युहन्ना 3

फारिसिगेलाइ मध्येसो निकोदेमस मिङ पाका एमि द्याङ हिघाहि | उङ्को यहुदिगेलाइको माहासभाउको (चाउरासि) एलोङ सदस्य हिघाहि | 2 वा न्हिसिङ्ता येसु:कोता लोहि कालाउ वासेङ दोअ्हि, “गुरु जि, केलाइ गिनाखे नादोङ पाक्का परमेस्वरसो लोका एलोङ सिकस्यक हिना | हाइपालिपानु परमेस्वर दोफा मानथुहेपानु ना पाका इदोइ चिनागेलाइ हासुबुङ पालिमादङ |” 3 येसु: उङ्कोहेङ उत्तारा पिहि, “जातिङ्को का नासेहेङ दोअ्खा, हासुबुङ नावाजेन्तेङ जोलोम माजेङ्नु वा परमेस्वरको सारभि तिङ्लिमादाङ |” 4 निकोदेमस वासेङ दोअ्हि, “द्याङ बुह्रातेङ हेसा जोलोम जेङ्लि द्वाङ कालाउ ? हाइ उङ्को ताइको आमाइको हामुता दुल्तेङ आरोङ न्हेपल्ति जोलोम जेङ्लि द्वाङ ?” 5 येसु: उत्तारा पिहि, “जातिङ्को का नासेहेङ दोअ्खा, हासुबुङ चि कालाउ आत्मासो जोलोम माजेङ्नु परमेस्वरको सार्भिता दुल्लि मादाङ | 6 जिउसो जोजोम जेङ्का जिउदोङ, कालाउ पबित्तरो आत्मासो जोलोम जेङ्का आत्मादोङ | 7 का नासेहेङ नावाजेङ्तेङ जल्मिलि गोयाङ दोअ्काता माआवाइ | 8 भेर्मा जिसो मन्ताचाखे ओसोङ दोलाइखे | ना भेर्माको गाला हिङ्खेना,कालाउ इङको हिसोलोखे कालाउ हिसो हानेखे,उङ्को मागिस्वाना |आत्मासो जोलोम जेङ्का गोताङ द्याङ इन्सिकाङ जेङ्खे |” 9 निकोदेमस वासेहेङ हि:हि, “या हेसा ज्याङ कुनु ?” 10 येसु: उन्कोहेङ उत्तारा पिहि, “ना इस्राएलको गुरु, कालाउबुङ इदोइ काथा माबुझिखेना ?” 11 जातिङ्को,का नासेहेङ दोअ्खा,केलाइ जेदोङ गिनाखे इङ्कोङ दोअ्नाखे, कालाउ केलाइ जेदोङ तिङ्का हिनाहि उन्कोकोङ गवाइ पिन्हाखे, कालाउ नेलाइ केलाइको गवाहि माकिसुस्वाना |सुइकार मापास्वाना 12 का नेलाइहेङ पृथ्बीको काथा दोअ्घा, कालाउबुङ नेलाइ खानधुरि मापासुखेना, कालाउ नेलाइहेङ स्वर्ग को काथा दोअ्काता हेसापा खानधुरी पासुवाना ? 13 स्वार्ग खुअ्तेङ लोका द्याङ्को चानसो आरोङ हासुबुङ स्वार्गता हानिलि दोअ्का मान्थु | 14 जेसाङ मोसादोङ मारालाका थामेता पुह्याहेङ तोल्हि ,इङ्साङ्दोङ द्याङ्को चान तोल्हिन्हालि गोयाङ, 15 कालाउ ज्याइ-ज्याइदोङ वासेहेङ खान्धुरिपाखे, वादोङ अनन्त जिवन निङ्खे | 16 “हाइपालिपानु परमेस्वर सुमिङ्हेङ इस्का मायारु पाहि, कालाउ वादोङ ताइको एनोङ खिनिङ चानपिहि, वासेङ खान्धुरिपाका हासुबुङ नास माज्याको, कालाउ वादोङ अनन्त जिवन निनाको | 17 हाइपालिदोनु परमेस्वर सुमिङ्हेङ दुसिलि दोअ्तेङ चानहेङ सुमिङ्ता मादिङ्गिल्हि भरु सुमिङ वाकोसो बान्च्याको दोअ्तेङ दिङगिल्हि | 18 ज्याइ वाको हुसो खान्धुरिपाखे वा दुसि माजेङ्खे, कालाउ ज्याइ खान्धुरिमापाकाचाहि लाम्फाङ दुसि जेङ्का हि | हाइपालिदोनु वा परमेस्वरको एलोङ खीनिङ चानको मिङ्ता खान्धुरिपाका मान्थु | 19 न्याय निसाप चाहि इदोइदोङ :थास्साइका(ज्याति) सुमीङ्ता लोका हि कालाउ द्याङ गेलाइ थास्साइका खाङ्तेङ भरू कितिकितिका रेमनाङ गिखे, हाइपालिपानु इम्बालाइको काम दुष्ट हिघा, 20 हाइपालिदोनु दुस्त काम पाकालाइ झाराङ थास्साइका(फाइसालामका) मन्दामाताखे, कालाउ थास्साइकाता मालोखे, माकोनुते वाको काम प्रकट जेङ्धावा | 21 सत्येसो हिका द्याङ थास्साइका लोखे, कालाउ एसापा वा पाका कामगेलाइ परमेस्वरता पाका हि दोअ्का कामगेलाइ तिङ्खे |” 22 कालाउ न्हुसो येसु: कालाउ वाको चात्यागेलाइ यहुदिया सारभिता हानिहि , कालाउ इन्ता इम्बालाइदोफा कोम्हा दिना थेकापा बासाहि, कालाउ बप्तिस्ता पिहि | 23 यु:हान्नाबुङ सालिमको भेर्पा एनोनता बप्तिस्ता पिघाहि, हाइपलिपानु इन्ता हेन्जा चि हिघाहि | इन्ता द्याङ्गेलाइ लोघाखे कालाउ बप्तिस्ता ह्रुघाहि | 24 ओदोङ बेला थिकापा यु:हान्ना झ्यालखाता दुल्का मान्थुघाहि | 25 कोकोङ बेला यु:हान्नाको चात्यागेलाइको एमि यहुदिदोफा सुदिकरको बिसयता काथा-चेरसुहि | 26 यु:हान्नाकोता लोतेङ एम्बालाइ वासेहेङ दोअ्हि, “गुरु ज्य्,यर्दनको ओदोइपार ज्याइ नाङ्कोदोफा हिघाहि, ज्याइको भाअ्सिङ ना गवाइ पिन्हा , खाङ्सु, वा बप्तिस्ता पिदोङ्खे ,कालाउ झाराङ वाकोता हानिदोङ्खे |” 27 यु:हान्ना उत्तार पिहि, “द्याङ्गेलाइहेङ स्वार्गसो मापिका भरि उङ्को हाइदोङ काथा निङ्लि मादावा | 28 का ख्रिस्ट माको, कालाउ का वा खाङ्तेङ लाम्फा दिङ्गिल्का दोअ्नु काङ्को गवाहि नेलाइ ताइमिङ पिस्वाना | 29 ज्याइदोफा दरवाइनि (बेहुलि) हि, दरूवा (बेहुला) इङ्कोदोङ |दरुवाको लोकोन्दि ज्याइ वाको भेर्पा जातेङ हिखे, वाको गाला हिङ्तेङ मेनाङ लङ्चावा |अदोङ भाअ्सिङ काङ्को इदोइ एल्का दिना एला पुरा जेङ्का हि | 30 वा बारालि, कलाउ का म्हुइलि गोइका हि | 31 “ह्रुतासो लोका झाराङ खाङ्तेङ बार्का हि | पृथ्वीसो हिका पृथ्वीकोङ्दोङ कालाउ पृथ्वीकोङ काथा दोअ्खे |स्वर्गसो लोका झाराङ खाङ्तेङ बार्का हि | 32 वा जेदोङ तिङ्का कालाउ हिङ्का हि, इङ्को गवाहि वा पिखे कालाउ वाको गवाहि हासुदोङ माह्रुखे | 33 ज्याइ वाको गवाहि ह्रुकाहि, वादोङ परमेस्वर सत्ये हि,दोअ्का काथाको प्रमान पिखे | 34 हाइपालिदोनु ज्याइहेङ परमेस्वर दिङ्गिल्हि, इङ्कोदोङ परमेस्वरको बचन दोअ्खे, हाइपालिपानु परमेस्वर मादोङ्सिङ (माजोखेसिङ) पबित्तरो आत्मा प्याङ | 35 आबा चानहेङ मायारु पाखे, कालाउ गोतेङ आने-माने वाकोङ खुर्ता पिका हि | 36 ज्याइ चान ह्रुसो खान्धुरिपाखे वाको दोफा अनन्त जिवन हि | ज्याइ चानको आग्या माकिखे जिवन मातिनाङ, कालाउ परमेस्वरको चेर्र (क्रोध )वाको ह्रुता हितेङ ह्याङ |