यहूदा क हाथा माण्ढेड़ो कागद
परिचय
ई कागद को नांऊ उन्अ माण्ढबाळा यहूदा का नांऊ सुं छ। यहूदो खुदन्अ याकूब को भाई खेव्अ छ, ज्यो ईसु मसी को भाई छो। जिसुं वो बी ईसु का भाया मं सुं एक मान्यो जार्यो छ (1)। ई कागद को मकसद एक खास बस्वास्या की टोळी बेई ज्यो पराणा नियम की छी, अर यहूदा का कागद न्अ बाचबाळा यहूदी बी हो सक्अ छ, ई बात को पक्को तोल कोन्अ। जस्यान, वे वांका कागदा म माण्ढ्अ छा, “वे सबळा ज्यो बलाया गिया छ, ज्यो सबळा पिता परमेसर का प्यारा छ अर ईसु मसी मं सुरक्षित छ” (1)। यो कागद मसी का जनम क पाछ्अ अन्दाजन 60 ई. क आस-पास माण्ढ्यो गियो छ। यो कागद माण्ढबा को मतलब छो क सबळा ईसायां न्अ झूंटा सखाबाळा सुं चताबो छो ज्यो वांकी सक्ष्या सुं भटकाव्अ छा (4)। वे पराणा नियम की बाता अर घटना सुं वाकी बाता न्अ पक्की करअ छ। झूंटा सखाबाळा बेई चेतावणी देता होया पतरस का दूसरा कागद मं बी घणी बाता बताया छ (यहूदा 4, 2 पतरस 2:1)। अस्यान'ई सरगदूत बेई अर सदोम अर अमोरा बेई बी बताव्अ छ।
रूप-रेखा
1 यहूदा को पेली बाचबाळा न्अ सम्बोधन 1–2
2 उंक्अ पाछ्अ झूंटा सखाबाळा सुं चेताबा आग्अ माण्ढबा की कारण देव्अ छ 3–4
3 उंक्अ पाछ्अ वो पराणा नियम का लोगबागा अर वांकी बाता का उदारण देव्अ छ 5–16
4 फेर वो वान्अ चताव्अ छ क वान्अ कांई करणी चायजे 17–23
5 आखरी मं वो परमेसर की महमा कर कागद न्अ बन्द करअ छ 24–25