युहन्ना 8

कालाउ येसु: जैतुन तिकार्ता हानिहि | 2 वा एह्रिमाङ आरोङ मुन्दिरको सा हानिहि ,कालाउ झाराङ द्याङ्गेलाइ वाकोता लोहि, कालाउ वा योम्हि, कालाउ इम्बालाइहेङ सिक्स्या पिहि | 3 सास्तिरि कालाउ फारिसिगेलाइ कासिबिरिता रिमनिन्चाका एलोङ बेबालहेङ चुमाहि, वासेहेङ झाराङ्को माझाता जाअ्पाहि | 4 इम्बालाइ वासेहेङ दोअ्हि, “ गुरु ज्यू, इदोइ बेबाल कासिबेरि कामता रिमनिन्चाहि | 5 व्यवस्थाता मोसा इस्कालाहेङ उन्थुहोइ तोलि केलाइहेङ आग्या पिका हि |ना याको काथाको बारेता हाइ दोअ्ताना ?” 6 कालाउ इम्बालाइ वासिहेङ जाचिलिको भाअ्सिङ, कालाउ वाको हुता दोसिलि द्वाङ्बे कि दोअ्तेङ इनसा दोअ्का हिघाहि | येसु: तुघुरतेङ भोनोइता आङ्गुलिओइ लेखेहि |” 7 कालाउबुङ ,जेलाउ इम्बालाइ वासेहेङ हितेङ्साङ हि, कालाउ वा जातेङ इम्बालाइहेङ दोअ्हि | '' नेलाइता हासुकोता पाप मान्थु, उङ्कोदोङ इदोइ बेबालाहेङ लाम्फा उन्थुइ तोकाको |” 8 कालाउ आरोङ तुघुरतेङ वा भोनोइता आङ्गुलिओइ लिखीहि | 9 कालाउ जेलाउ इम्बाइलाइ यिदोइ हिङ्हि, कालाउ बार्कासो सुरुपातेङ म्हुइका थिकापा एमि-एमि पातेङ हानिहि, कालाउ येसु: उङ्को बेबालदोफा एकलाङ हिन्दि हि , कालाउ उङ्को बेबाल चाहि वाको आगाता जातेङ हि | 10 येसु:दोङ उङको बेबालहेङ दोअ्हि,''एइ बेबाल,इम्बालाइ हिसो हानिहि ? हाइ हासुबुङ नासेहेङ मादानाइ हि ? 11 उङ्को बेबाल दोअ्हि,'' प्रभु, हासुबुङ मापिहि |”येसु: दोअ्हि, ''काबुङ नासेहेङ दण्ड माप्याङ्का |हाने, कालाउ आरोङ पाप काम मापा |” 12 येसु: आरोङ इम्बालाइहेङ दोअ्हि,“का सुमिङ्को फाइसालाम्का | कासेहेङ पिताइकालाइ कितिकितिकाता माहिगिललाङ, कालाउ उङ्को जिवनको फाइसालामका निनाङ |” 13 कालाउ फारिसिगेलाइ वासेहेङ दोअ्हि,“ना ताइको बिसयता गवाहि पितेङ हिना | नाङ्को गवाहि सत्ये माजेनाङ |” 14 येसु: उत्तरा पिहि,'''का ताइको बिसयता गवाहि पिखा, कालाउबुङ काङ्को गवाहि सत्ये हि | का गिखा ,का हितासो लोका, कालाउ का हिसो हानिदोङ्खा | कालाउ नेलाइ मागिसुखेना, का हेता लोखा,याते हिसो हानिदोङ्खा | 15 नेलाइ मानिमुइ ( मानव) नजरसो न्या पासुखेना का हासुकोबुङ न्य मापाङ्का | 16 का न्या पालाबुङ, काङ्को निसाब सत्येदोङ थोहरियावा | हाइपालिदोनु निसाब पाका का एक्लाङ मान्थुघा, कालाउ का हिघा, कालाउ कासेहेङ दिङ्गिल्का ह्रुताको आबबुङ्हि | 17 नेलाइको ब्यावस्थाताबुङ न्हेमि द्याङ्को गवाहि सत्येदोङ थोहरियावा दोअ्तेङ लेखेका हि | 18 ताइको बिसयता का तामिमिङ गवाहि पिखा कालाउ कासेहेङ दिङ्गिल्का ह्रुताको आबाबुङ काङ्को बिसयता गबाहि पिखे |” 19 इम्बालाइ वासेहेङ दोअ्हि, “ नाङ्को आबा हिसो हि ?”येसु: उत्तारा पिहि, ''नेलाइ नाते कासेहेङ नाल्सुखेना ना काङ्को आबाहेङ , नेलाइ कासेहेङ नाल्कानु काङ्को आबा हेङ्बुङ नाल्सुधाना |” 20 यिदोइ काथा वा मुन्दिरता सिक्स्या पिलाउ दानपिका भाकार (भण्डारे) भेर्पा दोकाताङ |कालाउ हासुदोङ वासेहेङ मारिम्हि, हाइपालिदोनु वाको दिना आरोबुङ लोका मान्थुघाहि | 21 वा आरोङ इम्बालाइहेङ दोअ्हि,“ का हानाङ्का, कालाउ नेलाइ कासेहेङ भोस्वाना , कालाउ नेलाइ ताइको पापता सि:स्वाना |जेता का हानिखा, नेलाइ लोलि मादोसुवाना |” 22 याहुदिगेलाइ दोअ्हि, “या द्याङ्ते दिहा होमतेङ कि स्याङ्ना हाइको ? हाइपालिदोनु याते 'का जेताका हानिखा नेलाइ लोलि मादोस्वाना' दोअ्तेङ दोअ्खे |” 23 कालाउ वा इम्बालाहेङ दोअ्हि, “नेलाइ लेताको, का ह्रुताको नेलाइ इदोइ सुमिङ्को |का यिदोइ सुमिङ्को माको | 24 कादोङ नेलाइहेङ दोअ्घा, 'नेलाइ ताइको पापता सि:स्वाना', हाइपालिदोनु का वादोङ दोअ्तेङ नेलाइ खान्धुरि मापास्वाना पानु ताइको पापता सि:स्वाना |” 25 इम्बालाइ वासेहेङ हिअ्हि, “ना हासु कुनु ?” येसु: इम्बालाइहेङ दोअ्हि, “का वादोङ, जेदोङ का नेलाइहेङ सुरुसोङ दोअ्दोङ्खा | 26 कादोङ नेलाइको बिसयता दोअ्लि कालाउ निसाप पालि हेन्जाङ्दोङ हि |कालाउ कासेहेङ दिङ्गिल्का सत्ये हि, कालाउ वाकोसो का जेदोङ हिङ्घा इङ्कोङ काथा का सुमिङ्हेङ दोखा |” 27 आबाको बिसयता वादोङ दोअ्का-हि दोअ्तेङ इम्बालाइ माबुझिहि | 28 ओदोङ भाअ्सिङ येसु: दोअ्हि, “जेलाउ नेलाइहेङ द्याङ्को चानहेङ ह्रुता तोलिस्वाना, का वाआङ्दोङ दोअ्तेङ नेलाइदोङ थाहा गिसुवाना, कालाउ का ताइकोङ खाबाराता हाइदोङ मापाङ्का,कालाउ आबा धिर्पाका काथागेलाइ धुइखा दोअ्तेङ गिसुवाना | 29 कासेहेङ दिङ्गिल्का का दोफा हि,वादोङ कासेहेङ एकालाङ लाधिका मान्थु, हाइपालिदोनु का दिनाङ वासेहेङ खु:सि बानाइका काम पाखा |” 30 वा इदोइ काथा दोअ्काताङ पालाउ हेन्जाङ वाको ह्रुसो खान्धुरि पाहि | 31 येसु: ताइह्रुसो खान्धुरि पाका येहुदिगेलाइहेङ दोअ्हि, “नेलाइ काङ्को बचानता हिसुना पानु नेलाइ जातिङ्को काङ्को चात्यादोङ | 32 कालाउ नेलाइदोङ सत्ये हाइ दोअ्तेङ गिसुवाना, कालाउ सत्येहोइ नेलाइहेङ स्वतन्तरो बानायाङ |” 33 इम्बालाइ वासेहेङ उत्तरा पिहि,''केलाइ आब्रहामको सतान्दोङ कालाउ एला थिकापा हासुकोङ्बुङ खाबाराता हिका मान्थुन्हाहि | ' नेलाइ स्वतन्तरो जेनाङ दोअ्तेङ हेसा दोसुखेना ?” 34 येसु:इम्बालाइहेङ उत्तरा पिहि,''जातिङ्को, का नेलाइहेङ दोअ्खा, पाप पाकालाइ झाराङ पापको बानधाइतिदोङ | 35 बानधाइति जेलाउबुङ साता माहिखे, कालाउ चान जेलाउबुङ साता हिखे | 36 ओदोङ भाअ्सिङ चान नेलाइहेङ स्वतन्तरो पाहि दोअ्नु नेलाइ जातिङ भारि स्वतन्तरो जेङ्स्वाना | 37 का गिखा, नेलाइ आब्राहामको सतानदोङ | कालाउ नेलाइ कासेहेङ सेअ्लि भोसुखेना, हाइपालिदोनु काङ्को वचनको कारनसो नेलाइता थामे मानिङ्सुवाना | 38 जेदोङ-जेदोङ का काङ्को आबा लोकाता तिङ्का हिघा, इङ्कोङ का दोअ्खा | नेलाइबुङ जेदोङ नेलाइको आबासो हिङ्का हिसुना, ओदोङ पासुखेना |” 39 इम्बालाइ वासेसेङ दोअ्हि, “केलाइको आबाते आब्राहामदोङ येसु: इम्बालाइहेङ दोअ्हि, “नेलाइ आब्राहामको सन्तान दोङ्कुनुते,आब्राहाम जेदोङ काम पाहि ओदोङ पासुध्वाना | 40 कादोङ परमेस्वरसो हिअ्का, “सत्ये नेलाइहेङ दोअ्का हिघा, कालाउ एला नेलाइ कासेहेङ सेअ्लि खाङ्सुखेना , आब्राहाम इस्का काम मापाहि | 41 नेलाइको आबा जेदोङ पाहि नेलाइ ओदोङ काम पासुखेना |”इम्बालाइ वासेहेङ दोअ्हि, “केलाइ लेसाइकासो जोलोम जेङ्का माको ! नेलाइको आबा एनोङ्दोङ हि, वा परमेस्वर हिकाहि |” 42 येसु: इम्बालाइहेङ दोअ्हि, “परमेस्वर नेलाइको आबा हिका हिनुते नेलाइ कासेहेङ प्रेम पाधोस्वाना, हाइपालिदोनु का परमेस्वरसो ओल्हितेङ लोघा |का ताइकोङ इच्सासो लोका माको, कालाउ वा कासेहेङ दिङ्गिल्हि |” 43 कादोङ, दोअ्का नेलाइ हाइपालि माबुझिसुखेना ? हाइपालिदोनु नेलाइ काङ्को बचन हिङ्लि मादोस्वाना | 44 नेलाइ ताइको आबा दियाबलसको हिसुना, कालाउ नेलाइको आबाको इस्सा पुरा पालि नेलाइको ता |संकल्प हि| उङ्को ते लाम्फासोङ से:का द्याङ पाघाहि, कालाउ सत्ये दोफा उङ्कोहेङ हाइदोङ वास्था मान्थ | हाइपालिदोनु इङ्कोता हाइदोङ सत्ये मान्थु| जेलाउ उङ्को धाताइका धुइखे, इङ्को ताइकोङ स्वभाव आन्सार धुइखे, हाइपालिदोनु उङ्को धाताइकादोङ कालाउ धाताइकाको आवादोङ | 45 का सत्ये धुइखा, कालाउ नेलाइ कासेहेङ खान्धुरि मापासुखेना | 46 नेलाइ मध्येसो हासु कासेहेङ पापसो दोसिलि लागाइलि दोवा-वा ? एदि का सत्ये धुइखा पानु, हाइ पालि नेलाइ का ह्रुसो खान्धुरि मापासुखेना ? 47 ज्याइ परमेस्वरको हि, वा परमेस्वरको बचन हिङ्खे | नेलाइ परमेस्वरको माको, ओदोङ भाअ्सिङ नेलाइ माहिङ्सुखेना |” 48 यहुदिगेलाइ वासेहेङ उतार पिहि , “हाइ केलाइको इदोइ दोअ्का भानाइ ठिकमाको, हाइ ना सामरिदोङ कालाउ नासेहेङ भुत धेल्का हि ?” 49 येसु: उतार पिहि, “ कासेहेङ भुत धेल्का मान्थु, कालाउ का ताइको आबाको इजोत ताअ्खा, कालाउ नेलाइ काङ्को अनादर पासुखेना | 50 कालाउ का ताइकोङ महिमा माभोखा, एमि हि ज्याइ महिमा भोखे कालाउ फाइसाला पाखे | 51 जातिङ्को भारि का नेलाहेङ दोअ्खा, एदि हासुबुङ काङ्को वचन पालन पाखेपानु उङ्को हेलाउबुङ सि:का माचाखायाङ |” 52 यहुदिगेलाइ वासेहेङ दोअ्हि, “ एला केलाइहेङ जाङ्तिको थाहा जेङ्हि, नासेहेङ भुत धेल्कादोङ हि | आब्राहाम सि:हि, अगम्बक्तागेलाइबुङ सि:हि, कालाङ ना दोअ्खेना, ' हासुदोङ काङ्को बचन माकिखे पानु उङ्को हेलाउबुङ सी:का चाखिलि मानिनाङ |' 53 हाइ केलाइको आजाइ- आजु आब्राहाम खाङ्तेङ ना माहान हिना ? वा सि:हि, कालाउ अगमबक्ता गेलाइबुङ सि:हि | ना चाहि ताइमिहेङ हासुको दोअतेङ दाबी पाखेना ?” 54 येसु: उत्तारा पिहि, “एदि का ताइकोङ महिमा पाखापानु काङ्को महिमा ब्यर्थौङ जेनावा | कासेहेङ महिमा पिका काङ्को आबा हि , ज्याइहेङ नेलाइ ' केलाइको परमेस्वर ' दोअ्सुखेना | 55 नेलाइ वासेहेङ नाल्का मान्थुसुन्हा, कालाउ का वासेङ नाल्खा |का वासेहेङ मानाल्खा दोअ्खा पानु का नेलाइ सरहङ धाताइका भायाङ्का |कालाउ का वासेहेङ नाल्खा, कालाउ वाको वचन मानिखा | 56 नेलाइको आजाइ-आजु आब्राहाम काङ्को दिना, खाङ्लि मन्तचाका हिघाहि, कालाउ उङ्को तिङ्हि कालाउ मेनाङ हाउसाहि |” 57 ओदोङ भाअ्सिङ यहुदिगेलाइ येसु:हेङ दोअ्हि, “ना आब्राहामहेङ तिङ्का हिना ? ना एलाबुङ न्हेकुरि बासार थुकाका मान्थुना | 58 येसु: उत्तारा पिहि, “का नासेहेङ जातिङ्को दोअ्खा | आब्राहामको जोलोम जेङ्का खाङ्तेङ का लाम्फासोङ हिघाखा | 59 जेलाउ इम्बालाइ वासेहेङ तोअ्लि दोअ्दोतेङ उन्थुइगेलाइ कुह्राइहि, | कालाउ येसु: म्होतेङ मुन्दिर बाहार ओलितेङ हानिहि |