युहन्ना 10

येसु: दोअ्हि, “का नेलाइहेङ जातिङ् भारि दोअ्खा जेलाउ हिदोइबुङ एलोङ द्याङ भेडामेसा साता दुल्खे, उङ्को द्वारसो दुल्खे | एदि उङ्को भेनेङ पाहासो दुल्खे पानु उङ्को खुका द्याङ चोर कालाउ दाकु | 2 कालाउ हिदोइबुङ द्याङ द्वार हितेङ पिसालता दुल्खे कालाउ वा गोठालादोङ | 3 जाइ द्वारको रेख-देख पाखे वादोङ गोठालाको भाअ्सिङ द्वार हिखे, कालाउ भेडाबुङ वाको काथा हिङ्खे, गोठालागेलाइ ओबाइको मिङ र्-हुतेङ काइयावा भेडामेसागेलाइबुङ पिसाल बाहार ओलिखे | 4 गोठालादोङ गोतेङ भेडागेलाइ बाहार ओलिपाखे कालाउ वा झाराङको लाङ् हानिखे इम्बालाइको अगुवा पाखे | भेडामेसा गेलाइ वाकोङ न्हु-न्हु हानिखे हाइपालिदोनु इम्बालाइ वाको गाला नाल्खे | 5 भेडामेसागेलाइ मानाल्का द्याङ्गेलाइको न्हु-न्हु मानिखे ,इम्बालाइ मानाल्का द्याङसो दुरे खाअ्खे, हाइपालिदोनु इम्बालाइ वाको गाला मानाल्खे |” 6 एसापा येसु: द्याङ्गेलाइ एनोङ काथाङ हिङ्पाखे, कालाउ इङ्को काथाको माने हाइकोनु इम्बालाइ माबुझिखे | 7 येसु: आरोङ दोअ्हि, “का जातिङ्भारि दोअ्खा , का भेडामेसागेलाइको भाअ्सिङ द्वार का | 8 जाइ का खान्तेङ लाङ्फा लोहि, इम्बालाइ झाराङ खुकागेलाइ कालाउ डाकागेलाइ, भेडा इम्बालाइहेङ मारेसिहि | 9 का द्वार दोङ जेदोङ द्याङ काङ्को सो दुल्खे वा बान्चायाङ उङको द्याङ लिता लोलि कालाउ बाहार हानिलि जोग्य जेनाङ | वा गोइका जेथे गोतेङ काथागेलाइ निनाङ | 10 एलोङ चोर खुलि, सेअ्लि कालाउ नासापालि खिनिङ लोखे, कालाउ का जिवन दान पिलिलोघा इन्सिका जिवन पुर्न कालाउ असल हि | 11 “का असल गोठाला असल गोठालोदोङ ताइको भेडामेसाको भाअ्सिङ ताइको प्रान अर्पन पाखे | 12 ताका पितेङ ताअ्का काम पाका कालाउ ख़ास गोठालाता भेनाङ जेङ्नाखे दोरमा पितेङ ताअ्का गोठालागेलाइको ताइको भेडामेसा मान्थुखे | जेलाउ वा ब्वासो तिङ्खे, वा भेडामेसाहेङ लाअ्तेङ खाअ्खे , कालाउ ब्वासो भेडामेसाहेङ झामिरितेङ भेडामेसाको हान्जाहेङ उधेरपाखे | 13 हाइपालिदोनु वा दोरमाता ताका द्याङ ओदोङ भाअ्सिङ खाअ्खे ,वा भेडामेसाको हाइदोङ मातलब मापाखे | 14 “ का असल गोठाला का ताइको भेडामेसाहेङ नाल्खा, कालाउ काङ्को भेडामेसा कासेहेङ नाल्खे | 15 जेसाङ आबा कासेहेङ नाल्खे, का आबाहेङ नाल्खा, कालाउ का भेडामेसागेलाइको भाअ्सिङ ताइको प्रान पिखा | 16 “काङ्को आरोङ्बुङ भेडामेसा हि, जाइ इदोइ पिसालको माको | इम्बालाइहेङ्बुङ का चुमालि गोइका हि, कालाउ इम्बालाइ काङ्को गाला हिनावा, कालाउ इम्बालाइ एनोङ्दोङ हान्जा जेनावा, कालाउ एनोङ गोथाला जेनावा | 17 आबा कासेहेङ ओदोङ भाअ्सिङ माया पाखे, हाइपालिपानु का ताइको प्रान पिलि तियार हिघा ताकि का आरोङ काङ्को प्रान घुरिपाका हिसाबसो अर्पन पाखा | 18 हासुबुङ काङ्कोसो काङ्को प्रान ह्रुलि मादाङ, कालाउ का ताइको जिवन ताइको इच्सा सो ताइको प्रान प्याङ्का | काङ्को ताइको प्रान पिलि खाबारा का दोफा हि, कालाउ आरोङ र्हुली खाबाराबुङ का दोफा हि, इङ्को आग्या का काङ्को आबासो निङ्का हिघा |” 19 इदोइ वचनको भाअ्सिङ यहुदिगेलाइता आरोङ मन खुलदुलि जेङ्हि | 20 इम्बालाइ मध्यसो हेन्जाङ्दोङ द्याङ्गेलाइ दोअ्घाहि, “यासेहेङ भुत धेल्का हि, कालाउ या पागालाजेङ्का हि, नेलाइ याको काथा हाइपालि हिङ्सुखेना ?” 21 भेनेङ द्याङ्गेलाइ दोअ्घाहि, “ भुत धेल्का द्याङ्को काथा इस्का माजेङ्खे | हाइ भुत कान्हाको मिसिया तिङ्पालि दोखे रो ?” 22 यरुसेलेमता परमेस्वरको मुन्दिरको समर्पनको पार्वा हिघाहि | 23 इदोइ चुङ दिन्को बेला हिघाहि,येसु: मुन्दिरलिता सोलोमनको दलानता टुघ्रेरतेङ हिघाहि | 24 यहुदिगेलाइ वाको कोरपाहाङ जोम्तेङ हिअ्हि, “हेलाउ थेकापा ना केलाइहेङ इसुना-असो बानाइतेङ ताताना ?” ना ख्रिस्ट दोङ जेङ्नु केलाइहेङ झालाझालापा दोअ्पि |” 25 येसु: इम्बालाइहेङ उत्तरा पिहि,“का नेलाइहेङ दोअ्लि दोअ्का हिघा, कालाउ नेलाइ खान्धुरि, मापासुखेना | काङ्को आबाको मिङ्ता जेदोङ काम का पाखा, वादोङ काङ्को गवाहि पिखे | 26 कालाउ नेलाइ खान्धुरि मापासुखेना, हाइपालिदोनु नेलाइ काङ्को भेडामध्येसो माको | 27 “काङ्को भेडागेलाइ काङ्को धुइका गाला हिङ्खे कालाउ इम्बालाइहेङ का नाल्खा, कालाउ इम्बालाइ काङ्को न्हु-न्हु लोखे | 28 इम्बालाइहेङ का अनन्त जिवन पिखा, कालाउ इम्बालाइ हेलाउबुङ नासा माजेनाङ, कालाउ हासुबुङ इम्बालाइहेङ काङ्को खुरसो घिङ्तेङ चुम्पुलि माद्वाङ | 29 काङ्को आबा इङ्को कासेहेङ पिका हि, वा झाराङ खाङ्तेङ माहान हि, आबाको खुरसो हासुबुङ इम्बालाइहेङ घिङ्तेङ माचुम्पाङ | 30 आबा कालाउ का एनोङ्दोङ हिनाहि |” 31 यहुदिगेलाइ वासेहेङ उनठुइ तोअ्काइने दोतेङ आरोङ उन्ठुइ तोलिहि | 32 येसु: इम्बालाइहेङ दोअ्हि, “का नेलाइहेङ काङ्को आबासो हेन्जाङ असल काम तिम्पाघा, इङको मध्येसो हिदोइ कामको भाअ्सिङ नेलाइ कासेहेङ उन्ठुइ तोलि खाङ्सुखेना ?” 33 यहुदिगेलाइ वासेहेङ उत्तरा पिहि,“असल कामको भाअ्सिङ केलाइ नासेहेङ उन्ठुइ मातोकाङ, कालाउ इस्वर निन्दा पानाङ , हाइपालिपानु ना द्याङ जेङ्तेबुङ ताइमिहेङ परमेस्वर भाइपाखेना | 34 येसु: इम्बालाइहेङ उत्तरा पिहि,“ हाइ नेलाइको व्यवस्थाता इसिका लेखिका मान्थु, 'का दोअ्घा, नेलाइ दिरगेलाइदोङ ? 35 एदि जाइ दोफा परमेस्वरको वचन लोहि, इम्बालाइ दिरगेलाइ दोअ्नाङ दोहि (धर्मसास्तर मारेम्का जेङ्लि मादाङ,) 36 आबा पबितरो बानाइतेङ सुमिङ्ता दिङ्गिल्का द्याङ, का परमेस्वरको चान दोअ्लाउ हेसा इस्वर निन्दा जेनावाङ ? 37 एदि का आबाको काम पाका मान्थुघा पानु का ह्रुसो खान्धुरि मापासु | 38 कालाउ एदि का आबाको काम पानु कालाउबुङ नेलाइ का ह्रुसो खान्धुरि मापासुखेना पानु इदोइ कामगेलाइ हुता खान्धुरि पासु, कालाउ नेलाइ थाहा निङ्लि दोस्वाना कालाउ बुझिस्वाना, कि आबा काङ्कोता हि, कालाउ का आबा दोफा हिघा | 39 इम्बालाइ आरोङ वासेहेङ रिम्लि भोखे,कालाउ वा इम्बालाइको खुरसो खाहि | 40 कालाउ वा आरोङ यर्दन ओदोइ पार इङ्को थामेता हानिहि, जेता यु:हान्ना लाम्फा बत्तिस्ता पिका थामे हिघाहि, कालाउ वा इन्ता हि | 41 हेन्जाङ द्याङ्गेलाइ वाकोतालोहि, कालाउ इम्बालाइ दोअ्हि,“यु:हान्ना हिदोइबुङ चिन्हागेला मापाहि, कालाउबुङ यु:हान्ना इङ्को बिसायता जे जति दोअ्का हिघाहि इङ्को सत्ये हिघाहि |” 42 कालाउ इन्ता हेन्जा वा ह्रुसो खान्धुरि पाहि |