युहन्ना 7

इङ्को न्हुसो येसु: गालिलताबुङ घुराइगिल्हि, कालाउ यहुदियाता हानिलि मनमापाहि, हाइपालिदोनु याहुदिगेलाइ वासेहेङ सेअ्लि दाउ भोघाहि | 2 एला याहुदिगेलाइको खोप्रा बासा हिका पार्बा लोलिताम्का हिघाहि | 3 ओदोङ भाअ्सिङ येसु: को ओनेगेलाइ वासेहेङ दोअ्हि, “इदोइ थामे लाअ्तेङ यहुदिया हाने, कालाउ नादोङ पातेङ हिका कामगेलाइ नाङ्को चात्येगेलाइबुङ तिनाको | 4 जेदोङ दयाङ् नावाइ तालिखाङखे, ओदोङ भाअ्सिङ म्होतेङ काम मापाखे | ना इदोइ कामगेलाइ पालि खाङ्ना पानु ताइमिहेङ सुमिङ्ता प्रकट पातेङ तिङ्पा |” 5 हाइपालिपानु वाको ओनेगेलाइबुङ वाहुता खान्धुरि मापागाहि | 6 येसु:इम्बालाइहेङ दोअ्हि,काङ्को''सहि समय एलाबुङ थेकापा लोका मान्थु,कालाउ नेलाइको भाअ्सिङ ते गोताङ समय ठिक हि | 7 सुमिङ नेलाइहेङ मारेम्का पालि मादाङ, कालाउ कासेहेङ्ते मारेम्का पाका हि , | हाइपालिपानु सुमिमिङ्को बिसयता वाको कामगेलाइ दुस्त हि दोअ्तेङ का गबाहि पिखा | 8 नेलाइ इदोइ पार्बाता हानिसु |का इदोइ पार्बाता मानान्हाङ्का हाइपालिदोनु काङ्को समय एलाबुङ थेकाकापा पुरा जेङ्का मान्थु |” 9 इम्बालाइहेङ एसा दोअ्तेङ वा गालिलताङ हि: | 10 कालाउ वाको ओनेगेलाइ पार्बाता हानिलिदोतेङ न्हुसो वाबुङ तिम्पा-तिम्पा माको, कालाउ सिकापा हानिहि | 11 पार्बाता यहुदिगेलाइ वासेहेङ भोतेङ हिकाहिघाहि, कालाउ वा हिसो हि ?” दोअ्तेङ मासोचिघाखे | 12 जेरगेलाइको माझाता वाको बिसयता काथा चारचारराइलि तेङ्हि | आदिमि दोअ्घाहि, “उङ्को एल्का हि |”भेनेङ दयाङ दोघाहि, “माको, यादोङ द्याङ्गेलाइहेङ आवाइ पातेङ ताका हि |” 13 कालाउ यहुदिगेलाइहेङ थितेङ वाको बिसयता हासुङ मन खोलितेङ काथा दोअ्लि मादोघाहि | 14 पार्बाको माझाता येसु:थानको सालिता दुल्लि, कालाउ सिक्स्या पिहि तेङ्हि | 15 यहुदिगेलाइ सक्क परितेङ एसा दोअ्हि, “ हिदोइबुङ मापढेसिङ वा, इदोइ काथा हेसा गिहि | इदोइ बिध्या हेसापातेङ निङ्हि ?” 16 कालाउ येसु: उत्तारा पितेङ ओबालाइहेङ दोअ्हि, “काङ्को सिक्स्या काङ्कोङ माको, कालाउ वाको, ज्याइ कासेहेङ दिङ्गिलहि | 17 एदि हिदोइबुङ दयाङ् परमेस्वरको इच्सा पालन पालि खाङ्खे पानु, काङ्को सिक्स्या परमेस्वरपाहासो हि, कि काङ्को ताइको पाहासो इदोइ वा ग्यावा | 18 ज्याइ ताइकोङ पाहासो धुइखे, वा ताइकोङ मान भोअ्खे, कालाउ ज्याइ ताइमिहेङ दिङ्गिल्काको मान भोअ्खे, उङ्को सत्त्ये हि ,कालाउ वाकोता सलकपट मान्थुखे | 19 हाइमोसा नेलाइहेङ व्यावस्था मापिहि | कालाउ नेलाइ हासुबुङ इङ्को व्यावस्था मा-मानिसुखेना| कालाउ नेलाइ हाइपालि कासेहेङ से:लि खाङ्सुखेना?” 20 द्याङ्को जेरसो जोबाफ पिहि, “नासेहेङ भुत धेल्का हि | हासु नासेहेङ से:लि भोअ्दोखे ?” 21 येसु: उत्तारा पितेङ इम्लाइहेङ दोअ्हि, “एनोङ काम का पाघा, कालाउ नेलाइ झाराङ इदोइता भारभुसाइसुखेना | 22 मोसा नेलाइहेङ खतनाको मुन्धुम पिका हि ( हुनुते ,इङ्को मोसाको तर्फसोते माको कालाउ ते आबा-आजुगेलाइसो लोका ) कालाउबुङ माइसाचाका दिनाता नेलाइ द्याङ्गेलाइहेङ खाताना पिसुखेना | 23 मोसाको वयवस्था भङ्ग माज्याको दोअ्तेङ एदि हिदोइबुङ द्याङ माइसाचाका दिनाता खतना पाहे पानु, का एमि द्याङ्हेङ माइसाचाका दिनाता पुराङ एल्पापिघा दोअ्तेङ हाइ नेलाइ काङ्दोफा चेरफेसुखेना ? 24 ह्राइ खाङ्तेङ खिनीङ माको, कालाउ ठिकसो निसाप पा |” 25 यरुसेलेमको आधिमि द्याङ्गेलाइ दोअ्हि, “ हाइ या वाआङ माको, ज्याइहेङ इम्बालाइ सेअ्लि खाङ्खे (भोखे) ? 26 खाङ, याते झाराङ्को अगाउरि (आगाता) भाइ- भाइपा नुइधुइदोङ्खे, कालाउ इम्बालाइ वासेहेङ हाइदोङ मादोअ्खे ! हाइ या ख्रिस्टदोङ दोअ्का धर्मगुरुगेलाइ जातिङ्को थाहा गिहि ? 27 कालाउ केलाइ गिनाखे, इदोइ द्याङ हिसोसो लोका | कालाउ जेलाउ ख्रिस्ट देखाल जेङ्नाङ, वा हिसोको हिका, हासुबुङ चाल मानिनाङ |” 28 जेलाउ येसु: थानसाता (मन्दिर घर) धिर्पालाउ, वा बार्का गालाहोइ दोअ्हि, “ नेलाइ कासेहेङ नाल्सुखेना, कालाउ का हितासो लोका हिगा, उङ्कोबुङ गिसुखेना| का ताइको इच्सासो लोका माको, कालाउ ज्याइ कासेहेङ दिङ्गिल्हि वा सत्ये हि | नेलाइ वासेहेङ मानाल्सुखेना, 29 कालाउ का वासेहेङ नाल्खा, हाइपालिदोनु का वाकोसो लोका हिगा, कालाउ वा कासेहेङ दिङ्गिल्का हि |” 30 ओदोङ भाअ्सिङ इम्बालाइ वासेहेङ रिम्लि भोहि, कालाउ हासुबुङ वाको ह्रुसो खुरमालागाइहि, हाइपालिदोनु वाको दिना एलाठेकाबुङ लोका मान्थुघाहि | 31 कालाउ हेन्जा द्याङ्गेलाइको जेरसो वा हुता खान्धुरि पाहि | इम्बालाइ दोअ्हि, “ जेलाउ ख्रीस्ट ल्वाङ , कालाउ हाइ याको पाका चिन्हगेलाइ खान्तेङ हेन्जा चिन्ह हाइ वा पावा रो?” 32 द्याङ्को जेर वाको बिसयता नावाइ चार-चराइका फारिसिगेलाइ हिङ्हि |कालाउ बारका मुख्य धामि गेलाइ कालाउ फारिसिगेलाइ वासेहेङ रिम्लि थान ह्रुम्का द्याङ्हेङ दिङ्गिल्हि | 33 येसु: दोअ्हि, “ आले दिना थेकापा का नेलाइदोफा हिगा, कालाउ न्हुसो का कासेहेङ दिङ्गिल्का दोफा हानाङ्का | 34 नेलाइ कासेहेङ भोअ्स्वाना , कालाउ मानिङ्स्वाना ,कालाउ जेता का हिखा, नेलाइ इन्ता लोलि मादोस्वाना |” 35 कालाउ याहुदिगेलाइ ता-तामिता दोअ्हि, “वा हिसो हानिलि तोम्हि हि, कालाउ केलाइ वासेहेङ मादोसुवाङ ? हाइ या ग्रिकगेलाइको माझाता जेसो-ओसोङ हितेङ हिका याहुदिगेलाइ दोफा हानितेङ ग्रिकगेलाइहेङ सिक्स्या पिलि खाङ्खे ? 36 याको दोअ्का इदोइ वचन हाइ ? नेलाइ कासेहेङ भोअ्स्वाना, कालाउ मानिङ्स्वाना , कालाउ का जेता ह्याङ्का, नेलाइ इनता लोलि मादोस्वाना ?” 37 एला पार्बाको न्हुदिना, एनसाङ पार्बाको प्रमुख दिनात़ा, जाअ्तेङ येसु: बारकागालासो एसा दोअ्हि, “एदि हासुबुङ चिआम्लि किहेपानु उङ्को काङ्कोता ल्वाको कालाउ लोतेङ आअ्माको | 38 ज्याइ का ह्रुसो खान्धुरि पाखे, धर्मसासतर दोअ्का कोनिङ उङ्को लितासो मुर्का सिन्हुका जिवनको चिको झोरागलाइ झोतेङ्उल्लियावा |” 39 कालाउ इदोइ काथा वा पबित्तरो आत्माको बिसयता दोअ्का हिघाहि, जेदोङ पबित्तरो आत्मा वाको ह्रुसो खान्धुरि पाकालाइ निङ्लि तोम्का हिघाहि |हाइपालिपानु पबित्तरो आत्मा एला थिकापा पिका मान्थुघाहि, हाइपालिदोनु येसु:को महिमा एन्सालाउ ठिकापा जेङ्का मान्थुघाहि | 40 इदोइ काथा हिङ्का आधिमि-आधिमि द्याङ्गेलाइ दोअ्हि, “ याते जातिङ्को अगम्बक्तादोङ जेङ |” 41 भेनेङ द्याङ्गेलाइ दोअ्हि, “ या ख्रिस्ट दोङ |”कालाउ कोइ-कोइ दोअ्हि, “ हाइ ख्रिस्ट गालिलसो ल्वाङ रो ? 42 हाइ धर्मसास्तरता दोअ्का मान्थु, हाइ ख्रिस्ट दाउदको हारागुटियासो कालाउ दाउदकोङ देरा बेथालेहेम सो ल्वाङ ?” 43 ओदोङ भाअ्सिङ द्याङ्गेलाइको माझाता वाको करनसो खेङ्नाहि | 44 इम्बालाइमध्येसो हेथे द्याङ्गेलाइते वासेहेङ रिम्लि भोहि,कालाउबुङ वासेहेङ हासुबुङ वाको हुता खुरलागाइलि मादोहि | 45 कालाउ मुन्दिरको ह्रुम्का पालेगेलाइ बारका धामिगेलाइ कालाउ फारिसिगेलाइकोता ल्होहि |ओबालाइ | इम्बालाइङ दोअ्हि, “ नेलाइ उङ्कोहेङ हाइपालि माचुमासुन्हा ?” 46 ह्रुम्का पालेगेलाइ उत्तरा पिहि, “ इदोइ द्याङ् भाइपाते हिदोइबुङ द्याङ् हेलाउबुङ माधुइहि !” 47 फारिसिगेलाइ इम्लाइहेङ दोअ्हि, “नेलाइबुङ केउसुना कि हेसा ? 48 हाइ धर्मगुरु , कालाउ फारिसिगेलाइ मध्येसो हासुबुङ वा ह्रुसो खान्धुरि पाका हि ? 49 कालाउ इदोइ जेर ज्याइ व्यवस्था मागिखे, उङ्को स्रापित हि |” 50 इम्बालाइमध्येसो एमि निकोदेमस, ज्याइ लाम्फा एखे येसु:कोता लोका हिघाहि, उङ्को दोअ्हि, 51 “हाइ केलाइको व्यवस्था लाङ द्याङ्को हिङ्पाका माजेङ्सिङ, कालाउ उङ्को हाइ पाकाहि ओदोङ मागिसिङ उङ्कोहेङ दोसिलि थाराइखे रो ?” 52 इम्बालाइ वासेसेङ उत्तारा पिहि, “हाइ नाबुङ गालिलको दोङ ? धर्मसास्तर भोतेङ खाङ्सु, कालाउ ना तिनाना, कि गालिलसो आगमबक्ता माओल्ह्याङ ?” 53 कालाउ झाराङ द्याङ ता-ताइको सिता हानिहि|