागिखे, हाइ वा पार्बाता लावा ?” 57 प्रधान धामिगेलाइ कालाउ फरिसिगेलाइ येसु:हेङ रिम्लि वा हिसो हि दोअ्तेङ हासुबुङ थाहा हि दोअ्का गिनु बानाल पिलि दोतेङ आदेस पाका हिघाहि |