युहन्ना 6

इदोइ काथा न्हुसो येसु: गालिल, माकुनु तिबेरियास समुन्द्रको ओदोइ पार हानिहि | 2 कालाउ एनोङ बारका जेर वाको न्हु-न्हु हानिलि तेङ्हि, हाइपालिदोनु वा मासाधेगेलाकाइहेङ एल्पाका इम्बालाइ चिना तिङ्का हिघाहि | 3 येसु: तिकार हुता ताङ्हि, कालाउ वाको चत्यागेलाइदोफा इन्ता हि: | 4 यहुदिगेलाइको निस्तार-पार्बा भेरपाङ लोका हिघाहि | 5 कालाउ येसु:ताइको कोरपाङ खाङ्लाउ एनोङ बार्का जेर ताइको भारि लोका तिङ्तेङ फिलिपहेङ दोअ्हि, “इम्बाइहेङ चापालिको भाअ्सि केलाइ हेतासो सेले चोल्लि ?” 6 वा उङ्कोहेङ जाचिलिको भाअ्सिङ इदोइ काथा दोकाहिघाहि, हाइपालिदोनु वा जेदोङ पालि तोम्का हिघाहि ,वा इदोइ गिका हिघाहि | 7 फिलिप वासेहेङ उत्तारा पिहि, “झाराङ्हेङ आतु-आतुइसा निङ्लाबुङ न्हेसाइ चान्दिको ताकाको सेले इम्बालाइहेङ माथेमाङ |” 8 वाको चत्यागेलाइसो एमि, सिमोन पतरुसको ओने अन्द्रियास दोअ्हि, 9 “इता एनोङ वाजान हि, वाकोदोफा जौको नालोङ सेलि कालाउ न्हेलोङ हाया हि| कालाउबुङ इदोइ झोको हेन्जाङ्को भाङ्सि इदोइ झोका हाइथेमावा रो ?” 10 येसु: दोअ्हि, “ द्याङ्गेलाइहेङ योम्पासु |”इन्ता हेन्जाङ घासिहिका चउर हिघाहि |कालाउ ना हाजार झोको वाबाल द्याङ्गेलाइ इन्ता योम्हि | 11 कालाउ येसु: सेले चुम्तेङ, परमेस्वरहेङ, धन्याबाद पितेङ योम्कालाइहेङ बाख्राइ पिहि, कालाउ इन्साङ पातेङ हायाबुङ बाख्राइ पिहि |इम्बालाइ गोइका झोको चाहि | 12 कालाउ जेलाउ इम्बालाइ हिमु भेल्पाङ चाहि, वा ताइको चत्यागेलाइहेङ दोअ्हि, “दाइका दुइका पोङ्नाकागेलाइ जोम्पासु, कालाउ हाइदोङ मानासाताको |” 13 चाकासो दाइका जौको इङ्को नालोङ् सेलेको पोन्हाकागेलाइ इम्बालाइ जोम्पालाउ तेन्हे डालो जेङ्हि | 14 ओदोङ भाअ्सि वा पालिदोका इदोइ चिना तिङ्तेङ उङ्को दयाङ्गेलाइ दोअ्हि, “सुमिङ्ता लोका अगम्बक्ता साचिकोङ वाआदोङ जेङ | 15 इम्बालाइ लोतेङ वासेहेङ हेसापालाबुङ चुम्पुतेङ राजा बानाइलि खाङ्खे दोअ्का काथा गितेङ येसु: आरोङ एक लाङ तिकार्ता हानिहि | 16 बेला हानिका पहर वाको चात्यागेलाइ समुन्द्र भारि हानिहि | 17 कालाउ नाउता धोल्तेङ इम्बालाइ समुन्द्र ओदोइपार कर्फनहुम भारि हानिलि तोम्हि | ओदोङ्बेला माचेल-मुचुलचिल्लि दोका हिघाहि, | कालाउ येसु: उदोङ पहर थिकापा इम्बालाइकोता थुकालि लोका मानथुघाहि | 18 कालाउ बार्का डुमभेर्पा दलाइन्हाका हिघाहि , समुन्द्रको साल उल्लाउल्ला हि | 19 ना-तु किलोमिटर झोको नाउ हियाइतेङ हानिका न्हुसो इम्बालाइ येसु:हेङ समुन्द्र ह्रुता-ह्रुता तेतेङ भेर्पाङ लोकातिङ्तेङ, इम्बालाइ थिहि | 20 कालाउ वा इम्बालाइहेङ दोअ्हि, “कादोङ ,माथिसु |” 21 इम्बालाइ वासेहेङ नाउता ताङ्लि दोअ्हि,कालाउ ओदोइ घरिङ्ताङ ओबालाइको हानिका थामेता नाउ थुकाल्हाहि | 22 समुन्द्र ओदइपार हिअ्का जेर न्हुदिना इन्ता एनोङ खीनिङ नाउ तिङ्हि | इम्बालाइ गिका हिघाहि, हाइ येसु:ताइको चत्येगेलाइदोफा नाउता धोल्का मान्थुघाहि, कालाउ वाको चात्यागेलाइ खीनिङ हानिका हिघाहि | 23 कालाउ तेबेरियासो आरोङ नाउगेलाइ इङ्को थामेको भेर्पा लोहि, जेता प्रभु धन्यबाद पितेङ कालाउ न्हुसो , इम्बालाइ सेलेकाचाका हिघाहि | 24 येसु: कालाउ वाको चत्येगेलाइ इन्ता मान्थुका तिङ्तेङ द्याङ्गेलाइ येसु:हेङ भोलि नाउता धोल्तेङ कफर्नुहुम भारि हानिहि | 25 इम्बालाइ वासेहेङ सुमुन्द्र ओदोइपार दुसुतेङ वासेसेङ हिअ्हि, “रबि, ना इता हेलाउ लोन्हा ?” 26 येसु: इम्बालाइहेङ उत्तारा पितेङ दोअ्हि, “जातिङ को का नेलाइहेङ दोअ्खा, नेलाइ चिन्हगेलाइ तिङ्तेङ माको, कालाउ घाइपाङ सेले चानाङ कासेहेङ भोसुखेना | 27 नासाका जेङ्का चाका आनेमानेको भाअ्सिङ मेहेमत मापासु, भरू अनन्त जिन थिकापा हिका चालि-आम्लिको भाअ्सिङ मेहेमतपासु, ज्याइ द्याङ्को चान नेलाहेङ प्याङ |हाइपालिदोनु परमेस्व आबादोङ वाको हुता ताइकोसाप लगाइपिका हि |” 28 इम्बालाइ “वासेहेङ दोअ्हि, “ परमेस्वरको चिताइका काम पालिको भाअ्सिङ केलाइ हाइपालि गोयाङ ? 29 येसु: इम्बालाइहेङ दोअ्हि, “ परमेस्वरको काम इदोइदोङ, ज्याइहेङ वा दिङ्गिल्हि वासेहेङ खान्धुरि पासु |” 30 ओदोङ भाअ्सिङ इम्बालाइ वासेहेङ दोअ्हि, “ ना हाइ चिन्ह तिन्पाना अदोइ केलाइ खानाङ, कालाउ नासेहेङ खान्धुरि पाङ ? नाहाइ पाखेना ? 31 आबा -आजुगेलाइ मारालाका थामेता मन्ना चाहि, इङ्को धर्मसास्तरता लेखिका हि, “ परमेस्वर स्वर्गासो सेलि चालि पिहि |” 32 येसु: इम्बालाइहेङ दोअ्हि, “ जातिङ्भारि, का नेलाइहेङ दोअ्खा, नेलाहेङ स्वर्गसो सेलि पिहि मोसा माको, कालाउ स्वर्गसो नेलाहेङ जातिकोङ सेले पिका काङ्को आबाहिकाहि | 33 हाइपालिदोनु परमेस्वरको सेले इङ्कोदोङ हि ज्याइ स्वर्गसो खुतेङ्लोका, कालाउ सुमिमिङ्हेङ जिवन पिखे |” 34 इम्बाइलाइ वासेहेङ दोअ्हि, “ प्रभु, इदोइ सेले केलाहेङ दिनाङ पि |” 35 येसु: इम्लाइहेङ दोअ्हि, “जिवनको सेले कादोङ, काङ्कोता लोकालाइ हासुबुङ माम्हितुताङ, कालाउ कासेहेङ खन्धुरि पाकालाइ हिदिकालबुङ चिआल्लि माकिताङ | 36 कालाउ का इम्लाइहेङ दोअ्काङ हिघा, नेलाइ कासेहेङ तिङ्का हिसुना, कालाउबुङ खन्धुरि मापासुखेना | 37 आबा कासेहेङ पिकागेलाइ झाराङ काङ्कोता ल्वाङ,कालाउ काङ्कोता लोकालाइहेङ का हिदोइबुङ रीतसो मालाताङ्का | 38 ताइको इच्सा पुरा पालि का स्वर्गसो खुतेङ लोका माको, कालाउ कासेहेङ दिङ्गिल्काको इच्सा पुरा पालिको भाअ्सिङ लोका का | 39 कालाउ कासेहेङ दिङ्गिल्काको इच्सा इदोइदोङ, हि कि कासेहेङ पिकागेलाइमध्ये हासुहेङ्बुङ का माअ्लाताङ्का, कालाउ इम्बालाइहेङ न्हुसोको दिनाता अनन्त जिवनता सिन्हुपाङ्का | 40 हाइपालिपानु काङ्को आबाको इच्सा इदोइदोङ हि कि, चानहेङ खाङ्लि कालाउ वाको हुता खान्धुरिपाका झाराङ अन्नत जिवन निनाको, कालाउ का उङ्काहेङ न्हुसोको दिनाता सिन्हुपाङ्का |” 41 यहुदिगेलाइ वाको बिरोधाता गुनगुनाइलि तेङ्हि, हाइपालिदोनु वा दोअ्हि, “स्वार्गसो खुतेङ्लोका सेले काआङ्दोङ |” 42 इम्बालाइ दोअ्हि, “हाइ या योसेफको चान,येसु: माको ? याको आबा कालाउ आमाइ केलाइ मानाल्न्हाखे रो ? एला या हेसा 'का स्वार्गसो काआङ खुअ्तेङ लोका ' दोअ्तेङ दोअ्खे ?” 43 येसु:दोङ इम्बालाइहेङ उतारा पिहि,''नेलाइ ताइकोता मा गनगनाइ हि | 44 कासेहेङ दिङ्गिल्का आबा मातान्हेये पानु हासुबुङ काङ्कोता लोलि मादाङ, कालाउ का उङ्कोहेङ न्हुसोको दिनाता(अन्त्ये) सिन्हुपाङ्का | 45 कालाउ यिङ्को झाराङ्हेङ परमेस्वरपाहासो धिर्पाङ' दोअ्तेङ अगमबक्त्तागेलाइको किताबता लिखिका हि | झाराङ ज्याइ आबासो हिङ्खे कालाउ धिर्खे उङ्को काङ्कोता लोखे | 46 आबाहेङ हिदोइबुङ द्याङ् तिङ्का मान्थु, कालाउ वा खिनीङ तिङ्का हि, ज्याइ परमेस्वरसो लोका हि, वादोङ आबाहेङ तिङ्का हि | 47 जातिङ्भारि का नेलाहेङ दोअ्खा, ज्याइ खान्धुरि पाखे वाको दोअ्फा अनन्त जिवन हि | 48 का जिवनको सेले | 49 नेलाइको आजु-आबागेलाइ मारालाका थामेता मन्ना चाहि कालाबुङ इम्बालाइ सितेङ हानिहि | 50 स्वार्गसो खुअ्तेङ लोका सेले इदोइदोङ हि, ज्याइ इदोइ चाखे उङ्को मास्याङ | 51 स्वार्गसो खुअ्तेङ लोका सिन्हुका सेले काआङ्दोङ | हासुबुङ इदोइ सेले चाहेपानु उङ्को हेलालाउबुङ बान्च्याङ | कालाउ जेदोङ सेले का सुमिङ्ता जिवनको भाअ्सिङ प्याङ्का, उङ्को चाहि काङ्को जिउ |” 52 कालाउ यहुदिगेलाइ ता-ताइमिता दोअ्सुलि तेङ्हि, “इदोइ द्याङ हेसा केलाहेङ ताइको जिउ चालि पिलि द्वाङ ?” 53 येसु: इम्बाइहेङ दोअ्हि, “ जातिङ्भारि , का नेलाइहेङ दोअ्खा, नेलाइ द्याङ्को चानको जिउ माचासुन्हा पानु ,कालाउ वाको हिति माआम्सुना पानु,नेलाइता जिवन मान्ठुवाङ | 54 काङ्को जिउ चाका कालाउ काङ्को हिति आम्कालाइदोफा अनन्त जिवन हि, कालाउ न्हुसोको (अन्त्ये) दिनाता का उङ्कोहेङ सिन्हुपाङ्का | 55 हाइपालिदोनु काङ्को जिउ (देह) जातिकोङ चाका आमनेदोङ, कालाउ काङ्को हिति जातिको आम्का आमेनेदोङ | 56 काङ्को जिउ चाका, कालाउ काङ्को हिति आम्काचाहि काङ्कोता हिखे, कालाउ का वाकोता ह्याङ्का | 57 जेसाङ कि सिन्हुका आबा कासेहेङ् दिङ्गिल्हि, कालाउ का आबाको कारनसो बान्चिखा, इन्सापातेङ कासेहेङ् चाकाबुङ काङ्को कारनसो बान्चियावा | 58 स्वार्गसो लोका इदोइ सेले इन्सिका माको, जेदोङ आबा-आजुगेलाइ चाहि कालाउबुङ सि:तेङ हानिहि | इदोइ सेले चाका चाहि जेलाउबुङ बानचितेङ ह्याङ |” 59 वा इदोइ काथा कर्फनहुमको चाउघारा साता सिक्स्या पिकाताङ दोअ्हि | 60 इदोइ हिङ्तेङ न्हुसो वाको चत्यागेलाइ मध्येसो हेन्जाङ दोअ्हि,इदोइ वचन थाङ्का हि, हासु इदोइ हिङ्लि द्वाङ रो ?” 61 कालाउ वाको चत्यागेलाइ इदोइ विसयता गुनगुनाइतेङ हि दोअ्तेङ गिअ्तेङ येसु: इम्बालाइहेङ दोअ्हि, “ हाइ इदोइ काथा नेलाइको भाअ्सिङ थाङ्का कारन जेङ्तेङ हि ? 62 नेलाइ दयाङ्को चानहेङ जेतावा लाम्फा हिघाहि इन्ता ताङ्का -ताङ्पाका तिङ्सुना दोअ्का ना हिसा ? 63 कालाउ न्हुसो वाको चत्यागेलाइ हेन्साङ(हेन्जाङ) खेङ्नाहि कालाउ वाको दोफा पाकपिलि लाहि | 64 कालाउ नेलाइसो हेथे हि, ज्याइ खान्धुरि मापाखे |” हाइपालिपानु खान्धुरि मापाकालाइ हासु-हासु जेङ, कालाउ वासेहेङ दोका पिका हासु ज्याङ धोअ्तेङ येसु:हेङ लाम्फासोङ गिका हिघाहि | 65 कालाउ वा दोअ्हि, “अदोङ भाअ्सिङ का नेलाहेङ दोअ्का-हिघा, एदि आबासो पिका माम्थुनु हासुबुङ द्याङ काङ्कोता लोलि मादोधाङ |” 66 कालाउ न्हुसो वाको चत्यागेलाइ हेन्साङ(हेन्जाङ) खेङ्नाहि कालाउ वाको दोफा पाकपिलि लाहि | 67 येसु: तेन्हे झनाहेङ दोअ्हि, “हाइ नेलाइबुङ कसेहेङ लाअ्तेङ (सिधेतेङ) हानिस्वाना ?” 68 सिमन पतरुस जोबाफ पिहि, हे प्रभु केलाइ हासुकोता हानिली, ? नादोफा अनन्त जिवको वचन हि , 69 कालाउ केलाइ खन्धुरिपाका हिनाहि कालाउ गिका हिनाहि, न परमेस्वरको पबित्तरो जन हिना |” 70 येसु: इम्बालाहेङ जोबाफ पिहि, “हाइ का तामिङ नेलाहेङ तेन्हे झनाहेङ सालका माको रो? कालाउ ? नेलाइ मध्येको एमि चाहि दियाबलस |” 71 इदोइ वा सिमोन इस्करियोतको चान यहुदाको बिसयता दोअ्का हिघाहि, हाइदोनु तेन्हेसो एमि जेङ्लाबुङ उङ्कोदोङ वासेहेङ दोखा पिलि तोम्का हिघाहि |